Jeuova Waahn Evribadi Fi Sari Fi Di Bad Sitn Dem We Dem Du An Tap Dwi’it

1. Ef sumadi a-go ton we fram dem sin dem an staat du wa rait, wa els dem afi du?

JEUOVA waahn wi fi ton we fram wi sin dem an staat du wa rait. Di Baibl mek wi nuo se sumadi we du dat a-go fiil difrant bout di bad sitn dem we dem did a du an tap du dem. An dem a-go chrai aad fi no dwi’it agen.​—Mat 3:8; Aks 3:19; 2 Pii. 3:9.

2. Wa mek aal a wi fi nuo wa it riili miin fi ton we fram wi sin dem an staat du wa rait? (Niimaiya 8:9-11)

² Evribadi fi nuo wa it riili miin fi ton we fram dem sin dem an staat du wa rait kaa aal a wi a sina. An dis a kaa aal a wi kom fram Adam an Iiv. (Ruo. 3:23; 5:12) Aal di man dem we did chrang iina wa dem biliiv iina, man laik Paal, did afi chrai aad fi no sin tu. (Ruo. 7:21-24) Bot dis no miin tu se wi naa go api kaa wi a sina. Kaa di Baibl mek wi nuo se Jeuova redi fi paadn wi an im waahn wi fi api. Luk pan wa im did tel di Juu piipl dem we did de bout iina Niimaiya taim. (Riid Niimaiya 8:9-11.) Jeuova neehn waahn dem fi kil aaf demself kaaz a sitn we dem du aredi. Bot im did waahn dem fi api wen dem a worship im kaa im nuo se wen wi ton we fram wi sin dem an staat du wa rait, dat a-go mek wi api. So wi nuo fi shuor se ef wi sari fi wi sin dem an staat du wa rait, Jeuova a-go paadn wi.

3. Wa wi a-go luk pan iina da lesn ya?

³ Iina da lesn ya, wi a-go luk pan chrii difrant sitn we kyan elp wi fi si wa it miin fi ton we fram wi sin dem an staat du wa rait. Fos, wi a-go luk pan wa Jeuova did tiich di Izrelait piipl dem bout dis. Den wi a-go luk pan wa im du fi di wan dem we did sin so dat dem kuda ton we fram dem sin dem an staat du wa rait. An den wi a-go luk pan wa Jiizas did tiich im falara dem bout dis.

WA JEUOVA DID TIICH DI IZRELAIT PIIPL DEM BOUT WA IT MIIN FI TON WE FRAM DEM SIN AN STAAT DU WA RAIT?

4. Wa Jeuova did tel di Izrel piipl dem se im wuda du ef dem ton we fram dem sin?

⁴ Wen Jeuova did pik di Izrelait piipl dem fi bi im speshal piipl, im mek wan diil wid dem an pramis dem se ef dem fala di laa dem we im gi dem, im wuda tek kier a dem an bles dem. Im mek dem nuo se: “Yu si dem laa ya we mi a gi unu tide, dem naa go tuu aad fi unu du. An a no laik se unu kyaahn go du dem.” (Dyuu. 30:11, 16) Bot ef dem no kip di laa dem we im gi dem ar ef dem staat fi worship ada gad, dem a-go sofa bad an dem naa go get no blesn fram im. Bot ef dem staat fi lisn tu im an staat fi du wa im se dem fi du agen, im a-go staat fi bles dem agen. (Dyuu. 30:1-3, 17-20) So dat miin tu se ef dem ton we fram dem sin an staat fi du wa rait agen, Jeuova wuda jraa nier tu dem an staat fi bles dem agen.

5. Wa Jeuova did du fi elp di Izrelait piipl dem fi gwaan sorv im? (2 Kingz 17:13, 14)

⁵ Bot dem Izrelait piipl ya we Jeuova did pik fi bi im speshal piipl neehn tap du tingz we im se dem no fi du. Dem staat fi worship ada gad an du aal saat a wikid an naasi sitn, an kaaz a dat, aal saat a bad sitn apm tu dem. Bot dat neehn miin tu se Jeuova did se a it dat fi dem. Kaaz a nof taim im mek im prafit dem go tu dem fi mek dem nuo se dem fi ton we fram dem sin dem an staat du wa rait.​—Riid 2 Kingz 17:13, 14.

