Yu Tingk se Ded Piipl Kyan Kom Bak Alaiv?
Wa yu wuda se . . .
It go so?
It no go so?
Yu no shuor?
DIS A WA DI BAIBL SE
“Di taim a-go kom wen evribadi we ded an iina dem griev gweehn . . . kom bak alaiv.”—Jan 5:28, 29, Di Jamiekan Nyuu Testiment.
WA DAT A-GO MIIN FI YU
Wen enibadi fi yu ded, it a-go elp iiz yu pien.—2 Korintiyan 1:3, 4.
It mek yu andastan se no dopi no de, an yu naa fi fried se yu a-go bon iina faiya fi eva.—Iibruu 2:15.
It mek yu luk faawod fi si yu ded piipl dem kom bak alaiv agen.—Jan 5:28, 29.
YU TINGK WI KYAN RIILI BILIIV WA DI BAIBL SE?
Ye. Wa mek? Si chrii riizn ya:
A Gad gi laif. Di Baibl se, “A [Gad] gi evribadi laif an aal di sitn dem we dem niid.” (Aks 17:24, 25) So ef a Gad mek wi iina di fos plies, den im mos kyan gi wi bak laif ef wi ded.
Iina di uol taim die dem, Gad did mek ded piipl kom bak alaiv. Di Baibl taak bout iet difrant sumadi we did ded an kom bak alaiv pan ort. Som a dem did ded fi jos a likl bit a taim, bot wan a dem did ded fi fuor die!—Jan 11:39-44.
Gad wel waahn mek ded piipl kom bak alaiv. Jeuova Gad iet det. Az faar az im iz kansorn, det a wan enimi. (1 Korintiyan 15:26) Im wel waahn get rid a da enimi de an mek ded piipl kom bak kom liv pan ort agen.—Job 14:14, 15, New World Translation.