Saadooqishsha Worboole Kadde

1-2. Saadooqi ayyete? (1 Zeena 12:22, 26-28)

TENNEE yaane hedde. Israꞌeelike duuchchiinge bogaꞌn Daawitiꞌi mootichcha assatee 340,000 labballi fuleen. Sase barraaꞌa, manjiinke haasoꞌiki hafuuri, saadinotixxi faaro, ittan gammashshotiki osoꞌlichchiki aaddi gali, Kebrooni qarqara afendaaxxe rassatixxe kooba qicoꞌn laqisaamman. (1 Zeena 12:39) Okkoo fuleemmak ardi, Saadooqite hinaaka dargaggeessa adda hubateemmachcho fakkaattaꞌnebaan. Kaddomaleꞌe, Yihowwa Saadooqi okkoo hedhemmaxxa egenannoshsha asseen. (1 Zeena 12:22, 26-28 yaansis.) Saadooqi ayyete?

² Saadooqi Kayinaatichcho kadeemmaxxeeꞌe Lumoke Kayinaatichchinni Abiyaataarinni welt hujaamman. Saadooqi Mageniinxi fedhii maachcho kaddeexxa egeꞌnatika beekkuma afeekenna gargariti hexxeexxa qalbeeffachchotixxa dandeette afeemmake leellisha uudaammake manjon. (2 Samu. 15:27) Manni eloka gorsa alfatee Saadooqiba maraamman. Ittan lebendaaxxa isinna worba manjomman. Tenne qoꞌneꞌni Saadooqi worba manjo kadeexxa leellisheeki hittate kaddeexxa barantannon.

3. (a) Yihowwaxxi mageneeffatoole worbooleeyye kadiyyo hasisseeki mayeete? (b) Tenne qoꞌneꞌni mariꞌantaannexxi yaane maachcho?

³ Tenne muuxamiinxe barruwwaꞌni Seexani Mageniinke ardaꞌni geesisaꞌneexxa rakko edi irran caala bussateꞌn hedheen. (1 Pheexi. 5:8) Yihowwa, Seexananna fuggoxxa aada isixxa balleessaa qicoꞌn, worbunteti heqqeꞌnannoke manna kadiyyo hasissaan. (Faaro 31:24) Worba manjo kadati Saadooqi fakkaantannoka sase ora uundo.

MAGENIINXA MOOTUMMA KIPHPHE

4. Yihowwaki ardi Mootumma isixxa kiphatee worba kada hasisseeki mayeete? (Fakke uudi.)

⁴ Noꞌo Yihowwaki ardi Mootumma isixxa woꞌma qalbenni kinphaannen, kaddomaleꞌe iitta assatee worba manna kadiyyo hasissaan. (Mat. 6:33) Fakkeennakee, tenne fuggitte buttaꞌn Yihowwake seerishsha hedhateenna Mootumma isixxixxa gammachchiissaaxxa odo lassatee, worba manna kada hasissaan. (1 Tese. 2:2) Ittan, edi irran caala mittunte baxxaꞌni metaꞌneexxe tenne aada giddo duuchchinii wodda polotikiinxe yaanenaaꞌn oddo goomoreessa kade hedhatee worbunte hasissaan. (Yoha. 18:36) Taꞌixxe yannaꞌn heddi Yihowwaki ardi, polotikiinxe yaaneꞌni eꞌya gophatenaaꞌn yookiin sannachcha kada gophatenaaꞌn kexxeexxa maallaqiinxi rakko geltaꞌneen, ganemaꞌneen ittan usuremaꞌneen.

5. Saadooqi Daawiti kiphatee worba kada hasisseeki mayeete?

⁵ Saadooqi Kebrooni mareemmaki Daawitii mootichcha assatee callammabaan. Isinna okkoo mareemmaki bagediinka iimaanuwwa kaꞌle lolakee qophpheeffateetemman. (1 Zeena 12:38) Daawiti loliinbaa meꞌaa wodda isooꞌo hordofateenna Israꞌeelika arda naaphakenaaꞌn gargaaratee ifi kophpheessedheemman. Okkone qiconna adhetixxa dandeette afeeke manjo kada gophoolenna worba manjo kadeexxa leellisheꞌeen.

