“Ani Ijjenda Ateꞌe Hunabeꞌnon”!

1. Dhuuchchiingi hariiremeeki Kirsitaani iimiꞌa adhdhemaaki haanote?

HEDDO wogga edi darre, Yihowwaki ardi, ‘buttateꞌn gateeki hariiremeeki Kirsitaan iimiꞌa adhdhemaꞌneeki haanote?’ hiyyaꞌn qoraamman. Hariiremeeki Kirsitaani Armaageedoonike bagedi uduma, heenooxxe yannaꞌa Gennete kaddeexxe buttaꞌn hedhaan hine hendaannaxxi yanna hexxemman. Kaddomaleꞌe, Hageyya 15, 2013 keꞌn, fuldeexxi Heqqecatixxi Xellepho, Armageedooniki bagedi keꞌebaa edi darre hariiremeeki Kirsitaani iimiꞌa adhdhemaaxxa ifisseemman.—Mat. 24:31.

2. Huuni qortumi keꞌa dandeꞌa? Tenne barachchoꞌn heene yaaneꞌn mariꞌe assinanno?

² Kaddoolenna, Yihowwaꞌa addatenshati ergatemaꞌneeki Kirsitoosiki “weli gedhebi” lumoke abari wodda maata kada?, hiyyaaki qortumi keꞌa dandeꞌaan. (Yoha. 10:16; Mat. 24:21) Mitti mitti Kirsitaani, insaꞌneke jaaluwwa kadeeki hariiremeeki dayyuwwinna dayyuwwa, iimiꞌa meꞌinaaxxa yanna qofitti gantaachcho yookiin hunemmaachcho fakkaattaaxxinna hexxaan. Insaꞌnexxe sammoꞌn daga dandeꞌaaka lame Maxaafi Qullichchiinka raaga uundo. Okkooꞌn insaꞌne yaadiyyo hasissabaaki mayeete kaddeexxa mariꞌantannon.

KADDABAAXXI YAANE HEENTE?

3-4. Mitti mitti manni maa hiyye heda dandeꞌa? Mayee?

³ Mitti mitti, hariiremeeki Iimiki Bisi, wele gedhebo akeeka gophaꞌneexxe kaddoole dedha dhugaatenaaꞌn fulaan, hiyye sodaataaxxina hedha dandeettaan. Dedha kunni manni iitta sodaata dandeꞌeeki, mitte mitte Maxaafi Qullichchiinke raaganaaꞌn kexxeexxinnite kada dandeettaan. Lame fakkeennuwwa uundo. Taakkaki, Lumoke Kayinaatichcho Yoodaheke fakkeennan. Isi magenokeꞌe addatemeemmake manjon. Isinna isixxi miniinxi ama Yoosabeexxi, Iyyoꞌaasite hiyyemaaka mitte belto, fuggoxxi yaane geltabaashsha heqqat, addatemeekenna eloke mootichcha kadaashsha gargaareen. Geerchi Yoodahe hedhoti hedhemmaxxa yanna, Iyyoꞌaasi eloxxa yaane assaamman. Kaddomaleꞌe, Yoodahe reyeexxe shiixxooxxe yanna uduma, Iyyoꞌaasi elobaaxxa yaane assa safeen. Isinna fuggaaleeyye baallooleka gorsa laqati Yihowwaꞌa waaleen.—2 Zena. 24:2, 15-19.

⁴ Langaki fakkeenni, langake dhibbeesso baroꞌni hedhemmake Kirsitaanan. Hawaaryaate giddiiꞌn muuxxamakeꞌn reyeeki, Yohaannisi, heddi kirsitaani Yihowwaꞌa addatenshati ergatemaashsha gargaareemman. (3 Yoha. 4) Wele Yesuusixxe hawaaryaateshshani, Yohaannisinna gubaꞌeti giddiꞌa fuggoxxi barachchonna aada eꞌyitabaashsha jabaxxa yaane asseen. (1 Yoha. 2:18; 2 Tese. 2:7.) Kaddomaleꞌe, Yohaannisi reyeechchi uduma, bono fichchakeꞌn kexxammaxxe giirashsha dhariinxi barachcho facaateen. Shiixxooxxe tomme wogguwwa uduma, gubaꞌeteꞌn hedhemmaki Kirsitaani dhariinxe barachchonni daafemeen.

