Woggateꞌn Haranga Gargariti Hexxeexxe Barraꞌa Qophpheeffatinee?

1. Qalliitika ayyaana ulfeesinaannexxi barra woggateꞌn hexxeexxe barruwwanaaꞌn gargariti higgeeki mayeete? (Luqqaasi 22:19, 20)

YIHOWWAKE ardiꞌa, Kirsitoosixe reyoke Qalliitike ayyaanixxi barra, woggateꞌn hexxeexxe barruwwanaaꞌn haranga gargariti hexxeexxen. Yesuusi hordofooleeyye isixxi ulfeesitaashsha ajajeeki ayyaani konnee callan. (LUQQAASI 22:19, 20 yaansis.) Konne ayyaana halchati heqqeꞌnaannexxi buutuwwa hexxeen. Tenne buutuwwa giddiiꞌn mitte mitte uundo.

2. Qallitika Ayyaana halchati heqqeꞌnannoshsha assitaaxxi mitte mitte buutuwwa heente?

² Kunni Qalliitiki ayyaani wodotixxe laꞌoꞌn alalchinannoshsha gargaaraan. Yesuusike wodotike tolchiꞌa saadino leellinshannoka ora qalli hinannoshsha assaan. (2 Qoro. 5:14, 15) Ittan dayyuwikinna dayyuwwat “weliꞌaan wel jajjabeessat” gammandannoxxa futtiꞌi alfa dandeenannon. (Roome 1:12) Wogga woggandeꞌn heddi qiideeki dayyuwwi konne ayyaanaꞌn afemaan. Konne manni giddiiꞌn mitti mitti, dayyuwwa eebbe garinni insaꞌneꞌe adhdhatenaaꞌn kexxeexxa, Yihowwabaꞌa higateꞌe murteessedheen. Ittan heddi manni laqeexxenna uudeexxe yaaneꞌn gammadateenaaꞌn kexxeexxa Maxaafa Qullichcha baratateꞌe fedhiitike kadeen. Tenneꞌa Qalliitike ayyaaniꞌa lumoxxa bakka uunannoxxi egeꞌnendeexxen!

3. Qalliitiki ayyaan butta duuchchaꞌn hexxeexxa dayyuwwa mitte assaaki hittate? (Fakke uudi.)

³ Qalliitiki ayyaani butta duuchchaꞌn hexxeexxa dayyuwwa mitte assaa qico hedi. Yihowwaxxi Naqaashe butta duuchchaꞌn wogga woggandeꞌn arishsho aaggeeshshani ayyaana ulfeessatee bukki hitaan. Duuchchiniing widotixxe laꞌoꞌn miꞌlachcho asseeka haasoꞌa caqansannon. Galatiinxa lame faaro faarsinannon, qixxannaa woyine noꞌoxxe oddooꞌn dolsinaan ittan woꞌma qalben shoole kadhaꞌa “ameen” hinannon. Butta duuchchaꞌn hexxeexxi gubaꞌe, 24 saate giddo konne seera hordoffaan. Yihowwanna Yesuusi mittoomiki insaꞌne ulfeesinaaꞌnaꞌa uundaa wodda hittatta gammandaaxxa hedi!

4. Tenne barachchoꞌn heene yaanuwwa mariꞌantanno?

⁴ Tenne barachchoꞌn konne qortumuwwaꞌn mariꞌe assinannon: Qalliitike ayyaaniꞌa qalbe noꞌoxxa qophpheefata dandeenannoki hittate? Welinna konna ayyaananaaꞌn laꞌo alfaashsha gargaara dandeenannoki hittate? Ittan qiiddeexxa dayyuwwanna gargaara dandeenannoki hittate? Konne qortumuwwiꞌa hiisinannoki hiissichchi, tenne qullite qophpheꞌa ifi qixxeeffantannoshsha gargaaraan.

QALLIITIKE AYYAANIꞌA QALBE NOꞌOXXA QOPHPHEEFFATA DANDEENANNOKI HITTATE?

5. (a) Wodotixxe laꞌoꞌn alalcha hasisseeki mayeete? (Faaro 49:7, 8) (b) Yesuusi Reyeeki Mayeete? hitaꞌneexxe Viidiyonaaꞌn maachcho baratette?

