BANTUAN KANGGO KELUARGA | NDHIDHIK ANAK
Anak-Anak lan Média Sosial—Bagéan 1: Apa Anakku Éntuk Nganggo Média Sosial?
Menurut survéi, 97 persèn cah-cah enom nduwé média sosial. Nèk anaké njenengan ya péngin nduwé, gatèkna sing dibahas ing artikel iki.
Ing artikel iki bakal dibahas:
Wektu sing dientèkké kanggo média sosial
Menurut situs wèb HelpGuide, ”Média sosial dirancang menarik bèn awaké dhéwé kecanduan.”
”Awalé mung péngin mbukak sedhéla thok tapi dadi mbukak berjam-jam. Nèk wis dolanan HP ki rasané males ngapa-apa.”—Lynne, 20 taun.
Pikirna: Apa anakku isih kudu tak batesi wektuné dolanan média sosial? Utawa, apa dhèwèké wis ngerti dhéwé?
Ayat: ”Kowé kudu terus nggatèkké tumindakmu . . . kaya wong sing wicaksana. . . . Gunakna wektumu kanggo nindakké apa sing penting.”—Éfésus 5:15, 16.
Ngijinké anak nganggo média sosial tanpa dikandhani sik kuwi kaya ngejarké anak numpak jaran tapi ora diajari sik.
Kanca-kanca ing média sosial
Média sosial dirancang bèn awaké dhéwé ngrasa nduwé akèh kanca, padahal sakjané ora.
”Akèh cah-cah enom ngrasa digatèkké nèk éntuk akèh likes lan followers, padahal sakjané ora.”—Patricia, 17 taun.
Pikirna: Apa anakku ngerti nèk likes karo followers kuwi ora penting? Apa anakku nduwé kanca sakliyané ing média sosial?
Ayat: ”Kanca sejati kuwi terus nresnani lan dadi sedulur sing isa diendelké wektu ana kesusahan.”—Wulang Bebasan 17:17.
Dampaké
Menurut para peneliti, wong-wong sing kakèhan nganggo média sosial dadi ngrasa kesepian, kuwatir, lan strès.
”Pas ndelok foto kanca-kancaku lagi ngumpul tapi aku ora dijak, rasané sedhih banget.”—Serena, 19 taun.
Pikirna: Apa anakku péngin dadi pusat perhatian utawa dadi seneng bersaing karo kanca-kancané ing média sosial?
Ayat: ”Aja nganti awaké dhéwé sombong, saingan, utawa iri karo liyané.”—Galatia 5:26.
Kelakuané ing média sosial
Ing média sosial, wong-wong isa mem-bully lan di-bully. Terus isa ngirim utawa dikirimi pesan lan gambar sing saru-saru. Ing média sosial ya isa ndelok pornografi. Mungkin awalé anaké njenengan ora kaya ngono, tapi suwé-suwé ya isa terpengaruh.
”Mémang ora kabèh sing ana ing média sosial kuwi bahaya, tapi ana akèh kata-kata lan musik sing ora pantes.”—Linda, 23 taun.
Pikirna: Apa anakku ngati-ati pas nganggo média sosial? Apa dhèwèké isa ngendhalèni dhiri bèn ora ndelok sing ora pantes?
Ayat: ”Aja nganti kowé ngomongké soal hubungan sèks sing ora pantes, kabèh tumindak sing najis, lan tumindak sing srakah. . . . Sakliyané kuwi, aja nindakké apa sing bejat, aja ngomongké apa sing ora ana gunané, lan aja guyonan soal sing saru-saru.”—Éfésus 5:3, 4.
Apa anakku mémang butuh média sosial?
Wong ora butuh média sosial bèn isa bahagia. Akèh cah-cah enom sing ora nduwé média sosial ya isa bahagia.
”Mbakku éntuk pengaruh èlèk saka média sosial. Makané aku wegah nduwé média sosial manèh. Akhiré aku dadi luwih bahagia.”—Nathan, 17 taun.
Intiné: Sakdurungé ngijinké anak nganggo média sosial, njenengan kudu mastèkké sik nèk meréka isa ngatur wektu, nduwé hubungan sing apik karo kanca-kancané, lan isa ngendhalèni dhiri.
Ayat: ”Wong sing pinter mikirké tenanan apa sing bakal ditindakké.”—Wulang Bebasan 14:15.