Yu Fi Riili Api Se Yu Kyan Prie Tu Gad

1. Kaa wi kyan prie tu Jeuova, ou dat shuda mek wi fiil?

DI WAN we mek evn an ort gi wi di chaans fi kyan prie tu im, an wi afi fiil gud bout dat. Jos tingk bout it, wi kyan tel Jeuova evriting we wi a tingk bout iina eni langwij we wi chat. An wi na’afi set op wan miitn fi dwi’it. Eniwe wi de wi kyan prie tu Jeuova enitaim. It no mata ef wi sik an de a aspital a lai dong ar ef wi lak op iina prizn, wi nuo se wi Faada we lov wi so moch a-go ier wi wen wi prie. So wi fi shuo se wi glad se Jeuova mek wi kyan prie tu im.

2. Ou di king we niem Dievid did shuo se im api se im kyan prie tu Gad?

² Di king we niem Dievid did api fi kyan prie tu Gad. Im did se dis tu Jeuova iina wan sang: “Mek mi prieya dem komiin laik spais we dem mek fi bon fi yu we sumel swiit.” (Sa. 141:1, 2) Iina di taim wen Dievid did de bout, di priis dem did tek dem taim fi mek di swiit spais we dem bon fi gi Gad. (Ek. 30:34, 35) Dievid did taak bout dis fi shuo se im a tek im taim fi tingk bout wa im a-go se bifuo im prie tu im Faada we de iina evn. An a dat wi waahn fi du tu. Wi a mek shuor se wa wi a prie bout a-go mek Jeuova fiil gud.

3. Ou wi fi taak tu Jeuova wen wi a prie tu im, an wa mek?

³ Wen wi a prie tu Jeuova, wi fi memba se wi an im a no saiz. So wi no fi paas wi plies wid im bot wi fi chat tu im wid rispek. Tingk bout di difrant vijan dem we som man laik Aizaiya, Iziikel, Daniyel, an Jan did get. Aal a dem difrant bot a wan ting wi si wid aal a dem, an a dat Jeuova shuo se im a wan big an powaful King. Aizaiya did si Jeuova a sidong pan wan ai ai chuon. (Aiz. 6:1-3) Iziikel did si Jeuova a sidong pan im chuon we de pan fuor wiil an wan brait lait did de roun im we komiin laik wan rienbuo. (Izii. 1:26-28) Daniyel did si Jeuova iina som wait kluoz an faiya did a kom fram im chuon. (Dan. 7:9, 10) An Jan did si Jeuova a sidong pan wan chuon we av wan priti griin rienbuo roun it. (Rev. 4:2-4) Wen wi luk pan ou Jeuova big an powaful it mek wi si se a wan nais ting se wi get di chaans fi kyan prie tu im. An dat mek wi si se wen wi a dwi’it wi fi shuo se wi av nof rispek fi im. Bot a ou wi fi prie wen wi a prie tu im?

“A SO UNU FI PRIE”

4. Wa wi lorn fram di fos set a sitn dem we Jiizas prie bout iina Matyu 6:9, 10?

⁴ Riid Matyu 6:9, 10. Iina di sorman we Jiizas gi pan di mountn, im did tiich im falara dem ou dem kyan prie iina wan wie we wuda mek Gad api. Afta im se “a so unu fi prie,” Jiizas staat taak bout di tingz dem we av fi du wid wa Gad waahn fi apm: laik fi piipl av nof rispek fi Gad niem; fi Gad Kindom kom get rid a aal a di piipl we a fait gens Im; an fi aal a di gud sitn dem we Gad a-go du fi di ort an fi di piipl dem we a liv pan it. Wen wi a prie an wi taak bout aal a dem sitn ya, it shuo se wa Gad waahn fi apm miin wol iip tu wi.

5. It aarait fi prie bout tingz we a gwaan wid wi?

⁵ Iina di neks set a ting dem we Jiizas prie bout iina da prieya de, im shuo se it aarait fi wi prie bout tingz we av fi du wid wi uona laif. Laik notn no rang fi wi aks Jeuova fi gi wi fuud fi nyam, fi paadn wi fi wi sin dem an fi elp wi no fi du notn we a-go kaaz wi fi sin, an fi no mek di wikid wan ort wi. (Mat. 6:11-13) Wen wi aks Jeuova fi dem sitn ya, wi shuo Jeuova se a im wi a dipen pan an wi a shuo im se wi waahn fi mek im api.