6. Daawiti eloka worbuntetika fakkeenna Saadooqiꞌaa leellisheeki hittate? (Faaro 138:3)

⁶ Kayinaatichchi Saadooqi worba manjo kada hasissaaxxa barateeki habaaꞌnite? Isi heddo jabakanna worba labballuwwa egeꞌneemman. Konne mannike fakkeennanaaꞌn barateexxa mammannoxxebaan. Fakkeennakee, Daawiti ‘Israꞌeelii akeekati’ leellisheeki eloki worbuntetik fakkeenni, duuchchiingi Israꞌeelooti woꞌma qalbenni isooꞌo kiphaashsha asseen. (1 Zeena 11:1, 2) Daawiti naapha isika lolatee duuchchinii wodda Yihowwake gargaarsaꞌni addataamman. (Faaro 28:7; Faaro 138:3 yaansis.) Worba manjo kadati Saadooqiꞌaa fakkeenna kadaaki weli labbaluwwinna hedhemman. Kunniirinna Yoodahenna adhallo kadeeki belti isiki, Benayahi ittan annuwwi isikike minenaaꞌn fuleeki Daawitii kiphaammake 22 sooreessuwwan. (1 Zeena 11:22-25; 12:26-28) Kunni duuchchiingi labballi Daawitixxa galcha kiphatee mudhdheekemman.

7. (a) Baro noꞌokeꞌn barachcho alfa dandeennannoki huuni worbuntetiki fakkeennuwwi hedhe? (b) Vidiyotenaaꞌn dayyi Nisiluke fakeennanaaꞌn maa barachcho alfitinee?

⁷ Yihowwaxxa mootumma kipheeke mannika fakeenna hedati, noꞌonna jabakenna worba manna kada dandeennannon. Mootichchi noꞌoki Yesuusi Kirsitoosi, Seexaniinxe polotikiinxe aadaꞌni eꞌyaashsha tirtirsinoolenna tennee yaane jabeenniki injifateen. (Mat. 4:8-11; Yoha. 6:14, 15) Isi duuchchinii wodda Yihowwa isiꞌaa jabeenna uwwaaxxa addataamman. Techchonna wodana ifikee hitaa wodda polotikiinxe yaaneꞌni eꞌya gibbeexxa, eloke fakkeenna kaddaaxxa heddo labbaxxa dargaggeeyye anfeennen. Jw.orgꞌn mitte mitte hedhotika raaga uuddineelenaꞌa?a

DAYYUWWA HAꞌNOOXXA GARGAARRE

8. Geedhe dayyuwwatee gargaarsa assatee worba kada hasissaaki haanote?

⁸ Yihowwaki ardi weliꞌaan weli gargaara eeyyaan. (2 Qoro. 8:4) Kaddomaleꞌe, mitte mitte yanna, iitta hexxeexxa yaane assatee worba manjo kadiyyo hasissaan. Fakkeennakee, bagedi keꞌaaxxa yanna loola okkoneꞌni hexxeexxi geedhe dayyuwwatee jajjabeenni, kiphi ittan manfasiinki yookiin maalakee hasissaaxxe yaaneki gargaarissi hasisaaxxa egendeꞌeen. Geedhe Mageniinke gedhebiꞌaa jaalala affeemmaxxeeꞌe, hedho insaꞌnexxa balateꞌn ibissaꞌneexxe yaane kaddoolenna, hasissaaxxa yaane insaꞌnaa qophpheesitaan. (Yoha. 15:12, 13) Konne orinni, worbuntetika Saadooqika fakkeenna hordoffaan.

9. 2 Samuꞌeli 15:27-29 borressendeeshshanni, Daawiti, Saadooqii maa assaashsha ajajeemma? (Fakke uudi.)

