Kaa Jiizas Kom Ded Fi Wi, Wa Wi Kyan Lorn Fram It?

1. Wa mek it gud fi wi go a di Laad Sopa evri ier?

AAL a wi nuo se a wan big ting Gad du fi sen im Bwai Pikni fi kom ded fi wi, an dat a wan gif we wi kyaahn pie im fa. (2 Kor. 9:15) Kaa Jiizas kom ded fi wi, im mek wi an Jeuova kyan ton gud gud fren, an dat mek wi kyan get di chaans fi liv fi eva. So a wan gud sitn fi wi shuo Jeuova an Jiizas uu lov wi se wi tangk dem fi wa dem du fi wi. (Ruo. 5:8) So fi mek wi memba wa dem du fi wi, bifuo Jiizas ded im set op di Laad Sopa fi wi kip it evri ier.​—Luuk 22:19, 20.

2. A wa wi a-go luk pan iina da lesn ya?

² Wi a-go kip di Laad Sopa fi da ier ya pan Satde Iepril 12, 2025. An wi nuo se aal a wi a plan fi go. An it a-go du wi gud ef wi sidong an tingk bout wa Jeuova an im Bwai Pikni Jiizas du fi aal a wi. Iina da lesn ya, wi a-go luk pan wa wi kyan lorn bout Jeuova an Jiizas kaa Jiizas kom ded fi wi. An di neda lesn a-go elp wi fi andastan som a di blesn dem we wi a-go get kaa Jiizas kom ded fi wi an wa wi kyan du fi mek dem nuo se wi tangk dem fi wa dem du fi wi.

KAA JIIZAS KOM DED FI WI, WA DAT TIICH WI BOUT JEUOVA?

3. Kaa wan man kom ded fi wi, ou dat mek wi kyan get frii fram sin an no en op a ded? (Luk pan di picha tu.)

³ Kaa Jiizas kom ded fi wi, it mek wi si se Jeuova a wan Gad we fier. (Dyuu. 32:4) Wi nuo dis kaa wen wi tingk bout it, sin kom bout kaa Adam neehn lisn tu Gad an a dat mek wi en op a ded. (Ruo. 5:12) Fi mek wi get frii fram sin an no ded Jeuova mek Jiizas gi op im laif fi wi. Bot a ou wa Jiizas du kuda mek uol iip a piipl get frii fram sin an no ded? Paal mek wi nuo dis wen im se: “Kaaz wan man [Adam] neva du we Gad se im fi du, sin kom iina di worl an siek-a dat evribadi a sina. A siem so, Gad mek tingz rait bitwiin im an piipl kaaz wan man [Jiizas] did du we im tel im fi du.” (Ruo. 5:19; 1 Tim. 2:6) So wi si se it did jos tek wan man we porfek we no du wa Gad se fi kaaz evribadi fi en op iina sin an a ded. An a das wai a wan neda man we porfek we lisn tu wa Gad se wi did niid fi frii wi fram sin an mek wi no ded.

4. Wa mek Jeuova kudn jos mek Adam pikni dem we du wa rait get fi liv fi eva?

⁴ Jiizas did riili afi kom ded fi wi? Jeuova kudn jos lou Adam pikni dem we a du wa rait fi jos liv fi eva? Fi wi, dat mait-a luk laik se a sitn we gud an kain fi Jeuova du, bot dat wudn shuo se im a wan Gad we fier. Kaa memba ino, Jeuova a wan Gad we fier, so im wudn mek we Adam bier fies an du jos go so.

5. Wa mek wi kyan nuo fi shuor se Jeuova aalwiez a-go du wa rait?

⁵ Ef Jeuova did mek Adam pikni dem gwaan liv fi eva an neehn sen im Bwai Pikni fi kom ded fi dem, it wuda komiin laik se im naa du wa im se rait an so piipl wuda a wanda ef im gweehn du wa im se rait, laik ef im a-go go bak pan som a di ting dem we im pramis se im a-go du. Bot wi nuo se im naa go du dat. Kaa Jeuova gi op im wan dege-dege Bwai Pikni we wot nof tu im, dat mek wi nuo se im a-go aalwiez du wa rait.

