Di Kindom a Gad​—A Wa?

DIS A WA DI BAIBL SE

“Kaaz Jiizas afi ruul uova di kindom, til im put di uol a im enimi dem anda im fut.”​—1 Korintiyan 15:25, Di Jamiekan Nyuu Testiment.

“Nou fi wi Gad, an Krais Jiizas av di rait fi ruul uova di uol worl an im a-go ruul fi eva an eva.”​—Revilieshan 11:15.

WA DAT A-GO MIIN FI YU

• Gad Kindom, we a wan gud govament, a-go ruul, an it a-go mek yu get nof nof blesn.​—Isaiah 48:17, 18, New World Translation.

• Yu a-go liv iina wan nyuu worl we laif a-go swiit, an yu a-go liv elti an api.​—Revilieshan 21:3, 4.

YU TINGK WI KYAN RIILI BILIIV WA DI BAIBL SE?

Ye. Wa mek? Si tuu riizn ya:

• Jiizas mek wi andastan we Gad govament a-go du. Iina di Owa Faada Prieya we im tiich im falara dem, Jiizas mek wi nuo se Gad Kindom a-go mek we im waahn fi apm pan ort apm. (Matyu 6:9, 10) An Jiizas shuo ou da prieya de a-go ansa. Ou im du dat?

  Wel wen im did de pan ort, im iil di sik, riez di ded an yuuz im powa fi fiid onggri piipl. (Matyu 15:29-38; Jan 11:38-44) So sins im nuo se im did a-go ton King, Jiizas gi wi a swiit likl glims fi shuo we di kindom a-go du fi wi iina di fyuucha.​—Revilieshan 11:15.

• Di sitn dem we a gwaan roun wi nou shuo se di Kindom suun kom. Jiizas did se, jos bifuo dat apm, wi wuda si uol iip a waar an ortkwiek, fuud wuda shaat iina nof nof plies, an uol iip a piipl wuda staav.​—Matyu 24:3, 7.

  A dem siem sitn de wi si a gwaan tide. So dat mek wi nuo se Gad Kindom de rait roun di kaana, an aal a wi prablem dem suun gaan.