Bagediinxenna Kaddo Nageꞌinxa Yanna Yihowwa Noꞌoo Jajjabeesseꞌeen

Pawulo: Yoꞌoshsha gammandeennan! Yannatinna Sadaasa 1985 kemman, Dhidhimiinke Afirkibaa, Layibeeriya taakkaaxxe yannaꞌaa miisoonoota kandeꞌe dhaabemme meꞌateꞌni orakeꞌn heꞌnennan. Meꞌinaannaki rophphiyyinna Senegaale uurreen. Aani “mitte saate giddo Layibeeriya gennannon!” hiteen. Okkooꞌni: “Mootumma fonqolchitaꞌneexxi gamo rophphiyyi okkoo ofoꞌlabaashsha kuttaammaxxeꞌe, Layibeeriyaa meꞌaaki manji duuchchi rophphiyyi giddiiꞌn fula hasissaan” hiyyaaki egeꞌnishanji kulemeen. Layibeeriyi giddo rensha manjiinka lumolla kaamoleꞌn feenaꞌneexxanna mootummatinna manji gadho maremaaxxa yanna gabaldeexxa, ittan gadho leelleeka manjo shinnaꞌeexxa haasoottaaxxa odo lanqaꞌni, Senegaale hedheeke miisoonootinni turrennen.

Aani: Noꞌo manji manbeꞌa hiyyaaxxa yaane assatee hansaannake mannabaan. Oosummatenaaꞌninni manji anee “yaritto Aani” hiyyaꞌni yeꞌaamman. Matanga ora qaxxaamuranda yoꞌoshsha sodaataannan! Kaddomaleꞌe, dhaabemmennexxe bakkabaa meꞌatee murteesseꞌneennan.

Pawulo: Aaninna ani ilemmenneki dhidhimiinxe Engilaande giddo kaddaa wodda looli noꞌokixxe oddoꞌni hexxemmaxxi, bayyinniinxi gargarunte saddeeta kilomeetireke callamman. Laminiingi qajeelsano kandenneki langake koobbixxa barachcho birrenneshshanden, hadi anki anee yoꞌoshsha jajjabeessaamman, ittan Aaniinna ama isexxi jajjabeessitaamman. Insaꞌnenna woꞌma yannaxxe ergachchoxxi halcha noꞌoxxi muuxendaashsha, woꞌma qalbenni kinphaamman. Tommenna sallane woggaꞌni Beetele yeꞌemennen, 1982 keꞌni weli aaꞌnennechchi uduma Aani Beeteleꞌaa yeꞌendeen.

Aani: Beetele ergatema eenaannan, kaddomaleꞌe, gargaarsi adda hasisaaxxe bakkaꞌni ergatema yoꞌoshsha hansaannan. Edo miisoonoota kaddeꞌe ergatendeexxeꞌe, Beetele hexxeexxe dayyuwwani huja kinni, halcha noꞌoxxi lebbaꞌni meꞌitaashsha assiteen. Tenne yaane uuddaaxxa sase woggaaꞌa duuchchinii wodda hashsha hashsha kadhantaannan, 1985 woggaꞌni 79 soxxe kutaꞌni Giliyaade barantannoshsha yeꞌemmennexxee yoꞌoshsha gammandeennan! Okkoneechchi uduma Dhidhimiinke Afirki giddo Layibeeriya dhaabemmennen.

DAYYUWWATIXXI JAALALA NOꞌOO JABAANTANNOSHSHA GARGAARTEEN

Pawulo: Layibeeriyaa meꞌaashsha eetii uwwendeeke keꞌitiinke rophphiyyaꞌni gudhunfennen. Okkone bogaꞌni hedhemmaki jeeji jijjiiremeemmabaan, ittan mootumma uggiteemmaxxi yannatixxi gabalanna kexxeemmabaan. Manji sodaꞌatenaaꞌni kexxeexxa keekkatebaangi kaamoletika hafuura laqaa wodda baqataamman! Noꞌonna raankinabeꞌnoshsha faarotika maxaafa duuchchinii wodda hashsha hashsha yaansinsaannan. Kaddoolenna hunjaannaxxa huje qalbe mittenni eenaannan. Aani gadho ergatendaamman, ani kinni Jooni Cherkukinnia Beetelexxa huje hujaannan. Isixxi hedhotixxi baranno, ittan dayyuwwa hexxeeka jeeja uuddaaxxa afeexxi egeꞌna aneꞌe leenjisaashsha isoo gargaarteen.