6. Wa a wan neda riizn wa mek Jeuova sen im Bwai Pikni fi kom ded fi wi? (1 Jan 4:9, 10)

⁶ Kaa Jeuova sen im wan dege-dege Bwai Pikni fi kom ded fi wi, it mek wi si umoch im lov wi, no jos se im fier. (Jan 3:16; riid 1 Jan 4:9, 10.) Di ting dem we wi lorn fram wa Jiizas du fi wi mek wi si se Jeuova no onggl waahn wi fi liv fi eva bot im waahn wi fi bi paat a im fambili. Tingk bout dis: Afta Adam sin, Jeuova put im outa im fambili. An kaa a dat wen wi baan, wi a no paat a Gad fambili. Bot wen Jiizas gi op im laif fi wi, it mek Jeuova kyan paadn wi sin dem, an suun suun aal a di wan dem we chos iina im kyan go bi paat a im fambili agen. Bot til da taim de kom, aal a wi kyan get kluos tu Jeuova an tu wi breda an sista dem we a sorv im tu. Ye man, Jeuova lov wi fi chuu!​—Ruo. 5:10, 11.

7. A ou wa Jiizas go chuu mek wi si umoch Jeuova lov wi?

⁷ It mek wi si umoch Jeuova lov wi wen wi tingk bout umoch it tek outa im fi sen Jiizas fi kom ded fi wi. Sietan tel Jeuova se nobadi naa go sorv im ef tingz rof wid dem. So fi mek Sietan nuo se a fuulinish im a chat, Jeuova lou Jiizas fi sofa an ded fi wi. (Juob 2:1-5; 1 Pii. 2:21) Jeuova wach di Juu liida dem an di piipl dem mak Jiizas an laaf aafa im an di suoja dem biit im wid tik an den go niel im pan wan wudn puos. Afta dat Jeuova wach im Bwai Pikni we im lov so moch sofa bad an ded. (Mat. 27:28-31, 39) Jeuova kuda yuuz im powa an no mek Jiizas sofa so moch, laik wen di piipl dem we did a fait gens im se: “Mek Gad siev im ef a dat Gad waahn du,” an Jeuova kuda du dat ef im waahn. (Mat. 27:42, 43) Bot ef Jeuova did du dat, Jiizas wudn get fi gi op im laif fi wi an a wuda it dat fi wi. So Jeuova mek im wan dege-dege Bwai Pikni kom sofa an ded fi wi.

8. Wa mek wi nuo se it did ort Jeuova wen im si im Bwai Pikni a sofa? (Luk pan di picha tu.)

⁸ Wi no fi fiil se kaa Jeuova av aal a di powa im kyaahn fiil no wie. Im mek aal a wi wid di siem kain-a wiez dem we im av. Jos laik ou tingz kyan apm we ort wi, a siem so tingz kyan apm we ort Jeuova tu. Di Baibl mek wi nuo se som a di taim Jeuova fiil “ort” an it mek wi nuo se im kyan fiil beks tu. (Sa. 78:40, 41) Tingk bout wa did apm wid Iebriyam an Aizak wen Jeuova aks Iebriyam fi gi op im wan dege-dege Bwai Pikni az wan sakrifais. (Jen. 22:9-12; Iib. 11:17-19) Tingk bout ou Iebriyam mos did fiil wen im did a get Aizak redi fi kil im. Dat gi wi wan likl prips a ou Jeuova did fiil wen im wach som wikid piipl biit an bata bruuz im Bwai Pikni an kil im!​—Wach di vidiyo we niem Imitate Their Faith​—Abraham, Part 2 we de pan jw.org.

