Fi Di Uol A Wi Laif Wi Lorn Fram Di Wan We A Tiich Wi

MI MADA AN FAADA DID ELP WI

Iina 1957, mi mada an mi faada did muuv fram Itali an go a Kindosli, we de iina Saskyachuan, iina Kyanada. An likl afta dat dem did lorn di chuut, an di chuut did a di big ting iina wi laif. Mi memba se wen mi did a pikni, mi yuus tu stie lang out de iina sorvis wid mi fambili, so somtaim mi wuda ron wan juok an se mi “did a agzilari paiyanier” wen mi did a iet.

Mi mada an mi faada did puor, bot dem did shuo wi wa it miin fi gi op tingz fi Jeuova. Laik iina 1963, dem did sel nof a dem tingz fi av di moni so dat dem kuda go a di kanvenshan wid piipl fram aal uova di worl we did a gwaan iina Pasadiina we de iina Kalifuoniya a Merika. An iina 1972, wi muuv go a Chriel we de iina British Kolombiya iina Kyanada, an de-so did a bout 620 mail fram we wi did de. An wi did du dis fi elp priich tu piipl we taak Italiyan iina da plies de. Mi faada yuus tu kliin wan suupamaakit fi im wok, an wen dem did se dem a-go gi im wan biga jab an gi im muor moni, im se im neehn waahn it kaa im did waahn fi gwaan du aal we im kuda du fi Jeuova.

Mi glad fi ou mi mada an mi faada riez mi an mi breda an sista dem. Kaaz a ou dem liv dem laif, dem a di fos wan dem fi tiich mi bout ou impuotant it bi fi wok fi Jeuova. An dem tiich mi sitn tu we mi naa go figet fi di uol a mi laif. Dem tiich mi se: Ef mi mek Gad govament bi di big ting iina mi laif, den Jeuova a-go tek kier a mi.​—Mat. 6:33.

WEN MI STAAT FI YUUZ MUOS A MI TAIM FI WOK FI JEUOVA

Iina 1980, mi marid tu wan priti sista, we waahn fi du muor fi Jeuova, we niem Debbie. Di tuu a wi did waahn fi yuuz muos a wi taim fi wok fi Jeuova, so Debbie staat fi paiyanier chrii mont afta wi marid. An wan ier afta wi marid, wi muuv go a wan likl kanggrigieshan we dem did waahn muor elp fi du di priichin wok, an mi staat fi paiyanier wid ar da taim de tu.

Afta a wail, wi did fiil laik se wi waahn fi gi op, an so wi mek op wi main se wi did a-go muuv we. Bot bifuo wi du dat, di fos ting we wi du a taak tu wi sorkit uovasiya. An im taak tu wi nais ino, bot im neehn go roun no kaana wen im tel wi se: “Yu nuo se unu a paat a di prablem duo. Unu a tingk tu moch bout di bad sitn dem we a apm, bot wa unu fi du a luk fi di gud sitn dem an unu wi si dem.” An a dat wi did niid fi ier. (Sa. 141:5) Siem taim wi staat fi du wa di breda tel wi fi du an den wi kuda si se a uol iip a gud sitn did a apm roun wi. Laik kopl piipl wel iina di kanggrigieshan did waahn fi du muor fi Jeuova, laik som a di likl pikni dem, an som sista we dem ozban a no witnis. Dat a did wan big big ting we wi lorn. Wi did lorn se wi did afi luk fi di gud iina tingz an nuo se Jeuova a-go saat out tingz wen tingz get aad fi wi iina wi laif. (Mai. 7:7) Afta dat, wi did staat fiil api agen an tingz did get beta.

Di tiicha dem a wi fos paiyanier skuul did du muor fi Jeuova iina som ada konchri. Wen dem did a yuuz di kompyuuta fi shuo wi som picha an so a wa gwaan wid dem, dem taak bout som a di aad taim we dem go chuu, an dem taak bout som a di blesn dem we dem did get, an dat did mek wi waahn fi ton mishineri tu. So wi se tu wiself se a dat wi did waahn du.

Kaa wi did waahn fi ton mishineri, iina 1984 wi muuv go a Kwibek, dat a wan plies we taak French, an it did de uova 2,485 mail fram British Kolombiya. So dat did miin se wi wuda afi go lorn fi chat wan difrant langwij an wi did afi de roun piipl we gruo an du tingz difrant fram wi. Wan neda ting we did aad fi wi a dat wi neehn av nof moni. Wan a di taim aal wi did av fi iit a som pitieta we wan faama did lef bak pan im lan fram we im did riip. An kaaz a dis, Debbie did afi a kuk di pitieta dem iina difrant difrant wie fi nais op di fuud. Bot iivn duo tingz did aad, wi stil did a du wa wi kuda du fi go chuu an stil api, an wi kuda si tu se Jeuova did a tek kier a wi.​—Sa. 64:10.