⁵ Qalliitike ayyaaniꞌa qalbe noꞌoxxa qophpheessedha dandeenannoki duuchchiniingenaaꞌn caaleeki mitti ori, Yesuusiki wodotiki tolchi afeexxe laꞌoꞌn alalchatiiten. Noꞌo ifiꞌa cubbotenaaꞌninna reyotenaaꞌn ijjenda fula dandeenaaꞌnon. (Faaro 49:7, 8 yaansis; Ittan Yesuusi reyeeki mayeete? hitaꞌneexxa viidiyo uudi)a Tenneꞌa, Yihowwa noꞌoꞌo fayyisateꞌe hiyyaa wodda belt isiki Yesuusi hedho isixxa noꞌa uwwaashsha asseen. Yihowwanna Yesuusi lamiing noꞌaꞌa lumoke tolcha assineen. (Roome 6:23) Insaꞌne noꞌaꞌa assineeke tolchaꞌn alalchinennexxe qixxeꞌn woddoteꞌe anfeennexxi saadino, ittinni lebbaꞌn meꞌitaan. Yihowwanna Yesuusi noꞌaa assineexxe jabaxxe yaanuwwa giddiiꞌn heenooxxa uundo. Wodo heene yaanuwwa abidda?

6. Wodo heene yaanuwwa abidda?

⁶ Wodote hiyyo mitte yaane wirri asse hirateꞌe uwwemaake hiran. Addaami taakkaꞌa dademeemma wodda qullichcha manjomman. Isinna cubbo hujatenaaꞌn kexxeexxa ifin calla kadebaangi oose isixxi duuchchiinxi, baro baro hedha dandeettabaashsha asseen. Addaami gophiseexxa hedho, Yesuusi wirri asse hirateꞌe qullitte kaddeexxa isixxa hedho tolcha asse uwween. Yesuusi buttateꞌn hedhemmaxxa yanna duuchcha “cubbo huje egeꞌnebaan, afoꞌo isikeꞌninna sobi afemeꞌe egeꞌnebaan.” (1 Pheex. 2:22) Yesuusi reyot tolchake asseexxi hedho, Addaami gopheexxe hedhoni weli qixxeten.—1 Qoro. 15:45; 1 Ximo. 2:6.

7. Yesuusi buttateꞌn hedhemma wodda isoꞌn heen mitte mitte rakko geltee?

⁷ Yesuusi buttateꞌn hedhemma wodda gargariti hedheeki abaruwwinna isoꞌn geyeexxe kaddoolenna anna isikeꞌe addatenshat ajajemeen. Qullichcha kade ilemeexxe kaddoolenna oosumma hedhemma wodda qullichcha kadebaake hadi isikike seeriꞌa ajajema hasissaamman. (Luqa. 2:51) Dargaggummatixxe yannaꞌninna ajajemabaashshanna addatemeeke kadabaashsha geltaammaxxa dhiibbe dandeꞌe saꞌiyyo hasissaamman. Yesuusi Lumolla kadeechchi udummanna, Seexani Dabiloosixxa hega uushsho, ittan Magenokeꞌe addatetenshatenaaꞌn kexxeexxa toggichcha kadeeke orinni, geltaammaxxa dhiibbe dandeꞌanna hasisseemman. (Mat. 4:1-11) Seexani, Yesuusi cubbo huje manjiinke beltiꞌa wodo kada dandeꞌabaashsha assateꞌe hidhatee keꞌeemman.

8. Yesuusi heene wele rakkoꞌn osse saꞌee?

⁸ Yesuusi buttateꞌn ergatemaammaxxa yanna wele hega uuddammaxxa yaanuwwanna osse saꞌeemman. Shorrichchi isoꞌn geyaamman ittan manjikinna isoꞌo shiyateꞌe hasaamman. (Luqa. 4:28, 29; 13:31) Hordofooleeyye isixxixxa gonphenna dandeꞌa hasisseemman. (Marqo. 9:33, 34) Hedho isixxi rakkoteꞌn hexxemmaxxa yanna isoꞌo geenbe geerarreemman ittan coorraamman, okkooꞌn salpisaakenna cori gibaake garinni shinneen. (Ibra. 12:1-3) Konnee muuxamiinka abara, Yihowwake gargaarisi belo dandeꞌe saꞌa hasissaamman.b—Mat. 27:46.