9. A wa Ruoman 8:32, 38, 39 tiich wi bout umoch Jeuova lov wi an wi breda an sista dem we a sorv im?

⁹ Kaa Jeuova sen im Bwai Pikni fi kom ded fi wi, it mek wi si umoch im lov wi. Nat iivn wi uona fren an fambili no lov wi so. (Riid Ruoman 8:32, 38, 39) Wi no afi aks ef Jeuova lov wi muor dan ou wi lov wiself. Jeuova waahn yu fi liv fi eva muor dan umoch yu waahn fi liv fi eva. Jeuova waahn yu sin dem fi get paadn muor dan ou yu waahn yu sin dem fi get paadn. Bot aal im waahn wi fi du a fi chos iina im an lisn tu wa im se. Wa Jeuova du fi wi mek wi si umoch im lov wi, an iina Paradais wi a-go lorn uol iip muor bout umoch im lov wi.​—Iik. 3:11.

KAA JIIZAS DED FI WI, WA DAT TIICH WI BOUT IM?

10. (a) A wa mek Jiizas did beks bad wen dem did a-go kil im? (b) A ou Jiizas did big op im Faada niem an mek dem nuo se a lai dem did a tel pan im? (Luk pan di paat we niem “Kaa Jiizas Did Du Wa Jeuova Se Im Fi Du, It Shuo Se Sietan A Laiyad.”)

¹⁰ Jiizas neehn waahn nobadi av notn bad fi se bout im Faada. (Jan 14:31) So it did ort im bad fi nuo se dem wuda kil im az sumadi uu disrispek Gad an se im a wan kriminal. An dat wuda mek piipl gi Jeuova bad niem. An a das wai im prie se: “Mi Faada, ef yu kyan dwi’it, du, tek da kop ya fram mi.” (Mat. 26:39) Wen Jiizas du wa im Faada se im fi du til im ded a so im big op im Faada niem an shuo se a lai dem did a tel pan im Faada.

11. Wa Jiizas du fi shuo se im riili lov piipl? (Jan 13:1)

¹¹ Kaa Jiizas gi op im laif fi wi, dat mek wi si se im riili riili lov piipl, speshali im falara dem. (Pr. 8:31; riid Jan 13:1.) Laik Jiizas did don nuo aredi se im wuda go chuu som rof taim pan di ort, speshali wen it kom aan tu di wie ou im did a-go ded. Bot wen wi luk pan di wie ou Jiizas du di wok we Jeuova gi im fi du, im neehn jos a dwi’it kaa im did afi dwi’it, bot im did wel waahn fi dwi’it. An wi kuda si dis iina di wie ou im put im uol aat iina di priichin an tiichin wok we im did get fi du an ou im elp ada piipl tu. Aal pan di laas die bifuo im ded im wash im apasl dem fut. Im aal tel dem tingz fi mek dem fiil beta an wa dem fi du tu. (Jan 13:12-15) An wen im did bout fi ded, im taak tu wan kriminal we did de saida im fi mek im nuo se im a-go de iina Paradais, an im aal aks sumadi fi tek kier a im mada tu. (Luuk 23:42, 43; Jan 19:26, 27) So di wie ou Jiizas liv im laif mek wi si se im lov wi, no jos kaa im ded fi wi.

12. Wa Jiizas a du fi wi ya nou?

¹² Wen Jiizas ded, “sin luuz aal a it powa fi eva.” Bot Jiizas stil a du uol iip fi wi. (Ruo. 6:10) An wi nuo dat kaaz a di uol iip a gud sopm dem we im kyan du kaa im did kom gi op im laif fi wi. Jiizas stil a wok aad, im a wi King, Liida Fi Di Priis Dem, an di ed fi di kanggrigieshan dem. (1 Kor. 15:25; Ifii. 5:23; Iib. 2:17) A im a gyada op di piipl dem we a-go liv iina evn an di wan dem we a-go liv pan di ort bifuo di wos sofarieshan don. (Mat. 25:32; Maak 13:27) Pan tap a dat, im mek shuor se di wan dem we a worship Jeuova av di ting dem fi kip dem kluos tu Im. (Mat. 24:45) An wen Jiizas a ruul fi di Touzn Ier, im a-go mek shuor se im a du wa a di bes ting fi wi. Jeuova riili gi op im Bwai Pikni fi wi!