5. Konne lame raaganaaꞌn maa hiyyaake muuxamaꞌn geya hasissabaꞌa?

⁵ Kunni lami Maxaafi Qullichchiinki raagi hariiremeeki Kirsitaani iimiꞌa adhdhemeechchi uduma, Kirsitoosike wele gedheboꞌn iitta hexxeexxi yaane geltaaxxa ifisaakee? Okkone wodda, addatemeeki Kirsitaani, Iyyoꞌaasishsha dhugaatenaaꞌn fulaa? Yookiin langake dhibbeessoke baroꞌn hedhemmake heddi Kirsitaanishsha dhariinxe barachchobaꞌa wirri hiyyaa? Hiissichchi, ijjenda waawwoti! hiyyaaken. Hariiremeeki Kirisitaani iimiꞌa adhdhemaa wodda weli gedhebi dhugaatike oraꞌn, Yihowwa mageneeffata ittinni ediꞌa sufaaxxanna isinna insaꞌneꞌe karkarsaaxxa addata dandeennannon. Iitta hine addantaanneki mayeete?

QULLITTE MAGENEEFFACHCHO IJJENDA DAAFENDABAAN

6. Haruumaa qicoꞌn uundaanneki baruwwi hoonte?

⁶ Ediꞌa haꞌurtaaxxi yanna daggoole qullitte mageneeffachcho daafendabaan hine addantaanneki mayeete? Buutotinna heꞌnaanneka baro uuddaaxxa Maxaafa Qullichchakenaaꞌn baranteennaxxeeten. Maxaafi Qullichchi taꞌa heꞌnaanneki bari, qariki Isiraꞌeelooti hedhammake baronaaꞌninna langake dhibbeesso bariki Kirsitaani hedhammake baronaaꞌn haranga gargariti hedheeke kadeexxa haasoꞌaan. Konne sase baroꞌn hubanno assino: (1) Qarike Isiraꞌeelooti baro, (2) Hawaariyaate rerteechchi uduma hedheeka baronna, (3) “Duuchchiinxi yaane haaroꞌmitaaka baro.” noꞌoka—Huje 3:21.

7. Qarike Isiraꞌeelootiinke baroꞌn mootooleeyyenna weli manni elobaaxxa yaane assaamma wodda, addatemeeki Isiraꞌeelooti adde woxxa gopheeki mayeete?

⁷ Qarike Isiraꞌeelooti baro. Muuse reyateꞌe shiixxooxxi yanna gatteechchi uduma, Isiraꞌeeloota iitta hiyyeemman: “Ani reyennechchi uduma elobaaxxa yaane assitinaaxxannaa ajajeenneke oranaaꞌn fuldinaaxxa geltaa qicoꞌn egꞌneennen.” (Zedag. 31:29) Muuse Isiraꞌeelooti jallateexxe kaddoole gadhixxi gosa insaꞌneꞌe boojiitaaxxa xexxeꞌachchiiseemman. (Zedag. 28:35, 36) Tinni yaane muuxendeemmata? Eet. Qeerraake bariꞌa heddo mootoleeyye, elobaaka ora hordofat, Mageniinka arda dedhisseemman. Tennenaaꞌn kexxeexxa Yihowwa fuggichcha arda waaleen, ittan mootoleeyye kexxaammaka tooranna uurraashsha asseen. (Hiziq. 21:25-27) Kaddolenna, addatemeeki Isiraꞌeelooti, Mageni hiyyeexxi yaane muuxematenaaꞌn kexxeexxa addatenshat isiꞌaa ergatema ittin sufeen.—Isa. 55:10, 11.

