Dargagge Dayyuwwi—Galfateeke Kirsitaana Labballo Kadde

1. Mitti Kirsitaani manji, isiꞌa qabboꞌa maa assa hasissa?

MOOTICHCHI Daawiti Selemooniꞌi: “Jabaat, labballo kadi.” hiyye gorseemman. (1 Negis. 2:1-3) Duuchchiniing Kirsitaana kadeeki labballi taꞌixxe yannaꞌn konne gorsa hujeteꞌn hosisateꞌe eloxxa woꞌlaancho assaꞌneen. Konne garinni insaꞌneꞌa qabboꞌa hansaꞌnoole, Mageniike seeriꞌa ajajema baratanna Maxaafi Qullichchiinka hundaayyetika seeruwwa hedho insaꞌneexxe duuchchaꞌn hujeteꞌn hosissiyyo hasissaan. (Luqa. 2:52) Dargagge dayyuwwi galfateeke Kirsitaana labballo kada laꞌo affeeki mayeete?

2-3. Mitti Kirsitaani dayyi, galfateeke Kirsitaana kadda hasisseeki mayeete?

² Mitti Kirsitaana kadeeki labballi mini giddonna ittan gubaꞌe giddo laꞌo affeexxa yaane hujaan. Dargaggeeyye dayyuwwa, ediꞌa baalle afa dandeetinaaxxa heddinaaxxe kaddeexxi egeꞌnendeexxen. Dedha woꞌma yannaxxe ergantoole kadateꞌe, gubaꞌeetixxe ergantoolenna geercho kadateꞌe heddinaaxxi hexxaan. Aadhateenna oose iꞌlateꞌe dedha hassinaaxxinna hedha dandeettan. (Effe. 6:4; 1 Ximo. 3:1) Yaane qabboꞌanna konne herregaꞌn geyateꞌe hassinaꞌnoole galfatineeke Kirsitaana kadiyyo hasissaan.b

³ Galfatineeke Kirsitaana kaddinaashsha haꞌnoꞌo gargaartaaxxi yaane maachcho? Nossecca hasissaaxxi laꞌo affeexxi dandeetuwwa hexxeen. Ediꞌa haꞌnoꞌo heqqitaꞌneexxa huje qabee garinni hujateenna qophpheefatateꞌe taꞌa maa assa dandeetinna?

GALFATEEKE KIRSITAANA KADATEE HASISSAAXXA TARKAAFUWWA

4. Hordofa dandeetinaaka eloka fakkeenna habaaꞌn alfa dandeetina? (Fakke uud.)

⁴ Hordoffatoka eloka fakkeenna melledhi. Maxaafi Qullichchi giddo dargaggeeyye hordoffaaki elok fakkeenni hedhen. Edixxe yannaꞌn kunni manninna, Mageno eeyyamakenna arda isike garigariti hexxeexxa eloxxa yaane assat karkarsaamakemman. Atinna eloke fakkeenna kadaaka galfateeka Kirsitaana manjo mini hadi giddiiꞌn ittan gubaꞌe giddiiꞌn alfa dandeetatton. (Ibra. 13:7) Yesuusi Kirsitoosina atiꞌa eloke fakkeenna kadaan. (1 Pheexi. 2:21) Fakkeennuwwa konne qoꞌnissatto wodda ife leellaꞌneeke adabuwwa insaꞌnekeꞌn miꞌlachcho assi. (Ibra. 12:1, 2) Okkooꞌn konne manjo fakkaattatoki hittate kaddeexxa murteessedhi.