Aani: Layibeeriya rankeꞌe iitta eenaꞌni menenneki mayeete? Dayyuwwa noꞌoxixxe buutonaaꞌni kexxeexxiniten. Insaꞌnenna jaalala noꞌaa anfeexxa leellinshaamman, ittan adde insaꞌnexxinna jabaxxemman. Insaꞌnenni welti jabaxxa mittunte anfeennaxxee; insaꞌnenna noꞌoke haarooke mini hado kandeen. Gorsi insaꞌnekinna manfasiinxe hedhonni jabaantannoshsha asseen. Lassatixxi hujenna yoꞌoshsha gammachchiissaꞌneexxemman. Ergachchoteꞌni manjiinba mine marreꞌe adda turrebeꞌnongi fullonnole manji mufataamman! Manni orakeꞌn uurre Maxaafi Qullichchiinka qortuma weli qoraꞌni mariꞌataamman. Sholla qicinni martetexxi insaꞌnenni makema dandeettatton. Heddo Maxaafi Qullichchiinxa barattoole anfeennaxxee, duuchchiinxa barasiisatee yanna cuꞌmattaamman. Tinni gammachchiissaaxxe rakkon!

SODAꞌA HEXXOOLENNA JABEENNA ANFEENNAN

Pawulo: Shoole woggaaꞌa, bogi oddichcha nageꞌa alfeechchi uduma 1989 woggaꞌni haranga sodaachchisaaki weliꞌaan weliki bagedi keꞌeen. Mootumma falamaammaki sannachchi Beetele hexxeemmaka loola, Hageeyya 2, 1990 woggaꞌni abideen. Sase agenjiꞌaa gadhi bogaꞌni hedhemmake hadi noꞌokinni, ittan illitte beeronni afemmebeꞌnongi turrennen. Bogakeꞌni adaba baꞌnenna sagaletixxi hanqo hexxemman, ittan dubartetinna daffaarendaamman. Rakko tinni 14 woggaaꞌa ittin suffeexxe kaddaa wodda, tennenaaꞌni kexxeexxa bogi duuchchi miidhemeen.

Aani: Mitte mitte gosa weliꞌaan weli lolendaꞌni weli shiltaamman. Jaba qicinni kaꞌleeki, gargariti hexxeexxa oddoono oddoꞌweeki sannachchi orakeꞌn mammaremaamman, ittan mine mine maraꞌni karra saamaamman. Mitti mitti manni manjo shiya “lukko gorraꞌatishsha” assee uudaamman. Dame beeroꞌaa shiqa hexxeexxe bakkaꞌni lolemaammaki sannachchi, ora saꞌaaka manjo uurrisaammaxxe bakkaꞌni manjiinki renshi tuulemeemman. Konne loolaꞌni, lami miisoonootinna wele addatendeexxi dayyuwwa rerteen.

Yihowwaxxi Naqaashe hedho ifixxa balateꞌni banqarsiteꞌe shorrinaammaxxanna shinnaammaxxa gosa mine ifiba shoxxeemman. Miisoonootinna Beetelooti iittan asseemman. Mitte mitte baqatteemmaxxi Yihowwaxxi Naqaashe Beetele giddo fooqeti butti mineꞌni diiphphaamman, wele kinni fooqeti iima noꞌonni welti hexxaamman. Noꞌo heꞌnaannaxxe kutaꞌni, noꞌonni welti torbaane mitte mine hadixxi una hexxaamman.

Pawulo: Duuchchiinxa barra lolemaammaki sannachchi, Beetele giddo manjo shoꞌneenneshsha uudatee eꞌyatee woꞌlaanaamman. Beetele heqqaꞌneeki shooli manji hedhemman: Lami dallaꞌiinxe hulaba hedhaamman, lami kinni mine hedheꞌe masikootetenaaꞌn gadhiꞌaa uudaamman. Lami dallaꞌiinxe hulaba hedhemmaki manni anga ediꞌaa hiissedhoole duuchchiinxi yaane nageꞌaken hiyyoten. Kaddomaleꞌe, anga insaꞌnexxa duddurokeꞌn uggudhinoole gadho lolemaꞌneeki manni yoꞌoshsha aareexxa kulaake beesisa kademmaxxeꞌe, masikooteteꞌni hexxe gadhiꞌaa uuddaammaxxi dayyuwwa, baqatteꞌe Beetele hexxemmaxxa dayyuwwa rakke shoxxaan.

