Wan Leta We Kom Fram Di Govanin Badi

Wi Bredaz an Sistaz:

Aal a wi we a sorv Jeuova riili lov di Baibl. Wi nuo se di sitn dem we it se apm aredi, a so it go fi chuu, an wa wi lorn fram it kyan elp wi fi liv wan gud laif, an it shuo wi ou Jeuova riili lov piipl. (Saam 119:105; Luuk 1:3; 1 Jan 4:19) Wi wel waahn fi elp ada piipl fi lorn bout di gud sitn dem we de iina Gad Wod. So a dat mek wi so glad fi gi unu da buk ya we niem, Kom Mek Wi Lorn Som Tingz Fram Di Baibl. Mek wi tel unu likl bout it.

A di pikni dem wi riili mek da buk ya fa, bot it kyan elp di big piipl dem tu we wel waahn fi lorn muor bout di Baibl. Di sitn dem iina di Baibl kyan elp piipl, no mata uu dem bi. So wi nuo fi shuor se evribadi kyan lorn sitn fram da buk ya, an dat wi elp dem fi liv wan api laif.

Da buk ya a-go tel wi bout tingz we apm fram Gad staat mek evriting, an wa an wa gwaan wid di piipl dem pan di ort afta dat. An wi du wi bes fi mek shuor se evriting iina da buk ya klier klier an iizi fi andastan.

Da buk ya no jos tel wi bout di ting dem we apm iina di Baibl, bot yu si di wie ou it rait an di picha dem we iina it, wen yu a riid it yu a-go fiil laik yu did de de an yu a-go get fi andastan ou di piipl dem did riili fiil dem taim de.

Da buk ya a-go elp wi fi si se wen wi riid di Baibl, wi a lorn bout piipl we did du wa Jeuova se dem fi du, an piipl we neehn du wa im se. An dat wi elp wi fi si wa wi kyan lorn fram dem. (Ruoman 15:4; 1 Korintiyan 10:6) A 14 difrant difrant paat de iina da buk ya. Di wol a dem a-go staat wid wan likl paragraaf we a-go tel wi di mien ting dem we wi a-go lorn iina da paat de.

Ef yu av pikni, yu kyan riid wan a di lesn wid dem an taak bout di picha dem tu. Den unu kyan riid di paat dem iina di Baibl we av fi du wid da lesn de, an elp dem fi si ou wa dem riid lain op wid wa di buk a se. Sumadi kyan du di sed ting tu wen dem a elp wan big sumadi fi andastan di Baibl.

Wi uop se da buk ya a-go elp piipl we waahn fi du wa rait fi stodi Gad Wod an du wa it se, weda dem yong ar uol. Da wie de, dem a-go kyan worship Jeuova an get fi bi paat a im fambili.