5. Yaane qeerrise hedatixxa dandeette nossedha dandeetinaaki hittate? Tinni laꞌo affeeki mayeete? (Faaro 119:9)

⁵ “Yaane qeerrise hedatixxa dandeette . . . heqqedhi” ittan nossedhi. (Fakke. 3:21) Mitti qeerrise hedatixxa dandeette afeeki manji mitte yaane assati edi darre xexxeꞌachchot hedaan. Tenneꞌa iitta hexxeexxa dandeette afateenna jabeessedhateꞌe jabaxxa woꞌlaancho asse. Mayee? Buutotinna taꞌixxe yannaꞌn buttateꞌn hexxeexxi dargaggeeyye murte assexxaꞌneeki ifike yaadishsha yookiin isaꞌneꞌn fakkaatteenshan kaddemmaxxeeten. (Fakke. 7:7; 29:11) Ittin lebendaaxxa, miidiyikinna, heddinaꞌneexxenna assitinaꞌneexxe yaaneꞌn jabaka miiccama geesisa dandeꞌaan. Yaane qeerrise hedatixxa dandeette afa dandeetattok hittate? Maxaafi Qullichchiinka hundaayye seera barata safi, ittan tinni yaane laꞌo affeeki mayeete kaddeexxa hedi. Okkooꞌn Yihowwa gammachchiissaaxxa murte assedhateꞌe konne hundaayye seeruwwa laꞌonfat. (Faaro 119:9 yaanisi.) Tenne laꞌo affeexxa dandeette nossexxotole, galfateeke Kirsitaana labballo kadateꞌe lumoxxa tarkaaffe adhdhitatton. (Fakke. 2:11, 12; Ibra. 5:14) Qeerrise hedatixxi dandeenne konne lame orinni atiꞌa laꞌo affeeki hittate kaddeexxa hedi: (1) dayyuwwati shinqannoke orinni ittan (2) oddoonoteꞌninna seefachchoteꞌn assexxaatexxe murteꞌn.

6. Yaane qeerrise hedatixxi dandeette, mitti dayyi dubarte dayyuwwaꞌa ulfinna leellishaashsha gargaartaaki hittate?

⁶ Qeerrise hedatixxi dandeette dubarteteꞌe ulfinna leellishshattosha gargaartaan. Mitti dargaggeessi dayyi, mitte Kirsitaana kaddeexxe dayyoni shiqateꞌe hasa, deettitetenna seerinxen. Kaddomaleꞌe, mitti yaane qeerrise hedatixxa dandeette afeeki dargaggeessi, buliitixxe jaalo isixxe kaddoꞌa hasaꞌnebaaxxa mitte dayyo, iseꞌa jaalala afeexxa fakkeesaake orinni haasoossa, borreessa yookiin heene yaanenna assa seerakebaan. (1 Ximo. 5:1, 2) Mitte dayyo aadhatee kadhataꞌneexxe kaddoole, manji hedhebaaba insaꞌne lami calli qofitti hedha gophat summi isek xuroꞌabaashsha assaan.—1 Qoro. 6:18.

7. Mitti dayyi seemma oddoꞌwaxxa fiꞌlaa woddanna umo abixxaa qico qeerrisse hedatixxi dandeette gargrtaaki hittate?

⁷ Mitti dargaggeessi fayyaxxa qeerrise hedatixxa dandeette nossedheexxa leellishaaki mitti ori, oddoonotinna umo fiꞌlaꞌneeke garinni eloxxa murte assedhatiten. Faashine seemmatixxa gissaꞌneekinna egeꞌnishaꞌneeki heddi manni, Yihowwaꞌa egeꞌnekebaan yookiin hedho insaꞌnexxa Yihowwa ulfinna afeeke orinni akeekaꞌnekebaan. Insaꞌnexxi seeri beloxxi hedino haranga mexxi hiteexxa yookiin labballonga meyyaxxe fakkeesitaaxxa seemma hunjaashsha assitaan. Mitti kirsitaanummatixxe galfachchoꞌn hedheek dargaggeessi, oddoꞌwaaxxa seemma fiꞌla wodda Maxaafi Qullichchiinke hundaayyetike seerininna gubaꞌe giddo uudaꞌneeke eloke fakkeenninni akeekemaan. Iitta hiyye ifi qora dandeꞌan: ‘Filanno anxi fayyaxxa hedino afeennexxanna welekeꞌe hedaannexxa leellishshaaxxe? Oddoono anxi, weli manji sholla qicoꞌn ani Magenokeꞌe ergatemateꞌe ifi mudhdheenneke manjo kedeennexxa addataashsha assitaaxxe?’ (1 Qoro. 10:31-33; Tiito 2:6) Mitti qeerrise hedatixxa dandeette afeeki dargaggeessi dayyuwwatanna dayyuwwa calla kaddebaangi iimatika anna isikanna ulfeesisaan.

