Yu Kyan Nuo Fi Shuor Se Jeuova Lov Yu

1. Wa mek yu did mek op yu main fi gi yu laif tu Jeuova? (Luk pan di picha tu.)

YU MEMBA wen yu did prie tu Jeuova an tel im se yu waahn gi yu laif tu im? Yu did mek op yu main fi du dat kaa yu did get fi nuo im an lov im. Da taim de yu pramis im se di sitn dem we im waahn yu fi du a-go bi di big ting iina yu laif an se yu a-go gwaan lov im wid aal a yu aat, yu suol, yu main, an yu chrent. (Maak 12:30) Fram dem taim de yu get fi lov im muor an muor. So wa yu wuda se ef sumadi aks yu se, “Yu riili lov Jeuova?” Yu wudn ich fi se, “Ye man! Mi no lov nobadi muor dan im an mi no lov notn muor dan im niida.”

2-3. A wa Jeuova waahn wi fi nuo fi shuor se, an a wa wi a-go taak bout iina da lesn ya? (Jerimaiya 31:3)

² Bot wa yu wuda se ef sumadi aks yu se, “Yu tingk Jeuova riili lov yu?” Yu mait-a no kwik fi ansa da kwestiyan de kaa yu mait-a a tingk se Jeuova kudn lov sumadi laka yu. An a dat did apm tu wan sista we did fiil laik se nobadi neehn lov ar wen shi did a pikni. Shi se: “Mi lov Jeuova wid aal a mi aat. Mi shuor bout dat. Bot muor wail mi no tuu shuor ef Jeuova lov mi.” Bot a ou Jeuova riili fiil bout yu?

³ Jeuova waahn yu fi nuo fi shuor se im lov yu. (Riid Jerimaiya 31:3.) An a Jeuova a di wan we jraa yu tu im so dat yu an im kuda ton fren. An so wen yu did prie tu im an tel im se yu a gi yu laif tu im an yu get baptaiz, im mek yu nuo se im a-go lov yu an stik tu yu fi eva. An dat a wan speshal ting im du fi yu. So dat miin tu se Jeuova lov yu bad an im naa go lef yu. An das wai wen Jeuova luk pan di wan dem we a sorv im, im si dem az im “speshal piipl” we wot nof tu im. An yu a wan a dem tu. (Mal. 3:17.) Jeuova waahn yu fi nuo fi shuor se im lov yu jos laik ou di apasl Paal did nuo fi shuor se Jeuova lov im. Kaaz a dat, Paal kuda rait se: “Mi nuo fi shuor se notn at aal kyan mek Krais Jiizas tap lov wi. It no mata ef wi ded ar wi alaiv, im naa tap lov wi. No ienjel, ruula ar powa iina evn kyan tap im fram lov wi. Notn we a apm nou an notn we a-go apm, wi mek im tap lov wi. Mi nuo fi shuor se, notn we de wie op iina di skai ar we de anda di ort kyan mek im tap lov wi. Az a matarafak, notn we Gad mek, notn at aal kyan tek we di lov we kom fram Gad.” (Ruo. 8:38, 39) Iina da lesn ya, wi a-go taak bout wa mek it impuotant fi nuo se Jeuova lov wi an wa an wa wi kyan du so wi kyan nuo fi shuor se im lov wi fi chuu.

WA MEK IT IMPUOTANT FI YU NUO SE JEUOVA LOV YU?

4. Wa a wan a di lai dem we Sietan waahn wi fi biliiv, an wa wi kyan du fi tan op chrang gens im wen im kom wid da lai de?

⁴ Wen wi nuo fi shuor se Jeuova lov wi, dat kyan elp wi fi fait gens wan a Sietan “wikid chrik dem.” (Ifii. 6:11) Sietan a chrai tap wi fram sorv Jeuova an im wi du eniting fi mek dat apm. An wan a di ting dem we im du a dat im chrai fi mek wi biliiv wan wikid lai se Jeuova no lov wi. Bot wi fi memba se Sietan a luk fi eni chaans we im kyan get fi presha wi, speshali wen wi wiik. So ef wi fiil sad kaa wi a tingk bout sopm we did ort wi fram lang taim, ar ef wi a wori bout sitn we a apm iina wi laif nou, ar ef wi a fret bout sitn we mait apm iina di fyuucha, Sietan a-go si wen dat a gwaan an im a-go kom dem taim de fi chrai presha wi fi ton wi bak pan Jeuova. (Pr. 24:10) Sietan komiin laik wan onggri beli laiyan we a luk fi sumadi fi nyam. So im a-go kom afta wi wen im si se sitn a gwaan we mek wi fiil sad bad fi chrai fi get wi fi gi op. Bot ef wi gwaan du di ting dem we mek wi shuor se Jeuova lov wi, dis a-go elp wi fi fait aaf Sietan an tan op chrang gens im wen im kom wid im oul wikid lai dem.​—1 Pii. 5:8, 9; Jmz. 4:7.

