KIP WACH!

Wol Iip A Shuutin A Gwaan Aal Uova Di Worl We A Shak Piipl—Wa Di Baibl Av Fi Se Bout Dis?

SITN CHIENJ: Iepril 27, 2023

Uol iip a piipl stil a ded kaaz a di iip a shuutin an kilin we a gwaan aal uova di worl. Dis a wa di nyuuz av fi se bout som a dem shuutin ya we gwaan no so lang ago.

“Wen it kom aan tu shuutin we wol iip a piipl a ded wan taim, no ada konchri no kom nier tu Merika kaa it komiin laik a evri wiik wan a dat gwaan.”—Iepril 21, 2023, The Guardian.
“Dem shuut op wan ous iina Sout Afrika an kil aaf 10 piipl iina wan fambili. Outa di 10, sevn a dem a did uman an wan a did wan 13-ier-uol bwai.”—Iepril 21, 2023, AP News.
“Iina Hamburg, Germany, wan gonman go iin pan som Jeuova Witnis we did a kip dem miitn an shat an kil siks a dem an den ton roun kil imself.”—Maach 10, 2023, Reuters.

Enibadi we sad bad ar we a sofa kaaz a dem sitn ya kyan fain tingz iina di Baibl we kyan osh dem an mek dem fiil beta. Fi fain out bout sumadi we go chuu sitn laik dis, wach da vidiyo ya we niem DeJanerio Brown: Broken but Not Destroyed.

Wan neda wie ou di Baibl elp wi a dat it shuo wi wa mek dem wikid sitn ya a gwaan. Fi lorn muo bout dis, wach da vidiyo ya we niem Wa Mek Gad Lou Iivl An Sofarin Fi A Gwaan?

Iina Julai 2022 wol iip a shuutin gwaan aal uova di worl we shak nof piipl:

“Wen dem kil wan big taim palitishan iina Japan [we niem Shinzo Abe we yuus tu bi dem prai minista] it did shak di piipl dem iina di konchri bad, an it did shak piipl fram aal uova di worl tu. Dis a kaa da konchri de no av nof kilin a gwaan de an dem av som siiros laa wen it kom aan tu gon.”—Julai 10, 2022, The Japan Times.
“Di piipl dem iina Denmaak iina shak afta wan gonman kil chrii piipl we did de a wan shapin maal we de a Kuopeniegn.”—Julai 4, 2022, Reuters.
“Iina Sout Afrika, som gonman shuut op wan baar iina Soweto an kil aaf 15 piipl.”—Julai 10, 2022, The Guardian.
“Pan di Julai 4 alidie wiiken a muor dan 220 piipl dem shat an kil a Merika.”—Julai 5, 2022, CBS News.

Yu tingk di taim a-go kom wen wi naa go av dem kain-a kilin ya a gwaan agen? Wa di Baibl av fi se bout dis?

Wi Naa Go Av No Muor Shuutin An Kilin

Di Baibl mek wi nuo se wi a liv iina “di laas die dem” wen piipl a-go a gwaan laik wail daag iina di wikid an torbl wie dem ou dem a kil aaf piipl. (2 Timoti 3:1, 3) Dem wikid an torbl sitn de we dem a du mek piipl fried. (Luuk 21:11) Bot di Baibl mek wi nuo se di taim a-go kom wen piipl naa go kil aaf dem wan aneda, bot wa a-go apm a dat “piipl a-go liv iina piis. Eniwe dem liv, dem a-go fiil sief an tingz a-go nais an kwaiyat roun dem.” (Aizaiya 32:18) Ou shuutin an kilin a-go don we wid?

Gad a-go get rid a aal a di wikid piipl dem an im a-go mash op aal a di ting dem we dem yuuz fi fait an kil piipl.

“Bot yu si di wikid piipl dem, dem a-go don fa. Dem naa go de pan di ort agen.”—Pravorbz 2:22.
“[Gad] a-go tap di waar dem we a gwaan aal uova di ort. Im brok op di buo an mash op di spier; im bon op di shiil dem we dem yuuz wen dem a fait waar.”—Saam 46:9.

Gad a-go get rid a aal a di sitn dem we mek piipl waahn fi shuut an kil dem wan aneda kaaz im a-go tiich dem ou fi liv iina piis wid dem wan aneda.

“Dem naa go du notn fi ort nobadi ar notn, an dem naa go mash op notn iina mi uoli mountn, kaaz aal uova di ort, evribadi a-go nuo bout Jeuova jos laik ou waata ful op iina di sii.”—Aizaiya 11:9.
Aal rait ya nou ya, Gad a tiich piipl fram aal uova di worl ou fi no get miks op iina waar an kilin an ou fi pudong gon an dem sitn de. An im a shuo dem ou fi ‘ton dem suod iina sitn we dem yuuz fi pluo op lan an ou fi ton dem spier dem iina kotlis we faama yuuz.’—Maika 4:3.

Fi fain out muor bout wa di Baibl se bout ou piipl a-go liv an no fried, riid dis: “Freedom From Fear—Is It Possible?”

Fi fain out muor bout ou faitin an kilin a-go don we wid, riid dis: “Peace on Earth at Last!”