Ou Di Elda Dem Kyan Elp Di Wan Dem We Get Put Outa Di Kanggrigieshan?

1-2. (a) A ou Jeuova fiil bout di wan dem we sin bad an no ton we fram dem sin? (b) Wa Jeuova waahn di wan dem we sin bad fi du?

WI NUO fi shuor se Jeuova no put op wid rangz. (Sa. 5:4-6) Im ekspek evribadi fi du wa im tel dem iina im Wod fi du. An kaaz wi a sina, Jeuova nuo se wi naa go du di rait ting evritaim. (Sa. 130:3, 4) Bot aalduo im nuo dat, im no waahn wi fiil se kaaz im lov wi iivn duo wi no dizorv it, ‘wi kyan yuuz dat fi du aal kain-a wikidnis.’ (Juud 4) An memba se di Baibl tel wi se wen Aamagedan a gwaan, Jeuova a-go “ponish di piipl dem we no bizniz wid wa im se.”​—2 Pii. 3:7; Rev. 16:16.

² Jos laik wa wi si iina di lesn dem fi da Wachtowa ya we wi du aredi, Jeuova no waahn fi kil aaf nobadi, “wa im riili waahn a fi evribadi ton we fram dem sin an staat du wa rait.” (2 Pii. 3:9) Di elda dem a du laik Jeuova an a tek dem taim wid di wan dem we a du wa rang an a chrai fi elp dem fi chienj dem wiez dem so dat Jeuova kyan api wid dem agen. Bot som a di taim som a dem wan ya we sin bad no tek di elp we di elda dem a gi dem. (Aiz. 6:9) An no kier ou aad di elda dem chrai fi elp dem fi ton we fram dem sin dem, dem stil mek op dem main se dem naa chienj. Wen sitn laka dis apm, wa di elda dem fi du?

“RON DI WIKID PIIPL DEM”

3. (a) Ef sumadi sin bad an no waahn ton we fram dem sin, a wa di Baibl se fi apm tu dem? (b) Ef sumadi sin bad an dem en op get put out a di kanggrigieshan, wa mek wi kyan se a dem kaaz it fi apm?

³ Wen sumadi sin bad an no waahn fi ton we fram dem sin dem, di elda dem afi du wa 1 Korintiyan 5:13 se, we se: “Ron di wikid piipl dem fram mongks unu.” Memba ino, eniting sumadi plaant a dat dem a-go riip. So di sumadi we sin bad a-go nuo se ef dem no tap du wa dem a du, dem a-go get put outa di kanggrigieshan. (Gya. 6:7) Wi kyan se dat kaa a nof taim di elda dem chrai fi elp dem an dem mek op dem main fi no tek di elp we dem a get. (2 Ki. 17:12-15) So dis shuo se di sumadi no waahn fi du wa Jeuova waahn dem fi du.​—Dyuu. 30:19, 20.

4. Wa mek di elda dem mek di ada breda an sista dem iina di kanggrigieshan nuo se sumadi get put outa di kanggrigieshan?

⁴ Wen sumadi no waahn fi ton we fram dem sin an staat du wa rait an dem get put outa di kanggrigieshan, wan elda a-go go op pan di stiej an mek di ada breda an sista dem iina di kanggrigieshan nuo se da sumadi de a no wan Jeuova Witnis agen.a An wen di elda dem du dat, dem no dwi’it kaa dem waahn fi shiem di sumadi we sin. Bot dem dwi’it kaa dem waahn di breda an sista dem iina di kanggrigieshan fi du wa Gad Wod se dem fi du an ‘no av notn fi du wid da sumadi de,’ dem “no iivn iit wid dem piipl de.” (1 Kor. 5:9-11) An dem du dat kaa di apasl Paal did rait se: “A onggl wan likl bit a yiis yu niid fi mek di uol a di duo swel op.” (1 Kor. 5:6) Sumadi we naa ton we fram dem sin an du wa rait kyan kaaz di res a breda an sista dem we a chrai fi du wa Jeuova waahn dem fi du fi fiil se dem na’afi du wa Jeuova se dem fi du.​—Pr. 13:20; 1 Kor. 15:33.

