PITAKONANÉ CAH ENOM
Apa Terkenal ing Média Sosial Kuwi Penting?
Cah enom sing jenengé Elaine ngomong, ”Aku iri karo kanca sekolahku. Dhèwèké terkenal merga nduwé akèh followers (kanca ing média sosial).”
Apa kowé pernah ngrasa kaya ngono? Nèk iya, apa sing dibahas ing artikel iki bakal mbantu kowé.
Apa bahayané dadi terkenal?
Wulang Bebasan 22:1 kandha, ”mendhing nduwé réputasi sing apik timbang nduwé harta sing akèh.” Dadi, péngin disenengi wong liya lan nduwé réputasi sing apik kuwi wajar.
Ning, péngin disenengi wong liya isa nggawé kowé péngin dadi terkenal. Kuwi ana bahayané. Onya sing umuré 16 taun ngomong,
”Aku pernah ndelok wong sing nékad. Wong kuwi lompat saka lantai loro sekolahku mung merga péngin terkenal.”
Bèn terkenal ana wong-wong sing ngrekam kelakuané sing anèh-anèh lan di-posting ing média sosial. Ana cah-cah enom sing ngrekam pas dhèwèké mangan détergén utawa kapsul sing isiné racun. Padahal kuwi bahaya banget.
Alkitab kandha: ”Aja seneng . . . sombong.”—Filipi 2:3, Kitab-Kitab Yunani Kristen Terjemahan Donya Anyar.
Kanggo dipikirké:
Apa terkenal ing média sosial kuwi penting kanggo kowé?
Apa kowé bakal nindakké sing bahaya bèn terkenal?
Apa kowé ngapusi bèn isa terkenal?
Akèh cara bèn terkenal, kadhang ora perlu nindakké sing bahaya. Erica sing umuré 22 taun ngomong,
”Ana sing posting akèh foto lan kétok nduwé akèh kanca. Kuwi nggawé wong liya mikir nèk dhèwèké terkenal.”
Ana wong-wong sing ngapusi bèn kétok terkenal. Cara sing umuré 15 taun ngomong,
”Ana wong-wong sing kétoké foto ing pésta padahal ora.”
Matthew sing umuré 22 taun ya tau kaya ngono,
”Aku posting foto lan lokasiné tak tulis Gunung Everest. Padahal aku durung pernah mrono.”
Alkitab kandha: ”Terus dongakna aku, merga aku yakin nèk aku nduwé hati nurani sing resik, lan aku péngin jujur wektu nindakké apa waé.”—Ibrani 13:18.
Kanggo dipikirké:
Apa kowé pernah ngapusi bèn terkenal ing média sosial?
Saka sing mbok posting, wong liya isa ngerti apa soal kowé?
Apa followers lan likes kuwi penting?
Akèh wong mikir bakal terkenal nèk nduwé akèh followers lan likes. Matthew pernah ngrasa kaya ngono,
”Aku takon karo wong-wong, ’Followersmu ana pira?’ utawa ’Pira sing nge-likes postinganmu?’ Bèn followersku tambah akèh, aku follow wong-wong sing ora tak kenal. Média sosial nggawé aku dadi péngin luwih terkenal.”
Terkenal ing média sosial kuwi kaya makanan cepat saji. Kuwi nyenengké ning ana bahayané
Maria sing umuré 25 taun ngomong nèk ana wong-wong sing mikir followers lan likes kuwi penting banget,
”Ana wong wédok sing ngrasa èlèk merga mung sithik sing nge-likes fotoné. Akèh wong ngrasa kaya ngono. Padahal kuwi ora bener. Kuwi padha waé kaya kowé ngécé awakmu dhéwé.”
Alkitab kandha: ”Aja nganti awaké dhéwé sombong, saingan, utawa iri karo liyané.”—Galatia 5:26.
Kanggo dipikirké:
Apa média sosial nggawé kowé mbandhing-mbandhingké awakmu karo wong liya?
Nurutmu luwih penting nduwé followers apa nduwé sahabat?