Wan die wi did get wan fuon kaal we wi neehn a ekspek. Dem did a invait wi fi go a Betel a Kyanada. Bot di ting a dat wi did sain op aredi fi go a Gilead School, so wi neehn shuor wa fi du bout dis, bot wi se, ye, wi a-go go Betel. Wen wi riich a Betel, wi aks Breda Kenneth Little, we did a wan a di Branch Komitii breda dem, “Wa a-go gwaan fi Gilead? Kaa wi did sain op fi go de ino.” Im se, “Wen wi riich da brij de wi kraas it, no wori bout it.”

Wi riich da brij de wan wiik afta dat, kaa dem did tel mi an Debbie fi kom a Gilead, so wi did afi mek op wi main bout wa fi du. So Breda Little tel wi se: “No mata we yu pik fi du, som a di die dem yu a-go wish se yu did pik di ada sitn fi du. Bot wan no beta dan di ada wan. Jeuova a-go bles eniting we unu pik fi du.” So wi mek op wi main fi go a Gilead. An di muor taim wi spen a du wa wi a du, wi get fi si se a chuu Breda Little did a taak. An wi tel nof piipl bout wa im se wen dem afi mek op dem main bout wa dem waahn fi du fi Jeuova.

OU WI LAIF DID STIE WEN WI DID A MISHINERI

Wi did wel api fi de iina Gilead klaas nomba 83, an a 24 a wi did de iin de, an it did gwaan a Bruklin iina Nyuu Yaak iina Iepril 1987. Breda Ulysses Glass an Jack Redford a did a wi tuu mien tiicha dem. Iivn duo di klaas did gwaan fi faiv mont, it komiin laik it don kwik kwik, an wi gradiyiet Septemba 6, 1987. Afta dat, dem sen wi go a Ieti fi ton mishineri, an wi did go wid John an Marie Goode.

Fram 1962 dem neva sen no Gilead mishineri go a Ieti, kaa a da ier de di govament did ron out di wan dem we did de de. Chrii wiik afta wi gradiyiet, wi did de op iina di mountn dem iina Ieti, an wi did de iina wan likl kanggrigieshan wid 35 poblisha. Wi did yong an a nof tingz wi neva nuo, an a wi aluon did de a di ous we di mishineri dem wuda liv. Di piipl dem iina da plies ya did puor bad an nof a dem kudn riid. An iina dem taim de, piipl did a fait gens dem wan aneda an a fait gens di govament tu, an dem bon op uol tingz an yuuz dem blak aaf di ruod, an nof orikien did gwaan de tu.

Laif neehn iizi fi di breda an sista dem iina Ieti, bot wi kuda si se dem chrang bad an dem did api tu, an dem did lov Jeuova an lov fi go a sorvis tu. Wan a di sista dem de we did op iina iej kudn riid, bot shi kuda riil aaf bout 150 skripcha outa ar ed. Di ting dem we wi si evridie elp wi fi gwaan priich bout Gad Kindom an mek piipl nuo se a it a-go get rid a dem prablem dem. It did mek wi fiil so gud fi si som a di Baibl stodi dem we wi did av ton regila paiyanier an speshal paiyanier an elda tu.

Wen mi did de iina Ieti, mi miit Trevor, we a did wan yong Maaman mishineri, an wi did get fi taak bout di Baibl wid im wan an tuu taim. Som ier afta dat, mi get wan leta fram im we mi neehn ekspek. Im rait an se: “Mi a get baptaiz a di neks sorkit miitn. An mi waahn fi kom baka Ieti fi bi wan speshal paiyanier iina di siem plies we mi yuus tu bi wan Maaman mishineri.” An afta im baptaiz, im an im waif du dat fi uol iip a ier.

