Dargagge Dayyuwwa—Galfatteexxe Kirsitaana Dubarte Kadde

1. Galfateeke Kirsitaana kadateꞌe maa assiyyo hasissa?

MITTE anno rakke nophphite lumolla kadda wodda manbeꞌa hinannon. Kunni nophphichchinna wiinameeke kadeechcho fakkaattan. Kaddomaleꞌe, galfateeke Kirsitaana kadatiki nophphichchi kinni iitta wiinamaan hiyyotebaan.b (1 Qoro. 13:11; Ibra. 6:1) Tenne bakkaꞌn geyateꞌe, ifixxe kaddeexxa jabaxxa firunte Yihowwani welt afiyyo hasissaan. Mageniinkika adaba nossedhateꞌe, laꞌo affeexxa dandeette afateenna ediꞌa hexxexxe maganneꞌa qophphefataateꞌe manfasi qullichchi hasisaan.—Fakke. 1:5.

2. Dadatika maxaafa 1:27, naaꞌn maachcho barantano? Tenne barachoꞌn maachcho uundanno?

² Yihowwa manjo dadeeki labbakenna meyyake asseeten. (Dada. 1:27 Yaansisi.) Labbakinna meyyaki bisiinxa gargarunte anfemmashshan ittan wele orinninna gargarunte anfeexxi egeꞌnendeexxen. Fakkennakeꞌe, Yihowwa meyyakanna labbaka dadeeki gargariti hexxexxa huje hunjaashshaten, tenne insaꞌnaꞌa uwwendeexxa huje hunjaashsha gargaaraaka adabuwwanna dandeette afa hasissaan. (Dada. 2:18) Tenne barachoꞌn, mitte dargaggeette dayyo, galfatteexxe Kirsitaana dubarte kadateꞌe maa assa dandeettaaxxa uundannon. Itti aandaaxxe barachchoꞌn kinni, dargagge dayyuwwi maa assa dandeꞌaaxxa uundannon.

MAGENIINKIKA ADABA NOSSEDHDHE

3-4. Dargagge dayyuwwa hordoffaaka eloka fakkeenna habaaꞌn alfa dandeetta? (Fakke uud.)

³ Maxaafi Qullichchi heddo dubarte Yihowwaꞌa eetammaxxanna isiꞌa ergatendaammaxxa kulaan. (Jw.org teꞌn “Maxaafi Qullichchi Giddo Kulendeexxe dubartenaaꞌn—Maa Barantano?” hiyyaꞌneeka yaada uud) Insaꞌnenna, barachcho hundeessendeexxi xiqse haasotaꞌneeshshani, “galdumiki miketike”nna “duuchchiniinxe yaaneꞌn” addatemmeeramman. Itti lebeendaaxxa, galfatteexxanna fakkeenna kaddaaxxa, Kirsitaana dubarte dayyuwwa gubaꞌe haꞌnoonxi giddo afa dandeetinaan.

⁴ Dargagge dayyuwwa, fakkeenna insaꞌneeka hordofa dandeetinaaxxa galfatteexxa Kirsitaana dubarte gargarit hiissitineꞌe egendineelenaꞌa? Eloka adaba insaꞌneka miꞌlachchoti hubatte. Okkooꞌn insaꞌneꞌe hitta fakkaata dandeetinaaxxa hedde. Itti aanaake deeruwwaꞌn galfatteexxe dubarte kadateꞌe haranga hasissaaka sase adabuwwa uundannon.

5. Ifi heeshshi assa galfatteexxe Kirsitaana manjoꞌa hasisseeki mayeete?

⁵ Ifi heeshshi assa galfateeke Kirsitaana kadateꞌe haranga hasissaxxe yaanen. Mitte umo ifika heeshshi assitaaxxi manjo, Yihowwaninna manjiki affeexxe eloxxe jaalunteꞌn gammaddaan. (Yaꞌiqo. 4:6) Fakkeennakeꞌe, mitte Yihowwaꞌa eetaaxxi manjo anni iimatiki iseki qophphesseeka umummatika seera ifi heeshshi assati kiphphaan. (1 Qoro. 11:3) Kunni hundaayyet seeri gubaꞌeteꞌninna kaddo mine hujeteꞌn hanna hosaaken.c

6. Dargagge dubarte ifi heeshshi assa uudaxxa Ribiqanaaꞌn maachcho barata?

⁶ Ribiqaka fakkeenna meen uundo. Isenna hedho isexxeꞌn eloxxa murte assexxaammaxxe qalbammeettenna worba manjomman. (Dada. 24:58; 27:5-17) Kaddoleenna, wele ulfeesitaammaxxenna hirendaammaxxen. (Dada. 24:17, 18, 65) Atinna Ribiqashshaan ifi heeshshi assite Yihowwaxxa qophphe kiphphattexxe kaddolee, mini hadi giddonna kaddo gubaꞌe giddo eloke fakkeenna kaddatton.

