SING UTAMA DIREMBUG | APA SEBABÉ JUJUR?
Ora Jujur—Apa Pengaruhé?
”Biasané masalah isa dirampungi nganggo tumindak ora jujur.”—Samanta, Afrika Selatan.
Apa panjenengan setuju karo omongané Samanta? Kaya dhèwèké, awaké dhéwé mesthiné wis tau ngadhepi masalah gedhé. Tanggepané awaké dhéwé kanggo ngadhepi masalah kuwi, isa nduduhké pathokan endi sing dinggo. Contoné, mbokmenawa awaké dhéwé ora jujur mung merga péngin dialem wong. Nèk konangan, akibaté mesthi èlèk banget. Gatèkna akibaté nèk ora jujur.
ORA DIPERCAYA MANÈH
Kekancan kuwi dhasaré rasa percaya. Nèk percaya siji lan sijiné, wong-wong kuwi bakal rumangsa aman lan diayomi. Ning, rasa percaya kuwi ora ujug-ujug ana. Wong kekancan isa percaya nèk suwé sesrawungan, kerep omong-omongan, lan ora mentingké awaké dhéwé. Rasa percaya isa rusak, mung merga tumindak ora jujur sepisan waé. Nèk rasa percaya kuwi rusak, angèl didandani manèh.
Apa panjenengan wis tau diapusi karo kanca sing panjenengan tresnani? Nèk wis tau, piyé perasaan panjenengan? Panjenengan mesthi lara ati banget, ta? Kuwi lumrah. Tumindak ora jujur isa ngrusak hubungan sing wis apik.
NULARI WONG LIYA
Profésor saka University of California sing jenengé Robert Innes kandha, ”Tumindak ora jujur kuwi nular.” Tumindak kuwi kaya virus. Nèk panjenengan kekancan karo wong sing seneng ngapusi, panjenengan ya isa ”ketularan”.
Piyé carané bèn ora mèlu-mèlu nindakké sing ora jujur? Alkitab isa mbantu panjenengan. Gatèkna pathokané Alkitab sing bakal dirembug ing kaca sakbanjuré.