Nèk awaké dhéwé nyritakké Yéhuwah karo wong-wong, biyasané ana wong sing ora seneng. Wong-wong kuwi malah ngécé lan nyenèni awaké dhéwé. Kuwi marakké awaké dhéwé wedi nèk arep nyritakké Yéhuwah karo wong-wong. Apa kowé ya wis tau ngrasakké kaya ngono kuwi?— Nèng Alkitab, ana critané cah nom sing jenengé Yérémia. Yérémia kuwi sayang karo Yéhuwah, ning tau emoh nyritakké Yéhuwah karo wong-wong. Ayo, diwaca critané.

Pas Yérémia isih enom, Yéhuwah ngongkon dhèwèké ngélingké wong-wong bèn ora jahat menèh. Ning, kuwi angèl banget kanggo Yérémia. Yérémia ora wani ngandhani wong-wong kuwi. Yérémia ngomong karo Yéhuwah, ’Aku isih enom, aku ya bingung mèh ngomong apa karo wong-wong kaé.’ Ning, Yéhuwah kandha karo Yérémia, ’Aja wedi, kowé mengko tak éwangi.’

Yérémia terus dadi kendel. Yérémia ngomong nèk wong-wong jahat ora gelem dadi wong sing apik, mengko arep diukum Yéhuwah. Wong-wong jahat kuwi gelem nuruti omongané Yérémia ora?— Ora gelem. Akèh wong sing ngécé Yérémia, malah ana sing arep matèni dhèwèké. Yérémia wedi banget. Yérémia kandha, ’Aku ora gelem menèh nyritakké Yéhuwah’. Ning, Yérémia apa tenanan wis nyerah?— Yérémia ora nyerah merga sayang karo Yéhuwah. Dadi, Yérémia tetep nyritakké Yéhuwah karo wong-wong. Merga Yérémia ora nyerah, Yéhuwah nglindungi Yérémia.

Wong-wong jahat tau nyemplungké Yérémia nèng sumur sing isiné lumpur. Yérémia ora dikèki maem karo banyu nggo ngombé. Yérémia ditinggal nèng kono bèn mati. Ning, Yéhuwah nylametké Yérémia.

Kowé isa sinau apa saka critané Yérémia?— Yérémia sok-sok wedi, ning tetep nyritakké Yéhuwah karo wong-wong. Kowé mungkin ya ngalami sing padha. Pas kowé nyritakké Yéhuwah karo wong-wong, mungkin ana sing ngécé karo nyenèni. Kowé isa wedi utawa isin. Ning, aja nyerah. Terusa nyritakké Yéhuwah. Yéhuwah mesthi nulungi kowé, kaya Yérémia.

Kowé kerep manut ora karo wong tuwamu?— Sok-sok, manut karo wong tuwa kuwi ora gampang. Kowé ngerti ora nèk Yésus kuwi bocah sing manut karo wong tuwané lan Yéhuwah?— Nèk kowé maca critané Yésus, kowé mesthi luwih manut karo wong tuwamu senajan kuwi angèl. Ayo, gatèkna critané.

Sakdurungé Yésus urip nèng bumi, Yésus urip nèng swarga karo Bapaké, Yéhuwah. Pas nèng bumi, Yésus ya nduwé wong tuwa sing jenengé Yusuf karo Maryam. Piyé critané kok Maryam karo Yusuf isa dadi wong tuwané Yésus?—

Yéhuwah nggunakké roh suci nggo mindhah Yésus seka swarga nèng wetengé Maryam. Mula Yésus isa lair nèng bumi. Mung Yéhuwah thok sing isa ngono kuwi. Yésus sangang sasi nèng wetengé Maryam, padha kaya kowé mbiyèn pas nèng wetengé ibumu. Bar sangang sasi nèng wetengé Maryam, Yésus lair. Nah, saka crita kuwi, awaké dhéwé dadi ngerti nèk Yusuf karo Maryam dadi wong tuwané Yésus.

Yésus sayang banget karo Yéhuwah. Pas umuré 12 taun, Yésus dijak wong tuwané nèng Yérusalèm nggo ngrayakké paskah. Yérusalèm kuwi adoh banget. Pas wong tuwané Yésus mulih, Yésus ora mèlu mulih. Lha terus Yésus nèng ngendi?—

Yusuf karo Maryam bali menèh nèng Yérusalèm nggolèki Yésus. Wong tuwané bingung nggolèki Yésus nganti telung dina. Pas digolèki nèng bait Allah, jebulé Yésus ana nèng kono. Nèng kono Yésus ngapa?— Dhèwèké sinau bab Yéhuwah. Yésus sayang banget karo Yéhuwah, mula dhèwèké péngin nyenengké Yéhuwah. Yésus tetep manut karo Yéhuwah nganti dhèwèké mati. Manut karo Yéhuwah kuwi ora gampang, ning merga sayang, Yésus gelem manut karo Yéhuwah. Apa Yésus ya manut karo Yusuf lan Maryam?— Alkitab kandha ya, Yésus manut karo wong tuwané.

Apa sing isa ditiru saka Yésus?— Kowé kudu manut karo wong tuwamu lan Yéhuwah. Dadi, kowé gelem manut ora karo wong tuwamu?—