A Ou Jeuova Waahn Di Kanggrigieshan Fi Chriit Di Wan Dem We Sin Bad?

1. Wa Jeuova waahn evribadi fi du?

JEUOVA mek wi iina wan wie so wi kyan mek op wi main bout tingz fi wiself. Di bigis ting we sumadi kyan mek op dem main fi du a fi prie tu Jeuova an mek im nuo se dem a-go gi dem laif tu im so dat dem kyan bi paat a im fambili we a worship im. An a dat Jeuova waahn evribadi fi du kaa im lov piipl an im waahn gud fi dem, an im waahn im an dem fi ton fren so dat dem kyan liv fi eva.​—Dyuu. 30:19, 20; Gya. 6:7, 8.

2. A ou Jeuova fiil bout di wan dem we naa ton we fram dem sin an staat du wa rait? (1 Jan 2:1)

² Jeuova naa go fuos nobadi fi sorv im. Im waahn evribadi fi mek op dem main fi du dat fi demself. Bot wa ef sumadi we gi dem laif tu Gad an baptaiz en op sin bad? Di Baibl mek wi nuo se ef da sumadi de no ton we fram dem sin an staat du wa rait, dem fi put dem outa di kanggrigieshan. (1 Kor. 5:13) Bot aal wen di kanggrigieshan du dat, Jeuova waahn da sumadi de fi staat sorv im agen. An a das wai im mek Jiizas kom ded fi wi so dat di sumadi we ton we fram dem sin an staat du wa rait kyan get paadn fi dem sin. (Riid 1 Jan 2:1.) Kaa Jeuova lov dem, im beg di piipl dem we sin fi ton we fram dem sin an staat du wa rait agen.​—Zak. 1:3; Ruo. 2:4; Jmz. 4:8.

3. A wa wi a-go luk pan iina da lesn ya?

³ Jeuova waahn wi fi fiil di wie ou im fiil bout sin an fi fiil di siem wie laik im bout di wan dem we sin tu. Da lesn ya a-go elp wi fi si ou wi kyan du dat. Wen yu a riid it, luk out fi dem chrii tingz ya: (1) Ou di kanggrigieshan iina Korint bak iina Baibl taim did chriit wan man we did sin bad? (2) Wa di apasl Paal did tel dem fi du wid da man de we did sin bad an ton we fram im sin an staat du wa rait? (3) Wa da tuori ya tel wi bout ou Jeuova fiil bout sumadi we did a sorv im we sin bad?

WA DEM WUDA DU BAK IINA BAIBL TAIM WEN SUMADI SIN BAD?

4. Wa did a gwaan iina di kanggrigieshan? (1 Korintiyan 5:1, 2)

⁴ Riid 1 Korintiyan 5:1, 2. Wen Paal did a go roun di tord taim iina im mishineri wok, im did ier bout som bad sitn we did a gwaan iina di kanggrigieshan we did jos staat op iina Korint. Wan a di breda dem iina di kanggrigieshan did a sliip wid im stepmada. Wa im did a du did so “bad dat no iivn di piipl dem we no nuo Gad wuda du dem” sitn de. Di breda an sista dem iina di kanggrigieshan no onggl did a put op wid wa im did a du, bot it luk laik dem did fiil gud bout wa im did a du tu. Wen dem du dat, dem mosi did fiil se dem did a shuo ou Gad redi fi paadn piipl. Bot Jeuova no aarait wid it wen im piipl du dem kain-a sitn de. Di man did bier fies wid wa im a du so dat did a kaaz di kanggrigieshan fi get bad niem. An miebi im did a mek di ada breda an sista dem we a spen taim wid im fiil se notn no rang wid di sitn dem we im a du. Bot wa Paal did tel di breda dem iina di kanggrigieshan fi du?

5. A wa Paal did tel di breda dem fi du, an wa im did miin bai dat? (1 Korintiyan 5:13) (Luk pan di picha tu.)

⁵ Riid 1 Korintiyan 5:13. Jeuova did mek Paal rait wan leta tu di breda dem iina di kanggrigieshan fi mek dem nuo se dem fi ron di man fram outa di kanggrigieshan. An Paal did tel di breda dem iina di kanggrigieshan se dem “no [fi] av notn fi du wid” im. So dis miin tu se dem ‘nat iivn wuda iit wid im.’ (1 Kor. 5:11) Kaa ef yu sidong an a iit fuud wid sumadi, dat miin tu se yu a-go en op a spen nof taim wid dem. So Paal did miin se dem no fi spen nof taim wid dem kain-a piipl de. Wen di breda an sista dem du dat, it wuda kip dem bad sitn de outa di kanggrigieshan. (1 Kor. 5:5-7) An pan tap a dat, wen dem no kip kompni wid im, it mait-a kaaz im fi si se im riili naa du di sitn dem we Jeuova waahn im fi du, an mek im fiil shiem an ton we fram im sin.