5. Wa mek it impuotant fi wi nuo se Jeuova lov wi an dat wi wot nof tu im?

⁵ Wen wi nuo fi shuor se Jeuova lov wi, dat a-go mek wi jraa nier tu im. Luk pan wa mek wi se so. Wi niid fi lov piipl an wi niid fi nuo se ada piipl lov wi tu. A so Jeuova mek wi. Wen sumadi shuo se dem lov wi, dat wi mek wi waahn fi shuo se wi lov dem tu. So di muor wi kyan si an fiil se wi preshos tu Jeuova an se im lov wi a di muor wi a-go waahn fi lov im bak. (1 Jan 4:19) Wen wi lov fi Jeuova a get chrangga an chrangga, fi im lov fi wi a-go get chrangga an chrangga tu. Di Baibl se: “Jraa nier Gad, an Gad wi jraa nier unu.” (Jmz. 4:8) So wa wi kyan du so dat wi kyan nuo fi shuor se Jeuova riili lov wi?

WA KYAN ELP YU FI NUO FI SHUOR SE JEUOVA LOV YU?

6. Ef yu no shuor se Jeuova riili lov yu, wa yu kyan du?

⁶ No tap prie tu Jeuova fi elp yu fi nuo wa mek im lov yu. (Luuk 18:1; Ruo. 12:12) Yu mait-a afi prie tu Jeuova nof taim evridie fi elp yu fi nuo ou im fiil bout yu. Somtaim yu mait-a fiil so bad bout yuself dat it aad fi yu fi nuo se Jeuova riili lov yu. Bot memba se Jeuova biga dan yu aat. (1 Jan 3:19, 20) Im nuo yu muor dan ou yu nuo yuself an im si di gud wiez dem we yu av aal wen yu no si dem. (1 Sam. 16:7; 2 Kr. 6:30) So no ich fi “tel im evriting” bout ou yu fiil an aks im fi elp yu fi nuo fi shuor se im lov yu. (Sa. 62:8) Afta yu prie tu im, mek shuor yu du dem sitn ya we wi a-go taak bout nou.

7-8. Ou di Saamz dem elp wi fi nuo fi shuor se Jeuova lov wi?

⁷ Yu kyan biliiv wa Jeuova se. Jeuova gi im uoli spirit tu di man dem we im yuuz fi rait di Baibl. So wi kyan nuo fi shuor se wa dem se bout Jeuova a so it go fi chuu. Iina wan a di Saamz dem we Dievid rait, im taak bout ou Jeuova kier bout wi. Im se: “Jeuova de de fi di piipl dem we dem aat a tier op insaida dem, an im siev di wan dem we fiil laik dem taiyad an waahn gi op.” (Sa. 34:18.) Wen yu fiil sad bad, yu mait-a fiil laik yu de pan yu uon an nobadi no andastan wa yu a go chuu. Bot wen yu fiil dem wie ya Jeuova pramis se a dem taim de im a-go de de wid yu kaa im si se yu riili niid im elp. Iina wan neda Saamz we Dievid rait, im se: “Mi a beg yu kech mi yai-waata iina yu bakl.” (Sa. 56:8) Ye man, Jeuova si wen yu sad bad an im si aal a wa yu a chogl wid. Im kier bout yu nof nof an im fiil yu pien iina im aat. Yu si jos laik ou wen yu de a ruod an di son at bad an yu chuot jrai, evri jrap a waata iina yu waata bakl wot nof tu yu. A siem so Jeuova si evri jrap a yai-waata evritaim yu fiil pien an a baal an it wot nof tu im tu. Saamz 139:3 se: “[Jeuova] yu si an nuo wa mek mi du evriting we mi du.” So Jeuova si evriting we yu du ino, bot a di gud sitn dem we yu du im riili tek iin. (Iib. 6:10) Wa mek wi nuo dat? Kaa evriting we yu chrai fi du fi mek im api wot nof tu im.a

⁸ Jeuova yuuz dem ya skripcha ya fi mek yu nuo se im lov yu an kier bout yu nof. Bot wi did lorn aredi se Sietan waahn wi fi tingk se Jeuova no lov wi. So ef somtaim yu fiil laik se Jeuova no lov yu, yu kyan tingk bout a uu yu waahn fi biliiv. Yu kyan iida biliiv Sietan we a di “faada fi aal lai” ar yu kyan biliiv Jeuova we a di Gad we aalwiez taak chuut.​—Jan 8:44; Sa. 31:5.