⁹ Daawiti jabaxxe rakko giddo hedhemman. Belti isiki Abiseloomi mootumma isonaaꞌn hunnati adhdhatee hidhateꞌe keꞌeemman. (2 Samu. 15:12, 13) Daawiti rakeexxi Iyyerusaalemiiꞌni fula hasisseemman! Isinna ergantooleeyye isixxa yeꞌeexxi: “Keꞌwe baqanto, kada gophphoole mittikinna Abiseloomixxe anganaaꞌn milinqaaꞌnon!” hiyyeen. (2 Samu. 15:14) Qachcha kenaaꞌn fulateꞌn heꞌneeꞌnaa Daawiti, Iyyerusaalemi gateꞌe Abiseloomi maa assatee hasaꞌneexxa isoꞌn kulaaki manji hasisaaxxa qalli hiyyeen. Tenneꞌaa Saadooqinna wele kayinaate qachchiinbaa hingeen hexxeexxa yaane isoꞌn kullaashsha ergeen. (2 Samuꞌeli 15:27-29 yaansis.) Insaꞌnenna jabaxxa xexxeꞌachcho assa hasissaamman. Daawiti kunni manni assoꞌaa qoreexxi yaane haꞌurtittetenna hedho insaꞌnexxeeꞌe sodaachchissaaxxe yaanemman. Umo ifika calla eeyyaaki, halo abixxaaki ittan hantalcha manjo kadeeki Abiseloomi, Saadooqinna wele kayinaate, Daawitii gargaaratee shoꞌomme isooꞌo toꞌatateꞌni heꞌneexxa egeꞌneele maa assaaxxa hedde!

10. Saadooqinna isini welt hedhemmaki manni Daawitii gargaareeki hittate?

¹⁰ Daawiti hedeexxa yaane assati isooꞌo gargaarraashsha Saadooqinna addatemeeka jaalo isika Kuusii qoreen. (2 Samu. 15:32-37) Daawitike herregishani Kuusi Abiseloomi edo adhdhensha alfeen. Ittan Daawiti lolakee qophpheeffatatee yanna alfaake orinni Abiseloomike sannachiꞌaa gorsa uwween. Konnee yaada Abiseloomiꞌni hasoꞌeechchi uduma herrega isika Daawitiꞌn kulloꞌaa Saadooqiꞌninnaa Abiyaataariꞌni kuleen. (2 Samu. 17:8-16) Erga tenneꞌe lami labballi Daawitiꞌn mare kuleen. (2 Samu. 17:17) Yihowwake gargaarsinni Saadooqinna isinni welti hexxemmaxxi kayinaate, Daawitixxa hedho heqqatee jabaxxa yaane assineen.—2 Samu. 17:21, 22.

11. Dayyuwwa noꞌoxxa gargaarranno wodda, worbunteti Saadooqi fakkaata dandeennannoki hittate?

¹¹ Dayyuwwa noꞌoxxeꞌn bala gelteeꞌnaaꞌa, insaꞌnee gargaarronnaa yeꞌemmannoxxa yanna Saadooqishsha worba manna kandeennexxa leellisha dandeennannoki hittate? (1) Akeette hordoffe. Bala geltaaxxa yanna mittunte eloxxa laꞌo affeen. Loola haꞌnookeꞌn hexxeexxi dame beero uutaaxxe akeetteꞌaa ajajemme. (Ibra. 13:17) Geedhe duuchchinii wodda orga uuteexxe akeettexxe hundaayyeshsha bala geltaaxxa yanna qophpheeffantaaki hittate kaddeexxanna maa assinaaxxa qalli assa hasissaan. (1 Qoro. 14:33, 40) (2) Worbooleeyye kadde, kinni xexxeꞌatte. (Fakke. 22:3) Mitte yaane assati edi darre hedde. Hasissabaaxxe rakkoꞌn eꞌyitinoqqe. (3) Yihowwaꞌn addatte. Yihowwa atiꞌaanna dayyuwwa atixxee qalbe giddixxin hedaꞌneexxa qalli hiyyi. Isi dayyuwwa atixxa nageꞌiki gargaartattoshsha kiphaan.

12-13. Vikteerixxenna Viitaalixxe hedhotixxe barannonaaꞌn maa barattinee? (Fakke uudi.)