6. Wa a som a di sitn dem we Jeuova did mek im prafit dem tel im piipl dem se fi mek dem si se dem fi ton we fram dem sin an staat du wa rait? (Luk pan di picha tu.)

⁶ Muor taim, a im prafit dem Jeuova yuuz fi waan im piipl dem an fi elp dem chienj dem wiez. Laik im did yuuz Jerimaiya fi tel dem se: “Aal a unu Izrel piipl we ton chrieta gens mi, kom bak kom sorv mi . . . Mi naa go lang op mi fies pan unu kaa mi a no sumadi we ton mi bak pan mi piipl dem. . . . Mi naa go av unu op fi eva. Jos se yu rang an don kaa yu nuo se yu did ton gens Jeuova yu Gad an du wa im se yu no fi du.” (Jer. 3:12, 13) An Jeuova did tel Jowel fi tel dem dis: “Kom bak tu mi wid aal a unu aat.” (Jowel 2:12, 13) An im mek Aizaiya tel dem se: “Kliin op unuself; mi no waahn fi si di wikid sitn dem we unu a du; tap du dem bad sitn de.” (Aiz. 1:16-19) An Jeuova mek Iziikel aks dem se: “Unu tingk se mi laik fi si wen sumadi wikid ded? An unu no tingk se mi raada wen sumadi tap du di wikid sitn dem we dem a du an gwaan liv? Mi no api wen nobadi ded. . . . So tap du di rang sitn dem so dat unu kyan liv.” (Izii. 18:23, 32) Aal a dis mek wi si se wa Jeuova waahn a fi piipl ton we fram dem sin an staat du wa rait so dat dem kyan liv an liv fi eva tu. Bot dis no miin tu se piipl afi ton we fram dem sin fos bifuo Jeuova du sitn fi elp dem. Mek wi luk pan som ada tuori fi fain out muo.

7. A wa Jeuova did yuuz di tuori bout Oziya an im waif fi tiich im piipl dem?

⁷ Jeuova did yuuz sitn we did apm wid im prafit Oziya an im waif we niem Guoma fi tiich im piipl dem sopm. Oziya waif did gi im bon wid wan neda man an den shi lef Oziya go staat sliip roun sliip roun wid ada man. Bot yu tingk dis miin tu se shi kudn chienj ar wiez dem? Memba se Jeuova kyan riid aat, an im tel Oziya se: “Go bak agen go lov di uman we yu marid tu we wan neda man lov an we stil a sliip wid ada man tu, jos laik ou Jeuova neehn tap lov di Izrelait dem aal wen dem a worship di ada gad dem.” (Oz. 3:1; Pr. 16:2) Wi si se Oziya waif did stil a sin bad wen Jeuova tel Oziya se im fi go fain ar, paadn ar, an mek op bak wid ar.a So Jeuova did a shuo se im neehn gi op pan im piipl dem aalduo dem did a sin bad. Im did stil lov dem an a du evriting fi elp dem fi ton we fram dem sin an staat du wa rait. So yu tingk dis miin tu se ef sumadi a sin bad ya nou, Jeuova a-go chrai fi fain dem an elp dem fi ton we fram dem sin an staat du wa rait? (Pr. 17:3) Mek wi fain out no.

A OU JEUOVA ELP SUMADI FI TON WE FRAM DEM SIN?

