Yu Tingk Piipl Kyan Get Rid A Waar?

A nof difant difrant tingz mek waar brok out. Piipl waar kaaz a palitiks, kaa tingz aad fi dem, ar kaa dem waahn jostis. Som ada piipl waahn kanchuol lan, an ail an dem ting de. An som waar gens dem wan aneda kaaz a rilijan, ar di chraib ar konchri we dem kom fram. Wa piipl a du fi tap di waar dem an fi mek piipl liv iina piis? Yu tingk wa dem a du a-go wok?

Wan picha we tier a shuo som man we du kanschrokshan wok a taak bout wa dem a-go du.

DI GOVAMENT DEM A CHRAI MEK TINGZ BETA

Wa dem waahn fi du: Dem a chrai mek piipl laif beta. Wan a di mien ting wa mek piipl waar iina wan konchri a wen dem fiil se tingz aad fi dem.

Wa mek dis aad fi du: Di govament dem wuda afi chienj op wa dem a spen moni pan. Iina 2022, di govament dem aal uova di worl spen bout 34 biliyan U.S. dala pan tingz we dem a du fi elp piipl liv wan beta laif an fi liv iina piis wid dem wan aneda. Bot dat a no notn wen yu luk pan di mount a moni we dem spen da sed ier de pan dem aami an di sitn dem we dem yuuz fi fait waar.

“Wi a spen uol iip muor moni a elp piipl fi diil wid di prablem dem we waar kaaz an a spen les pan tingz we wuda mek di waar dem no staat iina di fos plies, an we elp piipl fi liv iina piis.”—António Guterres, di man we inchaaj a di Yuunaitid Nieshanz.

Wa di Baibl se: Aalduo di govament dem an som difrant difrant aaganaizieshan du tingz we elp puor piipl, no mata wa dem du, piipl stil a-go puor.—Dyuutaranami 15:11; Matyu 26:11.

Wan picha we tier a shuo tuu man a shiek an. It jos a shuo dem an dem.

DI GOVAMENT DEM A CHRAI FI MEK PIIS

Wa dem waahn fi du: Wen dem av prablem, dem waahn fi taak an saat out tingz iina wan wie we di tuu said dem kyan aarait an liv iina piis.

Wa mek dis aad fi du: Som a di taim piipl pan wan said mait-a waahn fi saat out tingz bot di ada said no waahn fi du dat. An wen dem plan wa dem a-go du so dat dem kyan liv iina piis wid dem wan aneda, it iizi fi dem chienj dem main.

“Wen di govament dem chrai fi saat out tingz, it no aalwiez wok out gud. Tuu konchri mait-a plan fi du sitn fi tap wan waar, bot it no wok out kaa wa dem did plan fi du neva fier.”—Raymond F. Smith, American Diplomacy.

Wa di Baibl se: Piipl fi ‘chrai aad fi liv iina piis wid dem wan aneda.’ (Saamz 34:14) Bot it aad fi piipl chos piipl nowadiez kaa som a dem “ton chrieta” an wen dem se dem a-go du sopm, dem no aalwiez dwi’it. (2 Timoti 3:1-4) Kaa piipl stie so, aal som palitishan we waahn fi du di rait ting stil kyaahn get fi du it.

Wan picha we tier a shuo wan gon we mash op.

GET RID A TINGZ WE DEM YUUZ FI FAIT WAAR

Wa dem waahn fi du: Dem waahn di govament dem fi get rid a di sitn dem we dem yuuz fi fait waar, speshali di big bum dem an di ada sitn dem we dem yuuz we gi piipl aal kain-a siknis.

Wa mek dis aad fi du: Nof a di konchri dem fried se ada konchri a-go fiil se dem no big an powaful no muo an dem naa go kyan difen demself. Aal ef dem get rid a di sitn dem we dem yuuz fi fait waar, dem stil kyaahn get rid a di prablem dem we kaaz waar iina di fos plies.

“Afta 1991, nof a di govament dem did se dem wuda get rid a di sitn dem we dem yuuz fi fait waar, an dem wuda du tingz so dat di konchri dem wuda wok beta wid dem wan aneda so wan die evribadi a-go kyan liv iina piis. Bot dem neehn du dat.”—“Securing Our Common Future: An Agenda for Disarmament.”

Wa di Baibl se: Piipl fi get rid a di sitn dem we dem yuuz fi fait waar an dem fi “ton dem suod dem iina sitn we dem yuuz fi plou op lan.” (Aizaiya 2:4) Bot ef waar a-go tap, piipl afi du muo dan dat, kaa a wa de iina dem aat mek dem du aal kain-a wikidnis.—Matyu 15:19.

Wan picha we tier a shuo som ruula fi som konchri a sidong roun wan tiebl. Aal a dem av di sed piepa infronta dem an dem a sain it.

DEM JAIN OP FI ELP DEM WAN ANEDA

Wa dem waahn fi du: Difrant difrant govament plan fi wok tugeda fi fait aaf dem enimi dem. Dem tingk dis a wan gud plan kaa dem kliem se wan neda govament naa go waar wid dem kaa den da govament de afi go waar wid di ada konchri dem tu.

Wa mek dis aad fi du: Aal ef wan konchri si se dem afi go fait nof konchri wan taim, dat no miin se dem naa go staat waar. An wen som konchri pramis fi bak dem wan aneda, dem no aalwiez dwi’it. An som a di taim wen wan govament chretn fi waar gens dem, dem kyaahn mek op dem main bout wa dem a-go du an wen dem a-go dwi’it.

“Iivn duo di League of Nations an di United Nations did wok aad fi elp di govament dem fi jain op an elp dem wan aneda, waar stil a gwaan.”—“Encyclopedia Britannica.”

Wa di Baibl se: A wan gud ting wen piipl wok tugeda. (Iikliiziyastiiz 4:12) Bot di govament dem an di aaganaizieshan dem naa go kyan get rid a waar. Saam 146:3, 4 se: “No chos iina no ruula fi siev yu an no luk tu no ada man fi du dat niida kaa im na’av di powa fi siev yu. Im laif go out, im go bak tu di grong; pan da die de, aal we im nuo paas we.”

A no likl chrai piipl chrai fi get rid a waar, bot wi stil no av piis iina di worl.