6. A wa di breda an sista dem iina di kanggrigieshan did du afta dem get Paal leta, an wa dis did kaaz di man fi du?

⁶ Paal did a wanda ou di breda an sista dem wuda fiil wen dem get di leta, bot Taitos did mek im nuo se dem did fiil gud bout it. (2 Kor. 7:6, 7) Im kuda se dat kaa dem du di sitn dem we Paal tel dem fi du iina di leta. Som mont afta dat, di man we did a du rang sitn iina di kanggrigieshan ton we fram im sin an staat du wa rait. So wi si se im chienj im wiez dem an staat fi du di sitn dem we Jeuova se rait. (2 Kor. 7:8-11) So nou dat im chienj im wiez, a wa Paal wuda tel di breda an sista dem fi du?

A OU DI BREDA AN SISTA DEM IINA DI KANGGRIGIESHAN DID FI CHRIIT DI MAN WE TON WE FRAM IM SIN AN STAAT DU WA RAIT?

7. Kaa dem put di man we did a sin bad outa di kanggrigieshan, wa gud did kom outa dat? (2 Korintiyan 2:5-8)

⁷ Riid 2 Korintiyan 2:5-8. Iina di leta, Paal did se: “Muos a unu did ponish da sumadi de an di ponish we unu ponish im, it inof.” So Paal did a mek dem nuo se di jraa op we di man get did du wa it fi du​—an dat a fi mek im ton we fram im sin an staat du wa rait.​—Iib. 12:11.

8. A wa els Paal did tel di breda an sista dem fi du?

⁸ Paal tel di breda an sista dem se: “Unu fi paadn im an kain tu im” an “shuo im se unu stil lov im.” So Paal neehn onggl waahn dem fi tek di man bak iina di kanggrigieshan, bot im did waahn dem fi du tingz an se tingz we mek im si se dem riili paadn im an lov im. So dem wuda mek im si se dem api fi av im bak iina di kanggrigieshan.

9. A wa mek som mait-a neehn fain it iizi fi paadn di man we ton we fram im sin an staat du wa rait?

⁹ Di tuori bout di man we did ton we fram im sin an staat du wa rait no tel wi ef a evribadi iina di kanggrigieshan did api se im kom bak. Kaa wen yu tingk bout it, wa im did du did kaaz prablem fi evribadi iina di kanggrigieshan, an it mait-a aal did mek som a dem fiil shiem tu. So som a dem mait-a fiil se it no fier se im get fi kom bak iina di kanggrigieshan wen dem di de a chrai aad fi liv op an du wa rait. (Luk pan Luuk 15:28-30.) Bot wa mek a did wan big ting fi di breda an sista dem iina di kanggrigieshan mek da breda ya si se dem riili lov im?

10-11. Wa kuda apm ef di elda dem neehn paadn di man we sin?

¹⁰ Tingk bout wa kuda apm ef di elda dem neehn lou di man, we did ton we fram im sin an staat du wa rait, fi kom bak iina di kanggrigieshan, ar ef afta im kom bak iina di kanggrigieshan di breda an sista dem no du notn fi mek im si se dem stil lov im. Kaa ef dem no du dat, im kuda “get so sad dat im gi op.” An im mait-a fiil se im naa go kyan sorv Jeuova agen. Im mait-a iivn tap chrai fi ton Jeuova fren agen tu.

¹¹ An wan neda ting we kuda apm we kuda mek it wosa fi dem ef dem no paadn di man we kom bak iina di kanggrigieshan, a dat it kuda mek dem an Jeuova no fren tu. Kaa memba se Jeuova paadn piipl we du wa rang wans dem ton we fram dem sin an staat du wa rait. Bot Sietan, a im wikid an no waahn nobadi paadn piipl. So ef dem neehn paadn di sumadi we kom bak an staat du wa rait, a Sietan dem wuda mek de yuuz dem fi mek di man no kom bak kom sorv Jeuova.​—2 Kor. 2:10, 11; Ifii. 4:27.

