Yu Kyan Nuo Fi Shuor Se Jeuova Paadn Yu

1-2. Wen yu get fi si se Jeuova paadn yu sin dem, ou yu fiil? (Luk pan di picha tu.)

KING Dievid did fiil bad bout di bad sitn dem we im did du. (Sa. 40:12; 51:3; di likl sitn we rait op a tap) Bot im shuo se im did riili sari fi wa im du an im tap dwi’it, an so Jeuova paadn im. (2 Sam. 12:13) An Dievid did api fi si se Jeuova paadn im fi chuu.​—Sa. 32:1.

² Jos laik Dievid, wi api wen wi si se Jeuova paadn wi fi wi sin dem an tek im taim wid wi. Yu si aal ef wi sin bad, Jeuova kyan paadn wi ef im si se wi riili sari fi wa wi du, an ef wi prie tu im fi paadn wi, an ef wi taak tu di elda dem bout wa wi du, an ef wi du aal a we wi kyan du fi no du di bad sitn dem agen. An it riili nais fi nuo dis, no chuu? (Pr. 28:13; Aks 26:20; 1 Jan 1:9) An bwai wi api fi nuo se wen Jeuova paadn wi it komiin laik wi neehn du notn bad kaa im no wol it gens wi agen.​—Izii. 33:16.

3-4. Ou wan sista did fiil afta shi baptaiz, an wa wi a-go taak bout iina da lesn ya?

³ Som a di taim it mait-a aad fi som a wi biliiv se Jeuova paadn wi fi chuu. An a siem so Jennifer did fiil. Fi ar mada an faada did tiich ar bout Jeuova, bot wen shi get biga shi staat fi du som bad sitn anda di kwaiyat. Lieta iina laif, shi staat sorv Jeuova agen an den shi gi ar laif tu Jeuova an baptaiz. Shi se: “Yu si bifuo mi staat sorv Jeuova agen, aal we de pan mi main a moni an tingz, an mi did a du aal kain-a seks sin an a jringk til mi jongk, an mi did a at ed tu. Bot yu si afta mi don we wid aal a dem sopm de an mi beg Jeuova fi paadn mi, iina mi main kaa mi nuo se Jiizas kom ded fi mi, mi nuo se Gad paadn mi, bot iina mi aat mi did stil fiil laik se Gad kudn paadn mi fi chuu.”

⁴ Miebi yu fiil se Jeuova stil beks wid yu kaaz a som tingz we yu yuus tu du, bot yu fi memba se Jeuova gud an kain. An kaaz a dis, Dievid did nuo se Jeuova did paadn im fi we im did du an im did api bout dat. An Jeuova waahn wi fi fiil di siem wie laik Dievid. Iina da lesn ya, wi a-go si wa mek it impuotant fi wi nuo fi shuor se Jeuova paadn wi, an wi a-go si wa kyan elp wi fi nuo fi shuor se Jeuova paadn wi tu.

WA MEK IT IMPUOTANT FI WI BILIIV SE JEUOVA PAADN WI?

5. Wa Sietan waahn wi fi biliiv se? Tel wi wa mek yu se so.

⁵ Wen wi riili biliiv se Jeuova lov wi an se im paadn wi, Sietan naa go kyan chrap wi. Memba se Sietan waahn wi fi tap sorv Jeuova. So im wi du eniting fi chrai fi mek wi tap. Laik im mait chrai fi mek wi tingk se wi sin dem so bad dat Jeuova kuda neva paadn wi. Laik tingk bout wa did apm tu wan man iina Korint we did get put outa di kanggrigieshan kaaz im did a du seks sin. (1 Kor. 5:1, 5, 13) Lieta im did sari fi wa im du an tap dwi’it, bot Sietan did waahn di breda an sista dem fi no paadn im an no tek im bak iina di kanggrigieshan. Ef di breda an sista dem iina di kanggrigieshan neehn paadn im, di man mait-a tingk se Jeuova wudn paadn im niida an im mait-a “get so sad dat im gi op” an tap sorv Jeuova. A so Sietan did waahn im fi fiil an a siem so tide Sietan waahn wi fi fiil se Jeuova naa go paadn wi sin dem. Bot dat no fraitn wi kaa wi nuo se Sietan eva a luk fi wan wie fi “kaaz chobl an mek piipl ton we fram Gad.”​—2 Kor. 2:5-11.

