Wa Mek Waar Stil A Gwaan?
Di Baibl mek wi nuo wa mek piipl waar gens dem wan aneda, an it elp wi fi andastan wa mek waar stil a gwaan ya nou.
SIN
Gad mek di fos man an uman we niem Adam an Iiv wid di sed kain-a wiez we im av. (Jenisiz 1:27) Dat miin se dem kuda lov piipl an liv iina piis wid dem wan aneda. (1 Korintiyan 14:33; 1 Jan 4:8) Bot Adam an Iiv sin gens Gad kaa dem du sitn we im se dem neehn fi du. An a dat mek sin an det kom dong pan di wol a wi. (Ruoman 5:12) So kaaz a dat, piipl tingk aal kain-a wikid tingz an du aal kain-a wikid tingz tu.—Jenisiz 6:5; Maak 7:21, 22.
PIIPL A RUUL UOVA ADA PIIPL
Gad neehn mek wi fi ruul wiself. Di Baibl tel wi se: “It no op tu man fi iivn disaid fi imself ou im fi waak.” (Jerimaiya 10:23) An a dat mek di govament dem iina da worl ya naa go kyan eva get rid a waar.
SIETAN AN DI DIIMAN DEM
Di Baibl tel wi se a “di devl kanchuol di uol worl.” (1 Jan 5:19) Sietan a wan uol mordara. (Jan 8:44) A im an im diiman dem mek so moch wikidnis a gwaan bout di plies an so moch waar a gwaan.—Revilieshan 12:9, 12.
Wi kyaahn get rid a di ting dem we kaaz piipl fi waar gens dem wan aneda. A onggl Gad kyan du dat.