9. Yesuusi asseeka tolcha heddatto wodda maachchi ateꞌn laqemaꞌne? (1 Pheexiroosi 1:8)

⁹ Dhugaaten, Yesuusi wodo kadateꞌe jabaxxa rakko uudeen. Yesuusi noꞌaꞌa hiyya wodda tolcha kadateꞌe fedhiitike kadeexxa hendanno wodda, qalbe giddixxin isoo eenannoshsha assitaabaa?—1 Pheexiroosi 1:8 yaansis.

10. Yihowwa fedhiꞌi ifixxinni wodoteꞌe maa jabaka tolcha assee?

¹⁰ Yihowwa, Yesuusi noꞌaꞌa wodo kadaashsha fedhiꞌi ifixxen maa tolcha assee? Yihowwanna Yesuusi anniinxenna beltiinxe oddooꞌn hexxaaxxixxa jabaxxa mittunte anfeen. (Fakke. 8:30) Yesuusi buttateꞌn hedhemma wodda gargariti hedheeke abaraꞌn ossaaꞌnaꞌa, Yihowwa uudammaxxeꞌe okkone wodda maachchi isoꞌn laqemeexxa hekki hite hedi. Yihowwa belt isiki miicemaaꞌnaꞌa, jibbemaaꞌnaanna abari geyaaꞌna uuda wodda haranga yaadaxxe kaddeexxi mama affeexxebaan.

11. Yesuusi reye wodda Yihowwaꞌn maachchi laqema dandeꞌaaxxa fakkeenniki ifisi.

¹¹ Finna ifika reyot gopheeki haddi tinni yaane hittatta yaadissaaxxe kaddeexxa adda egeꞌneen. Reyotenaaꞌn keꞌatike tasfaꞌn jabaxxa adde anfeennexxenna kaddoole, kunni tasfi eenaanneki manji reyeeꞌnaꞌa giddo noꞌoxxeꞌn laqendaaxxa yaado balleessa dandeꞌabaan. Kunni fakkeenni Yihoowwa birraꞌiinxe mayeꞌn 33 K.I.U.c Yihowwa eeyyaꞌneeki belt isiki, rakkataaꞌnaanna reyeeꞌnaꞌa uudaa wodda hitte qico yaadeexxa egennannoshsha gargaaraan.—Mat. 3:17.

12. Ayyaaniinxe torbaꞌn heene yaanuwwa assa dandeenanno?

¹² Qalliitike ayyaan qicoꞌn ifixxe qoꞌnexxa projeekite yookiin wodoteꞌn miꞌlachcho assiteexxa mini hadixxa projeekite taꞌinaaꞌn saffineelena? Wodoteꞌn baꞌlaxxa qoꞌne assateꞌe Qoꞌne Kiphaaka Miya Yihowwaxxe Naqaasheꞌa (Qawwuffat) hiyyaaka maxaafa yookiin Maxaafa Qullichcha qoꞌnisateꞌe gargaartaaxxa wele borreesile laꞌoonfata dandeetinaan.d Ittan Qalliitike ayyaaniꞌa Kirsitaaniinxa Hedhonna Ergachcho—Bokkiitixxe Borreesileꞌn (Qawwufat) fulaꞌneeka Qalliitike ayyaanika Maxaafi Qullichcha yaansisatika progiraama hordoffe. Qalliitike ayyaanixxa barra Bariisixxe Mageneeffachchoka Progiraama hordofa deetinoqqe. Qalliitike ayyaaniꞌa qalbe noꞌoxxa qophpheefantanno wodda welinna konne ayyaananaaꞌn laꞌo alfaashsha gargaara dandeenannoxxa hunna anfannon.—Izira 7:10.

WELINNA LAꞌO ALFAASHSHA GARGAARI

13. Weli ayyaanakenaaꞌn laꞌo alfaashsha gargaara dandeenannoki taakkaki ori hoonte?

¹³ Weli manni Qalliitike ayyaninaaꞌn laꞌo alfaashsha gargaara dandeennannoki hittate? Iitta assa dandeennannoki taakkaki ori, manni ayyaanakeꞌn afemaashsha yeꞌatiten. Ergachchoteꞌn toggichcha kadeeke orinni anfannoka manna, ittan wele yeꞌnannoka manna qallassanjokeꞌn summa insaꞌneka borreesedha dandeennannon. Kunni yeꞌnaanneki manninna hado noꞌoke, hujetike jaaluwwa, barachchoti minike jaaluwwanna wele mananna kada dandeꞌaan. Geyaaka yeꞌinjiinka woraqata afa gonphoonnole elkitiroonetixxa linke erga dandeennannon. Ayyi dagaaxxa ayyete egeꞌne!—Meki. 11:6.

