Ou Di Elda Dem Kyan Shuo Se Dem Lov Di Wan Dem We Sin Bad An Chriit Dem Iina Wan Kain Wie?

1. Wa wi nuo se som a di wan dem we sin bad kyan du?

IINA di lesn bifuo da wan ya, wi si ou di apasl Paal did elp di breda dem iina di kanggrigieshan a Korint fi si se dem fi put out di man outa di kanggrigieshan we did sin bad an neehn sari fi wa im du. Bot di mien skripcha fi da lesn ya mek wi si se wi kyan elp sumadi we sin bad fi ton we fram dem sin an staat du wa rait agen. (Ruo. 2:4) Bot ou di elda dem kyan elp dem fi du dat?

2-3. Ef wi fain out se wan breda ar wan sista sin bad, wa wi fi du, an wa mek?

² Bifuo di elda dem kyan elp sumadi we sin bad, dem niid fi nuo a wa di sumadi did du. So ef wi nuo se wan breda ar sista du sitn we kyan mek dem get put outa di kanggrigieshan, wa wi fi du? Wi fi tel dem fi go taak tu di elda dem bout it.​—Aiz. 1:18; Aks 20:28; 1 Pii. 5:2.

³ Bot ef di sumadi mek op dem main se dem naa go tel di elda dem wa dem du, den wi afi go mek di elda dem nuo wa di sumadi du so dat dem kyan elp dem. Wi du dis kaa wi lov wi breda an sista dem an wi no waahn notn apm tu dem. Kaa ef di sumadi gwaan du di rang sitn we dem a du, it a-go mek dem an Jeuova no fren agen an it a-go mek di ada breda an sista dem iina di kanggrigieshan get bad niem tu. So a kaa wi lov Jeuova an di sumadi we sin bad mek wi du it.​—Sa. 27:14.

A WA DI ELDA DEM KYAN DU FI ELP SUMADI WE SIN BAD?

4. Wen di elda dem miit wid di sumadi we sin bad, wa dem waahn fi elp dem fi du?

⁴ Wen sumadi iina di kanggrigieshan sin bad, di elda dem pik chrii elda fi elp dem.a Dem elda ya fi ombl an nuo wa dem kyan du fram wa dem kyaahn du. Kaa aalduo dem a-go a chrai fi elp di sumadi fi ton we fram dem sin an staat du wa rait, dem nuo se dem kyaahn fuos dem fi du dat. (Dyuu. 30:19) An dem nuo se a no evribadi we sin bad a-go stie laik King Dievid we did sari fi wa im du an staat du wa rait agen. (2 Sam. 12:13) Kaa som piipl we sin bad mait-a mek op dem main se dem naa du wa Jeuova waahn dem fi du. (Jen. 4:6-8) Bot wa di elda dem riili waahn fi du a fi elp di sumadi we sin bad fi ton we fram dem sin an staat du wa rait agen. Wa di elda dem fi memba wen dem a elp di sumadi we sin bad?

5. A ou di elda dem fi diil wid sumadi we sin bad? (2 Timoti 2:24-26) (Luk pan di picha tu.)

⁵ Di elda dem memba se di sumadi we sin bad wot nof tu Jeuova an dem si di sumadi az wan a Jeuova shiip we laas. (Luuk 15:4, 6) So wen di elda dem a elp di sumadi, dem naa go rof dem op, dem a-go taak tu dem iina wan nais wie. An dem naa go jos miit wid dem kaaz a sitn we dem afi du, bot dem a-go diil wid dem laik ou 2 Timoti 2:24-26 se dem fi dwi’it. (Riid.) So wen dem a chrai elp di sumadi fi chienj dem wiez, dem fi tek dem taim wid dem an chriit dem kain.