7. Dargagge dayyuwwa mike ifixxa egeꞌnat Asiteeriꞌi fakkaata dandeetaaki hittate?

⁷ Mike ifixxa egeꞌna Galfateeke Kirsitaana kadateꞌe hasisaake wele adaban. Maxaafi Qullichchi “mike ifixxa egeꞌneeraꞌni beekkumi afemaan” hiyyaan. (Fakke. 11:2) Asteeri mike ifixxa egendeexxenna Magenokeꞌe adatendeexxe manjomman. Mike isexxa egeꞌna mitte yaane bakka saxxe hujjabaashsha gargaarteꞌeen. Isenna lumoke dayyi isekika gorsa laqqeexxi ajajendeen. (Aste. 2:10, 20, 22) Atinna eloka gorsa qodhdhatinna hujeteꞌn hana hosisat mike ifixxa egendeettexxa leellisha dandeetatton.—Tiito 2:3-5.

8. 1 Ximootwosi 2:9, 10 xxe hundaayyeshshan, mike ifixxa egeꞌna, Mitte dayyo seeriinxa seema oddowwitashshanna umo seerki abixxitaashsha gargartaaki hittate?

⁸ Asteeri mike ifixxa egendeexxa leellisheeki weli orinna hedheen. Isenna “bifati danchatenna dhaggati eldammaxxen,” kaddooleenna seerbelo manniinxa miꞌlachcho butattaamabaan. (Aste. 2:7, 15) Mitte Kirsitaana kaddeexxi manjo Asteerke fakkeeninaaꞌn laꞌo alfa dandeettaaki hittate? Mitti ori 1 Ximootwosi 2:9, 10. (Yaansis.) keꞌn ifisemeen. Hawwaarya Phawuloosi Kirsitaana kaddeexxi dubarte mike ifixxa egeꞌnatinna qalbefanniki oddoꞌwati, ifi seefantaashsha akeette uwweemman. Tinni Girketixxi hiyya, Kirsitaana kaddeexxe dubartexxi oddoono ulfiniinxenna, weli manjixxe ushshoꞌa ulfinna affeexxa leellishshaaxxe kaddeexxa kuldaaxxen. Galfatteexxe Kirsitaana dayyuwwaxxi oddoono miketixxe kada hittatta gammachchiissaaxxe!

9. Abigaꞌeelike fakkeennanaaꞌn maa barantanno?

⁹ Qalbeefanni duuchchiininxi galfatteexxi kirsitaani dayyuwwa leellisha hasissaake adaban. Qalbeefanni maachcho? Eloxxe murten. Tinninna eloxxenna elobaaxxe kaddeexxa yaane gargarit hiissineꞌe, eloxxe kaddeexxa yaane melledhatixxe dandeetten. Abigaꞌeelika fakkeenna meen uundo. Iseki miniinki anni mini hado duuchchaꞌn jabaka miidhdhama geesissaaxxa elobaaxxa murte assemman. Aabigaꞌeeli kinni hirbangeꞌn tarkaaffe adhdhiteen. Isexxe eloxxe murtenaaꞌn kexxeexxa heddo manjiinxi lubbo gargaarendeen. (1 Samu. 25:14-23, 32-35) Qalbefanni haano haasonannoxxanna haano sammi hinannoxxa egenannoshsha gargaaraan. Ittan weli manjiꞌa hendaannexxa leellinshanno wodda mike noꞌoxxa heqqeꞌnannoshsha gargaaraan.—1 Tese. 4:11.

LAꞌO AFFEEXXA DANDEETTE NOSSEDHDHE

10-11. Adda yaansisanna borreessa barata atiꞌanna kaddo welekeꞌe laꞌo affeeki hittate? (Fakke uud.)