6. A onggl di sitn dem we Jiizas taak bout iina di Owa Faada prieya wi kyan prie bout? Wa mek yu se so?

⁶ A no laik se Jiizas did a tel wi se evritaim wen wi prie wi afi prie siem laik ou im did prie iina di Owa Faada prieya. Kaa som ada taim wen Jiizas prie, im did prie bout tingz we de pan im main dem taim de. (Mat. 26:39, 42; Jan 17:1-26) A siem so wi kyan prie bout eniting we de pan fi wi main tu. Wen wi a chrai mek op wi main bout wa fi du, wi fi prie tu Jeuova fi mek wi waiz so wi kyan nuo di bes ting fi du. (Sa. 119:33, 34) Ef wi get sitn fi du fi Jeuova we wi mait-a fain aad fi du, wi kyan prie an aks im fi elp wi fi nuo ou fi dwi’it. (Pr. 2:6) Di mada an faada dem kyan prie fi dem pikni dem, an di pikni dem kyan prie fi dem mada an faada dem tu. An aal a wi fi prie fi di sumadi dem we wi stodi di Baibl wid an di piipl dem we wi a priich tu tu. Bot wen wi a prie wi fi memba se wi no fi onggl a aks Jeuova fi tingz.

7. Wa mek wi fi big op Jeuova iina wi prieya dem?

⁷ Wen wi a prie wi fi aalwiez memba fi big op Jeuova, kaaz nobadi no de we fi get muor big op dan Jeuova, kaa im “eva redi fi paadn piipl.” Pan tap a dat ‘im gud an kain, im no kwik fi get beks an im a-go stik tu wi fi eva an im aalwiez du wa im se im a-go du.’ (Sa. 86:5, 15) So wi si se a Jeuova fi get di big op kaaz a uu im bi an di sitn dem we im du fi wi.

8. Wa a som a ting dem we wi kyan tangk Jeuova fa? (Saam 104:12-15, 24)

⁸ Wan neks sitn we wi kyan du wen wi a prie, a fi tangk Jeuova fi aal a di nais nais sitn dem we im gi wi. Wi kyan tangk im fi di flowaz dem wid di wol iip a priti kola dem, di wol iip a nais fuud dem we im gi wi fi nyam an wi bunununus fren dem we wi kyan spen taim wid. Wi Faada we lov wi so moch gi wi dem sitn ya an nof muor tingz fi mek wi api. (Riid Saam 104:12-15, 24.) Bot muo dan dat, wi fi tangk Jeuova kaaz im gi wi wol iip a tingz we kip wi kluos tu im, an im mek wi nuo som gud sitn we im a-go du fi wi iina di fyuucha we wi kyan luk faawod tu.

9. Wa kyan elp wi fi memba fi tangk Jeuova fi aal a di gud sitn dem we im du fi wi? (1 Tesaluoniyan 5:17, 18)

⁹ Somtaim wi no memba fi tangk Jeuova fi di sitn dem we im du fi wi. Bot wa kyan elp wi fi memba fi tangk im? Yu kyan rait dong som a di sitn dem we yu prie bout an go bak go luk pan dem an si ou Jeuova did ansa yu prieya dem. Afta dat yu kyan prie an tangk im fi aal we im du fi elp yu. (Riid 1 Tesaluoniyan 5:17, 18.) Tingk bout dis: No chuu se aal a wi fiil gud wen piipl shuo se dem tangk wi fi di sitn dem we wi du fi dem? A siem so, wen Jeuova ansa wi prieya dem an wi memba fi tangk im, it mek im fiil gud. (Kol. 3:15) Bot wa a wan neda gud riizn fi tangk Jeuova?

