“Yu A-Go De Wich Paat Mi De Iina Paradais”

1. Likl bifuo Jiizas did ded, wa im did se tu wan a di kriminal dem we weehn de saida im? (Luuk 23:39-43)

JIIZAS an di tuu kriminal dem we weehn de saida im wen im did a-go ded did a sofa bad. (Luuk 23:32, 33) Di tuu a dem did a mak Jiizas, so wi si se dem neehn did a wan a im falara dem. (Mat. 27:44; Maak 15:32) Bot wi si se wan a dem did tap mak Jiizas an did staat fi tingk difrant. Im se: “Jiizas, memba mi wen yu kom iina yu Kindom.” Jiizas ansa im bak an se: “Mi a tel yu di chuut, tide yu a-go de wich paat mi de iina Paradais.” (Riid Luuk 23:39-43.) So wi si se a no laik se notn iina di Baibl shuo se da kriminal ya did biliiv wa Jiizas did a tiich se bout Gad Kindom, se it “a-go ruul uova di worl iina evri wie.” An Jiizas neva se di man wuda ruul iina Gad Kindom niida. (Mat. 4:17) Jiizas did a taak bout di taim wen di ort a-go ton iina wan paradais. Wa mek wi se dat?

2. Wa mek wi fiil se di kriminal we did sari fi wa im du mait-a did wan Juu?

² Di kriminal we did sari fi wa im du an tap mak Jiizas kuda bi wan Juu. Im se tu di ada kriminal se: “Yu no fried a Gad, laik ou yu a ded laik [Jiizas]?” (Luuk 23:40) Di Juu dem did worship wan Gad, bot di piipl dem fram di ada konchri dem did worship uol iip a gad. (Ek. 20:2, 3; 1 Kor. 8:5, 6) Ef di kriminal dem did kom fram wan neda konchri, dis a wa im mait-a did aks di ada wan, “Yu no fried a di gad dem?” Wen yu tingk bout it, Jiizas neehn kom tu di piipl dem fram di ada konchri dem bot im did kom “tu di shiip dem fram Izrel we laas.” (Mat. 15:24) An Gad did mek di Izrelait piipl dem nuo se im wuda mek dem kom bak alaiv. An bies pan wa di man did se, im mait-a did nuo se Jeuova wuda did mek Jiizas kom bak alaiv fi ruul iina fi im Kindom. An im mait-a did a uop se Gad wuda mek im kom bak alaiv tu.

3. Tel wi wa di kriminal we sari fi wa im du kudaana tingk bout wen im ier Jiizas taak bout Paradais. (Jenisiz 2:15)

³ Kaa im a did wan Juu, di kriminal we did sari fi wa im du wuda nuo bout Adam an Iiv an di Paradais we Jeuova did put dem iina fi liv. So im wuda nuo se di Paradais we Jiizas did a taak bout wuda bi wan nais priti gyaadn rait ya pan di ort.​—Riid Jenisiz 2:15.

4. Wa wi shudaana tingk bout bies pan wa Jiizas did se tu wan a di kriminal dem?

⁴ Wa Jiizas did se tu di kriminal shuda mek wi tingk bout wa laif a-go komiin laik iina Paradais. An wen wi si ou di piipl dem did a liv iina piis wen King Salaman did a ruul, dis mek wi si wa laif a-go komiin laik iina Paradais. An wi nuo se Jiizas, we av uol iip muor powa dan Salaman, a-go wok wid di wan dem we a-go ruul wid im fi mek di ort wan nais nais plies fi wi liv pan. (Mat. 12:42) So wi si wa mek di “ada shiip” wuda waahn fi nuo wa dem fi du fi liv fi eva iina Paradais.​—Jan 10:16.

WA LAIF A-GO KOMIIN LAIK IINA PARADAIS?

5. Wa yu tingk laif a-go komiin laik iina Paradais?

⁵ Wa an wa yu tingk bout wen yu tingk bout wa laif a-go komiin laik iina Paradais? Yu mait-a tingk bout wan nais nais plies wid uol iip a priti flowaz iina it we komiin laik di gyaadn a Iidn.(Jen. 2:7-9) Yu mait-a memba wa Maika se wuda apm. Im se Gad piipl dem “a-go sidong anda dem uona vain an anda dem uona fig chrii.” (Mai. 4:3, 4) An yu mait-a memba ou di Baibl se wi a-go av uol iip a fuud. (Sa. 72:16; Aiz. 65:21, 22) So yu mait-a a si yuself iina wan priti priti gyaadn, a sidong a wan big tiebl wid som uol iip a nais fuud pan it infronta yu. Yu mait-a a tingk bout ou di plies a-go sumel fresh an nais an ou yu a sumel di uol iip a swiit flowaz we de de. An yu mait-a de tingk bout yu fren an fambili dem ou di uol a unu api an a laaf​—aal di wan dem we ded an kom bak alaiv tu. Aal a dem sitn ya we yu a tingk bout a no dis jriim yu de jriim, dem sitn de riili a-go gwaan pan di ort. Bot a no onggl dem sitn ya wi a-go du, wi a-go du wok we mek wi fiil nais tu.

