CARANÉ SUMBANGANÉ NJENENGAN DIGUNAKKÉ
Rancangan sing Ramah Lingkungan lan Bermanfaat kanggo Sedulur-Sedulur
1 APRIL 2025
Awaké dhéwé ngerti nèk sedhéla manèh Yéhuwah bakal nyingkirké wong-wong sing ngrusak bumi. (Wahyu 11:18) Meskipun ngono, kèt saiki awaké dhéwé isa njaga bumi bèn ora tambah rusak. Misalé, Seksi-Seksi Yéhuwah nggawé rancangan sing ramah lingkungan wektu mbangun panggonan-panggonan sing digunakké kanggo kegiatan organisasi.
Tujuané rancangan kuwi digawé yaiku bèn lingkungan ing sekitaré tetep aman. Rancangané apa waé? Piyé sumbangané njenengan digunakké kanggo nggawé rancangan kuwi?
Rancangan Bèn Balai Pertemuané Luwih Sejuk
Balai Pertemuan Matola sing ana ing Mozambik kuwi kiwa tengené ora ana témboké lan atapé saka logam. Atap saka logam kuwi nyerep panas saka matahari. Mulané balai pertemuané dadi panas banget. Ana salah siji sedulur ing kana crita, ”Saking panasé, kringetku nganti dlèwèran. Terus pas acarané wis rampung, sedulur-sedulur langsung cepet-cepet metu bèn ora kepanasen manèh.” Nah rancangan apa sing digawé bèn sedulur-sedulur isa luwih nyaman lan menikmati acarané?
Ing atap balai pertemuan kuwi dipasang kipas-kipas lan penahan panas. Penahan panas kuwi fungsiné nahan panas saka matahari lan nggawé ruangané luwih adhem. Terus, kipas-kipas kuwi fungsiné nggawé bèn ruangané ana sirkulasi udarané, dadi udara panasé isa metu saka ruangan. Kipasé ora perlu nganggo listrik soalé digerakké nganggo angin. Sak kipas regané kira-kira wolung atus èwu rupiah.
Kipas-kipas sing ana ing atap Balai Pertemuan Matola
Rancangan iki nggawé udara ing Balai Pertemuan dadi luwih sejuk. Merga ana sirkulasi udara, udarané dadi ora lembab lan bangunané ora jamuren. Jumlah oksigén ing ruangan kuwi ya dadi luwih akèh. Dadi sedulur-sedulur isa luwih konsèntrasi lan menikmati acarané. Sedulur sing disebutké mau crita ngéné, ”Saiki kami ora langsung cepet-cepet metu pas acarané wis rampung. Malah pas istirahat, kami isa bergaul lan mangan bareng. Rasané sejuk banget, kami kaya lagi lungguh ing ngisoré wit sing rimbun.”
Wektu mèlu pertemuan wilayah utawa pertemuan gabungan wilayah, para sedulur saiki dadi luwih menikmati
Nggunakké Sumber Ènergi sing Ora Bakal Entèk
Ing bangunan-bangunan duwèké organisasi, akèh sing dipasangi panèl surya. Panèl surya kuwi bakal ngubah panas saka matahari dadi tenaga listrik. Merga sinar matahari terus ana, kanggo ngasilké tenaga listrik, awaké dhéwé ora perlu bergantung karo batu bara, minyak, utawa gas sing malah marahi polusi. Merga nganggo panèl surya, awaké dhéwé isa ngurangi polusi lan menghémat dhuwit sumbangan.
Taun 2022, ing Kantor Cabang Slovenia dipasang panèl surya. Panèl surya iki isa nyukupi 30 persèn kebutuhan listrik ing kantor cabang. Nèk tenaga listrik sing dihasilké luwih akèh timbang kebutuhané, kelebihané bakal disalurké kanggo masyarakat sekitar. Mémang rega panèl suryané mèh enem milyar rupiah, tapi merga nganggo panèl surya tagihan listriké isa luwih sithik lan isa menghémat dhuwit sumbangan. Nah dana sing dihémat kuwi nèk dijumlahké selama patang taun, jumlahé luwih akèh timbang biaya sing ditokké kanggo masang panèl surya.
