Wa A Som A Di Blesn Dem We Wi A Get Kaa Jeuova Lov Wi?

1. Wa wi kyan du fi mek Jeuova api?

WA EF yu gi sumadi wan nais gif we yu nuo se dem kyan yuuz an dem tek it an put it we an no yuuz it? Yu wuda fiil a wie, no chuu? Bot ef dem yuuz it, dat wuda mek yu fiil gud! Wen Jeuova sen im Bwai Pikni fi kom ded fi wi, a wan gif dat im gi wi kaa im lov wi. An a siem wie so im wuda waahn wi fi mek yuus a it. Dat wuda mek im si se wi tangk im fi wa im du fi wi an dat wuda mek im api!​—Jan 3:16; Ruo. 5:7, 8.

2. A wa wi a-go luk pan iina da lesn ya?

² Ef wi de bout fram lang taim, afta a wail wi mait-a en op tap du tingz fi shuo se wi tangk Jeuova an Jiizas fi wa dem du fi wi. It wuda komiin laik se wi tek di gif we Gad gi wi an put it we an naa yuuz it. An it wuda komiin laik se wi api fi av it bot wi naa mek nobadi si’it. So fi no en op du dat wi afi gwaan shuo Jeuova an Jiizas se wi tangk dem fi wa dem du fi wi. Iina da lesn ya, wi a-go luk pan som blesn we wi a get nou an iina di fyuucha kaaz a wa dem du fi wi. An roun di taim wi a kip di Laad Sopa wi a-go luk pan som tingz we wi kyan du fi shuo Jeuova se wi tangk im fi wa im du fi wi.

SOM A DI BLESN DEM WE WI A GET NOU

3. A wa a wan a di blesn dem we wi get rait ya nou kaa Jiizas kom gi op im laif fi wi?

³ Wan a di blesn dem we wi get kaa Jiizas gi op im laif fi wi a dat Jeuova wi paadn wi fi wi sin dem. A no laik se im afi dwi’it, bot im dwi’it kaa im riili waahn fi dwi’it. Wan a di man dem we rait di buk a Saamz se: “Kaa yu Jeuova, yu gud an yu eva redi fi paadn piipl.”​—Sa. 86:5; 103:3, 10-13.

4. A uu Jeuova mek im Bwai Pikni kom gi op im laif fa? (Luuk 5:32; 1 Timoti 1:15)

⁴ Som a wi mait-a fiil laik se wi no gud inof fi Jeuova paadn wi. Bot di chuut a dat non a wi no dizorv it. An a so di apasl Paal did fiil kaa im did se: “Mi no gud inof fi dem iivn kaal mi wan apasl.” An den im se: “Bot a chuu Gad gud an kain tu mi mek mi kyan du wa mi a du nou.” (1 Kor. 15:9, 10) Wen wi ton we fram wi sin dem an staat du wa rait, Jeuova wi paadn wi. Bot a no kaa wi dizorv it mek im a dwi’it, bot a chuu im lov wi. So ef yu fiil laik se yu no gud inof fi Jeuova paadn yu, jos memba se Jeuova gi op im Bwai Pikni fi piipl we sari fi we dem du rang, no fi piipl we no du notn fi nobadi paadn dem fa.​—Riid Luuk 5:32; 1 Timoti 1:15.

5. Tel wi wa mek wi no fi fiil se Jeuova afi paadn wi.

⁵ Kaa wi a sorv Jeuova fi wol iip a ier nou no miin se im afi paadn wi fi wi sin dem. Ye, Jeuova glad se wi a sorv im fi wan lang taim an wi a stik tu im. (Iib. 6:10) A wan gif im gi wi wen im sen Jiizas fi kom ded fi wi, a no pie Im did a pie wi fi aal a wa wi du fi Im. So ef wi fiil tu se a kaaz a di sitn dem we wi a du fi Jeuova mek im paadn wi, it wuda komiin laik se it neehn mek no sens Jiizas kom ded fi wi.​—Luk pan Gyalieshan 2:21.

6. A wa mek Paal did wok so aad fi Jeuova?

⁶ Paal did nuo se no mount a aad wok we im du kudn mek Jeuova paadn im jos so. Im neehn wok aad fi Jeuova kaa im tingk se Jeuova afi paadn im, bot im dwi’it jos fi shuo Jeuova umoch im tangk im fi wa Im du fi im. (Ifii. 3:7) So jos laik Paal, aal a wi fi gwaan wok aad fi Jeuova an mek im nuo se wi tangk im fi wa im du fi wi.

7. Wa a wan neda blesn we wi get rait ya nou kaa Jiizas kom gi op im laif fi wi? (Ruoman 5:1; Jiemz 2:23)

⁷ Wan neda blesn we wi get rait ya nou kaa Jiizas kom ded fi wi a dat wi an Jeuova kyan ton gud gud fren.a Jos laik wa wi did se iina di lesn bifuo da wan ya, wen wi did baan wi an Gad a neehn fren. Bot kaa Jiizas kom ded fi wi, “wi an Gad a liv iina piis” ya nou an wi kyan jraa nier tu im.​—Riid Ruoman 5:1; Jiemz 2:23.