6. A wa di elda dem a-go du bifuo dem miit wid di sumadi we sin bad? (Ruoman 2:4)

⁶ Bifuo dem go miit wid di sumadi we sin bad, di elda dem tek dem taim fi luk pan tingz di wie ou Jeuova wuda luk pan it. Dem memba ou Paal se: “Gad kain tu unu, kaaz im chrai fi get unu fi ton we fram sin an sari fi di rang we unu du.” (Riid Ruoman 2:4.) Di elda dem fi memba se a Jiizas Krais a elp dem wid di wok we dem a du. (Aiz. 11:3, 4; Mat. 18:18-20) So bifuo di chrii elda dem miit wid di sumadi, dem a-go prie an aks Jeuova fi elp dem fi si ou dem kyan elp di sumadi fi ton we fram dem sin an staat du wa rait. An dem a-go yuuz di Baibl an di buk an pamplet dem fi si ou dem kyan elp di sumadi, an dem a-go prie an beg Jeuova fi elp dem fi nuo wa fi du. Dem a-go chrai an si wa dem niid fi nuo bout ou di sumadi did gruo, we mait-a mek di sumadi tingk bout tingz di wie ou dem tingk bout tingz, an wa mek dem mait-a gwaan sortn wie.​—Pr. 20:5.

7-8. Wen di elda dem miit wid sumadi we sin bad, ou dem kyan du laik Jeuova an tek taim wid dem?

⁷ Di elda dem tek dem taim wid di sumadi laik ou Jeuova wuda tek im taim wid dem. Dem tingk bout ou Jeuova diil wid piipl we sin bak iina Baibl taim. Laik dem kyan tingk bout ou Jeuova did tek im taim wid Kien an waan im bout wa wuda apm ef im neehn ton we fram im sin, an Jeuova mek im si se ef im ton we fram im sin, tingz wuda wok out gud fi im. (Jen. 4:6, 7) An Jeuova did sen di prafit Nietan fi yuuz wan tuori fi elp Dievid fi ton we fram im sin. (2 Sam. 12:1-7) An a nof taim Jeuova did afi sen im prafit dem fi go waan im piipl dem iina Izrel fi ton we fram dem sin. (Jer. 7:24, 25) So im neehn wiet pan dem fi ton we fram dem sin bifuo im chrai fi elp dem. A Jeuova fos du sopm fi elp dem.

⁸ Wen di elda dem a chrai fi elp sumadi we sin bad, dem chrai fi chriit dem di wie ou Jeuova wuda chriit dem an “tek taim wid dem” jos laik wa 2 Timoti 4:2 se. An wen a sumadi we no so iizi fi elp, di elda wuda aalwiez afi go chrai kanchuol imself an chrai an tek im taim so dat im kyan elp di sumadi we sin fi waahn fi du wa rait. An ef dem mek di sumadi fiil se dem kyaahn bada wid dem, den dat mait-a kaaz di sumadi fi no waahn fi sorv Jeuova agen.

9-10. A ou di elda dem kyan elp di sumadi we sin fi tingk bout wa dem du?

⁹ Di elda dem chrai fi fain out wa mait-a kaaz di sumadi fi sin. Laik, dem mait-a waahn fi fain out ef di sumadi no so chrang iina wa dem biliiv iina kaa dem naa du dem uona Baibl stodi ar go iina fiil sorvis agen. Ar ef a bikaa dem naa prie tu Jeuova so aafn agen ar ef di sumadi dis a prie tu Jeuova an it no miin notn tu dem. Ar ef a kaa dem a ron dong di sitn dem we Jeuova se no gud fi dem. Ar ef dem a wach sortn tingz ar a du sortn tingz fi fon we Jeuova se rang an a kip kompni wid piipl we naa sorv Jeuova. So di elda dem afi go chrai an si ef a non a dem sopm ya mek di sumadi du wa dem du an ef di sumadi nuo se wa dem a du kyan mek dem an Jeuova no fren agen.

¹⁰ Di elda dem kyan aks di sumadi som kwestiyan we mek dem tingk bout wa dem did du. Bot dem no fi waahn faas iina di sumadi bizniz. (Pr. 20:5) Pan tap a dat, dem kyan yuuz wan tuori fi elp di sumadi fi si se wa dem did du did riili rang, jos laik we Nietan did du wid Dievid. So miebi wen dem a av di fos miitn wid di sumadi, di sumadi mait-a staat fi fiil sari bout wa im did du an dem mait-a ton we fram dem sin an staat du wa rait agen.