8. Mitti dargaggeessi dayyi addatemeeke kada barata dandeꞌaa qici hittate?

⁸ Addatendeeteke kadi. Mitti addatemeeki dargaggeessi uwwendeexxa baalle jabeenniki hujaan. (Luqa. 16:10) Yesuusika eloka fakkeenna hedde. Isinna uwwendeexxe maganneꞌn ijjenda balalli hiyye egeꞌnebaan. Yihowwa uwweexxi huje haꞌuritaammaxxa yannanna, uwweendeexxa huje woꞌma qiciꞌn hujeen. Isinna manjo eeyyammani irrancaala kinni hordofooleeyye isixxa eeyyammaxxeꞌe, hedho isixxa insaꞌneꞌa fedhi ifixxen saꞌisse uwween. (Yoha. 13:1) Yesuusiꞌi fakkaatati uwwendeexxa heene hujenna jabaatte huji. Hunja qico egeꞌna gophphootole galfateeke dayyuwika gargaarsa laqedhateꞌe ifi heeshshi assiteeteke kadi. Shiixxooxxa yaane calla assati anga mirqexxe ofoldoxxe. (Roome 12:11) Hujjaateki “Yihowwaate maleeꞌe, manjokeete kadagophpheemmaxxeꞌe” uwwendeexxa huje muuxi. (Qola. 3:23) Dhugaaten, ati qullichchakebaan, tenneꞌa mike ifixxa egeꞌn hujjetexxa balleessa addat.—Fakke. 11:2.

LAꞌO AFFEEXXA DANDEETTE NOSSEDHDHE

9. Mitti dargaggessi dayyi, laꞌo affeexxa dandeette nossecca hasisseeki mayeete?

⁹ Galfateeke Kirsitaana labballo kadateꞌe laꞌo affeexxa dandeetuwwa nossecca hasissaan. Tinninna gubaꞌe giddo uwwendaaxxa baalle adhdha dandeetattoshshanna huje alfite ifinna kade mini hado gargaartattoshsha, ittan welk eloxxa jaalunte afa dandeetattoshsha gargaartaan. Tenne laꞌo affeexxa heenooxxa dandeettuwwa uundo.

10-11. Mitti dayyi elo qicin yaansisanna borreessa barata isiꞌaanna gubaꞌeteꞌe laꞌo affeeki hittate? (Faaro 1:1-3) (Fakke uud.)

¹⁰ Adda yaansisanna borreessa barat. Maxaafi Qullichchi gammadaakinna yaane duuchchi isiꞌa qabbaaki manji, Qaale Mageniinxa duuchchini wodda yaansisaakenna yaansiseexxa alalchaake kadeexxa haasoꞌaan. (Faaro 1:1-3 yaansis.) Maxaafa Qullichcha bara barandeꞌn yaansisati Yihowwaxxa hedino eg eꞌnaan, tinninna elo qico hedaashshanna barateexxa hujeteꞌn hosisaa qico egeꞌnaashsha assitaan. (Fakke. 1:3, 4) Iitta hedheeki labballuwwi gubaꞌeti giddo hasemaan. Mayee?