9. Wa Jeuova pramis di wan dem we lov im? (Eksidos 20:5, 6)

⁹ Tingk bout ou Jeuova fiil bout di wan dem we lov im. Laik tingk bout wa Jeuova did tel Muoziz an di Izrelait dem. (Riid Eksidos 20:5, 6.) Jeuova pramis se im a-go aalwiez lov di wan dem we lov im an im a-go stik tu dem. Dis mek wi nuo fi shuor se az lang az wi lov Jeuova im a-go lov wi tu. A jos so im stie. (Nii. 1:5) So ef som a di taim yu staat fi tingk se Jeuova no lov yu, jos memba se yu lov Jeuova. So ef yu lov im an yu a chrai yu bes fi mek im api jos nuo fi shuor se im lov yu nof nof kaa yu a du dat. (Dan. 9:4; 1 Kor. 8:3) Dat miin tu se ef yu shuor se yu lov Jeuova, yu kyan nuo fi shuor se im lov yu tu an se im a-go aalwiez lov yu an im naa go lef yu.

10-11. Uu Jeuova waahn wi fi memba se im sen Jiizas fi kom ded fa? (Gyalieshan 2:20)

¹⁰ Sidong an tingk bout ou Jeuova sen im Bwai Pikni fi kom ded fi wi. Di bigis ting we Jeuova du fi wi a wen im sen Jiizas fi kom ded fi wi. (Jan 3:16) Bot yu wuda se Jeuova sen Jiizas fi kom ded fi yu? Ye man! Tingk bout wa did gwaan wid di apasl Paal. Memba se im did du som bad sitn bifuo im ton Kristiyan. An iivn afta dat im did afi chrai aad fi no du notn fi sin gens Jeuova. (Ruo. 7:24, 25; 1 Tim. 1:12-14) Bot im did nuo fi shuor se Jeuova did sen Jiizas fi kom ded fi im. (Riid Gyalieshan 2:20.) An memba ino, a Jeuova did tel Paal fi rait bout dis iina di Baibl. So Jeuova waahn wi fi lorn fram wa Paal did rait se. (Ruo. 15:4) Jeuova waahn yu fi nuo se im sen Jiizas fi ded fi yu. Dat a wan prezent fram im tu yu. So wen yu tingk bout da nais nais prezent de we Jeuova gi yu, it wi mek yu nuo fi shuor se im riili lov yu.

¹¹ Wi tangk Jeuova fi sen Jiizas fi kom ded fi wi. Bot wan neda riizn we mek Jiizas kom pan ort a fi mek piipl nuo di chuut bout Jeuova. (Jan 18:37) An wan a di ting dem we im taak bout a ou Jeuova fiil bout im pikni dem.

JIIZAS KYAN ELP YU FI NUO FI SHUOR SE JEUOVA LOV YU

12. Wa mek wi kyan biliiv wa Jiizas se bout Jeuova?

¹² Wen Jiizas did de pan ort, im did api fi tel piipl bout di kain-a sumadi Jeuova bi. (Luuk 10:22) An wi kyan biliiv wa Jiizas did se bout Jeuova kaa Jiizas did de iina evn wid Jeuova fi wol iip a ier bifuo im kom a ort. (Kol. 1:15) Jiizas nuo se Jeuova lov im bad an im si ou Jeuova shuo se im lov di ienjel dem iina evn an aal a im pikni dem pan di ort we a sorv im. So ou Jiizas kyan elp wi fi nuo fi shuor se Jeuova lov wi?

13. Wa Jiizas did waahn wi fi nuo bout Jeuova?

¹³ Jiizas waahn wi fi nuo ou Jeuova fiil bout wi. Iina di Baibl buk dem we niem Matyu, Maak, Luuk, an Jan, im kaal Jeuova “Faada” muo dan 160 taim. An wen im a taak tu im falara dem bout Jeuova, im se “unu Faada” an “yu Faada we de iina evn.” (Mat. 5:16; 6:26) Yu si bifuo Jiizas kom a ort, di wan dem we yuus tu worship Jeuova did kaal Jeuova di “Almaiti,” “di Muos Ai,” di “Wan We Mek Evriting,” an ada tingz laik dis tu. Bot Jiizas aalwiez kaal Jeuova wi “Faada.” An dis shuo se Jeuova waahn wi fi fiil kluos tu im jos laik ou wan pikni wuda fiil kluos tu im faada we lov im. An Jiizas did waahn wi fi nuo dat tu. So mek wi luk pan tuu taim wen Jiizas did kaal Jeuova “Faada.”

