Piipl We A Kristiyan Fi A Miks Op Iina Waar?—Wa Di Baibl Av Fi Se Bout Dis?

Wen wi luk pan wa a gwaan wid di waar iina Yuukrien, wi si se nof a di choch liida dem a bak di waar. Mek wi luk pan som sitn we tuu a di paasta dem we de pan difrant said a di waar se:

• “Wi riili waahn fi big op wi suoja dem an tel dem tangks kaa wi si se dem a difen Yuukrien fram di wan dem we a fait gens wi . . . Wi a prie fi unu, wi lov unu, an wi a-go aalwiez de ya a bak unu.”—Mechropalitan Epifaniyos Di Fos Fi Kyiv se dis iina The Jerusalem Post, Maach 16, 2022.

• “Kaaz Rosha stil a waar gens Yuukrien, pan Sonde di liida fi di Roshan Aatadaks Choch did kip wan choch sorvis fi di suoja dem an im tel dem se dem fi fait fi dem konchri ‘iina di wie ou onggl di Roshan dem kyan dwi’it.’”​—Reuters, Iepril 3, 2022.

So yu tingk Kristiyan piipl fi a miks op iina waar? Wa di Baibl av fi se bout dis?

A wa di Baibl riili se?

Di Baibl mek wi nuo se di wan dem we riili a fala Jiizas, dem no miks op miks op iina waar.

• “Put op bak yu suod! Kaaz enibadi we tek op suod fait, a suod a-go kil dem.”—Matyu 26:52.

  So ef sumadi a bak waar ar a fait iina waar, im riili a du wa Jiizas se im fi du?

• “Mi a tel unu fi du sopm nyuu—lov unu wan aneda. Sed wie mi lov unu, a so unu fi lov unu wan aneda. Wen unu lov unu wan aneda, a so piipl gweehn nuo se unu a fi mi falara.”​—Jan 13:34, 35.

  Ef sumadi a bak waar, dem riili a shuo se dem lov piipl di wie ou Jiizas did se im falara dem wuda dwi’it?

Fi fain out muor bout dis, riid dis: “Is War Compatible With Christianity?”

Di Kristiyan dem nowadiez fi a miks op iina waar?

It mek sens fi riili biliiv se piipl we a Kristiyan fi no av notn fi du wid waar? Ye man. Di Baibl mek wi nuo se di taim we wi a liv iina niem “di laas die dem,” an iina dem taim ya yu wuda av piipl fram aal uova di worl we wudaana du wa Jiizas se dem fi du an naa go lorn ou fi fait waar no muo.​—Aizaiya 2:2, 4.

• Fi fain out muor bout dis, riid dis iina The Watchtower: “How Does God View War?”

Suun suun Jeuova,a ‘di Gad we kyan gi unu piis iina unu aat an main,’ a-go yuuz im govament we de a evn fi siev im piipl dem “fram wikid piipl uu a mek dem sofa an uu a chrai fi ort dem.”—Filipiyan 4:9; Saam 72:14.

• Fi si ou im govament gweehn du dis, wach da vidiyo ya: Di Kindom a Gad—A Wa?