Aani: Heddo torba uduma yoꞌoshsha aarteexxi mitte loliinxi gamo hunnati giddiꞌaa eꞌyiteen. Ani hula culfennen, mitte dayyo kinni biso ansheꞌnammaxxe kutaꞌn hexxemman, eettene bakkaꞌni seemma uggudhinaaxxe uurrichchiinxe saaxine giddo shiixxooxxi shoꞌommaaxxi bakka hexxemman. Dayyo ittinna okko giddo shoꞌondeen. Loliinka miya kaꞌleeki manni ani hedhennaxxe fooqebaa dageen. Hula noꞌoxxanna hunnati ganganneen. Pawulonna kadhataꞌni, “Anxi miniinxi ama biso anshedhateꞌn hexxeen” hiyyeemman. Shoꞌommaammaxxa bakka hiissineꞌe cunfaa wodda hafuura laqissaamman, ittan seemma uggudhinaammaxxa uurrichchiinxa saaxine bakkateꞌn hiissa kinni qeerraaxxa yanna adhitaaxxe kaddemmaxxee shoꞌomeeki manji hedhaani hineꞌe hendaashsha asitaaxxemman. Tennenaaꞌn kexxeexxa lekkatenaaꞌn umii qicoꞌni roqoonsennen. Hula hitta asseꞌe bananno? Yihowwa anee gargaaraashsha qalbe giddo kadhatennen. Hula banennexxi hexxebaaxxenni ifi abideꞌe insaꞌnee nageꞌa aadhennen. Insaꞌne giddiiꞌn mitti seemma uuggudhinannaxxe uurrichchiinxe saaxinebaa anee dhiibaꞌni saꞌeen, iseenna baneexxi findigeen. Mittechchonna hase afebaan, afa gopha isinxa addateemabaan. Isinna una isixxi wele kutuwwa, ittan mine duuchcha findigaꞌni hanseen. Taꞌanna mittechchonna anfebaan.

DHUGAA IFA ITTIN EDIꞌAA SUFFEEN

Pawulo: Heddo agenjiꞌaa anfeennaxxi sagale heenooxxemman. Kaddomaleꞌe, manfasiinxa sagale gonphe egenneeꞌnon. “Diidhanto” noꞌoxxi Beetelexxe gorsixxe mageneeffachcho callamman, tinni sagale noꞌaa uuteeka giddika jabeenna duuchchiingi saandaannan.

Maalakee kaddaaxxi sagalenna wodeꞌi mudeechcho kadeele, noꞌonna ittan welinna Beeteleeꞌni fulatee gaddachchemmaannan. Tennenaaꞌn kexxeexxa noꞌoba shoꞌomeemmaki manni raya dandeꞌamman. Mitte mitte yanna Yihowwa noꞌaa hasissaaxxa yaane manbeꞌa assaake garinni hasissaaxxe yannaꞌni qophpheessaan! Yihowwa hasissaaxxe yaanenni noꞌoo karkarseen, ittan sodaꞌa injifantannoshsha gargaareen.

Butta dukandaꞌni metaamma wodda dhugaatiki ifini waꞌa hiyyaamman. Dayyuwwinna dayyuwwa noꞌoxxi lubbo gatilsedhatee higge-higgeenni baqattoolenna adde insaꞌnexxinna jabeenni insaꞌneki baꞌeemmabaan. Mitte mitte dayyuwwa “tinni bagediinxi yanna lumoke abari woddiꞌaa leenjissaan” hitaamman. Geedhetinna dargagge dayyuwwa, dayyuwwa gargaaratee worbunteti dandeenneexxa yaane duuchcha assinaamman. Dayyuwwa mittunteti hexxaamman, marteexxe bakkaꞌni lassitaamman, ittan baddaꞌa giddo yannatika bukkiitika galma giissiꞌne mageneeffantaamman. Tenne rakkotixxe yannaꞌni bukkiiteꞌn afemanna welekee lassa adde wonxabaashshanna jabaantaashsha gargaarteen. Insaꞌneꞌaa hasissaaxxa yaane qoondaanna wodda dayyuwwa seemmati irra lassatee kadaaka borsa laqatenaaꞌni kexxeexxa manbeꞌa hinennen! Yaaddoti hangulli hiyyeeki manni gammachchiissaaxxa odo laqaamman. Yihowwaxxi Naqaashe konne jeejin giddo gammaddeexxenna qajeelto uushsho affeexxa kada, insaꞌnee manbeꞌa assitaamman. Insaꞌne tenne dukkana giddo ifina xassinaꞌneeshshatemman! (Mat. 5:14-16) Dayyuwwatixxe eloxxe hinaaffenaaꞌn kexxeexxa, mitti mitti mararte belo manjo adhaammaki manni noꞌoke dayyuwwa kadeen.