6. Ef wi fiil se Jeuova no paadn wi fi sitn we wi did du, wa wi kyan du?

⁶ Wen wi riili biliiv se Jeuova paadn wi, wi kyan tap fiil gilti. Wi naamali fiil gilti wen wi du sitn bad. (Sa. 51:17) An dat a wan gud sitn kaa dat wi elp wi fi staat du di rait ting. (2 Kor. 7:10, 11) Bot ef wi stil fiil gilti aal wen wi sari fi wa wi du an tap dwi’it an fiil se Jeuova no paadn wi, den wi mait-a fiil so sad dat wi tap sorv Jeuova. Bot yu si wen wi biliiv se Jeuova riili paadn wi, den wi kyan tap fiil gilti. An dat wi mek wi gwaan sorv Jeuova kaa wi nuo se im api wid wi an wi a-go api tu. (Kol. 1:10, 11; 2 Tim. 1:3) Bot ou wi kyan nuo fi shuor se Jeuova paadn wi?

WA KYAN ELP YU FI NUO FI SHUOR SE JEUOVA PAADN YU?

7-8. Wa Jeuova tel wi bout imself, an wa dat mek wi nuo fi shuor se? (Eksidos 34:6, 7)

⁷ Tingk bout wa Jeuova se bout imself. Laik wen Muoziz did waahn nuo muor bout Jeuova, tingk bout wa Jeuova did tel im se.a (Riid Eksidos 34:6, 7.) Aalduo Jeuova av wol iip a nais wiez we im kuda taak bout, im tel Muoziz se im a “wan Gad we gud an kain.” So yu tingk se wan Gad laka dis wuda no paadn sumadi we a worship im aal wen dem sari fi wa dem du an ton we fram dem sin? Nuo sa! Jeuova wuda neva du dat. Im wuda wikid bad ef im no paadn da sumadi de, an Jeuova no stie so.

⁸ Wi nuo fi shuor se wen Jeuova se im gud an kain a di chuut im a taak kaa im a no laiyad. (Sa. 31:5) So wi kyan biliiv wa im se. Ef yu fain it aad fi biliiv se Jeuova riili paadn yu fi sitn bad we yu did du, aks yuself: ‘Mi riili biliiv se Jeuova a wan Gad we gud an kain an se im wi paadn enibadi we sari fi wa dem du an ton we fram dem sin dem?’ Ef yu biliiv dat den yu kyan nuo fi shuor se im paadn yu tu.

9. Wa Saam 32:5 miin wen it se Jeuova paadn wi sin dem?

⁹ Sidong an tingk bout wa Jeuova tiich wi iina di Baibl bout ou im paadn wi. Laik tingk bout wa Dievid did se bout ou Jeuova paadn wi. (Riid Saam 32:5.) Im se: “Yu paadn mi sin dem.” Di wod we miin “paadn” iina di Iibruu langwij kyan miin fi “lif op sopm,” ar “tek we sopm,” ar “kya we sopm.” So wen Dievid did se Jeuova paadn im, a laik se Jeuova did lif op im sin dem an kya dem we. So Dievid wuda fiil gud kaa it wuda komiin laik a wan evi luod im did kya pan im bak an Jeuova tek it aafa im. (Sa. 32:2-4) Wi kyan fiil laik ou Dievid did fiil tu. Wen wi sari fi di rang sitn dem we wi did du an wi tap du dem, wi no fi aalwiez a fiil bad bout wa wi did du, bot wi kyan fiil api fi nuo se Jeuova tek we wi sin dem an paadn wi.