8. Wa mek wi fi api se wi kyan prie tu Jeuova?

⁸ Kaa wi an Jeuova a gud gud fren wi kyan prie tu im. An im no onggl ier wi wen wi a prie tu im wid ada piipl, bot im ier wi aal wen wi a prie bai wiself tu. An wi no onggl prie tu im kaa wi waahn fi fiil wan piis iina wi aat an main bot wi prie tu im kaa wi waahn wi an im fi ton gud gud fren. (Sa. 65:2; Jmz. 4:8; 1 Jan 5:14) Wen Jiizas did de pan di ort, im prie aad tu Jeuova kaa im did nuo se Jeuova a lisn tu im an it mek im an im Faada stie kluos kluos. (Luuk 5:16) Yu no api se kaa Jiizas ded fi wi wi kyan get di chaans fi ton Jeuova gud gud fren an wi kyan aal get fi prie tu im tu?

SOM A DI BLESN DEM WE WI A-GO GET IINA DI FYUUCHA

9. Kaa Jiizas kom gi op im laif fi wi, a ou it a-go elp di wan dem we a worship Jeuova iina di fyuucha?

⁹ Di piipl dem we a sorv Jeuova a-go kyan get di chaans fi liv fi eva kaa Jiizas kom ded fi wi. Nof piipl no tingk notn kyan go so kaa dem neva si nobadi we liv fi eva yet. Bot wen Jeuova did mek wi, im did mek wi fi liv fi eva an a dat im a-go mek apm stil kaa ef Adam neehn sin evribadi wuda get di chaans fi liv fi eva. So aalduo rait ya nou it mait-a luk laik se wi kyaahn go get fi liv fi eva, wi kyan nuo fi shuor se it kyan apm kaa Jeuova did du di bigis ting eva wen im sen im Bwai Pikni, Jiizas, fi kom ded fi wi.​—Ruo. 8:32.

10. A wa di wan dem we get pik fi go a evn an di wan dem we a-go liv pan di ort a luk faawod fi get?

¹⁰ Aalduo a iina di fyuucha wi a-go kyan get fi liv fi eva, Jeuova waahn wi fi luk faawod fi get it. Di wan dem we get pik fi go a evn a luk faawod fi ruul wid Jiizas. (Rev. 20:6) An di wan dem we a-go liv pan di ort a-go enjai laif iina Paradais wen dem naa go fiil no pien an notn naa go mek dem fiil sad agen. (Rev. 21:3, 4) So ef yu a wan a di sumadi dem we a-go liv pan di ort, no bada tingk se yu a get sopm les dan di wan dem we a-go liv iina evn kaa Jeuova did mek wi fi liv pan di ort. An dat a sitn we a-go mek wi wel api.

11-12. Wa a som a di blesn dem we wi a luk faawod fi get iina Paradais? (Luk pan di picha dem tu.)

¹¹ Tingk bout wa laif a-go komiin laik iina Paradais. Da taim de yu na’afi fret an wori bout notn, an nobadi naa go get sik ar ded dem taim de tu. (Aiz. 25:8; 33:24) Eniting we yu waahn we Jeuova aarait wid im a-go gi yu it. Wa yu wuda waahn fi du iina Paradais? Ef yu a sumadi we lov myuuzik ar lov fi jraa, yu a-go get fi kyan dwi’it gud. An dem taim de wi a-go stil niid sumadi we kyan mek ous an we a plaant fuud an dem ting de. An yu don nuo se wi a-go niid sumadi fi luk bout fuud an dem ting de tu. An wi a-go niid sumadi fi mek di sopm dem we wi a-go yuuz tek kier a di ort an sumadi fi tek kier a di priti flowaz an dem ting de tu. (Aiz. 35:1; 65:21) An memba se dem taim de wi a-go a liv fi eva so yu a-go av aal di taim iina di worl fi du aal we yu waahn fi du.

¹² Tingk bout ou nais it a-go bi fi si wi piipl dem we ded kom bak alaiv! (Aks 24:15) An tingk bout ou nais it a-go bi tu fi de de a lorn bout aal a di ting dem we Jeuova mek we de roun wi! (Sa. 104:24; Aiz. 11:9) Bot di bigis ting we wi a-go get fi du a fi sorv Jeuova an no fiil gilti bout notn! So wen yu tingk bout aal a dem sitn de we wi a-go get iina di fyuucha, yu tingk se it mek sens fi wi gi op aal a dem sitn de jos fi “av fon fi wan likl wail”? (Iib. 11:25) Nuo sa! Dat no mek no sens! Dem sitn ya we wi a-go get iina di fyuucha wot muor dan eniting we wi kuda gi op rait ya nou. An memba ino, it naa go jos bi sitn we yu a tingk bout, bot a it yu a-go a liv iina. An wi wudn kyan get non a dem sopm ya ef Jeuova neehn gi op im wan dege-dege Bwai Pikni we im lov so moch fi wi!