6. Wa a som a di sitn dem we wi a-go du iina Paradais? (Luk pan di picha.)

⁶ Jeuova mek wi dat wi kyan lov di wok we wi a du. (Iik. 2:24) An wen Jiizas a ruul fi di Touzn Ier wi a-go av nof wok fi du. Di wan dem we go chuu di wos sofarieshan an di wan dem we kom bak alaiv a-go niid kluoz fi wier, fuud fi iit, an somwe fi liv. Fi du aal a dat wi a-go av nof wok fi du, an wi a-go lov fi du dem kain-a wok de. Jos laik ou Adam an Iiv did fi plaant op di gyaadn we dem liv iina, a so wi a-go lov di wok we wi a-go du fi ton di ort iina wan paradais. An jos tingk ou nais it a-go bi fi tiich di uol iip a piipl dem we a-go kom bak alaiv bout Jeuova we no nuo nof bout im. An it a-go nais fi elp di wan dem we did a sorv Jeuova lang bifuo Jiizas did kom pan di ort fi lorn muor tu.

7. Wa yu nuo se a-go apm fi chuu, an wa mek?

⁷ Wi kyan nuo se laif a-go swiit iina Paradais kaa piipl a-go liv iina piis, an evriting a-go gwaan gud fi wi, an tingz a-go saat out. Wa mek wi se so? Wen Jeuova mek wi si ou laif did nais wen King Salaman did a ruul, dat did jos gi wi wan likl prips a ou laif a-go nais wen im Son a ruul.

WI GET WAN LIKL PRIPS A PARADAIS FRAM WEN KING SALAMAN DID A RUUL

8. Ou wa Saam 37:10, 11, 29 se did apm afta King Dievid did rait it dong? (Luk iina di paat we niem “Kwestiyan We Piipl Aks” iina da Wachtowa ya.)

⁸ Jeuova did mek King Dievid rait bout ou laif wuda stie wen Jeuova wuda mek wan king we waiz an a du wa im waahn im fi du ruul. (Riid Saam 37:10, 11, 29.) Nof taim wen wi riid Saam 37:11 tu ada piipl, wi yuuz it fi tel dem bout di Paradais we a-go kom. An dis mek sens kaa Jiizas did yuuz da siem skripcha ya wen im did a gi im Sorman pan di Mountn, so dis mek wi nuo se wa da skripcha ya a se a-go apm iina di fyuucha tu. (Mat. 5:5) Bot Dievid did a mek wi nuo ou laif a-go stie wen King Salaman a ruul tu. Wen Salaman did a ruul iina Izrel, Gad piipl did a liv iina piis an tingz did a gwaan fi dem iina wan plies we ful op a milk an oni. Gad did tel di piipl dem se ef dem gwaan du di sitn dem we im tel dem fi du, im a-go mek dem liv iina piis an nobadi naa go du dem notn fi mek dem fried. (Liv. 20:24; 26:3, 6) Dem sitn ya did apm wen Salaman did a ruul. (1 Kr. 22:9; 29:26-28) An dem taim de wen Salaman did a ruul, ef dem did gwaan du wa Jeuova se, den “no muo wikid piipl” wudn de bout. (Sa. 37:10) So wa Saam 37:10, 11, 29 se did apm dem taim de, an it a-go apm agen wen di ort ton iina wan paradais.

9. Wa di kwiin a Shiiba did se bout ou tingz did stie wen King Salaman a ruul?

⁹ Di kwiin a Shiiba did ier ou di piipl dem iina Izrel did a liv iina piis an a enjai laif wen Salaman a ruul. So shi chravl faar an go wie a Jeruusilem fi go si wa did a gwaan fi arself. (1 Ki. 10:1) Afta shi si wa a gwaan fi arself, shi se dem neva tel ar di aaf a wa a gwaan an shi se di man dem we wok fi di king, dem an im sorvant dem mos api kaa di king waiz an dem a lisn tu im. (1 Ki. 10:6-8) Bot ou tingz did stie wen Salaman a ruul did jos a gi wi wan likl prips a wa Jeuova a-go du fi wi wen im mek im Son, Jiizas, staat fi ruul uova wi.