¹² Yukireene giddo dayyuwwatee sagalenna wodeꞌe geesisatixxa huje hujjaammaxxa Vikteerinna Viitaali hiyyendaaxxa lame dayyuwwa uundo. Vikteeri “duuchchiinxe bakkaꞌn sagale hansaannan” hiyyeen. “Heddo yanna noꞌoke qarqaraꞌn tokkonsaa wodda lanqaannan. Mitti dayyi massedheemmaxxe sagalenaaꞌn uwween. Tinni sagale heenooxxe yannaꞌaa heddo baꞌlisanoole gargaarteen. Kaamoleteꞌn miya feꞌateꞌn heꞌneeꞌnaa, bonbe darbineexxi noꞌo heꞌneꞌnebaaꞌn 20 meetireke bayyinneꞌni ibbeen. Yihowwa worbunteti dayyuwwa anxa gargaarannoshsha, aneꞌe gargaaroꞌaa barra duuchcha kadhataannan.”

¹³ Viitaali kinni “haranga worbunte hasissaamman. Taakkaa meꞌenneki ori 12 saate turseen. Ora meꞌaannaxxa yanna duuchcha Yihowwabaa kadhataannan” hiyyeen. Viitaali worba manjo kadoolenna xexxeꞌatallokemman. Ittan lebeexxi iitta hiyyeen: “Yihowwa beekkuma uwwaashshanna, mike ifixxa egeꞌnannoshsha gargaaroꞌaa kadhataannan. Kaamole oofaannaki mootumma fedhii uuteeke oraꞌn callamman. Dayyuwwikinna dayyuwwa mittummat hujjaaꞌna uudanno wodda adde anxi jabaatteen. Dayyuwwatinna orakeꞌn gufo kaddaaxxa yaane hoyyitaamman, sagale, seemma, ittan wele gargaarsakee kaddaaxxa yaane bukki assiteꞌe kaamoleteꞌn feetaamman, ora menaannaxxa yanna sagalenna hafuura adhdhinaannoxxa bakka qophpheesitaamman.”

YIHOWWAAꞌA ADDATENDINEESHSHAN HEDHDHE

14. Mitti noꞌo eenaanneki manji Yihowwaa addatemebaangi gataa wodda miidhema dandeennannoki hittate?

¹⁴ Maate noꞌoxxixxe una kadeeki mitti manji yookiin jaali noꞌoki Yihowwaa waalaa wodda yaandanno irran caala noꞌoo yaadissaaxxi heenooxxe rakkuwwan. (Faaro 78:40; Fakke. 24:10) Okkone manjiꞌaa anfeennexxi jabaxxi jaalala iitta hexxeexxa yaane addate adhdha noꞌoꞌn haꞌurtaashsha assitoꞌaa dandeettaan. Iitta hexxeexxi yadissaaxxi yaane ateꞌn geltee? Saadooqiki addatenshatiki fakkeenni atee jajjabeessaan.

15. Saadooqi Yihowwaꞌaa addatemeeshshani hedhatee worbunte hasisseemmaki mayeete? (1 Negisite 1:5-8)

¹⁵ Saadooqiki jaali Abiyaatari addatema gopheemmaxxa yanna, Saadooqi Yihowwaꞌaa addatemeemman. Tinni yaane kaddeemmaki Daawitixxe galchake muuxamaꞌniten. Daawiti reyo shiqeemmaxxa yanna Yihowwa Solomooniꞌaa uwwatee kako ageemmaka zuufana, belti isiki Adonyaasi hunnati adhdhatee woꞌlaaneemman. (1 Zeena 22:9, 10) Eettenee yanna Abiyaataari Adoonyaasii kipheen. (1 Negisite 1:5-8 yaansis.) Abiyaataarinna iitta assati Daawitiꞌaan calla kaddebaangi, Yihowwaanna addatemebaangi gateen! Saadooqi hittee qico yaadaaxxanna adde woxaaxxa heda dandeetatto? Isi 40 wogganaaꞌn caaldaaxxe yannaꞌaa Abiyaataaranni welti kayinaate kadeꞌe hujeen. (2 Samu. 8:17) Insaꞌnenna “dhugaatike Magenika Taaboota” welt dunkaamman. (2 Samu. 15:29) Keꞌitokeꞌn laminiingi Daawitixxa galcha kinpheemman, ittan Yihowwaxxe ergachchoꞌn heddo yaane assineemman.—2 Samu. 19:11-14.