5. A ou wi fi fiil bout sumadi we get put outa di kanggrigieshan, an wa mek?

⁵ Wen wan breda ar sista get put outa di kanggrigieshan, aalduo wi no fi kip kompni wid dem, wi no fi fiil laik se a it dat fi dem. Bot wi fi luk pan dem laik se dem a wan a Jeuova shiip we laas we kyan kom bak. Kaa memba se wan shiip we go we fram di res a shiip dem kyan kom bak tu dem. An memba se da shiip de we go we lef Jeuova aaganaizieshan did gi im laif tu Jeuova. Bot da sumadi de naa du wa dem pramis Jeuova se dem wuda du, so dat mek dem kyan en op ded. (Izii. 18:31) So az lang az di sumadi av taim fi ton we fram dem sin an staat du wa rait agen an Jeuova redi fi paadn dem, da sumadi de kyan staat sorv Jeuova agen. A ou di elda dem kyan shuo se a so dem fiil bout sumadi we get put outa di kanggrigieshan?

A OU DI ELDA DEM KYAN ELP DI WAN DEM WE GET PUT OUTA DI KANGGRIGIESHAN?

6. Wa a som ada sitn we di elda dem a-go du fi elp sumadi we get put outa di kanggrigieshan?

⁶ Wen sumadi get put outa di kanggrigieshan dat no miin tu se di elda dem a-go tap chrai fi elp dem fi kom bak tu Jeuova. Di chrii elda dem we miit wid di sumadi we get put outa di kanggrigieshan a-go mek dem nuo wa dem fi du so dat dem kyan kom bak iina di kanggrigieshan agen. Bot a no onggl dat dem a-go du, nof a di taim dem a-go tel di sumadi se dem a-go av wan miitn wid dem agen afta kopl mont fi si ef dem chienj dem wiez, an ef di sumadi se ‘Ye,’ dem wi miit wid dem agen. Afta dem miit wid dem, di elda dem a-go beg dem iina wan nais wie fi ton we fram dem sin an staat du wa rait an kom bak tu Jeuova. An iivn ef di sumadi no fiil fi chienj dem wiez da taim de, di elda dem stil a-go chek op pan dem evri nou an den.

7. A ou di elda dem kyan du laik Jeuova an shuo se dem fiil it fi piipl wen dem get put outa di kanggrigieshan? (Jerimaiya 3:12)

⁷ Wen di elda dem a chrai fi elp sumadi we get put outa di kanggrigieshan, dem chrai fi tek dem taim wid dem an shuo se dem fiil it fi dem laik ou Jeuova fiil it fi dem. Laik bak iina di taim wen di Izrelait dem did ton we fram Jeuova, a Jeuova fos did du sopm fi shuo se im redi fi elp dem fi kom bak, an im du dat bifuo dem did du notn fi shuo se dem ton we fram dem sin an redi fi du wa rait. An jos laik wa wi did luk pan aredi iina di sekan lesn iina da Wachtowa ya, Jeuova did shuo se im fiil it fi piipl an a tek taim wid dem wen im tel im prafit Oziya fi tek bak im waif iivn duo shi did stil a gi im bon. (Oz. 3:1; Mal. 3:7) So jos laik Jeuova, di elda dem riili waahn fi elp sumadi we a sin bad fi kom staat sorv Jeuova agen, an dem naa go du notn we a-go mek it aad fi dem du dat.​—Riid Jerimaiya 3:12.

8. Ou di tuori we Jiizas tel wi bout di faada we im bwai pikni laas mek wi si muor ou Jeuova fiil it fi piipl an redi fi paadn dem? (Luuk 15:7)

⁸ Iina di sekan lesn iina da Wachtowa ya, wi luk pan wan tuori we Jiizas did tel wi bout wan man bwai pikni we did laas. Wen di faada si im a kom, im “ron go og im op an kis im.” (Luuk 15:20) Im faada we lov im did redi fi paadn im, im neehn wiet pan im bwai pikni fi beg im fi paadn im. A siem so di elda dem shuo se dem redi fi paadn di wan dem we lef di kanggrigieshan. Dem waahn dem wan de fi kom staat sorv Jeuova agen. (Luuk 15:22-24, 32) Evribadi iina evn an di breda an sista dem iina di kanggrigieshan api bad wen sumadi we did a sin bad staat sorv Jeuova agen!​—Riid Luuk 15:7.

