Yu Redi Fi “Kom Get Di Ort”?
AAL A wi a luk faawod fi get wa Jiizas pramis fi gi wi wen im se: “Aal a uu ombl demself, Gad bles dem, kaa yu si di ort, a dem piipl de a-go kom get it.” (Mat. 5:5) Di wan dem we Gad pik fi go a evn a-go get di ort wen dem staat fi ruul iina evn wid Jiizas. (Rev. 5:10; 20:6) Rait ya nou, muos a di wan dem we a fala Jiizas a luk fi liv pan di ort fi eva. An dem taim de dem a-go porfek, dem a-go kyan liv iina piis an api. So dat dis kyan gwaan, dem av som big wok fi du. Si chrii a dem ya: dem a-go tek kier a di ort an ton it iina Paradais, dem a-go mek shuor se di wan dem we kom bak alaiv av evriting we dem niid, an dem a-go tiich dem tu.
YU REDI FI TEK KIER A DI ORT AN TON IT IINA WAN PARADAIS?
Wen Jeuova did tel di fos man an uman se dem fi ‘ful op di ort wid uol iip a piipl an kanchuol di uol ort an tek kier a it,’ im did a mek dem nuo se a di uol ort wuda ton iina wan paradais. (Jen. 1:28) So a dat im waahn di wan dem we a kom get di ort fi du. Bot di gyaadn a Iidn no de bout agen, so no Paradais naa go de de dem taim de fi dem get. Dem afi go du uol iip a wok fi kliin op di difrant difrant plies dem pan di ort we mash op nou. Yu don nuo se a nof wok dat!
Dis mek wi tingk bout di wok we di Izrelait dem did afi du wen dem did kom bak fram Babilan. A 70 ier nobadi neehn liv pan dem lan. Bot Aizaiya did mek dem nuo se Jeuova wuda elp dem fi mek it nais agen. Im se: “Im a-go mek ar wildanes komiin laik Iidn an ar dezot a-go komiin laik wan gyaadn we Jeuova mek.” (Aiz. 51:3) An a dat did apm. An a siem so, Jeuova a-go elp di wan dem we a-go get di ort fi tek kier a it an ton it iina wan paradais. An rait ya nou yu kyan shuo se dat a sitn we yu wel waahn fi du.
Wan ting we yu kyan du a dat yu kyan chrai fi kip yu ous an yu yaad kliin an mek shuor se di sitn dem de wich paat dem fi de. Dis a sitn we yu kyan du iivn ef yu nieba dem naa dwi’it. An sitn els we yu kyan du a das yu kyan go kliin di Kindom Aal an di plies dem we dem kip di sorkit miitn an kanvenshan dem, ar elp fi tek kier a dem. Ef yu kyan dwi’it, yu kyan sain op fi go elp out wen orikien an dem sitn de gwaan an dis wi shuo se yu redi fi go elp out. Aks yuself, ‘Mi kyan du dem sitn ya so mi kyan lorn som tingz we a-go elp mi ef mi get di chaans fi kom get di ort?’
YU REDI FI ELP DI WAN DEM WE A-GO KOM BAK ALAIV FI GET EVRITING WE DEM NIID?
Rait afta im did mek Jairos daata kom bak alaiv, Jiizas did tel dem se dem fi gi ar sitn fi nyam. (Maak 5:42, 43) A neehn no big ting fi dem tek kier a dat de pikni de we a dis 12 ier uol. Bot tingk bout di mount a wok we piipl gweehn afi du wen Jiizas mek ‘aal uu ded an iina di griev ier im vais kaaz Gad memba dem an dem kom bak alaiv.’ (Jan 5:28, 29, NWT ) Di Baibl no tel wi wa an wa gweehn gwaan dem taim de. Bot ef wi tingk bout it, di wan dem we a-go kom bak alaiv mos a-go niid wi fi elp dem fi get fuud fi nyam, somwe fi liv, an kluoz fi wier. So iivn rait ya nou, yu tingk yu kyan shuo se yu redi fi elp dem? Mek wi luk pan som kwestiyan.
