Pangentasan
15 Wektu kuwi, Musa lan wong Israèl nyanyi lagu iki kanggo Yéhuwah,+
”Aku péngin nyanyi kanggo Yéhuwah, merga Dhèwèké bener-bener diluhurké.+
Jaran lan sing numpaki wis diuncalké ing laut.+
2 Yah* kuwi kekuwatan lan kuwasaku. Dhèwèké sing nylametké aku.+
Dhèwèké Gusti Allahku, lan aku bakal muji Dhèwèké.+ Dhèwèké kuwi Gusti Allahé bapakku,+ lan aku bakal ngluhurké Dhèwèké.+
3 Yéhuwah kuwi prajurit sing kuwat.+ Yéhuwah kuwi jenengé.+
4 Dhèwèké nguncalké kréta perangé Firaun lan prajurité ing laut,+
Para prajurité Firaun sing paling hébat kleleb ing Laut Merah.+
5 Ombak ing laut nutupi wong-wong kuwi, lan wong-wong kuwi kaya watu sing kleleb ing laut sing jero.+
6 Oh Yéhuwah, tangan-Mu tengen kuwat banget.+
Oh Yéhuwah, tangan-Mu tengen isa ngremuk mungsuh.
7 Njenengan hébat banget nganti isa nyingkirké wong-wong sing nglawan Njenengan.+
Njenengan nesu banget, nesuné Njenengan ngobong wong-wong kuwi kaya ngobong jerami.
8 Napasé Njenengan nggawé banyu laut dadi munggah jejeg kaya témbok.
Banyuné dadi kaya témbok.
Ing tengah-tengah laut, banyuné dadi jejeg.
9 Mungsuh-mungsuh-Mu kandha, ’Wong-wong kuwi bakal tak oyak* lan tak cekel!
Aku bakal mbagi-mbagi jarahan nganti aku puas!
Aku bakal nggunakké pedhangku! Tanganku bakal ngalahké wong-wong kuwi!’+
10 Wektu Njenengan nyebul angin, laut nutupi wong-wong kuwi.+
Wong-wong kuwi kaya watu sing kleleb ing laut sing ombaké gedhé banget.
11 Oh Yéhuwah,+ ora ana allah sing kaya Njenengan.
Ora ana allah sing luwih suci+ saka Njenengan.
Njenengan pantes dimulyakké nganggo lagu pujian, Njenengan nggawé mukjijat.+
12 Njenengan ngethungké tangan tengen-Mu, lan wong-wong kuwi dipangan bumi.+
13 Nganggo katresnan-Mu,* Njenengan mimpin wong-wong sing wis Njenengan slametké;+
Nganggo kekuwatan-Mu, Njenengan nuntun wong-wong kuwi menyang panggonan-Mu sing suci.
14 Bangsa-bangsa sing krungu+ soal kuwi bakal ndredheg merga wedi.
Penduduk Filistia bakal sedhih banget.
15 Wektu kuwi, kepala sukuné Édom bakal kewedèn,
Lan para pemimpiné Moab+ sing kuwat bakal ndredheg merga wedi.
Kabèh penduduk Kanaan bakal wedi banget.+
16 Wong-wong kuwi bakal dadi wedi banget.+
Merga kuwasa-Mu sing gedhé,* wong-wong kuwi kaya watu sing ora bakal isa obah
Nganti umat-Mu liwat, oh Yéhuwah,
17 Yéhuwah Gusti Allahku, Njenengan bakal nuntun umat-Mu bèn isa manggon ing gunung-Mu,+
Panggonan sing wis Njenengan pilih dadi panggonan-Mu,
Oh Yéhuwah, kuwi panggonan sing suci, sing dibangun nganggo tangan-Mu.
18 Yéhuwah bakal mréntah dadi raja nganti saklawasé.+
19 Wektu kabèh jarané Firaun, kréta perangé, lan prajurité sing numpak jaran ngoyak* tekan laut,+
Yéhuwah nggawé banyuné laut mbalik manèh lan nerjang wong-wong kuwi.+
Ning, wong Israèl nyabrang ing tengah laut, ing lemah sing garing.”+
20 Terus, nabi wédok sing jenengé Miriam, yaiku mbakyuné Harun, njupuk rebana, lan kabèh wong wédok ya mèlu njupuk rebana lan nari. 21 Miriam mbales nyanyiané wong-wong lanang kuwi lan nyanyi,
”Nyanyia kanggo Yéhuwah, merga Dhèwèké bener-bener diluhurké.+
Dhèwèké wis nguncalké jaran lan sing numpak jaran kuwi menyang laut.”+
22 Terus, Musa mimpin wong Israèl lunga saka Laut Merah menyang Padhang Belantara Syur. Wong-wong kuwi telung dina mlaku ing padhang belantara, tapi wong-wong kuwi ora nemokké banyu. 23 Akhiré wong-wong kuwi tekan ing Marah,*+ tapi wong-wong kuwi ora isa ngombé banyu ing Marah merga rasané pait. Kuwi sebabé panggonan kuwi dijenengi Marah. 24 Mula, wong-wong kuwi sambat karo Musa,+ ”Awaké dhéwé arep ngombé apa?” 25 Musa njaluk tulung marang Yéhuwah,+ lan Yéhuwah nduduhi Musa wit sing cilik. Wektu Musa nguncalké wit kuwi ing banyu, banyuné dadi legi.
Ing kana, Gusti Allah mènèhi wong-wong kuwi hukum lan dhasar kanggo ngadili wong-wong kuwi. Gusti Allah péngin ngerti wong-wong kuwi manut apa ora.+ 26 Gusti Allah kandha, ”Nèk kowé tenanan ngrungokké Yéhuwah Gusti Allahmu, nindakké apa sing bener nurut Aku, nggatèkké kabèh préntah lan peraturan-Ku,+ Aku ora bakal ngukum kowé nganggo penyakit kaya Aku ngukum Mesir.+ Aku, Yéhuwah, bakal nggawé kowé tetep séhat.”+
27 Terus, wong-wong kuwi tekan ing Èlim. Ing kana, ana mata air 12 lan wit palem 70. Wong-wong kuwi kémah ing pinggir mata air mau.