Rosha Muuv Iin An A Waar Gens Yuukrien

Pan Febiweri 24, 2022 bifuo die, Rosha muuv iin pan Yuukrien wid im aami dem an staat waar gens Yuukrien, aalduo di ada liida dem iina di worl did a wok aad fi dat no apm. So nof piipl a wanda ya nou wa dis a go miin fi di res a di worl. Kopl die ago, di tap-a-tap man iina di Yuunaitid Nieshan we niem António Guterres se: “Nobadi kyaahn go tingk bout ou bad tingz a-go get, kaa uol iip a piipl a-go sofa an di konchri dem iina Yuurop an di res a di worl naa go fiil so sief agen laik ou dem yuus tu fiil.”

Azkaadn tu di Baibl, wen sitn laik dis apm, wa it av fi du wid wi?

• Jiizas Krais did tel wi bout wan taim we a-go kom wen “wan set a piipl a-go waar gens wan neks set a piipl, an kindom a-go fait gens kindom.” (Matyu 24:7) Di waar dem we a gwaan tide mek wi si se di sitn dem we Jiizas se wuda apm iina fi wi taim, a dem a apm fi chuu. Fi fain out muor bout wa di Baibl av fi se bout it, riid dis: “What Is the Sign of ‘the Last Days,’ or ‘End Times’?”

• Iina di buk a Revilieshan it tel wi bout di waar dem we wudaana a gwaan pan ort iina fi wi taim wen it tel wi bout wan aas we “red laik faiya” an it tel wi se di wan we a raid im did get powa ‘fi mek di piipl dem pan ort kil aaf dem wan aneda iina waar.’ (Revilieshan 6:4) Fi fain out muor bout wa di Baibl av fi se bout it, riid dis: “The Four Horsemen—Who Are They?”

• Di buk a Daniyel tel wi ou “di king a di naat” an “di king a di sout” wudaana fait gens dem wan aneda. (Daniyel 11:25-45) Fi si wa mek wi nuo se di king a di naat a Rosha an di ada konchri dem we dem an dem a fren, wach da vidiyo ya we niem Tingz We Di Baibl Se A-Go Apm We Apm Fi Chuu—Daniyel Chapta 11.a

• Wan neda waar we wi riid bout iina Revilieshan a “di waar we a-go apm pan di big die wen Gad, we muor powaful dan evribadi, a-go joj piipl.” (Revilieshan 16:14, 16) Bot da waar ya no komiin laik di wan dem we wi si di konchri dem a fait gens dem wan aneda ya nou. Fi fain out muor bout da waar ya we a-go gwaan, riid dis: “What Is the Battle of Armageddon?”

Wa mek yu kyan shuor se di fyuucha a-go brait?

• Iina Saam 46:9 di Baibl tel wi se Gad a-go “tap di waar dem we a gwaan aal uova di ort.” Fi fain out muor bout wa Gad pramis se im a-go du fi wi iina di fyuucha, riid dis: “A Real Hope for a Better Tomorrow.”

• Jiizas tiich im falara dem fi prie tu Gad fi di taim kom wen Gad wuda ruul iina evri wie. (Matyu 6:9, 10) Gad set op wan kindom govament iina evn we a-go mek wa im waahn fi apm pan ort apm. An wan a di ting dem we Gad waahn fi apm a fi evribadi pan di ort liv iina piis. Fi lorn muor bout di gud sitn dem we da kindom govament de a-go du fi yu, wach di vidiyo we niem Di Kindom A Gad—A Wa?

A muor dan 129,000 Jeuova Witnis liv a Yuukrien. Jos laik di Jeuova Witnis dem we liv iina aal a di ada konchri dem, dem du laik Jiizas an no get miks op iina palitiks an di ada sitn dem we di worliyan dem get miks op iina, an dem no av notn fi du wid waar niida. (Jan 18:36) Aal uova di worl, di Jeuova Witnis dem a priich di ‘gud nyuuz bout Gad Kindom’ an a tiich piipl bout ou di Kindom a-go get rid a waar an aal a wi ada prablem dem. (Matyu 24:14) Fi lorn muor bout di gud sitn dem we di Baibl se a-go apm iina di fyuucha, aks fi wan vizit fram di Jeuova Witnis dem.