8. Langake dhibbeesso baroꞌn Kirsitaaniinxi gubaꞌe daafendeexxeꞌe manbeꞌa hiyya hasissaa? Ifisse.

⁸ Hawaariyaate rerteechchi uduma hedheeka baro. Langake dhibbeesso baroꞌn hexxemmaxxe gubaꞌexxi daafensha manbeꞌa hinannoshsha assitaaxxee? Waawwot. Yesuusi buttateꞌn hedhemma wodda heddo waakkattoole kexxaaxxa haasoꞌeemman. (Mat. 7:21-23; 13:24-30, 36-43) Hawaariya Phawuloosi, Pheexiroosinna Yohaannisi Yesuusi haasoꞌeexxi tinbite muuxema saffeeki keꞌitiinke dhibbeesso baroꞌn kaddeexxa kokeesineen. (2 Tese. 2:3, 7; 2 Pheex. 2:1; 1 Yoha. 2:18) Langake dhibbeesso baroꞌn, Kirsitaaniinxi gubaꞌe dhariinxe barachchonni daafendeen. Waakkattooletiki Kirsitaani keꞌati, butta duuchchixxe dhariinxe addexxe galcha kaddeexxe, Lumoxxe Baabiloonixxe gamo kadeen. Okkone baroꞌn manfasi qullichchiinxe akeetten haasoꞌendeexxi tinbite muuxama alfa saffeen.

9. Noꞌo heꞌnaanneki bari qarike Isiraꞌeelootiinke baronaaꞌninna langake dhibbeessoke Kirsitaaniinxe gubaꞌeke baronaaꞌn gargariti higeeki hittate?

⁹ “Duuchchiinxi yaane haaroꞌmitaa baro.” Noꞌo heꞌnaanneki bari, qarike Isiraꞌeelootiinke baronaaꞌninna waakkattoole kexxemmake langake dhibbeesso baronaaꞌn gargariti hedheeken. Noꞌo heꞌnenneki bari maa hiyyemeꞌe yeꞌemaake? Fuggoxxe yaanen woꞌmiteexxe aadaxxe “muuxamiinxe barruwwa” hine yeꞌa dandeennannon. (2 Ximo. 3:1) Maxaafi Qullichchi, kunni haꞌurtichchinna qeerraaki bari tenne yannaꞌn safeexxa haasoꞌaan. Isinna Mesiychiinxi Mootumma manjiinka belto qulloonsitaa qicoꞌninna butta gennet assitaa qicoꞌn turaake baron. Kunni barinna “yaane duuchchi haaroꞌmitaake baro” hiyyemee yeꞌemaan.” (Huje 3:21) Tinni yanna saffeeki 1914 K.I.U. Okkonne wodda haaroꞌmiteexxi yaane maachcho? Yesuusi iimateꞌn Mootichcha kadeen. Tenneꞌa Yihowwa isoꞌo tukkeesse, addatemeeke Mootichchika Daawitika zuufana dhaalaaka Mootichcha haarooba alfeen. Kaddomaleꞌe, Yihowwa haaroonseeki mootummatixxe galcha callabaan. Shiixxooxxe yanna uduma, qullite mageneeffachcho haaroꞌma saffeen! (Isa. 2:2-4; Hiziq. 11:17-20) Tinni qullitte mageneeffachcho langaxxa daafendaa?

10. (a) Noꞌoke baroꞌn hexxaaxxa qullitte mageneeffachcho uuddaaxxa Maxaafi Qullichchi maa hiyya? (Isayaasi 54:17) (b) Tinni tinbituwwa jajjabbeessitaaxxe kaddeeki mayyete?