QALBE NOꞌOXXA ENQITAAXXI YAANE FUTTI HITEEMMAXXA YANNA YIHOWWA NOꞌO JABEESSEEN

Pawulo: Bogakenaaꞌn sasele harumaaxxe yannaꞌaanna lamele kinni mitte wogga duuchchiꞌaa shorremmeennaxxi yanna hexxemman. Mitte miisoonichcho dayyo haasootteeki yaadi noꞌonna hendaannakemman, isenna iitta hiteen: “Giliyaade baranteenna wodda uwwendeexxa huje qalbe mittenni eenannoshsha baranteennan, noꞌonna iittani assinennen. Kaddomaleꞌe, dayyuwwa noꞌoxxi konne jeejaꞌni hexxeeꞌnaa insaꞌnee waale meꞌa haranga yaadissaaxxe yaanen!” Gammachchiissaaxxa shiqa hedheeke bogaꞌni heꞌnennexxi Layibeeri giddo hujendaꞌneexxa huje gargaara dandeenneennen.

Aani: Ella 1996 woggaꞌn, noꞌo shooliniingi laꞌo afeeki dame beeroki tarjuwwi borreessemeeka woraqatuwwa feeteexxe kaamoleꞌni meꞌatee keꞌnennen. Noꞌonna 16 kilomeetire bayyinneꞌn afemaake nageelichchi qachchibaa meꞌatee hanseennan. Eettene yannaꞌni heꞌnennaxxe bakkaꞌn loli keꞌeen. Mitti aareeki adhalli iimiꞌaa tokkoseexxi noꞌoo uurriseen, noꞌoo sase kaamole giddiiꞌni harkiseꞌe fulcheexxi, Pawulo kaamole giddonni hedheeꞌnaa kaamole oolfaꞌni meꞌeen. Alayyiki dilloonne uurrinenneba gantennen. Dedhangeꞌni Pawulo albakenaaꞌn munde cophphi-cophphi hitaaꞌnaa manjiinxe oddonaaꞌn dageen. Tinni yaane noꞌoo mekki assiteen, noꞌoꞌni xiiteti ganemeechcho fakkaatteen, kaddomaleꞌe xiiteti ganemeele kinni lekkati meꞌammabaan hinennen! Isi mundaꞌeeki mitti adhalli kaamole giddiiꞌn harkisaꞌni ganee woddaten. Gammachchiissaaxxa, mada shiixxooxxemman.

Okkoꞌo yoꞌoshsha sodaateemmaka manna ranbe-ranbe assineꞌe feeneexxi sannachchiinxi kaamole hexxemman. Kaamole giddo uurrinaaxxi bakka hedha gophphemmaxxee gadhi darreeꞌni rarraanennen. Kaamole oofaammaki manjichchi wiinamki ofaammaxxee ibatee shiixxoonba gantennen. Kaamole uurrisaashsha kadhantennen, kaddomaleꞌe isinna uurrisatee sodaateemman. Kadabelo kandeꞌe ittin ediꞌaa sunfennen, kaddomaleꞌe, bisi noꞌoo roqoonseemman, ittan qeerraaxxa yanna rarraaneennaxxee hirre loꞌo hiteen.

Pawulo: Okkooꞌni weliꞌaani weli uundanno wodda seemma noꞌoxxi xurootteemman, ittan daddarendeemman. Lubboti gata noꞌoxxa manbeꞌa hinennen, noꞌoo langa baro Seeraaliyooneꞌaa adhite meꞌitaꞌneexxe, xiiteti ganedeꞌe uꞌurendeexxe helekopiteere bira diidakeꞌn diinphennen. Lubboti gantennexxee yoꞌoshsha gammandeennan, kaddoolenna dayyuwwa noꞌoxxixxi yaane kinni yoꞌoshsha yaadisseemman.