YUUROP​—DEN AFRIKA

Dem muuv wi go a di paat a Yuurop we wi kuda staat fi priich agen kaa di priichin wok neehn anda lakdong agen. So iina 1992, wi did riich a Luubliyaana we de a Sloviiniya. An dis did nier tu we mi mada an faada di gruo an liv bifuo dem muuv go a Itali. Waar did stil a gwaan iina som plies iina di konchri we did niem Yuugoslaviya, an di branch afis iina Viena we de iina Aschriya, an di ada wan dem we de iina Zaagreb we de iina Kroyiesha, an Belgried we de iina Sorbiya did a luk afta di priichin wok iina dem plies de. So nou aal a dem plies de kuda av dem uona Betel.

So dis wuda miin se wi afi lorn wan neda langwij, an de roun piipl we gruo difrant an du tingz difrant. Di piipl dem we liv iina di ieriya wuda se, “Jezik je težek,” we miin “Di langwij aad.” An a no lai dem did a tel! Mi did lov ou di breda an sista dem stik tu wa Jeuova aaganaizieshan did tel dem fi du aal wen dem did a chienj op tingz, an wi si ou Jeuova did bles dem fi dat. So aal a dis mek wi si agen se Jeuova fiks tingz wen a taim fi dem get fiks. A nof tingz wi lorn wen wi de a Sloviiniya, an di sitn dem we wi did lorn bifuo wi riich de did elp wi fi go chuu di aad taim dem we wi did a go chuu iina Sloviiniya.

Bot muor tingz did gwaan iina wi laif. Kaa iina 2000, dem did sen wi go a Kuot Divwaa we iina Wes Afrika. Den iina Novemba 2002, kaaz di piipl dem did a fait gens dem wan aneda, dem sen wi go a Siera Liyuon. No waar neehn de a Siera Liyuon dem taim de kaa di waar we dem did a fait dem wan aneda fi 11 ier did jos don. It did aad fi wi lef Kuot Divwaa so kwik, bot wa wi did lorn fram bifuo did elp wi fi stil api an gwaan chuu.

Wan a di sitn dem we elp wi fi stie api a wen wi tingk bout di umochiin piipl we did waahn fi lorn bout di chuut an di breda an sista dem we no tap shuo umoch dem lov wi. Aal a dem did afi liv chuu di waar fi uol iip a ier. An di breda an sista dem did puor bad, bot dem did stil waahn fi gi wa dem av fi elp dem wan aneda. Laik wan sista did waahn fi gi Debbie som kluoz, bot shi neehn waahn fi tek it. So di sista se: “Yu si wen di waar a gwaan, di breda an sista dem we kom fram som ada plies did elp wi. Nou a fi wi taim fi elp.” So wi mek op wi main se wi waahn fi du laik we dem breda an sista ya du.

Wi did en op go baka Kuot Divwaa, bot kaaz a palitiks, dem staat fi waar gens dem wan aneda agen. So iina Novemba 2004, dem sen wi pan wan elikyapta so wi kuda ron we fram de-so. An di tuu a wi did av wi uona bag we did wie bout 22 poun. Wen wi riich we di French suoja dem wuda stie, wi did afi sliip pan di grong de fi di nait. An den dem flai wi go a Switsalan di neks die. An wen wi riich a di branch afis, a did a bout midnait. Di Branch Komitii an di tiicha dem fi di Ministerial Training School an dem waif dem did og wi op wen dem si wi, an dem gi wi som nais fuud an uol iip a Swis chaaklit. It did mek wi fiil gud.

Dem did sen wi go a Gaana fi wan likl taim, an den dem sen wi bak go a Kuot Divwaa wen di piipl dem neehn did a waar gens dem wan aneda so moch agen. Bwai, di breda an sista dem did elp wi nof wen wi did afi ron we an stie a som plies fi a likl wail til tingz sekl dong. Bot iivn duo mi an Debbie nuo se a naamal ting fi di breda an sista dem shuo dem wan aneda lov, wi aalwiez waahn fi si it az a big ting. Matarafak, a afta dis wi si se di sitn dem we wi go chuu tiich wi uol iip.

WI GO A DI MIGL IIS

Iina 2006 di breda dem a worl ed afis sen wi wan leta fi tel wi se dem a-go sen wi go a di Migl Iis. So dat miin tu se wi a-go go chuu nof nyuu tingz agen, som a di taim tingz a-go get aad, wi afi go lorn nyuu langwij, an wi afi go de roun piipl we gruo difrant fram wi agen. A uol iip wi did afi lorn iina da nyuu plies ya we di piipl dem did av bie prablem kaaz a palitiks an rilijan. Wi did lov fi si ou di breda an sista dem we taak difrant difrant langwij iina di difrant kanggrigieshan dem did wok tugeda az wan kaa dem a du wa Jeuova aaganaizieshan tel dem fi du. An wi did lov dem breda an sista ya kaa iivn duo dem fambili, an di piipl dem we dem go skuul wid, an di wan dem we dem wok wid, an dem nieba dem did a fait gens dem kaaz a we dem biliiv iina, dem stil neva let go aafa Jeuova.

