Jiekob Did Get Evriting We Iisaa Wuda Get

Aizak did a 40 wen im marid Ribeka, an im did lov ar bad. Kopl ier wel afta dat, dem av tuu bwai pikni we a twin.

Di wan we baan fos did niem Iisaa an di neda wan did niem Jiekob. Iisaa did lov fi de outa duor. An fi’im ting a did fi kech animal fi yuuz dem fi fuud an so. Bot Jiekob did laik fi tan a im yaad.

Iina dem taim de, a di faada fos bwai pikni wuda get muos a im moni an lan wen im ded. Iina Aizak fambili, paat a di sitn we im fos bwai pikni wuda get a wa Jeuova did pramis Iebriyam se im wuda du. Bot Iisaa neehn bizniz bout dat, bot fi Jiekob dat a did wan big ting.

Wan taim Iisaa did a chrai kech animal fi di wol die an im kom uom taiyad. Im sumel som nais fuud we Jiekob did a kuk an se: ‘Mi onggri laik daag! Beg yu som a da fuud de we yu a kuk!’ So Jiekob se tu im se: ‘Mi wi gi yu som a di fuud, bot bifuo mi gi yu, pramis mi se yu a-go gi mi di sitn dem we yu a-go get wen dadi ded.’ Iisaa se: ‘Mi no bizniz bout dem sitn de! Yu kyan tek dem. Mi jos waahn som fuud fi nyam.’ Yu tingk wa Iisaa did du mek sens? Nuo sa! Kaa, di pliet a fuud we Iisaa did get neehn wot notn wen yu tingk bout wa im wuda get fram im faada.

Wen Aizak did wel uol, a did taim fi im bles im fos bwai pikni. Bot Ribeka did elp Jiekob fi get di blesn, iivn duo im a di yongga wan. Wen Iisaa ier, im did beks bad an swier se im a-go kil im breda. Aizak an Ribeka neehn waahn Iisaa fi ort Jiekob, so dem tel im se: ‘Gwaan go tan wid yu ongkl Lieban til Iisaa tempa kuul dong. So Jiekob du wa im mada an faada se an tek fut an ron we fram de-so.