¹⁰ Isayaasi 54:17 yaansis. Ateꞌe miidhateꞌe giisineeki “huuni bagedi qababaan”! hitaꞌneexxa tinbite hedde. Tinni manfasiki haasoꞌendeexxi tinbite taꞌixxe yannaꞌn muuxemateꞌn hexxeen. Buttiiꞌn hedheeki gammachchiisaaki yaadinna noꞌoke baroꞌn kadateꞌn hedheen: “Oose atixxi duuchchi, Yihowwanaaꞌn baratteexxe kaddaan, oose atixxiki nageꞌinna birasaꞌaan. Qullummati jabaatteettexxe kadde hundeessendatton. ... Heene yaanenna sodaattaaxxon, ateꞌe raankissaaxxi yaanenna hexxabaan, atibaanna shiqqabaan.” (Isa. 54:13, 14) “Tenne aadake mageno” kadeeki Seexaninna, Yihowwake ardixxa barsiisatixxa huje uurisaaxxa hunna afebaan. (2 Qoro. 4:4) Qullitte mageneeffachcho haaroꞌmiteechchinni kayyiꞌaa, ijjenda dhariinxe barachchonni daafendabaan. Isenna bari bariin qicoꞌn hexxaan. Noꞌoꞌo miidhateꞌe giissemeeki bagedi qababaan!

HIINI YAANE KADDA?

11. Hariiremeeki Kirsitaani iimiꞌa meꞌaa wodda haranga baci ardi hunemabaaxxa addantannoshsha assitaaxxi yaane heente?

¹¹ Hariiremeeki Kirsitaani iimiꞌa meꞌa wodda maachchi kada? Yesuusi allalsanjo noꞌoke kadeexxa qalliyye. Isi Kirsitaaniinxe gubaꞌeke umon. Isinna iitta hiyyeen: “Akeekisanji haꞌnooki mitteken, isinna Kirsitoositen.” (Mat. 23:10) Iimateꞌn galchaꞌneeki Mootichchi noꞌoki Yesuusi, dhugaatixxa hordofooleyye isixxa heqqaan. Yihowwaki belt heqqaammaxxee buttateꞌn hexxeexxi Kirsitoosixxi hordofooleeyye sodaattaanxi yaane hexxebaan. Dhugaaten, eettene yanna Kirsitoosi arda isika hitta akeekaaxxa duuchcha yaane egeneeꞌnon. Tenneꞌa noꞌoꞌo jajjabeessaaka mitte mitte Maxaafi Qullichchiinka fakkeenna uundo.

12. Yihowwa arda isika karkarsee qici hittate? (a) Muuse reyeechchi uduma? (b) Eliyaasiꞌa wele huje uwwendee wodda? (Fakke uudi.)

¹² Isiraꞌeelooti Kakotike Bogibaaꞌa eꞌyebaangi muuse reyeen. Mageniinki ardi maa kadeta? Muuse reyeechchi uduma Yihowwa arda isika gargaara waaleemmaꞌa? Waawwot. Insaꞌne isiꞌa addatemmee qicoꞌn Yihowwa insaꞌneꞌe gargaaraamman. Yihowwa, Muuse reyebaangi edise, Isiraꞌeeloota akekoꞌaa Iyyaasuꞌu mellaashsha ajajeemman. Muusenna tomme wogguwwaꞌa Iyyasu leenjisaꞌn tureen. (Zetsi. 33:11; Zedag. 34:9) Ittan lebendaaxxa, heddi akeekatixxa dandeette afeeki labballuwwi; Kumiinki, dhibbiinki, shantamiinkinna tomiinki sooreessuwwi hedhemman. (Zedag. 1:15) Konne garinni Mageniinki ardi elo qicinni karkarsemaamman. Konneen labaaka Eliyaasika fakkeenna uundo. Isinna tomme wogguwwaꞌa Isiraꞌeeloota qullitte mageneeffachchoꞌn akeekaꞌn tureen. Kaddomaleꞌe, Yihowwa isoꞌo bitaꞌike Yiihuudike bogibaꞌa wele hujeꞌa meꞌaashsha asseemman. (2 Neg. 2:1; 2 Zena. 21:12) Tenneꞌa Isiraꞌeelixxe tomme gosaxxe mootumma giddo hedhemmaki addatemeeki manni hunemeen hiyyotee? Waawwot. Eliyaasi Elisayiꞌi heddo waggaaꞌa leenjisaꞌn tureen. Ittan mitte barachchoti mineꞌn leenjo adhdhitaꞌneexxi “wabeekooletixxi oose” hexxemmaxxa hedheeke jeejanaaꞌn uuda dandeessissaan. (2 Neg. 2:7) Tenneꞌa heddi Mageniinka arda akeeka dandeꞌaaki labballi hedhemman. Konne orinni, Yihowwa yaada isika muuxa ittin ediꞌa sufeemman, ittan addatendeexxa Mageneeffatoole isixxa karkarsaamman.

