Beth ngomong, ”Kèt enom aku wis kena anémia. Kuwi nggawé aku lemes, gampang kesel, lan angèl konsèntrasi. Balung-balungku ya lara banget. Ning, aku ngrasa luwih séhat wektu ngombé suplemèn zat besi saka dokter lan njaga pola makanku.”

Akèh wong ya kena anémia. Organisasi Kesehatan Dunia (WHO) kandha nèk ana rong milyar wong (kira-kira 30 persèn penduduk sak donya) sing kena anémia. Ing negara berkembang, kira-kira ana 50 persèn ibu hamil lan 40 persèn balita sing kena anémia.

Anémia isa nggawé awaké dhéwé kena penyakit liyané. Beberapa wong sing kena anémia isa lara jantung lan malah gagal jantung. WHO kandha nèk anémia dadi penyebab 20 persèn kematian ibu hamil ing beberapa negara. Bayi sing lair saka ibu sing kena anémia défisiènsi besi (jenis anémia sing paling umum) isa lair prématur lan kuru. Pertumbuhan bocah sing lara anémia bakal luwih suwé, lan badané bocah kuwi ya gampang kena infèksi. Ning, anémia défisiènsi besi isa dicegah lan diobati.a

Apa Kuwi Anémia?

Anémia kuwi penyakit. Wong-wong sing lara anémia ora nduwé cukup sèl darah merah sing séhat. Penyebabé anémia ya ana akèh. Para ilmuwan wis nliti nèk ana luwih saka 400 jenis anémia. Wong sing lara anémia kuwi ana sing parah lan ana sing ora. Ana sing suwé lan ana sing mung sedhéla.

Apa sing Nyebabké Anémia?

Sing nyebabké anémia kuwi ana telu:

• Kurang sèl darah merah merga kélangan getih.

• Tubuh ora ngasilké sèl darah merah séhat sing cukup.

• Tubuh ngrusak sèl darah merah.

Wong-wong biasané luwih kerep kena anémia défisiènsi besi ketimbang jenis anémia sing liyané. Kuwi merga tubuh kurang zat besi sing isa ngasilké hémoglobin sing cukup. Hémoglobin kuwi bagéan sèl darah merah sing fungsiné kanggo nggawa oksigén.

Apa Gejalané Anémia Défisiènsi Besi?

Wong-wong sing kena anémia isa waé ora sadhar. Gejalané isa macem-macem. Misalé:

• Kesel banget

• Tangan lan sikilé kadhemen

• Lemes

• Kulité pucet

• Mumet

• Dhadhané lara, detak jantungé banter, sesak napas

• Kukuné rapuh

• Bayi lan bocah-bocah biasané ora doyan mangan

• Péngin banget mangan ès batu, tepung, lan tanah

Sapa Waé sing Isa Kena?

Wong wédok gampang kena anémia défisiènsi besi merga kélangan getih wektu mènstruasi. Ibu hamil ya isa kena anémia nèk kurang vitamin B, folat, lan asam folat.

Bayi sing lairé prématur utawa kuru sing ora éntuk akèh zat besi saka ASI utawa susu formula.

Bocah-bocah sing panganané ora séhat.

Vegetarian sing panganané kurang zat besi.

Wong-wong sing nduwé penyakit parah, kaya kelainan getih, kanker, gagal ginjal, pendarahan ing lambung, utawa infèksi liyané.

Cara Ngobati Anémia

Ora kabèh jenis anémia kuwi isa dicegah lan diobati. Ning, anémia merga kekurangan zat besi lan vitamin isa dicegah lan mari merga mangan panganan sing isiné:

Zat besi. Ana ing daging, kacang-kacangan, lan sayuran sing wernané ijo tuwa.b Njenengan ya isa masak nggunakké alat-alat saka wesi, merga nurut penelitian kuwi isa nambah zat besi ing panganan sing lagi dimasak.

Folat. Ana ing buah-buahan, sayuran sing wernané ijo tuwa, kèju, endhog, iwak, kacang polong, kacang merah, kacang almond, lan kacang tanah. Folat ya ana ing produk gandum sing akèh vitamin, misalé roti, séréal, pasta, lan sega. Vitamin sintètik saka folat kuwi asam folat.

Vitamin B-12. Ana ing daging, produk susu, séréal sing bergizi, lan produk kacang kedelai.

Vitamin C. Ana ing kabèh jenis jeruk, paprika, brokoli, tomat, mélon, lan stroberi. Vitamin C sing ana ing panganan kuwi mbantu tubuh nyerep zat besi.

Panganan ing saben dhaérah kuwi béda-béda. Njenengan kudu ngerti panganan apa waé ing dhaérahé njenengan sing isa nyukupi kebutuhan gizi. Dadi, ibu hamil lan wong wédok sing kepéngin nduwé anak kudu nggatèkké soal iki. Nèk njenengan séhat, bayiné njenengan mungkin ora kena anémia.c