TANGK JEUOVA FI IM BWAI PIKNI WE IM LOV SO MOCH

10. Azkaadn tu 1 Piita 2:21, wa mek wi fi tangk Jeuova fi sen Jiizas kom pan ort?

¹⁰ Riid 1 Piita 2:21. Wi afi tangk Jeuova fi im Bwai Pikni we im lov so moch we im sen fi kom tiich wi wol iip a tingz. Wen wi riid bout Jiizas an si aal we im du an aal we im se, it elp wi fi lorn bout Jeuova Gad an nuo wa fi du fi mek Im api. An wi an Jeuova kyan get kluos wen wi shuo se wi chos iina Jiizas, di wan we Im sen fi kom ded fi wi.​—Ruo. 5:1.

11. Wa mek wen wi prie, wi prie iina Jiizas niem?

¹¹ Wi tangk Jeuova fi mek wi kyan prie tu im iina im Bwai Pikni Jiizas niem. Jiizas a di wan we Jeuova yuuz fi ansa wi prieya dem. An wi yuuz Jiizas niem wen wi a prie tu Jeuova. Jeuova lisn tu wi an im wi ansa wi prieya dem. Jiizas se: “Mi wi du eniting unu aks mi fa kaa unu a mi falara. Mi gweehn dwi’it so dat di Bwai Pikni kyan get fi shuo ou di Faada big an powaful.”​—Jan 14:13, 14.

12. Wa a wan neda riizn wa mek wi fi tangk Jeuova fi im Bwai Pikni?

¹² Jeuova kyan paadn wi sin dem kaa Jiizas did kom ded fi wi. Di Baibl mek wi nuo se Jiizas a “wan liida fi priis we sidong pan di rait-an-said a Gad chuon op iina evn.” (Iib. 8:1) An Jiizas a “sumadi we wi taak tu Faada Gad fi wi” an aks Im fi elp wi. (1 Jan 2:1) Wi riili afi tangk Jeuova kaaz Im gi wi wan Liida Fi Di Priis dem we nuo wa wi a go chuu an we “taak tu Gad an a beg fi wi”! (Ruo. 8:34; Iib. 4:15) Non a wi no porfek, so ef Jiizas neehn kom ded fi wi, wi wuda neva get di chaans fi kyan prie tu Jeuova. Wen wi tingk bout ou Jeuova sen im Bwai Pikni we im lov so moch fi kom ded fi aal a wi, wi kyaahn tap tangk Im fi dat!

PRIE FI YU BREDA AN SISTA DEM

13. Pan di nait bifuo Jiizas did ded, ou im mek wi si se im lov im falara dem?

¹³ Di nait bifuo im ded, Jiizas did spen wan lang taim a prie fi im falara dem an im aks im Faada “fi gyaad dem fram di wikid wan.” (Jan 17:15) Dat mek wi si umoch im did riili lov dem! Iivn duo im did a-go go chuu sitn we wuda riili aad fi’im, im did stil de de a tingk bout im falara dem.

14. Ou wi kyan shuo se wi lov wi breda an wi sista dem?

¹⁴ Jos laka Jiizas, wi no onggl tingk bout wiself wan bot wi eva a prie fi wi breda an sista dem. Wen wi du dat wi a shuo se wi lov wi wan aneda an a mek Jeuova si se wi lov wi breda an sista dem jos laik wa Jiizas tel wi fi du. (Jan 13:34) A no wies wi a wies wi taim wen wi prie fi wi breda an sista dem. Di Baibl tel wi se “wen sumadi we liv rait prie, im prieya ful op a powa an wi mek gud sitn apm.”​—Jmz. 5:16.

15. Wa mek wi fi prie fi wi breda an sista dem?

¹⁵ Wi fi prie fi wi breda an sista dem kaa dem a go chuu wol iip a prablem. Wi kyan aks Jeuova fi elp dem wen dem sik bad, wen orikien an dem ting de mash op wich paat dem liv, wen waar a gwaan iina di konchri we dem liv, wen piipl a fait gens dem kaaz a wa dem biliiv iina, an wi kyan prie bout eni ada prablem we dem mait-a a go chuu. An wi kyan prie fi wi breda an sista dem we wok aad fi elp di ada breda an sista dem wen dem a go chuu dem prablem de. Rait ya nou yu mait-a nuo som piipl we a go chuu dem kain-a prablem de. Yu kyan kaal dem niem wen yu a prie fi dem. Wen wi prie an aks Jeuova fi elp wi breda an sista dem fi eng aan an tan op chrang, wi a shuo se wi riili lov dem.