14. A ou Jiizas shuo wi se evri wan a wi wot nof tu wi Faada Jeuova? (Matyu 10:29-31) (Luk pan di picha tu.)

¹⁴ Fos mek wi luk pan wa Jiizas se a Matyu 10:29-31. (Riid.) Di skripcha taak bout som likl bod, an dem ya bod ya kyaahn lov ar worship Jeuova. Bot wi si se Jeuova nuo wen eni wan a dem jrap a grong. So ef dem ya bod ya wot so moch tu Jeuova, wi kyan nuo fi shuor se im kier nof nof muor bout wi kaa wi lov im an wi worship im tu. A Matyu 10:30 Jiizas se: “Dong tu di ier pan unu ed Faada Gad kount op an nuo umoch de de.” So sins Jeuova nuo aal dem likl sitn de bout wi, wi nuo se im kier bout wi nof nof. So wi si klier klier se Jiizas waahn wi fi nuo se evri wan a wi wot nof tu wi Faada iina evn.

15. Iina Jan 6:44, wa Jiizas tel wi bout wi Faada we de a evn?

¹⁵ Luk pan di neks taim Jiizas yuuz di wod “Faada.” (Riid Jan 6:44.) Yu Faada we de a evn elp yu fi get fi nuo im an lov im. An im du dat kaa im si di gud wiez dem we yu av an se yu aat kliin. (Aks 13:48) Wen Jiizas se wa im se a Jan 6:44, im kuda a taak bout wa Jeuova did se a Jerimaiya 31:3. Jeuova se: “Wen mi lov sumadi mi stik tu dem, an a das wai mi jraa yu tu miself.” (Jer. 31:3; luk pan Oziya 11:4.) Tingk bout wa dat miin fi yu. Yu Faada we de iina evn aalwiez si di gud wiez dem we yu av we yu mait-a nat iivn si se yu av.

16. (a) A wa Jiizas tel wi an wa mek wi kyan biliiv im? (b) Wa kyan elp yu fi nuo fi shuor se Jeuova a di bes Faada yu kuda eva av? (Luk pan di paat we niem “Di Bes Faada Wi Kuda Eva Av.”)

¹⁶ Jiizas tel wi se Jeuova a no jos fi im Faada bot a fi yu Faada tu. Jiizas waahn yu fi nuo fi shuor se Jeuova lov yu an im kier bout yu nof nof. So somtaim wen yu a wanda ef Jeuova lov yu, yu fi memba wa Jiizas se. An yu kyan biliiv im kaa im no tel lai an nobadi els no nuo Jeuova beta dan im.​—1 Pii. 2:22.

DU EVRITING YU KYAN DU FI AALWIEZ MEMBA SE JEUOVA LOV YU

17. Wa mek wi fi du evriting we wi kyan du fi aalwiez memba se Jeuova lov wi?

¹⁷ Jos laik wa wi lorn aredi, Sietan we a wi enimi we kumuujin bad, a-go du evriting im kyan du fi tap wi fram sorv Jeuova. Im waahn fi mek wi biliiv se Jeuova no lov wi. So wi afi du evriting we wi kyan du fi aalwiez memba se Jeuova lov wi nof nof. Wi kyaahn mek Sietan win!​—Juob 27:5.

18. Wa yu kyan du fi aalwiez nuo fi shuor se Jeuova lov yu?

¹⁸ Iina da lesn ya, yu lorn se Jeuova riili lov yu. An yu lorn se yu kyan prie tu im an aks im fi elp yu fi si yu gud wiez dem we im si se yu av an si wa mek im lov yu. Tingk gud tu bout di Baibl vors dem we taak bout ou im kier bout di wan dem we lov im an ou im lov dem tu. An no figet se Jeuova did sen im Bwai Pikni fi kom ded fi yu. An yu kyan nuo fi shuor se wen Jiizas se Jeuova a yu Faada a no lai im a tel. So ef sumadi shuda aks yu se: “Yu shuor se Jeuova lov yu?” yu naa go ich fi se: “Ye man! Im lov mi. An mi a du aal we mi kyan du evridie fi shuo im se mi lov im tu!”