Memba Lat Waif

Lat a did Iebriyam breda pikni. Lat an Iebriyam did liv a wan plies niem Kienan. Di tuu a dem did av nof nof animal an wich paat dem did liv did get tuu likl fi di animal dem. So Iebriyam se tu Lat se: ‘Da plies ya tuu likl fi di tuu a wi liv ya. So mi waahn yu fi pik wich paat yu wuda waahn fi go an mi wi pik somwe els.’ It did nais fi si se Iebriyam neehn jos a tingk bout imself wan, duohn?

Lat si wan nais piis a lan nier wan plies we niem Sadam. Nof griin graas did di de an wol iip a waata. So a de-so im muuv im fambili go.

Bot di piipl dem we did a liv a Sadam an wan neda plies nier it we niem Gomaro did wikid bad. An kaaz a dat, Jeuova se im a-go get rid a dem plies de. Bot Gad did waahn mek shuor se Lat an im fambili wuda aarait. So im sen tuu ienjel fi tel dem se: ‘Mikies an kom outa da plies ya! Kaa Jeuova a-go get rid a it.’

Bot Lat did a lie-lie. So di ienjel dem uol aan pan im an im waif, an dem tuu daata dem an kya dem outa di siti. An se tu dem se: ‘Ron gwaan so notn no apm tu unu! An mek shuor se unu no luk baka unu. Yu si ef unu luk baka unu, unu a-go ded!’

Wen dem kech a di plies we niem Zowaar, Jeuova mek faiya an solfa kom dong pan Sadam an Gomaro. An a so im did get rid a dem tuu plies de. Bot Lat waif neehn du wa Jeuova se shi fi du. Shi luk baka ar, an kaaz a dat shi ton iina wan stachu we mek outa saalt. Bot kaa Lat an im daata dem did du wa Jeuova se dem fi du, dem did aarait. It wuda did aad fi dem wen dem si se shi neehn lisn tu Jeuova. Bot dem did glad se dem did lisn tu im.