¹¹ Dayyuwwakeenna dayyuwwateꞌe Maxaafa Qullichchakeꞌn hana hundeessendeexxa akeettenna gorsa uwwaatixxa dandeette afeeki labballuwwi hasisaan. (Tiito 1:9) Adda yaansisanna borreessa dandeettaatole laꞌo affeexxa barachcho, adde jabeessaaka ardiniinka haasoꞌa nna bukkiiteꞌn yaada uwwateꞌe elo qicin qophpheefata dandeetatton. Ittani ifixxa qoꞌne assitatto wodda, gubaꞌetixxe, rogiinxenna killiletixxe bukkiiꞌn shiqaaka haasoꞌa caqassatto wodda eloka qallassanjo abixxitattoshsha gargaartaan. Kunni qallassanji adde ifixxa jabeessexxattoshshanna wele manjonna jajjabeessitattoshsha gargaaraan.

12. Elo qicin weli yaada jijjiidhdha dandeetattoshsha gargaartaaxxi yaanuwwa maachcho?

¹² Yaada welik jijjiidhatixxa eloxxa dandeette nossedhi. Mitti Kirsitaana kadeeki manji yaada wel manjinni elo qicini jijjiidhdhaa qico baratiyyo hasissaan. Mitti, yaada elo qico welki jijjiidha egeꞌneeki manji, weli haasoꞌaa wodda caqasaan, ittan weliinke yaadiꞌaanna irriꞌa miꞌlachcho uwwaan. (Fakke. 20:5) Isinni haasoꞌaꞌneeki manji haasoꞌaꞌne qico, goora isikanna biso leleꞌmisaꞌne qico egeꞌna dandeꞌaan. Tenne yaanuwwa weli manjinni yanna saꞌisitebexxoki egeꞌna dandeettaaxxon. Duuchchini wodda elekitiroonetika miya laꞌoonfatte borreesitaꞌn manjiki haasootaatole, manjiki weli uuddaꞌn haasoꞌatixxi dandeette heenoꞌmitaꞌn meꞌitaan. Tenneꞌa manjiki weli uudaꞌn haasoꞌateꞌe woꞌlaancho assi.—2 Yohaannisi 12.

13. Mitti dargaggeessi wele barata hasissaaxxi yaanuwwwa maachcho? (1 Ximo. 5:8) (Fakke uud.)

¹³ Ifi dandeꞌa barat. Mitte galfateeke Kirsitaananaaꞌn ifinna kadde minika hado kipha isonaaꞌn heqqendaan. (1 Ximootwosi 5:8 yaansis.) Mitte mitte bogaꞌn hexxeexxi dargagge dayyuwwa, annuwwakenaaꞌn yookiin insaꞌnaꞌa shiqaake manjonaaꞌn huje barattaan. Wele bogaꞌn kinni, dargaggeeyye daddaliinxa yookiin wele ogexxa dandeette barataꞌneeki langake koobbike barachchoti mineꞌniten. Hoone orinnitenna kaddoole huje alfateꞌe gargaartaaxxa dandeette barata eloxxen. (Huje 18:2, 3; 20:34; Effe. 4:28) Huje uwwendeexxa muuxamii qicoꞌn jabaatte hujat wele manni edo eloka summa alfateꞌe woꞌlaan. Iitta assitaattexxe kaddoole huje alfatixxi bado baꞌlataꞌn atiꞌa meꞌitaan. Iimiiꞌn uundenneki adabuwwinna dandeettuwwa mitti Kirsitaani ediꞌa heqqitaꞌneexxa baalle seeriki muuxa dandeꞌaashsha gargaartaan. Tenne baalluwwa giddiiꞌn mitte mitte uundo.