8. A wa Jeuova did du fi chrai elp Kien fi ton we fram im sin dem? (Jenisiz 4:3-7) (Luk pan di picha tu.)

⁸ Kien a did Adam an Iiv fos pikni, an im get im bad wiez dem fram dem. An di Baibl tel wi se: “Kien, im du wikidnis.” (1 Jan 3:12) So dat mek wi si wa mek Jeuova mait-a “neehn api wid di aafrin we Kien did gi op.” Bifuo Kien chienj im bad wiez dem, “Kien get beks bad an staat fi lang op im fies.” Afta dat, Jeuova stil taak tu Kien an chrai fi elp im. (Riid Jenisiz 4:3-7.) Jeuova taak tu im iina wan nais wie an mek im nuo wa gud wuda apm ef im chienj im wiez dem an wa wuda apm ef im no chienj dem. Bot Kien neehn lisn tu Jeuova. Im neva mek Jeuova elp im fi ton we fram im sin dem an staat du wa rait. Bot dat neehn mek Jeuova tap elp piipl fi ton we fram dem sin dem an fi staat du wa rait.

9. Wa Jeuova did du fi elp Dievid fi ton we fram im sin an fi staat du wa rait?

⁹ Jeuova did lov King Dievid bad. Im aal se im “a wan man we wi tingk ou mi wuda tingk.” (Aks 13:22) Bot Dievid did stil en op sin bad; im sliip wid wan neda man waif an en op kil di man tu. An azkaadn tu Muoziz Laa, Dievid did fi ded fi dat. (Liv. 20:10; Nom. 35:31) Bot Jeuova neehn mek dat apm.b Im sen im prafit Nietan fi go luk fi Dievid aalduo Dievid neehn du notn yet fi shuo se im ton we fram im sin an redi fi du wa rait. Nietan yuuz wan tuori fi elp Dievid fi si se im du sopm rang, so it elp Dievid fi ton we fram im sin an staat du wa rait. (2 Sam. 12:1-14) An Dievid rait sopm fram im aat fi mek wi si se im did riili sari fi wa im du. (Sa. 51, di likl sitn we rait op a tap) Wa Dievid did rait elp uol iip a piipl we sin fi ton we fram dem sin an staat du wa rait. Duohn wi api se Jeuova did elp Dievid fi ton we fram im sin an fi staat du wa rait?

10. Kaa Jeuova tek im taim wid yu an a paadn yu, ou dat mek yu fiil?

¹⁰ Jeuova iet aal kain-a sin. (Sa. 5:4, 5) Bot im nuo se aal a wi a sina, an chuu im lov wi im a elp wi fi no sin. Aal di piipl dem we sin bad, im aalwiez waahn fi elp dem fi ton we fram dem sin an jraa nier tu im. Dat nais fi nuo, no chuu? Kaa wen wi tingk bout ou Jeuova tek im taim wid wi an redi fi paadn wi, it mek wi waahn fi du wa rait an kwik fi ton we fram wi sin wen wi du notn rang, no chuu? Mek wi luk pan ou Jiizas did elp di Kristiyan dem iina Baibl taim fi ton we fram dem sin an staat du wa rait.

WA JIIZAS FALARA DEM DID LORN BOUT WA IT MIIN FI TON WE FRAM DEM SIN AN STAAT DU WA RAIT?

11-12. A wa Jiizas did du fi elp piipl fi si se im Faada lov fi paadn piipl? (Luk pan di picha.)

¹¹ Jos laik wa wi did si iina di lesn bifuo da wan ya, wen di taim did kom fi di Mesaiya kom, Jeuova yuuz Jan di Baptis an Jiizas fi tiich di piipl dem wa mek dem fi ton we fram dem sin an staat du wa rait.​—Mat. 3:1, 2; 4:17.

¹² Jiizas aalwiez elp piipl fi si se im Faada redi fi paadn piipl. An im did yuuz wan tuori bout wan faada an im bwai pikni fi mek dem si ou Jeuova redi fi dwi’it. Di yong bwai did staat fi liv wail, bot “im kech imself” an go baka im yaad. Jiizas se: “Im did stil faar fram im yaad wen im faada si im an fiil sari fi im. Im faada ron go og im op an kis im.” Im bwai pikni did a-go aks im ef im kuda bi wan a di man dem we wok fi im. Bot im faada kaal im “mi pikni” an tek im bak iina di fambili. Im faada se: “Im did laas bot mi get im bak.” (Luuk 15:11-32) Wen Jiizas did de iina evn bifuo im kom pan di ort, im did si ou im Faada shuo se im fiil it fi di wan dem we ton we fram dem sin dem an staat du wa rait. So Jiizas yuuz da tuori ya fi mek wi si ou Jeuova redi fi paadn wi.