11. A ou Jiizas did chrai fi elp di wan dem we sin?

¹¹ Di elda dem chrai fi du laik Jiizas. Afta Jiizas kom bak alaiv an did de a evn an a chrai fi elp Saal, im aks im se: “Saal, Saal, wa mek yu a mek mi sofa?” So wen Jiizas aks Saal da kwestiyan de, im did a chrai fi elp im fi tingk bout di bad sitn dem we im did a du. (Aks 9:3-6) An wen im did a taak bout “da uman de, Jezibel,” Jiizas se: “Mi gi ar taim fi chienj ar wiez an fi shuo se shi sari fi di rang we shi a du.”​—Rev. 2:20, 21.

12-13. Wa di elda dem kyan du fi shuo se dem a gi di sumadi we sin taim fi chienj dem wiez? (Luk pan di picha tu.)

¹² Fi shuo se dem a fala Jiizas, di elda dem naa go kwik fi tingk se di sumadi we sin naa go chienj. Wen di chrii elda dem miit wid di sumadi fi di fos taim, dem mait-a redi fi chienj dem wiez. Bot fi som, dem mait-a niid muor taim. So di elda dem mait afi plan wan neda miitn fi miit wid dem wan ya agen. Kaa miebi afta di fos miitn, dem mait-a staat fi tingk bout wa di elda dem did se tu dem. An dem mait-a ombl demself an go prie tu Jeuova an aks im fi elp dem fi chienj dem wiez. (Sa. 32:5; 38:18) So wen di elda dem av di sekan miitn wid di sumadi, di sumadi mait-a gwaan difrant dan ou dem did gwaan a di fos miitn.

¹³ Wen di elda dem a chrai fi elp di sumadi fi ton we fram dem sin an staat du wa rait, dem fi tek dem taim wid dem an shuo se dem fiil it fi dem. An di elda dem fi prie tu Jeuova an aks im fi bles wa dem a du. An dem uop se di sumadi wi si se wa dem a du riili rang, so dat dem kyan ton we fram dem sin an staat du wa rait agen.​—2 Tim. 2:25, 26.

14. A uu fi get di big op wen sumadi ton we fram dem sin, an wa mek wi se so?

¹⁴ So aal ef a wan sumadi we sin ton tu Gad agen, a sitn we mek wi api! (Luuk 15:7, 10) Bot yu tingk se a di elda dem fi get di big op wen dat apm? Memba se Paal did rait an se di piipl dem we sin, “Gad mait-a mek dem chienj dem wiez.” (2 Tim. 2:25) So wi si se a Jeuova fi get di big op wen sumadi chienj dem wiez kaaz a im elp di sumadi fi chienj di wie ou dem tingk bout tingz an ou dem yuus tu gwaan. Paal tel wi bout som nais tingz we apm wen sumadi ton we fram dem sin an staat fi du wa rait. Im se it mek di sumadi get fi nuo di chuut beta, an it wi elp dem fi staat tingk bout tingz iina di rait wie agen, an it wi mek dem kyan get outa di Devl chrap dem.​—2Tim 2:26.

15. Wa di elda dem fi du fi gwaan elp sumadi we ton we fram dem sin?

¹⁵ Afta di sumadi ton we fram dem sin an staat du wa rait, di elda dem a-go stil plan fi go luk fi di sumadi so dat dem kyan elp dem fi get chrang iina wa dem biliiv iina an kip we fram Sietan chrap dem an gwaan du wa rait. (Iib. 12:12, 13) An wi nuo se di elda dem naa go tel nobadi bout wa di sumadi did du. Bot wa di elda dem mait-a afi mek di ada breda an sista dem iina di kanggrigieshan nuo?