16. Saadooqi addatemeeke kadaashsha gargaarteexxi yaane maachcho kada dandeetta?

¹⁶ Abiyaataari, Yihowwaa addatema gopheexxenna kaddoole, Saadooqi kinni Yihowwaa addatemeeshshan hedhemman. Daawiti Saadooqixxa addatensha ijjenda mame egeꞌnebaan. Daawiti, Adoniyaasi zuufana isika adhdhatee diinateꞌnii hedheexxa dhaqqabeexxa yanna, Solomoonii mootichcha asse hariirateeꞌe Saadooqii, Naataaninna Benayahi melleen. (1 Neg. 1:32-34) Saadooqi Yihowwa addatenshat mageneeffataammake mannin, kunniirinna Nataaninninnaa mootichcha Daawitii kiphaammake wele manninni hedha, jabaataashshanna adde woxabaashsha assiteen. (1 Neg. 1:38, 39) Solomoon mootichcha kadeechchi uduma “Abiyaataarixxe bakkaꞌn kayinaatichcho Saadooqii hariireen.”—1 Neg. 2:35.

17. Mitti eetinaꞌneeki manji, Yihowwaa addatama gophaa wodda Saadooqii fakkaata dandeetinaaki hittate?

¹⁷ Saadooqii fakkaata dandeetinaaki hittate? Mitti eetinaꞌneeki manji Yihowwaa waalaaxxa yanna, haꞌno Yihowwaa addatendineexxa leellishshe. (Iya. 24:15) Yihowwa haꞌnoꞌaa hasisaaka jebeennannaa hunna uwwaan. Isibaa kadhatatinna isooꞌo addatenshat mageneeffataꞌneeke addetike jaaluwwini shiqe hedhat, isoꞌn addattinaneexxa leellishshe. Yihowwa addatensha haꞌnooxxa lummiseꞌe uudaammaxxeꞌe eebisaan.—2 Samu. 22:26.

18. Markoxxenna Sidsaxxe hedhotixxe barannonaaꞌn maa barachcho alfitinee?

¹⁸ Lami dubarri insaꞌneki dhugaatenaaꞌn fuleeka, Markonna Sidsa hinaaka miniinka annanna miniinxa amaka fakkeenna uundo. Marko iitta hiyyeen: “Oose haꞌnooxxa ilendeexxe yannanaaꞌn saffine yoꞌoshsha eetinaan. Insaꞌnee miitaaxxe yaanenaaꞌn heqqatee dandeetineexxa yaane duuchcha assitinaan. Kaddoolenna insaꞌnenna Yihowwaa waallaa wodda yoꞌoshsha yaadissaan.” Ittin sufeexxi: “Yihowwa noꞌon welt hedhemman. Yihowwa ani gophanno wodda miniinxi ama anxi jabaattaashsha, ise gophaa wodda ani jabaatannoshsha asseꞌeen.” Sidsanna lebbeexxi iitta hiteen: “Yihowwa noꞌaa hasisaaka jebeenna uwwa gopheele jebaante ossa dandeennaannabaan. Tinni yaane kaddeeki anxe balleessaniiten hiyye yaadaannaxxeꞌe, tenne yaane Yihowwaꞌn kuꞌlaannan. Shiixxooxxe yanna uduma qeerraaxxe woggaaꞌa uudebeꞌnongi tureennaxxi mitte dayyo anibaa daggeexxi, agooda ankeꞌn anga uggiteꞌe, ille giddo aneꞌe uuddaꞌni iitta hiteen, ‘Sidsa tinni yaane kaddeeki balleessa atixxinnite kaddebaaxxa qalli hiyyi!’ hiteen. Yihowwake gargaarsinni gammashsho anxi baxxebaangi isiꞌaa ergatema itti sufa dandeꞌennen.”

19. Maa assatee mudhiteette?

¹⁹ Yihowwa duuchchiinxi ergantoole isixxi, Saadooqishsha worbooleeyye kaddoꞌaa hasaꞌneen. (2 Ximo. 1:7) Ifike jabeennaꞌn addantonnaa hasaꞌnebaan. Tenneꞌaa irra isoꞌn addantonnaa hasaꞌneen. Jabeenni hasisaake jeeji giddo hexxinaaxxa yanna, Yihowwabaa wirri hiyye. Saadooqishsha haꞌnoonna worbooleeyye assaaxxa kokiinke kada dandeetinaan!—1 Pheex. 5:10.