HAAROOXXE HEQQENDEBAAXXE HAꞌURTITTE YAANEꞌAA KADAAKA JABEENNA

Aani: Seeraaliyoone Beetele hexxeeke Firiitawon hiyyemaake qachchaba nageꞌiki gennennen. Dayyuwwatinna elo qicinni noꞌoo karkarsiteemman. Kaddomaleꞌe, Layibeeriya kaddemmaxxi yaane sammo anxibaa daggaꞌni nageꞌa anee kuta saffeen. Duuchchinii wodda mitte yaane kaddaachcho fakkaattaaꞌnaa sodaataannan. Ittan seerikinna hedaannabaan, qarqara ankeꞌni kaddaꞌneexxi yaane duuchchi oojjote aneꞌn labbaamman. Hashsha hashsha rifotenaaꞌn kexxeexxa qiidake daffinni shame-mudeꞌe keꞌaannan, ittan bisinna anee roqoonsaamman. Hafuura adhdhandi aneꞌni haꞌuritaamman. Pawulo anee hanqalfeeꞌnaa welti kadhantaannan. Bisi anee roqoonsa waalaa qicoꞌn Mootummatixxa faaro faarsinaannan. Maraataannechcho aneꞌni fakkaatteemman. Ittan miisoonummatixxa hujenna konneechchi udumiꞌaa huja dandeꞌannochcho labbaammabaan.

Itti-aana kaddeexxa yaane ijjenda dedhabeꞌnon. Eettene torbaꞌni lame borreessiluwwa alfinennen. Mitte Adooleessa 8, 1996 woggaꞌni fuldeexxe Dammaqqe! hitaaxxe borreessilemman. Borreessile tenneꞌninna “Sodaatatto Wodda Maa Assa Dandeettato?” hiyyaaki yaadi hedhemman. Taꞌa iitta sodaataanneki mayeete kaddeexxa egeꞌna dandeꞌeennen. Langaxxi borreessile Ella 15, 1996 woggaꞌni fuldeexxe Heqqecatixxe Xellephomman. Iseꞌninna “Jabeenna Alfineeki Habaaꞌnite?” hiyyaaki yaadi hedhemman. Tenne Heqqecatixxe Xellephoꞌni miidhemeeke billi billaanchiinxi fakke hexxemman. Konne umo yaadaꞌni mitti billi billaanchi jaba qicinni keela miidhemeexxe kaddoolenna, itanna phirri hiyya ittinni ediꞌaa sufammashshanni, qalbe noꞌoxxi giddo jabaxxi yaado hexxoolenna, Yihowwake qullichchi manfasike gargaarisinni wele gargaara ittin ediꞌaa sufa dandeennannoxxa ifisaaki yaadi hedhemman. Tinni haranga hasissaaxxe yannaꞌni Yihowwanaaꞌni alfinennexxe jajjabeesitaaxxe sagalemman. (Mat. 24:45) Qoꞌne assanna weli fakkaataaka umo yaaduwwa mitteba bukki assa anee gargaarteen. Yannati uduma edo kaddeexxe yaanenaaꞌni kexxeexxa sammo anxa diipho kuttaammaxxi yaane baxxaꞌni meteen.

YIHOWWA HAAROOXXA HUJE ADHDHINANNOSHSHA NOꞌAA JABEENNA UWWEEN

Pawulo: Layibeeriyiiꞌni fulle wirri hine hingaannaxxa yanna duuchcha yoꞌoshsha gammandaannan. 2004 woggake muuxami qicoꞌni, konne bogaꞌni 20 wogga geltaaxxe yannaaꞌa ergachchoteꞌni turreennen. Bagedinna uurreꞌeen. Dame beero giddo ijaarsiinki herregi hedhemman. Kaddomaleꞌe, dedhangeꞌni wele bakkabaa menannoshsha erga daggeen.

Tinni haranga noꞌoꞌni haꞌuriteexxe yaanemman. Manfasiinxe maate noꞌoxxinni jabaxxa mittunte anfeennan, insaꞌnenaaꞌni gargariti hinge hitta hedha dandeennano? Hado noꞌoka waallennexxi Giliyaadiꞌaa meneenna wodda, ifi Yihowwaxxe angaꞌni saꞌisse uwwa hittee qico eebbisemmannoshsha assiteexxa uundennaxxeꞌe, haarooxxe bakkabaa meꞌatee fedhiitike kandennen. Tinni haarooxxi dhaaba uwwendeemmaki, shiqa afemaake Gaana hiyyemaake bogaꞌnitemman.