14. Manjo anni annitin yeꞌa maa laꞌo affeexxa fakkeenniki ifisi.

¹⁴ Duuchchiniinga manjo anni annittin yeꞌa affeexxa laꞌo shollisine uudinoqqe. Mitte barra Yihowwaxxe Naqaashe kadebaaka miniinka anna affeexxi mitte dayyo, iseki miniinki anni Qalliitike ayyaanaꞌn iseni welt afemoꞌa haseexxa haasoꞌe woddi yoꞌoshsha gammaddeemman. Ise gammaddeeki mayeete? Buutotinna konneechchi edi darre konne ayyaanaꞌn afemaashsha heddole jajjabeesiteexxe kaddolenna isi afeme egeꞌna gopheemmaxxeeten. Taꞌa isoꞌn jijjiirra idaggeexxi yaane maachcho? isinna itta hiyyeen “Aniꞌa qofinni yeꞌinjiinki woraqat geyeen,” loola isikeꞌn hedhaꞌneeki mitti gubaꞌeti geerch ayyaana konneꞌn afemaashsha isoꞌo yeꞌeexxa haasoꞌeen. Kunni miniinki anni ettene wogganaaꞌn safeꞌe heddo woggaꞌa Qalliitike ayyaanaꞌni afemeen.

15. Manji Qallitike ayyaanaꞌn afemoꞌa yeꞌnanno wodda qalli hiyya hasissaaxxi yaane maachcho?

¹⁵ Ayyaanakeꞌn afemoꞌa yeꞌnaanneki manni giddiiꞌn, konneechchi edi darre bukkiiteꞌn afeme egeꞌnebaaki manni qortuma afaaxxe kadeexxa dedhiyyo hasissabaan. Qorroꞌa dandeennaaka qortumuwwa edinseen hedat, qortuma insaꞌnekeꞌe qophpheefata eloxxen. (Qola. 4:6) Fakkeennakeꞌe mitti mitti manni iitta hiyye qoraan: ‘Tenne qophpheꞌni assendaꞌneexxi yaane maachcho?’ ‘Hitte qico turtaꞌneexxe yaane?’ ‘Gargariti hexxeexxa seemma oddoꞌwa hasissaꞌnee?’ ‘Maallaqa uuneete eꞌyinaꞌneeki?’ ‘Maallaqa qoncaꞌneeba?’ Mitti manji ayyaanakeꞌn afemoꞌa yeꞌnannoxxa yanna, “Qortuma affeete?” hine qora dandeennannon, Okkooꞌn qortumuwwa isikeꞌe hiissichcho hiisinannon. Yesuusixxe Reyoxxa Qalliinna Bukkiitike Galmaꞌn Assendaꞌneexxi Yaane Maachcho? hitaꞌneexxa viidiyuwwa, duuchchiingi bukkiꞌi noꞌoxxi akeekendaꞌnee qico egeꞌnoꞌa gargagaarateꞌe laꞌoonfata danadeennannon. Ittan Baro Baro Gammadiki hedhi! (Qawwuffat) Hiyyaaka maxaafa hafuura adhdha 28 keꞌn konne manniꞌa kullannoxxa heddo eloxxa beddo afa dandeenannon.

