KIP WACH!

Di Wie Ou Di Choch Dem A Miks Op Iina Di Waar We A Gwaan Iina Yuukrien, Wa Di Baibl Av Fi Se Bout Dis?

Mek wi luk pan som tingz we di choch liida dem a se bout di waar we a gwaan iina Yuukrien:

“Aal a nou Piechriyaak Kiril, di tap choch liida fi di Roshan Aatadaks Choch, no se wan ting gens wa Rosha did du wen dem muuv iin pan Yuukrien. . . . Di choch se som uol iip a tingz fi lik out gens Yuukrien an Putin yuuz dis fi sopuot wa im a du.”—EUobserver, Maach 7, 2022.
“Piechriyaak Kiril . . . mek it klier se im a bak di waar gens Yuukrien wen im se di waar we a gwaan a wan waar gens sin.”—AP News, Maach 8, 2022.
“Mechropalitan Epifaniyos Di Fos Fi Kyiv a di liida fi di Yuukrieniyan Aatadaks Choch. Pan Monde, im gi im piipl dem im blesn fi go ‘fait gens di Roshan piipl dem we a kom tek uova dem konchri’ . . . Plos, [im] se ef dem kil di Roshan suoja dem, dat a no sin.”—Jerusalem Post, Maach 16, 2022.
“Wi a bak di suoja dem an aal a uu a fait fi difen Yuukrien fram wi enimi dem. Wi a prie fi dem an wi a gi dem wi blesn tu.”—Fram UCCROa, Febiweri 24, 2022.

So wa yu tingk? Ef di choch dem kliem se dem a fala wa Jiizas Krais did se, yu tingk dem fi a tel dem choch memba dem se dem fi go fait waar? Wa di Baibl av fi se bout dis?

A fram lang taim di choch dem a miks op iina waar

Wen wi luk pan wa apm bak iina di diez, wi si se a fram lang taim di choch dem a miks op iina waar iivn duo dem mek it luk laik se a piis dem a se. Bot a uol iip a ierz nou di Jeuova Witnis dem a shuo se di choch dem a uol ipokrit. Mek wi luk pan som tingz we wi rait bout dis.

“The Crusades—A ‘Tragic Illusion’” mek wi si ou di Ruoman Kyatalik Choch did kil aaf som uol iip a piipl an ton roun se a Gad an Krais Jiizas dem dwi’it fa.
“The Catholic Church in Africa” taak bout wan a di taim wen som chraib did a fait gens dem wan aneda an wan chraib did a chrai kil aaf aal a di piipl dem iina wan neda chraib, an di choch neehn du notn bout it.
Dem chrii sitn ya: “Is Religion to Blame?,” an “Religion’s Role in Man’s Wars,” an “Religion Takes Sides” shuo wi ou di choch liida dem fi di Kyatalik, di Aatadaks, an di Protestant choch dem no ramp fi push dem memba dem fi tek said iina waar an fi fait gens dem wan aneda.

Yu tingk di choch dem we a fala Jiizas Krais fi a miks op iina waar?

Dis a wa Jiizas se: “Yu fi lov yu nieba siem laik ou yu lov yuself.” (Matyu 22:39) “Lov unu enimi dem.”—Matyu 5:44-47.

Tingk bout dis: Wan choch kyan riili se dem a du wa Jiizas se dem fi du wen it kom aan tu ou dem fi lov ada piipl an ton roun a tel dem memba dem se dem fi go fait waar an kil ada piipl? Fi fain di ansa, riid dem tuu sitn ya: “True Christians and War” an “Is It Possible to Love One’s Enemies?”

Dis a wa Jiizas se: “Mi no ruul laka di king dem we de iina di worl. Ef mi did ron tingz laka dem, mi sorvant dem wuda tek op fi mi an fait fi mek dem no ares mi an gi mi uova tu di Juu liida dem.” (Jan 18:36) “Kaaz enibadi we tek op suod fait, a suod a-go kil dem.”—Matyu 26:47-52.

Tingk bout dis: Ef Jiizas neehn waahn im falara dem fi fait fi difen im, den yu tingk im wuda waahn dem fi go tek op gon an dem sitn de fi go fait fi notn els? Fi si ou di fos set a Kristiyan dem did riili fala wa Jiizas se dem fi du, riid dis: “Is War Compatible With Christianity?”

A wa a-go apm tu di choch dem we naa tap miks op miks op iina waar?

Di Baibl mek wi nuo se aal a di choch dem we a kliem se dem a fala Jiizas bot dem naa du wa im se dem fi du, Gad no iina notn wid dem.—Matyu 7:21-23; Taitos 1:16.

Revilieshan mek wi si se Gad bliem dem choch de fi “aal di piipl we get kil aal uova di worl.” (Revilieshan 18:21, 24) Riid dis fi si wa mek a so it go: “What Is Babylon the Great?”
Jos laik ou wen wan chrii ratn out an it naa bier notn gud, “it get chap dong an dash iina di faiya,” Jiizas did mek wi nuo se aal a di choch dem we naa du wa Gad waahn dem fi du, Gad a-go get rid a di uol a dem. (Matyu 7:15-20) Fi fain out ou dis a-go apm, riid dis: “The End of False Religion Is Near!”

Di Jeuova Witnis Dem No Komiin Laik Di Piipl Dem We De Iina Di Worl

Di Jeuova Witnis dem iina Rosha an Yuukrien du wa Jiizas se dem fi du an dem no miks op miks op iina palitiks an dem no go fait no waar niida, an a dat di res a di Jeuova Witnis dem we de aal uova di worl du tu. An kaaz a dat wi naa bak da waar ya ar no ada waar, an wi naa go get miks op iina it niida. An wi si se kaaz wi mek op wi main fi du wa di Baibl se wi fi du, piipl a fait gens di Jeuova Witnis dem iina nof a di konchri dem. (Jan 15:19, 20; 2 Timoti 3:12) Laik iina Rosha, di govament put uol iip a Jeuova Witnis iina prizn an dem iivn biit op biit op an bata bruuz op som a wi. Dem aal tek we wi Kindom Aal an dem ting de an se a di govament uon dem nou. Fi fain out muor bout dis, go pan www.jw-russia.org.

Fi si ou dem a fait gens di Jeuova Witnis dem we de a Rosha, wach da vidiyo ya: Jehovah’s Witnesses in Irkutsk Remain Faithful Despite Brutal Home Raids.
A no jos nowadiez di Jeuova Witnis dem naa get miks op miks op iina palitiks an waar an dem ting de. Fi si ou dem did tan op chrang wen dem did a fait gens dem iina Natsi Jormani an di plies dem we dem yuus tu kaal di Suoviyet Yuuniyan, wach da vidiyo ya: Dem Tan Op Chrang Wen Piipl A Fait Gens Dem.

Fi fain out muor bout wa wi biliiv iina, chek out wi websait. Yu a-go get fi si wa di Baibl se bout wan taim we a-go kom wen nobadi iina di worl naa go a fait no waar. (Aizaiya 2:4; Jerimaiya 29:11) Ef yu waahn nuo muor, aks fi wan vizit fram di Jeuova Witnis dem.

Dis a we di picha dem kom fram, fram di lef said tu di rait said: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a Di UCCRO stan fi di Ukrainian Council of Churches and Religious Organizations, an a 15 difrant difrant choch mek it op. It av iin Aatadaks, Griik, Ruoman Kyatalik, Protestant, Ivanjelikal, an di Juu piipl dem an Mozlim piipl dem tu.