16. Wa mek wi fi prie fi di breda dem we a liid wi?

¹⁶ Di breda dem we a liid wi iina di kanggrigieshan riili api wen wi prie fi dem, kaaz wen wi prie fi dem it elp dem. A dat wi si wid di apasl we niem Paal. Im did se: “Prie fi mi tu. Prie se Gad wi elp mi an tel mi di rait wod fi se. Prie se mi wi no fried evritaim mi uopm mi mout fi tel piipl di siikrit mesij bout di Gud Nyuuz.” (Ifii. 6:19) Rait ya nou, wi av wol iip a breda we a liid wi an dem a wok aad aad. Wi shuo se wi lov dem wen wi prie an aks Jeuova fi bles di wok we dem a du.

WEN YU A PRIE FI PIIPL A MIITN AN PAN WAN BAIBL STODI

17-18. Wa a som a di taim dem wen wi mait-a afi prie fi ada piipl, an wa a som a di sitn dem we wi fi tingk bout?

¹⁷ Som a di taim, piipl mait-a aks wi fi prie pan wan Baibl stodi ar a miitn an dem ting de. Laik wan sista we a du wan Baibl stodi mait-a aks wan neda sista fi prie wen shi kom pan di stodi. Di sista we kom pan di stodi mait-a no riili nuo di sumadi we yu a stodi wid, so shi mait-a waahn fi se di laas prieya insted-a di fos wan. Da wie de shi kyan lorn likl bout di sumadi fos an kyan get fi nuo som a di sitn dem we shi kyan prie bout fi di sumadi.

¹⁸ Di breda dem mait-a aks wan breda fi prie wen wi de a di miitn fi fiil sorvis ar wen wi de a miitn. Di breda fi memba wa mek dem a kip da miitn de. So wen dem a prie, dem no fi yuuz it fi jraa op di breda an sista dem iina di kanggrigieshan an dem no fi yuuz it fi taak bout tingz we di breda dem no nuo bout yet niida. Fi muos a wi miitn dem a faiv minit wi av fi sing di sang an prie. So di breda we a-go se di prieya, im fi memba se im no fi yuuz “wan bag a wod” wen im a prie, wos ef di miitn jos a staat.​—Mat. 6:7.

PRIEYA FI BI WAN BIG TING IINA YU LAIF

19. Wa kyan elp wi fi mek shuor se wi redi fi Jojment die?

¹⁹ Wos laka ou di worl suun don, wi afi mek shuor se wi eva a prie. A dat mek Jiizas did se wi fi ‘aalwiez a wach, an prie se wi a-go kyan get we fram aal a wa a-go apm.’ (Luuk 21:36) Ye man, wi afi mek shuor se wi a prie nof kaa a dat a-go elp wi fi kip wi main pan tingz we a-go kip wi kluos tu Jeuova, da wie de di en no kriip op pan wi an kom kech wi an wi no redi.

20. Ou wi prieya dem kyan komiin laik swiit spais we wi bon gi Jeuova?

²⁰ Wa an wa wi taak bout iina da lesn ya? Wi get fi si se it riili nais se wi get di chaans fi kyan prie tu Jeuova. Wen wi a prie, di mien ting dem we wi fi prie bout a wa Jeuova waahn fi apm. Wi fi prie an shuo Gad se wi tangk im fi im Bwai Pikni an Im Kindom we Jiizas a ruul iina, an wi fi prie fi wi breda an sista dem. Pan tap a dat, wi kyan prie fi di sitn dem we wi niid fi liv an prie fi tingz we kyan elp wi fi chos iina Gad muor. Wen wi tek taim fi sidong an tingk bout wa wi a-go se bifuo wi prie, it wi shuo se wi nuo se notn no nais laik fi taak tu wi Gad. An di wod dem we wi yuuz fi komiin laik swiit spais we wi a bon gi Jeuova, an it a-go riili mek im fiil gud.​—Prav. 15:8.