13. Ibrawiyaane 13:5b teꞌn Yihowwa maa assanno hiyyee kako aagee? (Fakke uudi.)

¹³ Konneꞌe fakkeennuwwa, qalli hiyyat, muuxamiinki hariiremeeki Kirsitaani iimiꞌa adhdhemaa wodda maachchi kada? hitine heddina? Okkone qico manbeꞌa hiyya hasissabaan. Maxaafi Qullichchi addachchiissaaxxa dhugaatixxa yaane haasoꞌaan: Yihowwa buttateꞌn hedheeka arda isika ijjenda hunabaan. (Ibraawiyaane 13:5b yaansis.) Muuseshshanna Eliyaasishshanni, taꞌixxe yannaꞌn akeekateꞌn hexxeexxi hariiremeeke Kirsitaanixxi shiixxooxxi una, wele leenjisa maa laꞌo affeexxa hubatteꞌeen. Heddo wogguwwaꞌa, Iimiki Bisi wele gedhebi giddiiꞌn akeette uutaaxxa dayyuwwa leenjisaꞌn tureen. Fakkeennakeꞌe, geedheteꞌe, rogiinke iimike dooyyaluwwiꞌa, Dame Beeroxxe Komitexxe unaꞌa, Beeteleke iimike dooyyaluwwiꞌa ittan welekeꞌe kadaaka leenjotika barachcho mine orgeesseen. Iimiki Bisi, gargariti hexxeexxa Iimike Bisixxa kiphalluwwiinxa komite qofinni leenjisateꞌn tureen. Kunni kiphalluwwi taꞌanni addatenshat jabaxxa huje hujateꞌn hedheen. Insaꞌnenna Kirsitoosika gedhebo karkarsa ittin ediꞌa sufateꞌe elo qicin qophpheeffanteen.

14. Tenne mariꞌeꞌni umo kaddeexxi beddo heente?

¹⁴ Mariꞌetiki umi yaadi konneten: Lumoke abariki muuxami shiqeeꞌnaꞌa, buttateꞌn gateeki hariiremeeki Kirsitaani iimiꞌa adhdhemaa wodda, buttateꞌn hedheeki Mageniinki ardi, Yihowwaꞌa addatenshati mageneeffata ittin ediꞌaa sufaan. Eetenne yanna, mittunte dadeeki gosooletiki naaphi Magooki Googiki, Mageniinke ardaꞌn miidhama geesisaaxxa egeneennen. (Hiziq. 38:18-20) Kaddoolenna, tinni harumaaxxe yannaꞌn naaphi geesisaꞌneexxi bala qabbabaan, isinna Mageniinki ardi Yihowwaꞌa mageneeffatabaashsha uurisa dandeꞌabaan. Yihowwa arda isika okkone wodda fuggoxxe yaanenaaꞌn gargaaraan! Leellishateꞌn Hawaariya Yohaannisi Kirisitoosike wele gedhebonaaꞌn “haranga baca arda” uudeemman. Yohaannisi kunni “haranga baci ardi” “lumoka abara saꞌe dageeke” kadeexxa haasoꞌeen. (Leellisha. 7:9, 14) Tenneꞌa, Yihowwa insaꞌneꞌe fuggoxxe yaanenaaꞌn gargaareexxa egeꞌna dandeennannon!

15-16. Leellisha Yohaannisixxa 17:14 xxe hundaayyeꞌn, Armaageedooni bagedi wodda, Kirsitoosixxi hariirendeexxi hordofooleeyye maa assita? Tinni yaane jajjabeesitaaki hittate?