“UNU FI KAREK DEM INFRONTA EVRIBADI”

16. A uu a di “evribadi” iina 1 Timoti 5:20 we Paal taak bout?

¹⁶ Riid 1 Timoti 5:20. Wen Paal did rait dem wod ya, a Timoti im did a rait dem tu. An Timoti a did wan elda laik Paal. Paal did a mek im nuo ou fi diil wid di wan dem we did a liv iina sin. So uu a di “evribadi” we Paal did a taak bout? Paal neva did a taak bout evribadi iina di kanggrigieshan, bot im did a taak bout di wan dem we nuo bout di bad sitn dem we di sumadi did a du. Som a dem miebi did si wa di sumadi did a du, ar som mait-a nuo bout di sin kaa di sumadi we sin did tel dem wa dem did du. So a dem wan ya di elda dem a-go mek nuo se dem miit wid di sumadi we sin an karek dem.

17. Ef nof piipl iina di kanggrigieshan nuo bout wan siiros sin we sumadi du ar ef nof piipl a-go fain out bout it, wa di elda dem a-go mek di kanggrigieshan nuo, an wa mek?

¹⁷ Som a di taim a mait-a nof piipl iina di kanggrigieshan nuo se di sumadi a sin, ar kaaz a wa gwaan, nof a dem a-go nuo wa apm. So ef dat apm, di “evribadi” we Paal taak bout, a wuda evribadi iina di kanggrigieshan. So wan a di elda dem wuda afi go op pan di stiej an mek evribadi iina di kanggrigieshan nuo se dem karek da sumadi de. An wen dem du dis, dem du it “fi waan di res a piipl dem,” so dat di res a dem no en op sin tu.

18. Wa di elda dem a-go du ef wan yong sumadi we baptaiz bot we no kech 18 yet sin bad? (Luk pan di picha tu.)

¹⁸ Wa di elda dem a-go du ef wan yong sumadi we baptaiz an dem no kech 18 yet sin bad? Di elda dem iina di kanggrigieshan a-go pik tuu elda fi miit wid di yong sumadi an dem mada an faada we a sorv Jeuova.b Di elda dem a-go chrai fi fain out wa di mada an faada a du fi elp di pikni aredi so dat dem kyan ton we fram dem sin an du wa rait. Ef di pikni a lisn tu dem mada an faada an a du wa dem se, di tuu elda dem mait-a na’afi du notn els. Kaa wen yu tingk bout it, a di mada an faada Jeuova gi di rait fi tiich dem pikni an karek dem. (Dyuu. 6:6, 7; Pr. 6:20; 22:6; Ifii. 6:2-4) Afta dat, di elda dem a-go chek wid di pikni mada an faada fi mek shuor se dem a gi di pikni di elp we dem niid. Ef wan pikni naa tek di elp we dem a get an stil a sin bad, di elda dem a-go pik chrii elda fi miit wid di pikni an im mada an faada we a sorv Jeuova.

‘JEUOVA JENGKL AN GUD AN KAIN’

19. Wen di elda dem a elp sumadi we sin, ou dem shuo se dem a chrai fi du tingz laik Jeuova?

¹⁹ Di chrii elda dem we dem pik fi elp sumadi we sin bad fi memba se Jeuova a yuuz dem fi protek di ada breda an sista dem iina di kanggrigieshan fram di wan dem we no waahn du wa im se dem fi du. (1 Kor. 5:7) An dem waahn fi du wa dem kyan du fi elp di sumadi we sin fi ton we fram dem sin an staat du wa rait. Wen dem a chrai elp di sumadi, dem uop se di sumadi chienj dem wiez kaa di elda waahn fi du laik Jeuova we “jengkl an gud an kain.” (Jmz. 5:11) Luk pan ou di apasl Jan did shuo se im jengkl an gud an kain laik Jeuova. Im se: “Mi pikni we mi lov, mi a rait dem sitn ya tu unu so unu wi no sin. Bot ef nobadi du sin, wi av sumadi we wi taak tu Faada Gad fi wi, Jiizas Krais we eva du wa rait.”​—1 Jan 2:1.

20. Wa wi a-go luk pan iina di neks lesn?

²⁰ Sad fi se, som a di taim wan Kristiyan mait-a mek op dem main se dem naa tap sin. Wen dat apm, di elda dem afi put da sumadi de outa di kanggrigieshan. Iina di laas lesn iina da Wachtowa ya, wi a-go luk pan ou di elda dem fi diil wid dem prablem de.