NO TAP LORN

13. Wen wi tingk bout aal a wa Jeuova an Jiizas du fi wi, a ou dat kyan elp wi fi gwaan lorn bout umoch dem lov wi?

¹³ Ef yu gwaan tingk bout wa Jeuova an Jiizas a du fi wi yu kyan lorn uol iip a sopm. So roun di taim wen dem a kip di Laad Sopa, yu kyan riid wan a dem buk ya: Matyu, Maak, Luuk ar Jan an si wa yu kyan lorn fram it. No chrai fi riid tu moch wan taim, tek yu taim an si ou wa yu riid kyan elp yu fi lov Jeuova an Jiizas muor, an memba fi tel ada piipl bout di sitn dem we yu a lorn.

14. Wen wi luk op tingz, a ou dat kyan elp wi fi gwaan lorn bout ou Jiizas gi op im laif fi wi an ada tingz? (Saam 119:97) (Luk pan di picha tu.)

¹⁴ Ef yu a sorv Jeuova fi uol iip a ier, yu mait-a a wanda ef notn nyuu de fi yu lorn bout ou Jeuova fier an ou im lov wi an bout ou im gi op im Bwai Pikni fi ded fi wi. Bot wi stil kyan lorn uol iip muor bout dem sitn ya, so yu kyan riid op bout dem sopm ya iina wi buk an pamplet dem. Wen yu fain sitn we yu no andastan chrai fi riid op muor bout it. Wen yu a go chuu di die gwaan tingk bout wa yu lorn an si wa it a elp yu fi nuo bout Jeuova an im Bwai Pikni an umoch dem lov yu.​—Riid Saam 119:97

15. Wa mek wi no fi tap chrai fi fain sopm nyuu wen wi a riid wi Baibl?

¹⁵ No fiil no wie ef som a di taim wen yu a riid di Baibl an a luk op tingz yu no fain notn nyuu ar notn we yu wel waahn fi tel nobadi bout. Iina wan wie yu komiin laik sumadi we a luk fi guol. Somtaim a uol iip a die it tek sumadi we a luk fi guol fi fain wan likl piis, bot dem no tap sorch fi it kaa evri likl piis a guol wot nof tu dem. Wen wi fain sitn nyuu iina di Baibl, it wot nof muor dan wen sumadi fain guol. (Sa. 119:127; Pr. 8:10) So tek taim wid yuself an gwaan riid yu Baibl evridie.​—Sa. 1:2.

16. Wa wi kyan du fi shuo se wi a du tingz laik Jeuova an Jiizas?

¹⁶ Wen yu a stodi, chrai an du di ting dem we yu a lorn, laik chrai fi chriit piipl fier laik wa Jeuova wuda du an chrai fi lov piipl laik Jeuova an laik ou Jiizas lov dem. Jiizas did redi fi sofa so dat im kuda big op Jeuova niem. An jos laik Jiizas wi fi redi fi du wa wi kyan du fi elp out wi breda an sista dem, an priich tu piipl laik Jiizas so dat dem kyan get fi nuo aal a di nais sitn dem we Jeuova du fi dem.

17. A wa wi a-go luk pan iina di neda lesn?

¹⁷ Di muor wi lorn bout ou Jeuova sen Jiizas kom gi op im laif fi wi a di muor wi a-go lov dem. An dat a-go mek dem du tingz fi shuo se dem lov wi tu. (Jan 14:21; Jmz. 4:8) So mek wi yuuz di sitn dem we Jeuova gi wi fi gwaan lorn bout wa dem du fi wi. Iina di neda lesn, wi a-go lorn bout som a di blesn dem we wi a-go get kaa Jiizas kom ded fi wi, an wi a-go lorn bout wa wi kyan du fi shuo se wi tangk Jeuova fi ou im lov wi.