¹⁰ Mitte kirsitaana, kaddeexxi dubarte laꞌo affeexxa dandeette nosseca hasissaan. Mitte dubarrichcho oosummandeꞌn hexxeꞌe mitte mitte dandeette baratteexxe kaddoole hedho isexxe duuchchaꞌn laꞌonfattaan. Heenoka fakkeenna uudi.

¹¹ Adda yaansisanna borreessa barati. Mitte mitte aadaꞌn dubarte yaansisanna borreessa barata okkone qico laꞌo affeexxe yaanesha uudendabaan.d (1 Ximo. 4:13) Kaddomaleꞌe, tinni Kirsitaani duuchchiꞌa hasissaaxxe dandeetten. Tenneꞌa hiini yaanenna yaansisanna borreessa baratabexxoshsha gufo kadoꞌa waaldoxxe. Tinni yaane atiꞌa maa laꞌo affee? Dedha tinni dandeenne huje alfitattoshsha gargaara dandeettaan. Mageniinxe qaaleexxe barattonna barsissaanjo kaddattoshshanna gargaartaan. Duuchchiniinxi iimi darre, yaansisse alalchitetteexxe qixxeꞌn isibaꞌa shiqqattoshsha assitaan.—Iya. 1:8; 1 Ximo. 4:15.

12. Fakkeenna 31:26 yaada weliki elo garin jijjjiidhdha dandeetattoshsha gargaraaki hittate?

¹² Yaada welik jijjiidhatixxa eloxxa dandeette nossedhi. Kirsitaani eloke kadeeke garin weliki yaada jijjiidhdhiyyo hasissaan. Tenneꞌe uuddaaxxa Yaꞌiqoobi eloka gorsa noꞌaa uwween, iittanna hiyyeen: “Manji duuchchi laqateꞌe muddameekenna haasoꞌateꞌe uduꞌmeeke kada hasissaan.” (Yaꞌiqo. 1:19) Weli mani haasoꞌa wodda hubannoti laqqaatole, rakko insaꞌneexxa ifixxisha assite uuddaatexxanna, “dayyumummatixxa jaalala affeetexxa” leellishshaton. (1 Pheex. 3:8) Mitti manji haasoꞌeexxi yaane ateꞌn aaga gophphoole, hasisaaka qortuma qori. Okkooꞌn haasoꞌati edi darre hekki hite hedi. (Fakke. 15:28, le.ka.qa.) Ifi iitta hite qori: haasoꞌaannexxi yaane dhugaatixxenna jajjabeesitaaxxe? Haasoꞌaannexxi yaane ulfinnanna shaqqunte afeennexxa leellishshaaxxee? Elo qicin haasottaaxxe galfatteexxe dayyuwwanaaꞌn elo qicin haasoonna qico barat. (Fakkeenna 31:26 yaansis.) Insaꞌne haasonnaꞌne qico hubat. Tenne dandeette elo qicin baratottole weli manjinni sholla qicin jaalo kada dandeetatton, insaꞌneninna nageꞌiki hexxatton.

13. Mine seeriki abixxinaa qico barata dandeetattoki hittate? (Fakke uud.)

¹³ Mine abixxitatto qico barat. Heddo bakkaꞌn dubarte, gargarit hexxeexxa mini giddixxa huje hujjaan. Ama atixxi yookiin dandeette affeexxi dayyo iitta hexxeexxa dandeenne baratattoshsha dedha gargaaroꞌa dandeennaan. Sindi hiyyendaaxxi dayyo: “Ama aniꞌa uuteexxe uwwa giddiiꞌn mitte, Jabaate hujati gammashsho alfanno qico barsiisaten, sagale raꞌissa, mine caꞌaa assa, seemma goba, dikko mara barata hedho anxa shollaxxe assiteen, ittan Yihowwaꞌa ergatemateꞌn caaldeexxa yaane assannoshsha ora aniꞌa bandeen. Ittan keesumma keesunsanno qiconna barsisseen, tinninna dayyuwwikinna dayyuwwat afemannoshshanna eloka fakkeenna insaꞌneeka hordofannoshsha gargaarteꞌeen” hiteen. (Fakke. 31:15, 21, 22) Bareddo kaddeexxi keesumma adhdhitaaxxinna mine iseka seeriki abixxa egendeexxi manjo, mine isekeenna kado gubaꞌeteꞌe eloxxa laꞌo affeen.—Fakke. 31:13, 17, 27; Huje 16:15.

