A Ou Waar A-Go Don We Wid?

GAD A-GO GET RID A DI GOVAMENT DEM

Gad a-go yuuz di waar we di Baibl kaal Aamagedana fi get rid a aal a di govament dem. (Revilieshan 16:16) Dem taim de, ‘di king dem aal uova di worl a-go gyada op fi di waar we a-go apm pan di big die wen Gad we muor powaful dan evribadi a-go joj piipl.’ (Revilieshan 16:14) So afta di Aamagedan waar, no muor waar naa go de bout agen.

Wen Gad get rid a dem govament de, a fi im govament we iina evn a-go staat fi ruul an it naa go eva mash op. (Daniyel 2:44) A im Bwai Pikni, Jiizas Krais, Gad pik fi bi di King we ruul iina da govament de. (Aizaiya 9:6, 7; Matyu 28:18) An a da govamentb de Jiizas did tiich im falara dem se dem fi prie fa. (Matyu 6:9, 10) Wen Jiizas a ruul, evribadi pan di ort a-go liv tugeda az wan.

Jiizas no tan laik di piipl dem we a ruul iina da worl ya, we onggl a luk out fi demself wan. Im no paashal, so nobadi naa go afi fiil se im naa go chriit dem fier kaaz a di kola a dem skin, di konchri we dem kom fram ar notn laka dat. (Aizaiya 11:3, 4) An nobadi naa go afi a blak ruod an dem ting de kaa dem waahn jostis, kaa Jiizas a-go luk out fi evri singgl suol. Di Baibl se, “Di puor piipl we a baal out fi elp im a-go siev dem, an im a-go du sopm fi elp di ombl wan dem uu nobadi neehn bizniz wid. . . . Im a-go siev dem fram wikid piipl uu a mek dem sofa an uu a chrai fi ort dem.”​—Saam 72:12-14.

Gad Govament a-go get rid a aal a di sitn dem we piipl yuuz fi fait waar. (Maika 4:3) An yu si aal a di piipl dem we a waar-buot an waahn du bie wikidnis, Gad Govament a-go get rid a dem tu. (Saam 37:9, 10) Evribadi a-go fiil sief dem taim de, no mata wich paat a di worl dem go.​—Iziikel 34:28.

Wen Gad Govament a ruul, laif a-go swiit fi evribadi. Piipl naa go a waar wid dem wan aneda kaa Gad Govament a-go get rid a aal a dem prablem dem. So nobadi naa go puor, evribadi a-go av wan gud plies fi liv, an nobadi naa go staav kaa nof gud fuud gweehn de bout we evribadi kyan get fi nyam.​—Saam 72:16; Aizaiya 65:21-23.

Gad Govament a-go get rid a aal a di torbl sitn dem we apm tu piipl kaaz a waar. So aal a di pien we piipl fiil an di sofa we dem sofa siek-a waar, dat a-go gaan. An yu waahn nuo se aal di wan dem we ded a-go get fi kom bak alaiv an liv pan di ort. (Aizaiya 25:8; 26:19; 35:5, 6) Piipl a-go get fi si dem fambili agen an dem naa go memba aal a di bad sitn dem we apm tu dem kaaz a waar, kaa “dem uol taim sitn de don we wid.”​—Revilieshan 21:4.

GAD A-GO GET RID A SIN

Wen Gad Govament a ruul uova di ort, evribadi a-go a worship Jeuova.c Im a di onggl wan we a riili Gad an im a ‘di Gad we lov wi an gi wi piis.’(2 Korintiyan13:11) So evribadi a-go lorn fi liv iina piis wid dem wan aneda. (Aizaiya 2:3, 4; 11:9) An evribadi we du di sitn dem we dem a lorn, sin naa go av no muor kanchuol uova dem an dem a-go get porfek.​—Ruoman 8:20, 21.

GAD A-GO GET RID A SIETAN AN IM DIIMAN DEM

Gad Govament a-go get rid a Sietan an im diiman dem kaaz a dem a push piipl fi waar wi dem wan aneda. (Revilieshan 20:1-3, 10) Wen dem no de bout, ‘piis a-go de evriwe an it naa go en.’​—Saam 72:7.

Yu kyan nuo fi shuor se Gad a-go get rid a waar fi chuu. Im wel waahn fi dwi’it an im nuo di bes wie fi dwi’it.

• Gad waiz an im av nof powa, so wi nuo se im kyan get rid a waar fi eva. (Juob 9:4) Notn no de we im kyaahn du.​—Juob 42:2.

• Gad iet fi si piipl a sofa. (Aizaiya 63:9) An “enibadi we lov notn we av fi du wid faitin an kilin, im iet dem.”​—Saam 11:5.

• Eniting we Gad se im a-go du, a dat im a-go du kaa Gad no tel no lai.​—Aizaiya 55:10, 11; Taitos 1:2.