¹⁵ Taꞌanna mitti mitti qortumi keꞌa dandeꞌaan: ‘Hariiremeeka Kirsitaana uuddaaxxa maa hiyya dandeesissa? Buttatenaaꞌn iimiꞌa meꞌineechchi uduma hunjaꞌneexxi yaane maachcho?’ Maxaafi Qullichchi konne qortumiꞌa toggichcha kadeeka hiissichcho uwwaan. Isinna tenne buttaxxi polotikiinxi hunna “gedhechchiki welt lolendaaxxa” ifisaan. Insaꞌnenna injifateemaan. Maxaafinna “Gedhechchikinna insaꞌnee injifataan” hiyaan. Isoꞌo gargaaraꞌneeki ayyete? Xiqsetinna “yeꞌemeeri” “mellemeeri”nna addatemeera hite hiissichcho uutaan. (Leellisha Yohaannisixxa 17:14 yaansis.) Kunni manni ayyeera? Reyotenaaꞌn keꞌeeke hariiremeeke Kirsitaanan! Tenneꞌa, lumoke abariki muuxami shiqeeꞌnaꞌa, muuxamiinki buttateꞌn gateeki hariiremeeki Kirsitaani iimiꞌa adhdhemeechchi uduma, insaꞌneꞌa uwwendaaxxe hujenaaꞌn mitte lolaten. Tinninna hittatta manbeꞌa assitaaxxe huje! Hariiremeeke Kirsitaani giddiiꞌn mitti mitti, Yihowwaxxe Naqaashe kadebaa edi darre manjiki lolemaammaken. Weli kinni tenne buttaxxe mootummake sannachchamman. Kaddoolenna, dhugatike Kirsitaana kandeechchi uduma nageꞌiinka ora barante lola waalleꞌeen. (Gela. 5:22; 2 Tese. 3:16) Kaddomaleꞌe, iimiꞌa meꞌineechchi uduma, Yesuusininna isixxe qullitte malaakitenni welt, Mageniinka naapha balleessateꞌe muuxamiinke bagedoꞌn qoodemmaan.

¹⁶ Hedi meen. Buttateꞌn hedheeki mitti mitti hariiremeeki Kirsitaani cimeꞌeen ittan gopheꞌeen. Iimateꞌn hedhateꞌe reyotenaaꞌn keꞌneechchi uduma, hunnaameeyyenna rertabaaxxe manfasiinxe dada kandaammaxxee, Adhallo kadeeke Mootichcha Yesuusi Kirsitoosinni welt lollaan. Armaageedoonike bagedi uduma kinni, Yesuusinni welt manjiinki belt qulliyye kadaashsha gargaarraan. Okkonne wodda insaꞌnenna buttateꞌn hexxeexxe dayyuwwa insaꞌnexxee, qulliyye kandebaa wodda, assinaammaxxe yaane irrancaala hexxeexxa eloxxa yaane assa dandeennaaxxa mammannoxxebaan!

17. Armaageedoonike bagedi wodda, duuchchiinxi Mageniinxi ergantooleeyye nageꞌiki hexxaaxxa egeꞌna dandeennannoki hittate?

¹⁷ Ati wele gedhebonaaꞌnitee? Kaddootole, Armageedooniki bagedi safaa wodda ati maa assa hasissa? Yihowwaꞌn addatanna isi uwwaaxxa akeette hordofa hasissaan. Tenne yaane assinannoki hittate kada dandeetta? Gammachchiissaaxxa Maxaafi Qullichchi iitta hiyyaan; “Giddixxe kuta atixxibaꞌa eꞌyi, hulatanna udumiiꞌn cufedhi, mufetinna saxxaa qicoꞌn heenooxxe yannaꞌa shoom.” (Isa. 26:20) Eettenne yanna iimateꞌninna buttateꞌn hexxeexxi Mageniinxi ergantoleeye nageꞌiki hexxaan. Hawaariya Phawuloosishshanni noꞌonna “mootummanna kaddo, taꞌa hexxeexxi, ediꞌa daggaaxxi hiini yaanenna ... Mageniixxe jaalalanaaꞌn kuta dandeettabaaxxa” addata dandeennannon.” (Roome 8:38, 39) Yihowwa haꞌnoꞌo eeyyaꞌneexxanna ijjenda hunabaaxxa duuchchinii wodda qalliyye!