EDIꞌA ATEꞌE HEQQITAꞌNEEXXE BAALLUWWAꞌA QOPHPHEEFATI

14. Mitti dargaggeessi dayyi, woꞌma yannake ergatanjo kadateꞌe qophpheefata dandeꞌaaki hittate?

¹⁴ Woꞌma yannake ergatanjo kada. Heddi galfateeki Kirsitaani woꞌma yannaxxa ergachcho safeeki dargaggumatixxe yannaꞌniten. Qajeellisanjo kada mitti dargaggeessi gargarit hedheeke manjinni elo qicin hujaa qico barataashsha assitaan. Ittan maallaqa alfaꞌneeka faangeessebaangi laꞌonfataa qico barataashsha gargaartaan. (Filph. 4:11-13) Woꞌma yannaxxe ergachchoꞌn eꞌyateꞌe taakkaxxi yaane kiphallo qajeellisanjo kadaten. Heddi manni kiphallo qajeellisanjo kade ergatema, duuchchi woddike qajeellisanjo kadateꞌe ifi qixxeeffataashsha assiteꞌeen. Qajeellisanjuma wele woꞌma yannaxxe ergachchoꞌa, tinniirinna ijaarsiinxenna Beetele ergatemateꞌe ora bandaan.

15-16. Mitti dayyi, gubaꞌe giddo ergatemateꞌe geyiitike kada dandeꞌaaki hittate?

¹⁵ Gubaꞌetike ergatanjo yookiin geercho kada. Kirsitaana kadeeki labballi gubaꞌeti giddo geercho kade dayyuwwakeenna dayyuwwateꞌe ergatematee, geercho kadatixxa dandeette afaashsha herrega fulchedhiyyo hasissaan. Maxaafi Qullichchi tenne baalleꞌn geyate hiixataaki labbali “eloxxa huje gaabbaake” kadeexxa haasoꞌaan. (1 Ximo. 3:1) Mitti dayyi gubaꞌetike geercho kade ergatemati edi darre, gubaꞌetike ergatanjo kade ergatemateꞌe hasissaaxxa dandeette wonshedhiyyo isonaaꞌn heqqendaan. Gubaꞌetiki ergatanjuwwi gargarit hedheeke orinni geedhuwwa kiphaan. Geedhuwwatinna gubaꞌetiki ergatanjuwwi dayyuwwateꞌe ifi heeshshi assat ergatemmaan, ittan dhugaꞌa lassatixxe hujeꞌn hinaafet qoodemmaan. Dargagge dayyuwwa gubaꞌetixxe ergantoole kadateꞌe tommeesoke woggake muuxamuwwaꞌn heꞌne hasisaaxxa dandeette wonshedha dandeenaan. Ittan mitti dandeette eloxxa afeeki gubaꞌetiki ergatanji 20 soxxe woggake keꞌitoꞌnini geercho kade baalloomoꞌaanna dandeꞌaan.

¹⁶ Tenne baalleꞌn geya dandeetattoki hittate? Maxaafi Qullichchi tenne baalleꞌn geyateꞌe hasisaaka adabuwwa ifisaan. Kaddomaleꞌe, tinni hasissaaxxi dandeette hundeessendeeki, Maxaafa Qullichchakeꞌni, Yihowwaꞌn ittan mini hado atikeenna gubaꞌeteꞌe affeetexxe jaalalaꞌnten. (1 Ximo. 3:1-13; Tiito 1:6-9; 1 Pheex. 5:2, 3) Duuchchiniinxa dandeette egeꞌnateꞌe wixirfachcho assi. Tenneꞌe dandeette wonshedha dandeetattoshsha, Yihowwa gargaaroꞌa kadhat.c

