LESN 47
Yu Tingk Yu Redi Fi Get Baptaiz Yet?
Fram yu staat stodi di Baibl til nou, yu lorn wol iip a sitn bout Jeuova. An yu mait-a tap du nof sitn we yu yuus tu du aredi. Bot sopm stil mait-a a tap yu fram gi yu laif tu Jeuova an get baptaiz. Da lesn ya a-go taak bout som sitn we mait-a tap piipl fram mek op dem main fi go baptaiz an wa dem kyan du fi mek dem sitn ya no tap dem.
1. Yu afi nuo evriting we iina di Baibl bifuo yu kyan baptaiz?
Nuo sa! Yu no afi nuo evriting we iina di Baibl bifuo yu kyan baptaiz. Aal Kristiyan we baptaiz fram lang taim stil a lorn muor bout di Baibl evridie. (Koloshan 1:9, 10) Di Baibl mek wi nuo se bifuo yu kyan baptaiz, yu afi “nuo di chuut.” (1 Timoti 2:4) Dat miin se yu afi go nuo di mien ting dem we di Baibl tiich. So di elda dem iina di kanggrigieshan a-go aks yu som kwestiyan fi elp yu fi si ef yu nuo di mien ting dem we di Baibl tiich.
2. Wa a som sitn we yu fi du bifuo yu kyan baptaiz?
Bifuo yu kyan baptaiz, yu afi ‘ton we fram yu sin, an beg Gad paadn an kom bak tu im.’ (Riid Aks 3:19.) Dis miin se yu a-go sari bad fi di sitn dem we yu du rang an den aks Jeuova fi paadn yu. Den, yu a-go ton we fram di sitn dem we Gad se bad an mek op yu main fi du di sitn dem we im waahn yu fi du. Pan tap a dat, yu fi a go a di miitn dem an a priich an a du ada tingz wid di breda an sista dem tu.
3. Wa mek yu no fi fried fi go get baptaiz kaa yu tingk yu mait-a en op du sitn rang?
Som piipl mait-a fried se wa dem pramis Jeuova fi du, dem mait-a no aalwiez kyan go dwi’it. Ye, yu mait-a en op du sitn rang, bot memba se nof piipl we di Baibl tel wi bout we did a sorv Jeuova somtaim en op du sitn rang tu. Jeuova nuo se wi no porfek. (Riid Saam 103:13, 14.) Wen yu a du yu bes fi sorv Jeuova, it mek im fiil gud an im a-go elp yu fi sorv im. Matarafak, Jeuova mek wi nuo se “notn at aal kyan tek we di lov we kom fram [im].”—Riid Ruoman 8:38, 39.
LORN SOM MUO
Luk pan wa kyan elp yu so dat notn no tap yu fram get baptaiz. Wa kyan elp yu a wen yu get fi nuo Jeuova beta an tek di elp we im a gi yu.
4. Yu fi get fi nuo Jeuova beta
Umoch sitn yu afi nuo bout Jeuova bifuo yu kyan baptaiz? Yu afi go nuo im gud so dat yu kyan lov im an du wa im waahn yu fi du. Plie di VIDIYO fi si ou piipl fram aal uova di worl we a stodi di Baibl du dis. Den wi a-go taak bout di neks kwestiyan.
Iina di vidiyo, wa did elp som a di piipl dem fi get redi fi baptaiz?
Riid Ruoman 12:2, an den wi a-go taak bout dem kwestiyan ya:
Yu stil a wanda ef wa di Baibl se a so it go, ar ef wa di Jeuova Witnis dem a tiich a di chuut?
Ef yu stil no shuor bout it, wa yu kyan du?
5. Get rid a di sitn dem we kyan tap yu fram baptaiz
Wen wi mek op wi main fi gi wi laif tu Jeuova an get baptaiz, wi stil a-go av prablem. Fi si wa wi a chat bout, plie di VIDIYO, an den wi a-go taak bout di neks kwestiyan dem.
Iina di vidiyo, wa Narangerel did afi du fi sorv Jeuova?
Kaa shi lov Jeuova, ou dat did elp ar fi get rid a wa did a tap ar fram sorv im?
Riid Pravorbz 29:25 an 2 Timoti 1:7, an den wi a-go taak bout da kwestiyan ya:
Wa kyan elp wi fi no fried fi du wa Jeuova waahn wi fi du?
6. Tek di elp we Jeuova a gi yu
Jeuova a-go elp yu fi du wa im waahn yu fi du. Plie di VIDIYO, an den wi a-go taak bout di neks kwestiyan dem.
Iina di vidiyo, wa did mek di sumadi we a stodi di Baibl fried fi get baptaiz?
Wa im did lorn we elp im fi chos iina Jeuova muor?
Riid Aizaiya 41:10, 13, an den wi a-go taak bout da kwestiyan ya:
Wa mek yu kyan nuo se wa yu pramis Jeuova se yu a-go du wen yu gi yu laif tu im, yu kyan dwi’it fi chuu?
7. Du tingz we a-go elp yu fi lov Jeuova muor
Di muor yu tingk bout umoch Jeuova lov yu, a di muor yu a-go tangk im an waahn fi sorv im fi eva. Riid Saam 40:5, an den wi a-go taak bout da kwestiyan ya:
Wa Jeuova du fi yu we yu lov di muos?
Di prafit we niem Jerimaiya did lov Jeuova an im wod dem, an im did glad se Jeuova yuuz im fi taak bout im an im wod dem. Jerimaiya did se: “Yu wod mek mi api iina mi aat. Jeuova mi Gad . . . di sitn dem we mi a se, a yu sen mi fi se dem.” (Jerimaiya 15:16) Ansa dem kwestiyan ya:
Wa mek a wan nais sitn fi ton wan Jeuova Witnis?
Yu wuda waahn fi get baptaiz an ton wan Jeuova Witnis?
Sitn a tap yu fram dwi’it?
Wa yu tingk yu fi du so yu kyan go baptaiz?
SUMADI MAIT-A SE: “Mi tingk se ef mi go baptaiz mi mait-a en op go du sitn rang.”
A so yu fiil tu?
DIS A WA YU FI MEMBA
Ef yu tek di elp we Jeuova a gi yu, den notn naa go tap yu fram baptaiz.
Wa yu did lorn iina da lesn ya?
Yu afi nuo evriting we iina di Baibl bifuo yu kyan baptaiz?
Wa a som sitn we yu mait-a afi tap du bifuo yu kyan baptaiz?
Wa mek yu no fi fried fi baptaiz?
CHEK OUT SOM MUO SITN
Luk pan wa mek yu fi waahn baptaiz.
Luk pan wa yu kyan du fi tap du som sitn we mek yu kyaahn baptaiz nou.
“Wa Fi Tap Mi Fram Get Baptaiz Rait Nou?” (Di Wachtowa, Maach 2019)
Luk pan ou wan man did chienj op im wiez so im kuda baptaiz.
Luk pan wa mek wan man we niem Ataa neehn kwik fi go baptaiz, an luk wa elp im fi mek op im main fi dwi’it.