Kantor Cabang Slovenia
Taun 2024, ing Kantor Cabang Sri Lanka dipasang panèl surya lan baterai penyimpanan sing gedhé. Panèl surya kuwi isa nyukupi 70 persèn kebutuhan listrik ing kantor cabang. Biaya sing ditokké mémang gedhé, kira-kira 49 milyar rupiah. Tapi dana sing dihémat merga nganggo panèl surya, nèk dijumlahké selama telung taun, hasilé luwih akèh timbang biaya sing dibutuhké kanggo masang panèl surya. Ing taun sing padha, ing Kantor Cabang Belanda ya dipasang panèl surya. Panèl surya kuwi isa nyukupi 35 persèn kebutuhan listrik ing kantor cabang. Biayané sekitar 18 milyar rupiah. Tapi dana sing dihémat merga nganggo panèl surya, nèk dijumlahké nganti sangang taun, hasilé luwih akèh timbang biaya sing ditokké kanggo masang panèl surya.
Kantor Cabang Belanda
Beberapa kantor penerjemahan jarak jauh (RTO) sing ana ing Meksiko ya dipasang panèl surya. Misalé ing RTO Tarahumara (Tengah) sing ana ing Chihuahua. Pas musim dingin suhuné isa nganti minus lan pas musim panas suhuné isa luwih saka 40 derajat Celsius. Merga biaya listrik larang, para sedulur ora gelem nggunakké pemanas utawa AC. Sedulur Jonathan sing nglayani ing RTO crita, ”Pas musim dingin kami kudu nganggo jakèt lan klambi sing kandel, terus pas musim panas kami kudu mbukak jendhéla.”
Taun 2024, ing RTO kuwi wis dipasang panèl surya lan biayané kira-kira 350 yuta rupiah. Tapi dana sing dihémat merga nganggo panèl surya, nèk dijumlahké nganti limang taun, hasilé luwih akèh timbang biaya sing ditokké kanggo masang panèl surya. Dadi sedulur-sedulur ing kana isa luwih kerep nganggo pemanas lan AC. Sedulur Jonathan crita manèh, ”Kami dadi luwih nyaman lan isa konsèntrasi pas kerja. Kami ya seneng merga organisasi wicaksana nggunakké dhuwit sumbangan lan rancangan sing digawé ya ramah lingkungan.”
Sedulur-sedulur ing RTO Tarahumara (Tengah) saiki kerjané luwih nyaman
Sistem Penampungan Banyu
Beberapa Balai Ibadah ing Afrika ora nduwé sumber banyu sing resik. Mulané, ana sedulur-sedulur sing kudu lunga nganti beberapa kilomèter kanggo njupuk banyu lan nggawa kuwi ing Balai Ibadah. Ing Balai Ibadah liyané, sedulur-sedulur kudu tuku banyu sing digawa nganggo truk, sing malah marahi polusi lan regané larang.
Dadi, supaya sedulur-sedulur isa éntuk banyu sing resik, ing beberapa Balai Ibadah ing Afrika dipasang pipa banyu lan tangki penampungan banyu sing gedhé. Sakdurungé masang peralatané, sedulur-sedulur belajar soal cuaca lan iklim ing dhaérah kuwi bèn isa nggawé rancangan sing cocog kanggo Balai Ibadah ing kono. Biaya kanggo masang peralatané mèh 10 yuta nganti mèh 50 yuta rupiah, tapi merga nganggo peralatan kuwi biaya operasional Balai Ibadah dadi luwih murah.
Tangki penampungan banyu sing ana ing Balai Ibadah ing kutha Phuthaditjhaba ing Afrika Selatan
Sistem penampungan banyu kuwi bermanfaat banget kanggo sedulur-sedulur. Sedulur Noemia saka Mozambik crita, ”Sakdurungé, kami kudu lunga adoh banget kanggo njupuk banyu lan nggawa kuwi tekan balai ibadah. Pas tekan balai, kami dadi kekeselen. Rasané angèl banget bèn isa tetep resik. Tapi, saiki kami ora kudu nggolèk banyu nganti adoh, ora kekeselen, lan isa menikmati acarané. Kabèh sing teka ya isa wisuh. Maturnuwun banget.”
Manfaat sing dirasakké sedulur wédok lan anaké lanang ing Afrika Selatan merga ana sistem penampungan banyu
Piyé organisasi isa mbiayai rancangan sing ramah lingkungan iki? Merga sumbangané njenengan sing dilebokké ing kothak sumbangan utawa sing dikirim liwat donate.jw.org. Maturnuwun merga njenengan wis murah hati.