14. Kirsitaalinaaꞌn maachcho barateette? Maachchokeꞌn miꞌlachcho assa hasissa?

¹⁴ Ifi dandeꞌa barat, ifi dandeꞌa duuchchiniing Kirsitaani barata hasissaaxxe eloxxe yaanen. (Filph. 4:11) Kirsitaal hiyyeendaꞌneexxi dayyo iitta hiteen: “Hadi anki laꞌo affeexxa dandeette baratannoshsha langake kobbike barachchot mineꞌn baratannoxxa barachcho mellat aneꞌe gargaareꞌeen. Anni anki maallaqa abixxinaa qico barsiissaaxxa barachcho baratannoshsha jajjabeseen, tinninna tennete hinabaaxxa laꞌo alfanoshsha assiteen.” Itti lebendaaxxa eloxxa dandeette barata huje alfitattoshasha gargaartammaxxeꞌe baajite fulchinnaa qiconna abixxinna qico barata hasissaan. (Fakke. 31:16, 18) Affeeteexxe yaaneꞌn ititte hedhati, shollaxxa hedho akeekatinna hasisabaake liqaꞌn eꞌya gophati, manfasiinxe hedhoni geyateꞌe hassaatteba miꞌlachcho assi.—1 Ximo. 6:8.

EDIꞌA HEXXEXXE MAGANNEꞌA QOPHPHEEFAT

15-16. Heerundebaaxxi dayyuwwa welekeꞌe laꞌo affeeki hittate? (Marqoosi 10:29, 30)

¹⁵ Manfasiinka adabuwwanna eloxxa dandeette nossexxotole, ediꞌa hexxexxe maganneꞌa eloxxa dandeette affeette hiyyoteen. Maa assa dandeetattoxxa leellishaaka heenoka fakkeenna uundo.

¹⁶ Heenoxxe yannaꞌa qoola kadde hedha dandeetatton. Mitte mitte dubarte aada insaꞌnexxeꞌn heerummebaang hedha eeyendaꞌnexxe kada gophphoolenna, Yesuusi hiyyemmashshani heeruma gophateꞌe murte assexxeen. (Matwo. 19:10-12) Weli kinni heeruma gopheeki gargarit hexxeexxe buuton kada dandeettaan. Yihowwanna Yesuusi qoola Kirsitaana tuffantaꞌnebaaxxa addatte. Butta duuchchaꞌn hexxeexxi heerundebaaxxi dayyuwwa gubaꞌe giddo eloke fakkeenna kandeꞌneen. Tinni Kirsitaani dubarte, welekeꞌe anfeexxi jaalalanna qalbe giddixxinni weleke heda, insaꞌnexxi heddo Kirsitaanaꞌa manfasiinxe amanna manfasiinxe dayyuwwa kandaashsha assiteen.—Marqoosi 10:29, 30 yaansis; 1 Ximo. 5:2.

17. Mitte dargaggeette dayyo, woꞌma yannaxxe ergachchoꞌn qoodemateꞌe taꞌanni qophpheefata dandeetaaki hittate?

¹⁷ Woꞌma yannaxxe erganto kada dandeetatton. Kirsitaana kaddeexxi dubarte butta duuchchaꞌn assendaꞌneexxe lassatixxe hujeꞌn konnete hinabaaka gargaarsa assitaꞌneen. (Faaro 68:11) Woꞌma yannaxxe ergachoꞌn qoodemateꞌe qixxeefata dandeetatto? Dedha qajeellisaanjo kadde fedhiitixxe ijaarsiinxe hujeꞌn yookiin Beeteele ergata dandeetatton. Tenne bakkaꞌn geyateꞌe Yihowwabaꞌa kadhati. Tenne bakkaꞌn geyeeka mitte manjo haasoosi, atinna herregga atikeꞌn geyateꞌe maa assiyyo hasissaaxxa hedi. Dhugaatixxa qixxeeffachcho assedhi, herreggaateba geltottole Yihowwaꞌa ergata dandeetattoxxi heddo hula atiꞌa banendaan.