13-14. Wa di apasl Piita did lorn bout wen sumadi ton we fram dem sin dem an staat du wa rait, an wa im mek ada piipl nuo bout it? (Luk pan di picha tu.)

¹³ Muor taim kaaz a wa Piita did du, im did si se Jiizas redi fi paadn im an ada piipl. Laik wan taim afta Piita did se im no nuo Jiizas chrii taim, im did fiil bad kaaz a wa im did du. (Mat. 26:34, 35, 69-75) Bot afta Jiizas kom bak alaiv, im go tu Piita wan a di taim wen nobadi neehn de de. (Luuk 24:33, 34; 1 Kor. 15:3-5) Wen im du dat, im wuda mek Piita si se im paadn im.​—Luk pan Maak 16:7.

¹⁴ Piita kuda mek ada piipl nuo se Jeuova redi fi paadn sumadi we ton we fram dem sin an staat du wa rait kaa im did si dat fi imself. Likl afta Pentikas die, Piita mek wan uol iip a Juu piipl nuo se a dem did kil di Mesaiya. Bot im se tu dem se: “Ton we fram unu sin, beg Gad paadn an kom bak tu im, so dat im wi tek we unu sin dem.” (Aks 3:14, 15, 17, 19) So Piita mek dem nuo se wen dem sari fi di bad sitn dem we dem du, it a-go mek dem waahn fi ton we fram dem sin dem an staat du wa rait. An im mek dem nuo tu se Jeuova wuda rob out dem sin; dem sin naa go de de no muor. An som wol iip a ier afta dat, Piita mek di Kristiyan dem nuo se: “Jeuova . . . jos a gwaan tek im taim wid wi, kaa im no waahn fi kil aaf nobadi. Bot wa im riili waahn a fi evribadi ton we fram dem sin an staat du wa rait.” (2 Pii. 3:9, NWT ) Dis a wan nais sopm fi nuo se aal wen sumadi sin bad, dem kyan stil ton we fram dem sin an staat du wa rait!

15-16. (a) A wa mek wi se Paal did nuo wa it riili miin fi paadn sumadi? (1 Timoti 1:12-15) (b) A wa wi a-go luk pan iina di neda lesn?

¹⁵ Saal we kom fram Taasos, we yuus tu du som wikid sitn tu di Kristiyan dem an mek it aad fi dem fala Jiizas, did niid fi ton we fram im sin an staat du wa rait muo dan nof piipl so dat Gad kuda paadn im. So wol iip a piipl wuda fiil se im kyaahn chienj, bot a no so Jiizas did fiil bout im. Im an im Faada did si di gud wiez dem we Saal did av. Jiizas did se: “Mi pik da man ya fi sorv mi.” (Aks 9:15) Jiizas aal wok wan mirikl so dat Saal kuda ton we fram im sin an staat du wa rait. (Aks 7:58–8:3; 9:1-9, 17-20) Afta Saal ton wan Kristiyan, we dem kaal Paal afta dat, im mek piipl nuo umoch im tangk Gad fi ou Im gud an kain tu im an did redi fi paadn im. (Riid 1 Timoti 1:12-15.) So it mek wi si se: “Gad kain tu unu, kaaz im chrai fi get unu fi ton we fram sin an sari fi di rang we unu du.”​—Ruo. 2:4.

¹⁶ Wen Paal did ier se dem neehn put out wan man outa di kanggrigieshan we did a du aal kain-a seks sin, im elp dem fi si se Jeuova jraa op piipl iina wan wie we mek dem si se im lov dem, an im mek dem si se dem fi paadn piipl. Wi a-go lorn som muo bout da tuori ya iina di neks lesn.