10-11. Wa Saam 86:5 tel wi se bout Jeuova? (Saam 86:5)

¹⁰ Riid Saam 86:5. Iina da skripcha ya Dievid se Jeuova “eva redi fi paadn piipl.” Dis miin se Jeuova no kwik fi get beks wen wi du sitn rang an im eva redi fi paadn di wan dem we sari fi wa dem du an ton we fram dem sin dem. Wa mek im stie so? Ier wa di neks piis a di vors se: “Di wan dem we kaal pan yu nof nof, yu lov dem an yu stik tu dem.” Iina di lesn bifuo da wan ya, wi lorn se Jeuova pramis fi stik tu di wan dem we lov im an fi no lef dem. So ef dem wan ya did sari fi wa dem du an ton we fram dem sin, Jeuova ‘eva redi fi paadn dem no mata wa dem did du.’ (Aiz. 55:7) Ef yu stil no shuor se Gad paadn yu fi sitn bad we yu did du, tingk bout dis: Ef yu biliiv se Jeuova eva redi fi paadn aal a di wan dem we sari fi wa dem du an ton we fram dem sin dem an uu prie tu im fi paadn dem, den yu kyan nuo fi shuor se im paadn yu tu wen yu prie tu im an aks im fi paadn yu.

¹¹ Di Baibl tel wi se Jeuova nuo wi gud gud an im nuo se wi no porfek. (Sa. 139:1, 2) Mek wi luk pan wa Dievid se iina wan neda Saamz an ou dat kyan elp wi fi biliiv se Jeuova waahn fi paadn wi.

NO FIGET WA JEUOVA MEMBA

12-13. Bies pan Saam 103:14, wa Jeuova memba bout wi, an ou im chriit wi kaaz a dat?

¹² Riid Saam 103:14. Dievid mek wi nuo wan a di riizn dem we mek Jeuova redi fi paadn di wan dem we sari fi di bad sitn dem we dem du an ton we fram dem sin. Im se Jeuova “memba se a di dos wi kom fram.” So dat miin se Jeuova nuo se wi no porfek. Mek wi si ef wi kyan andastan likl beta wa Dievid did a taak bout.

¹³ Dievid se Jeuova don nuo ou wi kom bout. Jeuova mek Adam fram dos, so im nuo ou aal a wi mek an wa wi niid. Laik im nuo se wi niid fi iit, sliip, an wi niid ier fi liv tu. Bot aal ef wi did porfek, wi wuda stil niid dem sitn ya. (Jen. 2:7) Bot kaa Adam an Iiv did sin, wi komiin laik dos iina wan neda wie. Wi neehn baan porfek, an siek-a dat wi fain se it iizi fi wi du di sitn dem we bad. Jeuova nuo dat bout wi gud gud. Bot wen Dievid did se Jeuova “memba” se wi a dos, im did miin tu se kaa wi no porfek, som a di taim wi a-go du tingz we no rait. An kaa Jeuova nuo dat, im tek im taim wid wi an chriit wi iina wan kain wie. So ye man, Jeuova nuo se wi a-go mek mistiek, bot wen im si se wi sari fi di bad sitn dem we wi du an tap du dem, im naa go ich fi paadn wi.​—Sa. 78:38, 39.

14. (a) Wa Dievid did se bout ou Jeuova paadn wi? (Saam 103:12) (b) Wa wi kyan lorn fram ou Jeuova did paadn Dievid? (Luk pan di paat we niem “Jeuova Paadn Wi Sin Dem An Im Naa Go Bring Dem Op Agen.”)

¹⁴ Ou Saam 103 elp wi fi si se wen Jeuova paadn wi im paadn wi fi chuu? (Riid Saam 103:12.) Dievid se wen Jeuova paadn wi, im tek wi sin dem an put dem ‘faar fram wi’ jos laka ou wich paat di son kum op de faar fram we di son go dong. So a wuda laik se wi de a wan plies wich paat di son kom op an wi sin dem de wich paat di son go dong​—dem tuu plies de kyaahn miit. Wan buk we taak bout da vors ya put it da wie ya: “Ef Gad tek wi sin dem an put dem so faar fram wi, den dat miin se wi kyaahn si notn, ar iivn sumel notn we kuda mek wi memba bout wi sin dem.” Yu si wen Jeuova paadn wi, notn no lef fi mek yu memba se yu did sin gens im ar mek yu fiil laik se im a-go yuuz notn we yu did du gens yu.​—Izii. 18:21, 22; Aks 3:19.