10. Wa a som a di wie dem ou Jiizas beta dan Salaman?

¹⁰ So wen wi luk pan Jiizas an Salaman, wi si se Salaman neehn porfek kaa im du som rang sitn we mek laif aad fi Jeuova piipl. Bot Jiizas porfek, so wen im a ruul, im naa go du notn we a-go mek tingz aad fi Gad piipl. (Luuk 1:32; Iib. 4:14, 15) Sietan did du som sitn fi tes Jiizas an mek tingz aad fi im, bot Jiizas paas di tes dem. So Jiizas mek wi si se im naa go eva sin, an im naa go du notn fi ort di piipl dem we im a ruul uova. So im a di bes King wi kuda eva av.

11. Uu a-go ruul wid Jiizas?

¹¹ Jiizas a-go av 144,000 piipl a ruul wid im fi tek kier a piipl an fi du wa Jeuova waahn dem fi du fi di ort. (Rev. 14:1-3) Dem man an uman ya we Gad a-go tek fram di ort fi ruul wid Jiizas, wen dem did de pan di ort, dem did go chuu nof prablem an sofarieshan. So dem a-go nuo wa wi a go chuu, an dem wi tek dem taim wid wi. Bot, wa kain-a wok dem a-go du iina evn?

WA KAIN-A WOK DI WAN DEM WE GET PIK FI GA’A EVN A-GO A DU?

12. Wa kain-a wok Jeuova gi di 144,000 fi du?

¹² Di wok we Jiizas an di wan dem we a-go ruul wid im get fi du, nof nof muor dan di wok we Salaman did a du kaa Salaman did onggl afi tek kier a di piipl dem we did liv iina Izrel. Bot di wan dem we a ruul iina Gad Kindom a evribadi we liv pan di ort dem a-go a tek kier a. Dis a wan big wok we Jeuova a-go mek di 144,000 we a-go ruul wid Jiizas du.

13. Wa a di speshal wok we di wan dem we a-go ruul wid Jiizas a-go get fi du?

¹³ Jos laik Jiizas, di 144,000 a-go bi king an priis. (Rev. 5:10) Wen di piipl dem did a fala di Laa we Jeuova gi Muoziz, di priis dem did a di mien wan dem fi mek shuor se di piipl dem no get sik an fi mek shuor se di piipl dem a du wa Jeuova waahn dem fi du. Da Laa de a jos laik di “sheda fi di riil sitn dem,” so it mek sens fi se di wan dem we a-go ruul wid Jiizas a-go elp im fi mek shuor se di piipl dem we dem a ruul uova naa go get sik, an dem a get di sitn dem we dem niid fi sorv Jeuova di rait wie. (Iib. 10:1) Wi jos afi go wiet til dem taim de fi si ou di king an di priis dem a-go mek di wan dem we dem a ruul uova we de pan di ort nuo wa dem niid fi du. Wa wi nuo fi shuor se, wen di ort ton iina wan paradais, Jeuova a-go mek wi nuo wa wi fi du.​—Rev. 21:3, 4.

A WA DI “ADA SHIIP” FI DU SO DAT DEM KYAN GO LIV IINA PARADAIS?

14. Wa di “ada shiip” av fi du wid di likl gruup a piipl we a fala Jiizas?

¹⁴ Jiizas mek wi nuo se di wan dem we a-go ruul wid im a evn a wan likl gruup a piipl we a fala im. (Luuk 12:32) An im taak bout wan neda gruup a piipl we im kaal di “ada shiip.” Dem tuu gruup a piipl ya a wok tugeda. (Jan 10:16) An dem tuu gruup a piipl ya a-go gwaan wok tugeda til di uol ort ton iina wan paradais. Dem taim de, di likl gruup a piipl we a fala Jiizas a go de a evn an di wan dem we a di “ada shiip” a-go liv pan di ort fi eva an dem a-go api tu. Bot di wan dem we di Baibl kaal di “ada shiip” afi du som tingz we a-go mek dem kyan liv fi eva iina Paradais.

15. (a) Ou di “ada shiip” dem a wok wid di wan dem we a-go ruul wid Jiizas? (b) Ou yu kyan du laik da breda ya we de iina di faamasi? (Luk pan di picha.)