17. Mitti dargaggeessi dayyi miniinke annanna mini hadike umo kadateꞌe qophpheefata dandeꞌaaki hittate? (Fakke uud.)

¹⁷ Miniinke annanna mini hadike umo kada. Yesuusi haasoꞌemmashshan mitti mitti Kirsitaani labballi aadhebaangi tureen. (Matwo. 19:12) Kaddomaleꞌe, aadhateꞌe mellexxettexxe kaddoole miniinke anna kadatixxinna mini hadike umo kadatixxi ittan wele baalle adhitaatexxe kaddeexxa qalli hiyyi. (1 Qoro. 11:3) Yihowwa mitti miniinki anni miniinxa ama isixxa eeyyashshanna iseꞌe karkarsat, maaliinxa, irriinxanna manfasiinxa halcha isexxa wonshaashsha isonaaꞌn heqqaꞌneen. (Effe. 5:28, 29) Tenne barachcho giddo uundenneki adabuwwinna dandeettuwwa, tinniirinna qeerrise hedatixxa dandeettuwwa nossedha, dubarte ulfeessanna adatendeeteke kada, miniinxe ama atixxeꞌe eloke miniinke anna kada dandeetattoshsha gargaartaan. Miniinke annanna mini hadike umo kadateꞌe dandeesissaaxxa baalle alfateꞌe qophpheefateeteke kaddatton.

18. Mitti dargaggessi dayyi anna kadateꞌe qixxeefachcho dandeꞌaaki hittate?

¹⁸ Anna kada. Aaxxetechchi uduma annake kaddottaanna dandeetatton. Eloke anna kadateꞌe Yihowwanaaꞌn maachcho barata dandeettato? Heddo barachcho alfa dandeettaton. (Effe. 6:4) Yihowwa belto isika Yesuusi, eeyyaꞌnexxanna isoꞌn gammadaꞌnexxa ifa kadeeke orin haasoꞌeemman. (Matwo. 3:17) Anna kaddatto wodda oose atixxa eetaattexxa duuchchini wodda kuldattoxxa kokiinke kadi. Oose atixxi eloxxa yaane assitaa wodda galateeffat. Yihowwaka fakkeenna hordofaaki annuwwi oose insaꞌnexxi galfateeke Kirsitaana kaddaashsha gargaaraan. Atinna tenne baalleꞌa minni haddi giddonna bukkiiti giddo hedheeka jaalalat karkarsat taꞌanni qophpheeffata dandeettaton, ittan jaalalanna saadino affetexxa ifisa barat. (Yoha. 15:9) Tinninna ediꞌa eloke miniinke annanna oosetike anna kaddattoshshanna gargaartaan. Okkone qicoꞌn,Yihowwaꞌa, mini hadiꞌa ittan gubaꞌetee laꞌo affette manjo kaddatton.

TAꞌA MAA ASSA DANDEETATTO?

19-20. Dargagge dayyuwwa galfateeke Kirsitaana kaddaashsha gargaartaaxxi yaane maachcho (Gogiinxa fakke uud.)

¹⁹ Dargagge dayyuwwa, mittendeꞌn galfateeke Kirsitaana kada dandeessissabaan. Tenneꞌa eloka fakkeenna hordofateꞌe fiꞌla, qeerriise hedatixxa dandeette nossecca, addatendeeteke kada, laꞌo affeexxa dandeettuwwa baratanna ediꞌa hexxeexxe baalleꞌa kophpheeffata hasissaan.

²⁰ Ediꞌa ateꞌe heqqitaꞌneexxa huje heddatto wodda, hunna atixxi iimi darre hexxeechcho fakkattoꞌa dandeettan. Kaddomaleꞌe, tenne yaanuwwa assa dandeettatton. Yihowwa ateꞌe gargaaratixxa yorte afeexxa qalli hiyyi. (Isay. 41:10, 13) Ittan bukkiiteꞌn hexxeexxi dayyuwwanna ateꞌe gargaarateꞌe yoꞌoshsha hassaꞌneen. Woꞌma hunnan galfatee Kirsitaana labballo kaddottole hedho atixxi qabbekenna ititeeteke manjo kaddatton. Dargagge dayyuwwa haꞌnoꞌo yoꞌoshsha eenannen! Galfatineeke Kirsitaana kadateꞌe assitinaꞌneexxa woꞌlancho Yihowwa dinbiliqqi asse eebbisowwali.—Fakke. 22:4.