16. Qalliitike Ayyaanaꞌn afemaaki manji wele hooneꞌe qortumuwwa afaaxxi hexxa?

¹⁶ Ayyaanakeꞌn afemmeechchi uduma, egeꞌnatixxa halcha afeeki manni wele qortumanna qoraaxxi hedha dandeettaan. Dedha mitti manjinna woyinetenaaꞌn yookiin qixxakenaaꞌn qoodema gophaꞌneeki mayeete kadeexxa qora dandeennaan. Yookiin heeno manji calli (hedhoole) qodemaꞌneeki mayeete hine qorraaxxi hexxaan. Haano haano ulfeesinaannexxa dedha qorraaxxinna hexxaan. Ittani duuchchiinxi Yihowwaxxe Naqaashexxi bukkiiꞌi weli fakkaataake orinni akeekendaꞌneexxa egenoꞌaanna hansaaxxinna hexxeen. Qalliitike ayyaani baro shiqaꞌneeke aridiinke haasoꞌaꞌn tinni bedduwwa diideessendaꞌneexxe kaddoolenna haarooki dageeki manni caldeexxa egeꞌnoꞌa hasaaxxinna haxxaan. Jw.org teꞌn “Yihowwaxxi Naqaashe Wele Addenaaꞌn Gargariti Hedheeke Orinni Ulfeessitaꞌneeki Mayeete?” hiyyaꞌneeka yaada laꞌoonfata, konne mannike qortumiꞌa hiissichcho hiisinannoshsha noꞌoꞌo gargaaraan. Toggitte qalbetixxa halcha afeeki manni goottiinke hirbaatanaaꞌn laꞌo alfaashsha Qalliitike ayyaani edo, ayyaaniinxa barranna ayyaani uduma insaꞌneꞌe gargaarateꞌe dandeenennexxa duuchcha assa hansaannen.—Huje 13:48.

QIIDDEEXXA DAYYUWWA GARGAARRE

17. Qiiddeexxa dayyuwwa geedhe gargaara dandeettaaki hittate? (Hiziqeeli 34:12, 16)

¹⁷ Ayyaaniinxa maye geedhe qiiddeexxa dayyuwwa gargaara dandeettaaki hittate? Insaꞌneꞌa miꞌlachcho uwwat jaalala leellishatiten. (Hiziqeli 34:12, 16 yaansis.) Ayyaani edi darre dandeessissee qicoꞌn heddi manniꞌa bilbildeettexxa koki. Dandeettaateke ori duuchchinni, insaꞌneꞌe gargaarateꞌe jaalalanna halcha affeettexxa leellishi. Insꞌneꞌe ayyaanakeꞌn afemmaashsha yeꞌi. Dangeexxe kaddoole eebbake hafuurinni adhdhi. Ayyaani uduma konne fiixxa kadeeke dayyuwwinna dayyuwwat afema ittini ediꞌa sufi, ittan Yihowwabaꞌa higa dandeennaashsha hasisaaka kipha assi.—1 Pheex. 2:25.

18. Noꞌo duuchchiingi qiiddeexxa dayyuwwa gargaara dandeenannoki hittate? (Roome 12:10)

¹⁸ Duuchchiing gubaꞌeti giddo hedheeki Qalliitike ayyanaꞌn afendeexxa qiiddeexxa dayyuwwa gargaara dandeꞌaan. Hitta? Insaꞌneꞌe jaalalat, shaqquntetinna ulfinniki abidatiten. (Roome 12:10 yaansis.) Kunni fiixxa kadeeki gedhebi bukkiitibaꞌa higateꞌe hoodaaxxinna hexxaaxxa qalli hiyye. Aneꞌe elo qicini adhdhinabaan hiyyat sodaantaaxxinna hexxaan.e Tenneꞌa insaꞌneꞌe shookisaaka qortuma qortinoqqe, yookiin insaꞌneꞌe miidhaaka yaada haasootinoqqe. (1 Tese. 5:11) Insaꞌne noꞌoke addetike jaaluwwan. Insaꞌneni welt higgeen mageneeffata dandeenennexxeꞌe gammadiyyo hasissaan!—Faaro 119:176; Huje 20:35.

19. Yesuusixxa reyo qalli hiyyatenaaꞌn maa laꞌo alfinanno?

¹⁹ Yesuusi reyo isixxika Qalliitika ayyaana wogga wogandeꞌn ulfeesinannoshsha ajaja laꞌo affeexxe yaane? Qophphe tenneꞌn afemmanno wodda ifiꞌaanna laꞌo alfa dandeenannon, ittan heddi orinni welinna laꞌo alfaashsha assa dandeenannon. (Isa. 48:17, 18) Yihowwanna Yesuusiꞌa anfeennexxi jaalala nophphitaꞌn meꞌitaan. Insaꞌne noꞌa assineexxe yaaneꞌa hitte qico saadino anfeennexxa leellisha dandeenannon. Addetike jaaluwwi noꞌokinni anfeennexxa mittuntenna jabeesseꞌnannon. Ittan welinna wodotike badhaadhanaaꞌn gammashsho alfa qico egeꞌnaashsha gargaara dandeennannon. Dandeennennexxa yaane duuchcha assine woggateꞌn haranga gargariti hexxeexxe barraꞌa, Qalliitike ayyaaniꞌa qophpheeffanto!