Aani: Layibeeriyiiꞌni fulleenna wodda hiiqqinsee ooꞌneennan. Mitti beekichcha kadeeki woggati lummedheeki Fraanki hiyyemeeki dayyi, haasoꞌeexxi yaane noꞌoo manbeꞌa assiteemman: “Noꞌonni abidendeexxa mitte mitte yaane dhedha hasissaan! Noꞌoo ijjenda deetinabaaxxa egenneennen, kaddomaleꞌe, haꞌnoꞌaa uwwendeexxa haarooxxa huje woꞌma qalbenni huja hasissaan. Huje tinni Yihowwabaaꞌnite kaddemmaxxee, okkoo hexxeexxe dayyuwwaa miꞌlachcho uwwe.” Kunni haasoꞌi heenooki manji calli noꞌoo egeꞌneexxe bakkaꞌninnaa, mitte raaganna anfebeꞌnoxxe bakkaꞌni higgeenni haarooka haꞌuraaka jeeja sanfannoshsha jabeenna noꞌaa uwween.

Pawulo: Kaddomaleꞌe, Gaana hexxeexxe haarooxxe manfasiinxe maatenni jaalooma qeerraaxxa yanna adhitebaan. Okkoonna heddo Yihowwaxxi Naqaashe hexxemman! Itite hedhanna manfasiinxe hedhoka jabeenna uuddaaxxa haarooxxe jaaluwwa noꞌoxxenaaꞌni heddo yaane baranteennen. Okkooꞌni Gaani giddo 13 woggaꞌaa ergatemmennechchi uduma, wele hendebeꞌnoxxi yaane daggeen. Borotike Afirkixxe dame beeroꞌni Keeniya ergatemmannoshsha dhaabemmennen. Edo heꞌnennake bogaꞌni hexxemmaxxa jaaluwwa noꞌoxxa yoꞌoshsha halchinennexxe kaddoolenna, hirbangeꞌni Keeniya afendaaxxe dayyuwwanni jaaloommennen. Ittan taꞌi qicoꞌni gargaarsi adda hasisaaxxe baꞌlaxxe bakkaꞌni ergatemateꞌni heꞌnennen.

SAXXEMMAXXA YANNA

Aani: Saxxemmaxxa wogguwwa heddo alalshitaaxxanna roqonsissaaxxa yaane uudeennen. Bala yookiin yaadisaaki jeejuwwi bisokeꞌn, ittan hedino noꞌoxxeꞌni miidhdhama geesisa dandeꞌaan. Tenne yaanenaaꞌni dandamantenneki masotitebaan. Massaariinxanna midifetixxa tukisse laqanno wodda godobi anee loocci loocci assaamman, ittan anganna dilloottaamman. Kaddomaleꞌe, Yihowwaki gargaarsi ittan dayyuwwatiki kiphi noꞌoo jajjabeesseexxa egeꞌneennen. Manfasiinxe hedho noꞌoxxeꞌaa duuchchinii wodda assaꞌneexxe yaanuwwa darreeꞌni dhaabemmennexxe bakkaꞌni tura dandeennannoshsha Yihowwa gargaaraꞌneexxa uudeennen.

Pawulo: Mitti mitti manni, “Huje haꞌnoꞌaa uwwendeexxa eetinaꞌnee?” hiyye qoraaxxi hexxaan. Bogi heꞌnaannaki danchake yookiin nageꞌa afebaakenna balati woꞌmeeke kada dandeꞌaan. Iitta kaddooleta bogi irran caala eenaannexxi yaane maachcho? Fiixxa kaddeexxe dayyuwwatixxe maaten. Nophphichchi noꞌoki gargariti hedheeke kadoolenna dhugaatixxa hedinotixxa mittunte anfeennan. Noꞌoꞌni, insaꞌnee jajjabeessatee ergemmeennechcho fakkaatteemman, dhugaatishsha hexxoole kinni insaꞌneten noꞌoo jajjebeessineeki.

Mitte bakkanaaꞌni weletibaa minennexxe qixxeꞌni bari noꞌokixxa maso uundaannan: Tinninna dayyuwwummatixxe mittuntemman. Gubaꞌetixxe una kandenne qicoꞌni, mitte maatenna mitte mine anfeennen. Yihowwaꞌni addata ittin sunfaannexxe kaddoole, hiini yaanenna noꞌoꞌni geltoolee ossinannoshsha noꞌaa jabeenna uwwaaxxa addantaannen.—Filph. 4:13.