LESN 34
Ou Wi Kyan Mek Jeuova Si Se Wi Lov Im?
Yu wuda se yu lov Jeuova muor nou dan wen yu did jos staat stodi di Baibl? Yu wuda waahn yu an im get kluos kluos an ton big fren? Ef a dat yu waahn, memba se di muor Jeuova si se yu lov im a di muor im a-go lov yu an tek kier a yu. Wa yu kyan du fi mek Jeuova si se yu lov im?
1. Wa wi kyan du fi mek Jeuova si se wi lov im?
Wen wi du wa Jeuova se wi fi du, wi shuo se wi lov im. (Riid 1 Jan 5:3.) Im no fuos nobadi fi du wa im se. Im gi evribadi di chaans fi disaid fi demself ef dem waahn fi du wa im se ar ef dem no waahn fi du it. Wa mek im du dat? Jeuova du dat kaa im waahn ‘wi fala im wid aal a wi aat.’ (Ruoman 6:17) So wa im riili waahn a fi yu du wa im se yu fi du, no kaa im fuos yu fi dwi’it, bot kaa yu lov im. Paat 3 an 4 iina da buk ya mek wi si di ting dem we wi fi du fi mek Jeuova si se wi lov im, an it mek wi nuo di sitn dem we im no waahn wi fi du tu.
2. Wa mek it mait-a aad somtaim fi du tingz fi mek Jeuova si se wi lov im?
“Di sumadi we a du wa Gad se rait a-go av uol iip a prablem.” (Saam 34:19) Aal a wi a sina, so muor taim wi fain it aad fi du di rait ting. An wi mait-a fain it aad fi mek a livin, ar fi get jostis an wi kuda av som ada prablem tu. Wen wi a go chuu som rof taim, it mait-a aad fi du wa Jeuova waahn wi fi du kaa wi mait-a fain it iiziya fi du di rang sitn. Bot wen yu mek shuor se yu du wa Jeuova waahn yu fi du, a da taim de yu shuo im se yu lov im muor dan notn els, an yu wi mek im si se yu a stik tu im no mata wa. An a dem taim de im a-go stik tu yu tu. Im naa go lef yu.—Riid Saam 4:3.
LORN SOM MUO
Luk pan wa mek a wan big ting tu Jeuova fi yu du wa im se an lorn wa kyan elp yu fi aalwiez du wa im se.
3. Sitn we av fi du wid yu
Iina di Baibl, iina di buk a Juob, Sietan did kliem se im nuo wa mek Juob did a sorv Jeuova, an im kliem se a di sed riizn wa mek evribadi els a sorv Jeuova tu. Riid Juob 1:1, 6–2:10, an den wi a-go taak bout dem kwestiyan ya:
Azkaadn tu Sietan, wa mek Juob did a du wa Jeuova se im fi du?—Luk pan Juob 1:9-11.
Wa Sietan did kliem se evribadi wuda du, aal yu tu?—Luk pan Juob 2:4.
Riid Juob 27:5b, an den wi a-go taak bout da kwestiyan ya:
Ou Juob did shuo se im riili lov Jeuova?
Juob shuo se im lov Jeuova wen im stik tu Jeuova an du wa im se
Wi shuo se wi lov Jeuova wen wi stik tu im an du wa im se
4. Du tingz fi mek Jeuova api
Riid Pravorbz 27:11, an den wi a-go taak bout dem kwestiyan ya:
Ou yu tingk Jeuova fiil wen yu du wa im waahn yu fi du? Wa mek im fiil so?
5. Yu kyan stik tu Jeuova no mata wa
A di lov we wi av fi Jeuova we mek wi waahn tel ada piipl bout im. Kaa wi a stik tu im no mata wa, wi a-go du wa im se—aal wen it no iizi fi wi dwi’it. Plie di VIDIYO, an den wi a-go taak bout di neks kwestiyan dem.
Yu eva fain it aad fi tel ada piipl bout Jeuova?
Iina da vidiyo ya, wa did elp Kevin fi no fried fi taak op bout wa im biliiv iina?
It iiziya fi wi stik tu Jeuova wen wi lov di sitn dem we im lov an iet di sitn dem we im iet. Riid Saam 97:10, an den wi a-go taak bout dem kwestiyan ya:
Bies pan wa yu did lorn aredi, wa a som a di sitn dem we Jeuova lov an wa a som a di sitn dem we im iet?
Wa kyan elp yu fi lov di sitn dem we gud an iet di sitn dem we bad?
6. Wi laif a-go betaraaf wen wi du di sitn dem we Jeuova waahn wi fi du
It aalwiez a-go ton out beta fi wi wen wi du wa Jeuova waahn wi fi du. Riid Aizaiya 48:17, 18, an den wi a-go taak bout dem kwestiyan ya:
Yu tingk Jeuova aalwiez nuo wa a di bes ting fi wi? Wa mek yu se so?
Wa gud it du fi yu aredi kaa yu a stodi di Baibl an a lorn bout Jeuova?
SUMADI MAIT-A SE: “Gad no bizniz wid ou mi waahn fi liv mi laif.”
Wich skripcha yu kuda yuuz fi mek dem si se di wie dem liv dem laif kyan mek Gad fiil gud ar bad?
DIS A WA YU FI MEMBA
Yu kyan shuo Jeuova se yu lov im wen yu du wa im waahn yu fi du an stik tu im aal wen it no iizi fi yu du.
Wa yu did lorn iina da lesn ya?
Wa yu lorn fram ou Juob did diil wid di sitn dem we im go chuu?
Wa yu a-go du fi mek Jeuova si se yu lov im?
Wa a-go elp yu fi stik tu Jeuova no mata wa?
CHEK OUT SOM MUO SITN
Fain out wa yu fi du so yu kyan stik tu Jeuova an di kanggrigieshan.
Fain out muor bout wa Sietan kliem se a di riizn wa mek piipl a sorv Gad.
“Juob Liv Op An Du Wa Gad Waahn Im Fi Du” (Wa A Di Mesij We Iina Di Baibl? lesn 6)
Luk pan ou wi nuo se aal likl pikni kyan shuo se dem lov Jeuova.
Ou wan yong sumadi kyan stik tu Gad aal wen ada yong piipl a presha im fi du wa rang?
No Du Di Bad Sitn Dem We Yu Fren Dem A Fuos Yu Fi Du! (3:59)