MEK JEUOVA SI SE YU TANGK IM FI WA IM DU FI WI

13. Wa wi kyan du fi mek Jeuova si se wi tangk im fi wa im du fi wi? (2 Korintiyan 6:1)

¹³ Wi kyan shuo Jeuova se wi tangk im fi sen im Bwai Pikni fi kom ded fi wi wen wi mek wa im waahn wi fi du bi di big ting iina wi laif. (Mat. 6:33, NWT ) Kaa wen yu tingk bout it, Jiizas ded fi aal a wi “so dat di wan dem we did jos a liv fi mek demself api wuda chienj dem laif an staat liv dem laif fi mek im api​—di wan we did ded an kom bak alaiv.” (2 Kor. 5:15) So mek wi du evriting we wi kyan du fi sorv Jeuova an mek im si se wi tangk im fi aal a wa im du fi wi aalduo wi no dizorv it.​—Riid 2 Korintiyan 6:1.

14. Wa wi kyan du fi mek Jeuova si se wi a chos im?

¹⁴ Wen wi chos Jeuova an du wa im se wi fi du, it mek im si se wi tangk im fi wa im du fi wi. Laik wen wi fi mek op wi main bout umoch skuulin wi fi du ar di kain-a wok we wi a-go du, wi fi tingk bout wa Jeuova waahn wi fi du. (1 Kor. 10:31; 2 Kor. 5:7) Wen wi du tingz fi mek Jeuova si se wi chos im, it mek wi an im ton gud gud fren an dat wi mek wi nuo fi shuor se wi riili kyan go get fi liv fi eva.​—Ruo. 5:3-5; Jmz. 2:21, 22.

15. Roun di taim wen wi a kip di Laad Sopa, wa wi kyan du fi mek Jeuova si se wi tangk im fi wa im du fi wi?

¹⁵ Laik roun di taim wen wi a kip di Laad Sopa, wi kyan stil du sitn els fi shuo Jeuova se wi tangk im fi wa im du fi wi. Laik wi kyan mek shuor se wi du evriting we wi kyan du fi di de an wi kyan invait ada piipl fi kom tu. (1 Tim. 2:4) An wi kyan mek di wan dem we wi a-go invait nuo wa a-go gwaan de tu, an wi kyan shuo dem pan jw.org di vidiyo dem we niem Wa mek Jiizas Kom Ded fi Wi? an Shuo Se Wi Memba Se Jiizas Did Kom Ded Fi Wi. An di elda dem fi mek shuor se dem invait di wan dem we tap kom a miitn an go a sorvis an dem ting de fi kom tu. Jos tingk bout ou api di wan dem we de iina evn an di wan dem we a sorv Jeuova pan di ort a-go bi wen sumadi we did tap sorv Jeuova kom bak kom sorv im an bi paat a im fambili agen! (Luuk 15:4-7) So wen wi de a di Laad Sopa, wi no fi onggl se oudi tu wi wan aneda bot wi fi luk out fi di wan dem we a kom fi di fos taim an fi wi breda an sista dem we did tap kom a miitn tu. Wi waahn aal a dem fi nuo se wi api se dem di de tu!​—Ruo. 12:13.

16. Wa mek wi fi chrai fi du muor fi Jeuova roun di taim wen wi a kip di Laad Sopa?

¹⁶ Roun di taim wen wi a kip di Laad Sopa, chrai fi du muor fi Jeuova. Wen yu du dat yu a shuo Jeuova an Jiizas se yu tangk dem fi wa dem du fi wi. Di muor yu wok fi Jeuova a di muor yu a-go si se Jeuova di de fi yu an dat a-go mek yu kyan chos im muor an muor. (1 Kor. 3:9) Pan tap a dat, chrai fi du yu Baibl riidin fi di Laad Sopa, laik we de iina di Examining the Scriptures Daily buk, ar di riidin fi di Laad Sopa we de iina wi stodibuk fi di miitn. An yu kuda yuuz dem Baibl vors de fi stodi muor.

17. A wa wi kyan du fi mek Jeuova wel api? (Luk pan di paat we niem “Som Tingz We Wi Kyan Du Fi Mek Jeuova Si Se Wi Tangk Im Fi Wa Im Du Fi Wi.”)

¹⁷ Wi nuo se yu no mos kyan du evriting we da lesn ya taak bout. Bot memba se Jeuova naa luk pan wa wi a du an a se wi fi du laik we sumadi els a du. Nuo sa! Im kyan si iina wi aat an nuo se wi a du wi bes. An kaa a dat, Jeuova wel api wen im si se wi a du tingz fram wi aat fi shuo im se wi tangk im fi sen im wan dege-dege Bwai Pikni fi kom ded fi wi.​—1 Sam. 16:7; Maak 12:41-44.

18. Wa mek wi tangk Jeuova an Jiizas fi wa dem du fi wi?

¹⁸ A onggl bikaa Jiizas gi op im laif fi wi mek wi kyan get wi sin dem paadn, wi an Jeuova kyan ton gud gud fren, an wi kyan go get fi liv fi eva. So mek wi tangk Jeuova fi aal a di blesn dem we im mek wi kyan get. (1 Jan 4:19) An mek wi du evriting we wi kyan du fi mek Jiizas si se wi tangk im fi kom gi op im laif fi wi!​—Jan 15:13.