9. Wa Jeuova se fi shuo se im waahn fi elp di wan dem we sin gens im?

⁹ Bies pan wa wi luk pan aredi, wi kyan si klier klier se Jeuova no put op wid piipl we no ton we fram dem sin. Bot dat no miin tu se im naa go av notn fi du wid dem, kaa im waahn dem fi ton we fram dem sin an staat du wa rait agen. Oziya 14:4 mek wi nuo ou Jeuova fiil bout di wan dem we ton we fram dem sin wen im se: “Mi a-go elp dem fi ton we fram dem bad wiez so dat dem kyan staat sorv mi agen. An mi a-go mek op mi main miself fi lov dem, kaa mi no beks wid dem agen.” So dis mek di elda dem si wa dem kyan du wen sumadi du notn we shuo se dem redi fi ton we fram dem sin. An dis kyan elp di wan dem we tap sorv Jeuova tu fi si se dem fi kom bak tu im kwik kwik.

10-11. A wa di elda dem a-go du fi chrai fi elp di sumadi we get put outa di kanggrigieshan fram lang taim?

¹⁰ Wa bout di wan dem we get put outa di kanggrigieshan fi wol iip a ier nou? Nof a dem mait-a tap du di rang sitn we dem did get put outa di kanggrigieshan fa. An som a dem mait-a no iivn memba wa dem did du we mek dem get put outa di kanggrigieshan. No mata wa, di elda dem fi chrai fi go luk fi dem wan ya. An wen dem go luk fi dem, dem fi prie wid dem an beg Jeuova fi elp dem fi kom bak iina di kanggrigieshan, an mek dem nuo se dem wel waahn dem fi kom bak kom sorv Jeuova agen. An wi nuo se ef sumadi no de iina di kanggrigieshan fi wol iip a ier, dem mait-a no so chrang iina di sitn dem we dem biliiv iina. So ef di sumadi mek di elda dem nuo se dem wuda waahn fi kom bak iina di kanggrigieshan, di elda dem mait-a aks sumadi fi stodi di Baibl wid dem, aal bifuo dem mek di breda an sista dem nuo se da sumadi de a wan Jeuova Witnis agen. So a di elda dem wuda afi aks sumadi fi stodi wid dem.

¹¹ Di elda dem kyan fala Jeuova an kain tu di wan dem we get put outa di kanggrigieshan wen dem go luk fi dem an chrai fi mek dem kom bak kom sorv Jeuova. An wen di sumadi ton we fram dem sin an staat du wa rait agen, di elda dem fi kwik fi mek di ada breda an sista dem iina di kanggrigieshan nuo se da sumadi de a wan Jeuova Witnis agen.​—2 Kor. 2:6-8.

12. (a) A wen an wen di elda dem afi mek shuor se dem nuo wa dem a du? (b) Wa mek wi no fi fiil se Jeuova naa go eva paadn som kain-a piipl? (Luk pan di said paint tu.)

¹² Som a di taim, di elda dem afi nuo wa dem a du bifuo dem mek som piipl kom bak iina di kanggrigieshan. Laik sumadi we yuus tu moles pikni ar sumadi we tap sorv Jeuova an chrai fi mek ada piipl tap sorv Jeuova tu, ar sumadi we did plan op fi get rid a di sumadi we dem marid tu. Di elda dem wuda waahn fi mek shuor se da sumadi de riili ton we fram di rang sitn dem we dem du. (Mal. 2:14; 2 Tim. 3:6) A di elda dem av di wok fi tek kier a Jeuova shiip dem. Bot aal a wi fi memba se enibadi we riili sari fi di rang sitn we dem du an ton we fram dem sin an staat du wa rait agen, Jeuova redi fi tek dem bak. So aalduo di elda dem afi go nuo wa dem a du wen dem a diil wid dem kain-a piipl de we get put outa di kanggrigieshan, dem no fi se Jeuova naa go eva paadn dem kain-a piipl de.b​—1 Pii. 2:10.

A WA DI BREDA AN SISTA DEM IINA DI KANGGRIGIESHAN KYAN DU?

13. A ou di wie ou wi chriit sumadi we di elda dem karek difrant fram di wie ou wi chriit sumadi we get put outa di kanggrigieshan?