18. Mitte dayyo ediꞌa miniinke anna iseke kadaaka manjo xexxeꞌachchoti fiꞌla hasisseeki mayeete? (Fakke uud.)

¹⁸ Dedha heerumateenna melledha dandeetatton. Iimiiꞌn mariꞌantenneki adabinna dandeette, eloxxe miniinxe ama kada dandeetattoshsha gargaaraan. Dhugaaten, heerumateꞌe hassaattole, bultetike jaalo kadaaka manjo haranga xexxeꞌachchoti fiꞌla hasissaan. Tinninna hedho atixxeꞌn assitattoxxe heene murtenaaꞌninna haranga gargarit hexxeexxen. Ati heerundaateki manji umo atike kadaaxxa qalli hiyyi.(Roome 7:2; Effe. 5:23, 33) Tenneꞌa ifi iitta hitte qori: ‘Isi galfatee Kirsitaana? Hedho isixxeꞌn manfasiinxa yaane edisaꞌnee? Eloxxa murte assedhaꞌneekee? Balleessa ifixxa adataꞌneeke? Dubarteteꞌe ulfinna afeekee? Anxa manfasiinxa, maaliinxanna irriinxa halcha wonshatixxa dandeette afee? Maganne uwwendeexxa seeriki abidaꞌnekee? Fakkeennake gubaꞌe giddo maa huje afee? Tenne huje abidaꞌneeki hittate?’ (Luqa. 16:10; 1 Ximo. 5:8) Dhugaateen eloka miniinka anna hassaattole atini eloxxe miniinxe ama kada hasissaan.

19. “Gargaarsanjo” kadatixxi baalle ulfessendeexxe kaddeeki mayeete?

¹⁹ Maxaafi Qullichchi eloxxi miniinxi ama miniinke anna isekeꞌe “gargaarsaanjonna” “xeꞌya isixxa wonshitaaxxe” kaddeexxa haasoꞌaan. (Dada. 2:18) Tinni iseꞌe tuffachchiissaaxxe hiyya? Waawwoti! Miniinxi ama gargaarsanjo kadatixxi huje ulfesseendeexxen. Maxaafi Qullichchi Yihowwani “gargaarsaanjo” kadeexxa heddo bakkaꞌn haasoꞌaan. (Faaro 54:4; Ibra. 13:6) Miniinxi ama miniinka anna kiphpha woddanna mini hadiꞌaa eloxxa murte assaashsha gargaarta wodda dhugaatixxe gargaarsaanjo kaddeexxa leellishshaan. Buutotinna Yihowwa eeyyitaammaxxeꞌe iseke miniinke anniki eloki adabi wele manjoꞌn leellaashsha assitaan. (Fakke. 31:11, 12; 1 Ximo. 3:11) Tenneꞌe ediꞌa hexxeexxe maganneꞌa ifi qophpheesseedha dandeetattoki Yihowwan affeettexxa jaalala jabeessedhatinna minni giddonna kadde gubaꞌeteꞌn eloxxe gargaarsaanjo kadatiten.

20. Mitte ama mini giddo hiini eloxxi yaane hexxaashsha assa dandeetta?

²⁰ Ama kada dandeetatton. Heerundetechchini udumaa atinna miniinki anni atiki dedha oose ila dandeetinaan. (Faaro. 127:3) Tenneꞌa eloxxe ama kadateꞌe maa assiyyo hasissaaxxa heda eloxxen. Tenne barachchoꞌn mariꞌantenneki adabuwwinna dandeetuwwa miniinxe ama kaddattoshsha ateꞌe gargaaraan. Jaalala, ellenna ossunte atixxi, mini giddo gammashsho hexxaashshanna oose atixxi nageꞌikinna jaalalati hexxaashsha assitaan.—Fakke. 24:3.

21. Dayyuwwa uudaxxa noꞌoꞌn maachchi laqemaꞌne? Mayee? (Gogakeꞌn hexxeexxa fakke uud.)

²¹ Dayyuwwa, Yihowwanna kaddo, arda isike duuchchiꞌa assitinaꞌneexxe yaane duuchchiꞌa yoꞌoshsha eenaannen. (Ibra. 6:10) Haꞌnoonna manfasiinka adabuwwa nossecateꞌe hedho haꞌnooxxenna welekeꞌe laꞌo affeexxa dandeette nossecateꞌe, ittan ediꞌa adhdhitinaꞌneexxe maganneꞌaa kophpheefatateꞌe jabaxxe woꞌlaancho assitinaꞌneen. Haꞌnoꞌo Yihowwaxxe orga giddo lumoxxe bakka affineen!