Wa yu kyan du ya nou fi shuo se yu redi fi kom get di ort?
Wen dem tel yu se di sorkit uovasiya a-go kom a fi yu kanggrigieshan, yu pudong yu niem se yu a-go gi’im som fuud? Wen dem sen som breda an sista we did de a Betel fi kom a yu kanggrigieshan fi elp out wid di priichin wok, ar wen wan sorkit uovasiya a no wan sorkit uovasiya no muor, yu tingk yu kyan elp dem fi fain somwe fi liv? Ef wan kanvenshan a-go kip wich paat yu liv, yu tingk yu kyan sain op fi go elp out bifuo it staat ar afta it don, ar yu kyan de de fi se oudi tu di piipl dem we a kom?
YU REDI FI TIICH DI WAN DEM WE A-GO KOM BAK ALAIV?
Bies pan wa Aks 24:15 se, a uol iip an uol iip a piipl a-go kom bak alaiv. Nof a dem a-go bi piipl we neehn get di chaans fi nuo bout Jeuova. An wen dem kom bak alaiv a da taim de dem gweehn get di chaans fi nuo bout im.a Di wan dem we stik tu Jeuova an did a tiich piipl fram lang taim, a dem a-go get fi tiich dem wan ya dem taim de. (Aiz. 11:9) Wan sista we niem Charlotte, we priich tu piipl iina Yuurop, Sout Amerika an Afrika, se shi kyaahn wiet fi dat. Shi se: “Mi wel waahn fi tiich di piipl dem we a-go get fi kom bak alaiv. Wen mi riid bout sumadi we did liv bak iina di die, nof a di taim mi tingk se: ‘Bwai, it wuda nais ef da sumadi ya did nuo Jeuova. Dem laif wuda riili betaraaf.’ Mi kyaahn wiet fi tel di wan dem we a-go kom bak alaiv bout aal a di gud sitn dem we dem gweehn get wen dem sorv Jeuova.”
Iivn di wan dem we did a sorv Jeuova bifuo Jiizas did kom pan di ort a-go av nof tingz fi lorn tu. Tingk bout ou it a-go nais fi elp Daniyel fi andastan di sitn dem we im did rait bout bifuo dem apm an ou dem apm fi chuu. (Dan. 12:8) Ar tingk bout ou yu kyan go elp Ruut an Nayuomi fi andastan ou di Mesaiya en op kom fram fi dem fambili? It gweehn nais iihn fi get fi tiich piipl aal uova di worl! An wi a-go kyan dwi’it an naa fi a tingk bout aal a di prablem dem we wi a go chuu rait ya nou, an notn naa go de de fi a wies wi taim niida.
Wa yu kyan du rait ya nou fi shuo se yu a get yuself redi fi tiich di wan dem we a-go kom bak alaiv? Wel, wan ting we yu kyan du a dat yu kyan lorn fi tiich piipl beta, an yu kyan mek shuor se yu eva a du wa yu kyan du fi priich tu piipl rait ya nou. (Mat. 24:14) Iivn ef yu op iina iej nou an yu kyaahn du di sitn dem we yu yuus tu du, ar ada tingz mait-a a gwaan iina yu laif we mait-a mek it aad fi yu du nof iina di priichin wok, wen yu du di bes we yu kyan du, dat wi shuo se yu a get yuself redi fi tiich di wan dem we a-go kom bak alaiv.
So a dem kwestiyan ya yu riili fi a aks yuself: Yu riili a luk faawod fi kom get di ort? Yu wel waahn fi tek kier a di ort an ton it iina wan paradais? Yu wel waahn fi elp di wan dem we a-go kom bak alaiv fi get evriting we dem niid? An yu riili waahn fi tiich dem tu? Wen yu du di sitn dem rait ya nou we komiin laik di wan dem we yu a-go du iina Paradais, a so yu shuo se yu a get yuself redi fi kom get di ort.
a Luk pan di lesn we niem “Uol Iip A Piipl A Lorn Fi Du Wa Rait” we de iina Di Wachtowa fi Septemba 2022.