15. Wa wi kyan du ef wi fiil se Jeuova no paadn wi fi di sitn dem we wi did du?

¹⁵ Ef wi fain it aad fi biliiv se Jeuova paadn wi, ou wa Dievid se iina Saam 103 kyan elp wi? Ef wi fiil gilti bout sitn bad we wi did du, jos tingk bout ou Jeuova luk pan tingz. Im memba se yu no porfek an im paadn di wan dem we sari fi di bad sitn dem we dem du an tap du dem. An yu did sari fi di bad sitn dem we yu du an tap du dem tu. Memba tu se Jeuova naa go memba di bad sitn dem we yu du an im naa go memba yu bout it niida kaa im don paadn yu fi it. So yu no afi wori yuself kaa im naa go uol it gens yu. So kaa Jeuova naa tingk bout di bad sitn dem we im paadn yu fa aredi, wi no fi a tingk bout dem niida. (Sa. 130:3) Wen wi biliiv se Jeuova paadn wi sin dem wi no afi fiil gilti agen, bot wi a-go fiil api an wi a-go gwaan sorv Jeuova.

16. Tel wi sitn we shuo se a no wan gud ting fi aalwiez a tingk bout di sin dem we Jeuova don paadn wi fa. (Luk pan di picha tu.)

¹⁶ Tingk bout dis: Wen sumadi a jraiv wan kyaar, evri nou an den im mait-a luk iina di glaas fi si wa a kom baka im. Bot it wudn sief ef wen im a jraiv, im a luk iina di glaas aal di taim. Nuo sa! Im afi aalwiez luk pan di ruod we de infronta im. A siem wie so, nou an den, it mait-a aarait fi tingk bout di mistiek dem we wi did mek kaaz dat kyan elp wi fi no du dem agen. Bot ef wi aalwiez a tingk bout di sin dem we Jeuova don paadn wi fa aredi, wi naa go api agen, an wi naa go kyan gi im wi bes wen wi a sorv im. Insted-a dat, mek wi gwaan tingk bout di nais fyuucha we Jeuova pramis wi. Da taim de di bad sitn dem we did apm bifuo, “[wi] naa go memba dem at aal.”​—Aiz. 65:17; Pr. 4:25.

GWAAN BILIIV IINA YU AAT SE JEUOVA LOV YU AN IM PAADN YU

17. Wa mek wi fi gwaan biliiv se Jeuova lov wi an aalwiez redi fi paadn wi?

¹⁷ Wi niid fi nuo fi shuor se Jeuova lov wi an im eva redi fi paadn wi. (1 Jan 3:19) An dis a kaa Sietan naa go tap chrai fi mek wi biliiv se Jeuova no lov wi an se im naa go paadn wi. Eni wie yu tek it, Sietan jos waahn wi fi tap sorv Jeuova. An kaa Sietan nuo se im taim shaat, im a-go waahn ton op di presha pan wi fi mek wi ton wi bak pan Jeuova. (Rev. 12:12) Bot wi kyaahn mek Sietan win! Wi fi fait im aaf an gwaan sorv Jeuova.

18. Wa yu kyan du fi nuo fi shuor se Jeuova lov yu an eva redi fi paadn yu?

¹⁸ Di lesn bifuo da wan ya tel yu wa yu niid fi du so yu kyan nuo fi shuor se Jeuova lov yu. An dis ya lesn ya we wi jos go chuu elp wi fi nuo fi shuor se Jeuova eva redi fi paadn wi, laik wen it tel wi we Jeuova se bout imself. Sidong an tingk bout wa di Baibl se bout ou Jeuova paadn wi. An no figet se im memba se wi no porfek an se im a-go tek im taim wid wi. An memba tu se wen im paadn wi sin dem, im no uol it gens wi. Wen wi tingk bout aal a dis, yu kyan fiil api kaa yu nuo fi shuor se Jeuova gud an kain tu yu an jos laka Dievid, yu a-go kyan se, “Tangk yu Jeuova fi ‘paadn mi sin dem’!”​—Sa. 32:5.