¹⁵ Di kriminal we did sari fi wa im du ded bifuo im kuda did du notn big fi shuo Jiizas se im tangk im. Bot yu si wi uu a di “ada shiip,” wi av nof chaans fi mek Jiizas si se wi tangk im. Laik wi shuo ou wi fiil bout im wen wi chriit di wan dem we a-go ruul iina evn wid im gud. Jiizas se im a-go joj di shiip bies pan ou dem chriit di wan dem we a-go ruul wid im iina evn. (Mat. 25:31-40) Wen wi du di priichin an tiichin wok, wi shuo se wi a elp di wan dem we a-go ruul wid Jiizas. (Mat. 28:18-20) So wi waahn fi mek shuor se wi a yuuz di sitn dem we wi get fi elp piipl fi andastan di Baibl, laik di buk we niem Yu Kyan Bi Api Nou An Fi Eva! Ef yu na’av nobadi we yu a stodi di Baibl wid yet, plan fi tel uol iip a piipl we yu taak tu se yu waahn fi stodi di Baibl wid dem.

16. Wa a som a di sitn dem we wi fi a du nou ef wi waahn fi liv wen Gad Kindom a ruul?

¹⁶ Wi no fi wiet til wi de iina Paradais fi chienj wi wiez dem an du di sitn dem we Jeuova waahn wi fi du. Rait ya nou wi fi bi anis an no tel lai, an wi no fi tiif niida. An wi fi nuo ou fi kanchuol wiself an no go uova buod wid notn. An wi fi stik tu Jeuova no mata wa, an wi fi stik tu di sumadi we wi marid tu an wi breda an sista dem tu. Wen wi wok aad ya nou fi du di sitn dem we Jeuova waahn wi fi du, it a-go iiziya fi wi du dem wen wi a liv iina Paradais. An wen wi chrai fi du tingz laik chried an so an wi chrai fi av som gud wiez nou, it a elp wi fi get redi fi liv iina Paradais. Luk iina di paat a da Wachtowa ya we niem “Yu Redi Fi ‘Kom Get Di Ort’?”

17. Tel wi wa mek wi no fi mek di sin we wi sin aredi uol wi dong.

¹⁷ Wi no fi mek di rang sitn dem we wi a du mek wi fiil laik se Jeuova naa go eva paadn wi. An kaa Jiizas did kom ded fi wi, wi no fiil laik se wi kyan “mek op wi main se wi a-go gwaan sin galang” so. (Iib. 10:26-31) Bot wi kyan nuo se ef wi riili sari bout di bad sitn dem we wi du an ton we fram wi sin, an get di elp we Jeuova se wi fi get, im a-go paadn wi. (Aiz. 55:7; Aks 3:19) Memba Jiizas did tel di Farisii dem se: “Mi neehn kom ya fi tel piipl we du rait fi ton fram dem rang, a piipl we du rang mi kom ya fa.” (Mat. 9:13) Di kom we Jiizas kom ded fi wi kyan kova aal a di sin dem we wi sin.

YU KYAN GO LIV FI EVA WEN DI ORT TON IINA WAN PARADAIS

18. Wa yu wuda laik fi taak tu di kriminal we did de saida Jiizas bout?

¹⁸ Yu kyan si yuself iina Paradais a chat wid di kriminal we did a taak tu Jiizas? Di tuu a unu mait-a taak bout ou unu tangk Jiizas fi kom ded fu’unu. Yu mait-a aks im wa did apm likl bifuo Jiizas did ded an ou im did fiil fi nuo se Jiizas did ansa im an se im a-go du wa im did aks im fi du. An im mait-a aks yu a wa it did komiin laik fi liv iina di laas die dem wen Sietan did a kanchuol di worl. It a-go bi wan big ting fi stodi Gad Wod wid sumadi laik da man de!​—Ifii. 4:22-24.

19. Wa mek wen wi a liv iina Paradais wi laif naa go buorin? (Luk pan di picha pan di kova.)

¹⁹ Wen wi a liv iina Paradais, laif naa go buorin. Wi a-go a get fi nuo difrant difrant piipl an yu a-go du wok we yu lov fi du. An di swiitis ting a dat evridie yu a-go get fi nuo yu Faada we de a evn muor an muor. An wi a-go get fi lov di sitn dem we im a gi wi. Wi aalwiez a-go av sitn nyuu fi lorn bout im an di sitn dem we im mek. Di langga wi liv a di muor wi a-go lov Jeuova. Wi tangk Jeuova an Jiizas fi pramis wi se wi kyan go liv fi eva iina Paradais!