LESN 01
Ou Di Baibl Kyan Elp Yu Fi Saat Out Yu Laif?
Uol iip a piipl a wanda wa mek laif so aad an ef tingz a-go get beta wan die. An yu av wan bag a tingz we a schres out piipl evri die. Laik piipl a wanda bout ou dem a-go kyan tek kier a demself ar dem fambili, ar wa dem kyan du fi mek dem an dem fambili api. Bot wa wi a si a dat di Baibl a elp piipl fi nuo muo bout dem sitn ya we piipl wanda bout, an it a elp wi fi si ou wi kyan liv wan beta laif rait ya nou. So tingk bout dis: Yu tingk di Baibl kyan riili elp aal a wi fi liv wan beta laif?
1. Wa a som a di sitn dem we wi a tingk bout we di Baibl gi wi di ansa fa?
Si som kwestiyan ya we di Baibl gi wi ansa fa: A ou wi kom bout? A wa wi de ya fa? Wa mek piipl a sofa? Yu tingk se wen sumadi ded a jos it dat? Ef evribadi a se piis, wa mek so moch waar de bout? Yu tingk se di ort a-go bon op, mash op, ar yu tingk sitn els a-go apm tu it? Di Baibl mek wi si se wi fi chrai an get di ansa fi dem kwestiyan ya, an a nof nof piipl api wid di ansa dem we dem get.
2. Ou di Baibl kyan elp wi fi gwaan enjai wi laif ya nou?
Di Baibl tel wi di bes wie fi liv. So it mek wi nuo wa wi fi du fi mek wi fambili riili api. It mek wi nuo wa wi kyan du so dat wi no av uol iip a schres iina wi laif, an ou fi enjai eni wok we wi a du. An yu a-go get fi riizn wid sumadi an fain out wa di Baibl se bout dem sitn ya an wol iip a ada tingz. An yu a-go get fi si se wa di Baibl se iina 2 Timoti 3:16, a so it go fi chuu. It se, “Evri wod we iina Gad wod . . . gud fi tiich piipl.”
Da buk ya a-go elp yu fi nuo an andastan di Baibl beta. So wi waahn yu fi riid di skripcha dem wen yu a go chuu da buk ya. Wen yu du dat, it wi elp yu fi si ou wa yu a lorn a lain op wid wa di Baibl a se.
LORN SOM MUO
Wi a-go taak bout ou di Baibl elp piipl fi liv wan beta laif, an yu a-go si se yu a-go lov fi riid di Baibl. An yu a-go get fi andastan wa mek yu niid sumadi fi elp yu fi get wa it a se.
3. Di Baibl kyan mek wi nuo wa fi du
Di Baibl komiin laik wan brait brait lait. It kyan mek wi nuo di rait sitn we wi fi du iina laif an wa a-go apm iina di fyuucha.
Riid Saam 119:105, an den wi a-go taak bout dem kwestiyan ya:
Di sumadi we rait da saam ya, wa im did tingk bout di Baibl?
Wa yu tingk bout di Baibl?
4. Eni kwestiyan we wi mait-a av, di Baibl kyan elp wi fi ansa dem
Fi wan lang taim, wan uman did av som uol iip a kwestiyan we did a bada ar. Shi fain se shi get di ansa dem iina di Baibl. Plie di VIDIYO, an den wi a-go taak bout dem kwestiyan ya:
A wa a som a di kwestiyan dem we di uman iina di vidiyo did av?
Ou it did elp ar wen shi stodi di Baibl?
Di Baibl tel wi se wi fi aks kwestiyan we wi waahn ansa fa. Riid Matyu 7:7, an den wi a-go taak bout da kwestiyan ya:
Wa a som kwestiyan we de pan yu main we di Baibl kyan gi yu di ansa fi dem?
5. Yu kyan get fi lov fi riid di Baibl
Uol iip a piipl we a riid di Baibl fain se nof gud tingz a gwaan fi dem. Plie di VIDIYO, an den wi a-go taak bout dem kwestiyan ya:
Wen it kom aan tu riidin, ou dem yong piipl ya did fiil bout it?
Bot wa mek dem lov fi riid di Baibl nou?
Wa di Baibl se kyan elp wi fi nuo wa fi du, an it elp fi push wi fi tan op chrang an no gi op. Riid Ruoman 15:4, an den wi a-go taak bout da kwestiyan ya:
Laik ou di Baibl se it a-go elp wi fi tan op chrang an no gi op, dat soun laik sitn yu wuda waahn it du fi yu?
6. Ada piipl kyan elp wi fi andastan wa di Baibl a se
Som piipl fain se iivn duo dem riid di Baibl pan dem uon, dem get fi andastan it beta wen dem taak bout it wid sumadi els. Riid Aks 8:26-31, an den wi a-go taak bout da kwestiyan ya:
Ou wi kyan get fi andastan wa di Baibl a se?—Luk pan vors 30 an 31.
Sumadi did afi elp di man fram Iitiyuopiya fi andastan wa di Baibl a se. Uol iip a piipl a fain se di bes ting fi dem a fi sumadi elp dem fi andastan wa di Baibl a se
SUMADI MAIT-A SE: “A wies a taim fi stodi di Baibl.”
Wa yu wuda ansa dem an se, an wa mek?
DIS A WA YU FI MEMBA
Di Baibl mek wi nuo di bes wie fi liv wi laif, an it gi wi di ansa fi som kwestiyan we wi mait-a wanda bout, an it elp fi push wi fi tan op chrang an no gi op.
Wa yu did lorn iina da lesn ya?
Wa a som a di sitn dem we di Baibl kyan elp wi wid?
Wa a som a di kwestiyan dem we di Baibl kyan elp wi fi get di ansa fa?
Wa a som a di sitn dem we yu wuda waahn fi nuo wa di Baibl se bout it?
CHEK OUT SOM MUO SITN
Tingk bout ou wen wi du di sitn dem we di Baibl tel wi fi du, ou it mek tingz beta fi wi nowadiez.
“Di Tingz Dem We Rait Dong Iina Di Baibl Kyan Aalwiez Elp Wi” (Di Wachtowa No. 1 2018)
Wach da vidiyo ya an si ou wan man we did av som uol iip a prablem fram im did a wan likl bwai get elp fram di Baibl.
Fain out bout som a di sitn dem we di Baibl se wi fi du fi mek wi fambili riili api.
“Fain Out 12 Sitn We Kyan Mek Yu Fambili Riili Api” (Wiek Op! No. 2 2018)
Da vidiyo ya a-go elp yu fi si uu riili a kanchuol da worl ya.