12. Ou di breda an sista dem iina di kanggrigieshan kuda du laik Jeuova?

¹² Di breda an sista dem iina Korint kuda du laik Jeuova an paadn piipl wen dem ton we fram dem sin an staat du wa rait an shuo se a no Sietan dem a fala. Luk pan wa som a di man dem we Jeuova yuuz fi rait di Baibl se bout Jeuova. Laik Dievid did se: ‘Jeuova gud an eva redi fi paadn piipl.’ (Sa. 86:5) An Maika mek wi nuo se ‘nobadi no tan laik Jeuova we redi fi paadn piipl.’ (Mai. 7:18) An Aizaiya se: “Di wikid man fi tap du di wikid sitn dem we im a du, an im fi tap tingk bout di bad sitn dem we im a tingk bout; im fi staat du wa Jeuova se im fi du agen, an Im wi gud an kain tu im, kaa fi wi Gad eva redi fi figiv piipl, no mata wa dem du.”​—Aiz. 55:7.

13. Wa mek it mek sens fi tek iin bak sumadi iina di kanggrigieshan we sari fi wa dem du an staat du wa rait agen? (Luk pan di paat we niem “A Umoch Taim Did Paas Bifuo Dem Tek Iin Bak Di Man Iina Di Kanggrigieshan Iina Korint?”)

¹³ Ef di breda an sista dem iina Korint did a-go du laik Jeuova, dem wuda afi mek di man nuo se dem api se im kom bak an dem lov im siem wie. So wen di breda an sista dem tek iin bak di man iina di kanggrigieshan, dem wuda shuo se dem a ‘du aal a wa Paal se dem fi du.’ (2 Kor. 2:9) Aalduo a onggl kopl mont did paas sins di man get put outa di kanggrigieshan, im did lorn fram wa did apm tu im an did staat fi du wa rait agen. So it wudn mek no sens fi kip im outa di kanggrigieshan an no tek im iin bak.

DU LAIK JEUOVA WE FIER AN REDI FI PAADN PIIPL

14-15. Wa wi kyan lorn fram ou dem did diil wid di man we did iina Korint? (2 Piita 3:9) (Luk pan di picha tu.)

¹⁴ Jeuova did mek dem rait dong ou dem diil wid wa did apm iina di kanggrigieshan iina Korint “fi tiich wi.” (Ruo. 15:4) An da tuori de mek wi si se Jeuova no put op wid piipl we a sin bad iina di kanggrigieshan. Im no fiil se sumadi we a sin bad an naa ton we fram dem sin “fi get paadn” an tan iina di kanggrigieshan wid di ada breda an sista dem we a du wa rait. Ye, Jeuova a wan Gad we redi fi paadn piipl, bot im no put op wid rangz. Im naa go chienj wa im se rait an wa rang fi nobadi. (Juud 4) Ef Jeuova did fi du dat, im wudn shuo se im a wan Gad we gud an kain tu evribadi kaa it wuda mek tingz bad fi evribadi iina di kanggrigieshan.​—Pr. 13:20; 1 Kor. 15:33.

¹⁵ Bot a no laik se Jeuova waahn fi kil aaf nobadi. Wa im waahn fi du a fi siev piipl. So wen im si sumadi tap du di bad sitn dem we dem a du an waahn fi ton im fren agen, im paadn dem. (Izii. 33:11; riid 2 Piita 3:9, NWT.) So wen di man iina Korint ton we fram im sin an staat fi du wa rait, Jeuova mek Paal rait wan leta tu di kanggrigieshan fi mek dem nuo se dem fi paadn di man an tek im bak iina di kanggrigieshan.

16. Ou yu fiil bout ou Jeuova mek dem diil wid di man we did iina Korint?

¹⁶ Wen wi luk pan ou dem did diil wid wa did apm wid di man iina Korint, it mek wi si se Jeuova a wan Gad we lov im piipl dem an im aalwiez du wa rait an fier. (Sa. 33:5) An dat push wi fi priez Jeuova, no chuu? Kaa wen wi tingk bout it, aal a wi a sina, an aal a wi niid im fi paadn wi. So evri singgl wan a wi fi tangk Jeuova fi sen im Bwai Pikni fi kom ded fi wi kaa a dat mek Im kyan paadn wi. It riili mek wi fiil gud fi nuo se Jeuova riili lov im piipl dem an im waahn wa gud fi dem!

17. A wa a di kwestiyan dem we wi a-go get di ansa fa iina di neda lesn dem?

¹⁷ A ou di elda dem fi diil wid sumadi we sin bad tide? An ou dem kyan shuo se dem a du laik Jeuova wen dem a elp sumadi fi ton we fram dem sin dem an fi staat du wa rait? An ou di breda an sista dem iina di kanggrigieshan fi chriit di sumadi wen di elda dem put dem outa di kanggrigieshan? An ou dem fi chriit dem afta dem tek dem bak iina di kanggrigieshan? Wi a-go get di ansa fi dem kwestiyan ya iina di neks lesn dem.