Wi did go a di 2012 speshal kanvenshan we dem kip iina Telaviiv we iina Izrel. Da kanvenshan de a di fos taim sins Pentikas 33 C.E, wen so moch a Jeuova piipl iina da plies ya get fi kom tugeda an worship Jeuova. Bwai, dis did a sitn big we wi kyaahn figet!

Iina di taim wen wi did de iina di Migl Iis, dem did sen wi fi go a wan konchri we wi wok did anda lakdong. So wi bring som a wi buk an pamplet dem, an wi go fiil sorvis, an wi go a som likl sorkit miitn tu. Evriwe we wi did a waak wi si som suoja wid dem gon an ting, an dem did aalwiez a tap piipl an a chek dem. Bot wi did fiil sief wen wi did a tek wi taim a waak chuu di plies wid di wan a tuu poblisha dem we wi did a priich wid.

WI GO BAKA AFRIKA

Iina 2013 wi did get wan difrant kain-a wok fi du, dat a fi wok a di branch afis we de a Kinchaasa iina Konggo. Konggo a did wan big konchri we priti bad, bot di piipl dem did puor bad an a nof waar did a gwaan dong de tu. So wen wi si se a Afrika wi a go, wi se tu wi self se: “Wi nuo Afrika man, wi gud! Wi redi fi dis!” Bot a nof tingz wi did afi lorn, speshali ou fi chravl wen yu no av no ruod an brij an dem ting de. Wi did si som nais tingz duo we wi did aalwiez tingk bout, laik ou di breda an sista dem did api iivn duo dem did puor bad, an ou dem lov fiil sorvis, an ou dem chrai aad fi go a di miitn dem an di sorkit miitn dem. An wi si fi wiself ou muor an muor piipl get fi nuo bout Gad Kindom kaa Jeuova did a bak di wok we di breda an sista dem did a du an a bles it tu. Di taim we wi spen a du uol iip iina Jeuova sorvis iina Konggo did tiich wi nof tingz, an wi did get som gud fren we komiin laik fambili tu wi.

Iina di laas paat a 2017, dem sen mi fi go wok a di Betel afis a Sout Afrika. Da branch afis ya a di bigis wan we wi eva wok iina, an di Betel wok we wi did get fi du did nyuu tu wi tu, so wi did afi lorn som uol iip a nyuu tingz agen. Bot di sitn dem we wi did lorn bifuo did elp wi tu iina da nyuu wok ya we wi did get fi du. Wi riili lov di uol iip a breda an sista dem we did a gwaan sorv Jeuova iivn duo a nof tingz dem did afi go chuu fi uol iip a ier. An it did riili nais fi si di breda an sista dem we de a Betel a wok tugeda az wan iivn duo dem skin kola difrant an dem gruo iina difrant difrant wie. Wi kuda si fi wiself se Jeuova did a bles wa dem breda an sista ya did a du kaa dem did a liv iina piis kaa dem did a du wa di Baibl se dem fi du an a chienj op dem laif fi liv laik ou Jeuova waahn dem fi liv.

Mi an Debbie si se fi di uol iip a ier we wi get fi wok fi Jeuova, wi get som nais tingz fi du fi im, an wi get fi lorn fi de roun piipl we gruo difrant fram wi, an wi get fi lorn som nyuu langwij tu. It neehn aalwiez iizi, bot wi kuda si ou Jeuova yuuz im aaganaizieshan an di breda an sista dem fi shuo wi umoch im lov wi. (Sa. 144:2) An wi nuo se di uol a da taim ya we wi a yuuz muos a wi taim fi du tingz fi Jeuova elp wi fi sorv Jeuova beta.

Mi glad fi ou mi mada an mi faada riez mi, an ou mi waif, Debbie, aalwiez di de fi mi an a elp mi. An wi api fi get fi nuo di breda an sista dem a di difrant difrant plies dem we wi go we tiich wi nof kaaz a ou dem liv dem laif. Wi no nuo wa a-go gwaan iina di fyuucha, bot mi an Debbie mek op wi main fi memba aal a di tingz we wi did lorn fram Jeuova, uu a di Wan we a tiich wi.