¹³ Jos laik wa wi did luk pan iina di lesn bifuo da wan ya, som a di taim wan elda a-go go pan di stiej an mek di breda an sista dem iina di kanggrigieshan nuo se dem karek sumadi. An wen dem du dat, di ada breda an sista dem a-go stil kip kompni wid da breda ar sista de kaa dem nuo se im sari fi di rang we im did du an ton we fram im sin an staat fi du wa rait agen. (1 Tim. 5:20) So da sumadi de a stil paat a di kanggrigieshan, an dem a-go niid di ada breda an sista dem fi elp push dem fi gwaan sorv Jeuova. (Iib. 10:24, 25) Bot a no di siem wie wi a-go diil wid sumadi we get put outa di kanggrigieshan. Wi ‘no av notn fi du wid da sumadi de,’ wi “no iivn iit wid dem piipl de.”​—1 Kor. 5:11.

14. Ou wi kyan yuuz di ting dem we wi lorn fram di Baibl fi nuo ou fi chriit di wan dem we get put outa di kanggrigieshan? (Luk pan di picha tu.)

¹⁴ Wen sumadi get put outa di kanggrigieshan, it no miin tu se wi naa go pie dem no main. Bot wi stil naa go kip kompni wid dem. So bies pan wa wi lorn fram di Baibl, wi kyan yuuz wi kanchens fi mek op wi main ef wi a-go invait di sumadi we get put outa di kanggrigieshan fi kom a miitn. Da sumadi de kuda bi wan a yu fambili ar wan a yu kluos kluos fren. Wa yu a-go du ef dem kom a di miitn? Fos taim wi wudn se oudi tu di sumadi wen dem kom a miitn, bot nou wi a lorn se evribadi fi yuuz wa dem lorn fram di Baibl fi nuo wa fi du wen it kom aan tu dis. So som a wi mait-a fiil se it aarait fi wi se oudi tu di sumadi an mek dem nuo se wi api se dem kom. Bot wi naa go de de a chat wid dem lang an a bos big laaf wid dem.

15. A wa kain-a piipl 2 Jan 9a, 10,11 a taak bout? (Luk pan di paat we niem “A Di Siem Kain-a Sin Jan An Paal Did A Taak Bout?”)

¹⁵ Bot som piipl mait-a a wanda se, ‘Ef wi se oudi tu di wan dem we get put outa di kanggrigieshan, dat no miin tu se wi gilti a di siem wikidnis dem we dem a du?’ (Riid 2 Jan 9a, 10,11.) Di wie ou da skripcha ya rait mek wi nuo se it a taak bout di wan dem we tap sorv Jeuova an a chrai fi mek ada piipl tap sorv im tu, ar di wan dem we a chrai fi mek ada piipl du di wikid sitn dem we dem a du. (Rev. 2:20) So ef sumadi a du dem sitn ya, di elda dem naa go luk fi dem. Ye, wi nuo se di sumadi kyan tap du di wikid sitn dem we dem a du, bot til da die de wi naa go se oudi tu da sumadi de ar invait dem fi kom a wi miitn dem.

SHUO SE YU FIIL IT FI PIIPL AN REDI FI PAADN DEM LAIK JEUOVA

16-17. (a) Wa Jeuova waahn di wan dem we a sin bad fi du? (Iziikel 18:32) (b) A ou di elda dem a shuo se dem a wok wid Jeuova an a chrai fi elp di wan dem we a sin bad?

¹⁶ Di lesn dem we wi luk pan iina da Wachtowa ya mek wi si se Jeuova no api fi kil aaf nobadi. (Riid Iziikel 18:32.) Im waahn di wan dem we a sin bad fi ton we fram dem sin an staat du wa rait agen. (2 Kor. 5:20) An a das wai fram wie bak wen, im aalwiez a waan im piipl dem we ton we fram im fi tap du wa bad an staat sorv im agen. An a di siem ting im du wid di difrant difrant piipl dem we ton we fram im tu. Di elda dem iina di kanggrigieshan av da big wok ya fi wok wid Jeuova fi elp dem piipl ya fi ton we fram dem sin an staat du wa rait agen.​—Ruo. 2:4; 1 Kor. 3:9.

¹⁷ Jos tingk ou evribadi iina evn api wen sumadi ton we fram dem sin an staat du wa rait. Wi Faada, Jeuova, api tu evritaim wan a im shiip dem we did laas kom bak iina di kanggrigieshan. An it mek wi lov Jeuova muor wen wi tingk bout ou im gud an kain tu wi aalduo wi no dizorv it.​—Luuk 1:78.