Yihowwaa Egeꞌnateꞌe Hasaꞌneeka Manna Gargaarre

1. Manni gammachchiissaaxxa odo laqeꞌe hiissaaki hiissichchi gargariti hedheeke kadeeki hittate? (Huj. 13:47, 48; 16:14, 15)

KEꞌITIINKE dhibbeesso baroꞌni heddi manni Mageniinxe mootummaxxa erga laqeenge hirbaꞌninni addateemman. (Ergantooletixxa Huje 13:47, 48; 16:14, 15 yaansis.) Iittanni, techchixxe yannaꞌni mitti mitti manni taakkaa gammachchiissaaxxa odo laqaa wodda yoꞌoshsha gammaddaan. Matanga taakkaa Mageniinxe Mootummaxxa erga laqa hasaammabaaki manni, udumiiꞌni dhugaa baratateenna Yihowwaa mageneeffatatee hasaan. Mageno egeꞌnateenna Maxaafa Qullichcha baratatee hasaꞌneeka manjo anfanno wodda maa assa hasissa?

2. Manjo hordofoole assatixxi huje noꞌoxxi fichcha hujaake manjixxe hujenni fakkaattaaki hoone orinnite?

² Konnee fakkeenna uudde. Manjo hordofoole assatixxi huje noꞌoxxi fichcha hujaake manjixxe hujenni fakkaattaan. Fichcha hujaaki manji fichchi isiki giddo hedheeki haqichchi welekenaaꞌni edise gumma raꞌissaa wodda gumma bukki assedhoolenna, fichchi isiki giddo hedheeka gumma reefi raꞌissebaaka haqichchonna kuuffisanna wodeꞌe haꞌwisa ittin sufaan. Weli fakkaattaanxa, kullaannexxa erga laqateꞌe hasaꞌneeka manjo anfanno wodda Kirstoosike hordofeessa kadaashsha rankennexxi gargaarateꞌe dandeennennexxa yaane duuchcha assa hansaannen. Wele darrenaaꞌni kinni, kullaannexxi yaane laꞌo affeexxe kaddeexxa hubatatee yanna hasissaake mannixxa halcha nossa ittin sufa hasissaan. (Yoh. 4:35, 36) Itta hedheeka manna shiqe gargaarateꞌe eldaaxxa yanna egennannoshsha qalbeeffachcho noꞌoo gargaartaan. Tenne qoꞌneꞌni, kullaannexxa yaane laqateꞌe hasaꞌneeke manjinni taakkaa affemme haasoonnanno wodda isoo gargaarateꞌe maa assinannoxxa mariꞌantannon. Ittan iitta hedheeki manji manfasiinxe hedhonni nophpha ittin sufaashsha gargaarrannoki hittate kaddeexxanna uundannon.

KULLAANNEXXA YAANE LAQATEE HASAꞌNEEKA MANJO GARGAARRANNO QICO

3. Ergatenshateꞌni kullaannexxa yaane laqatee hasaꞌneeke manjinni afemmanno wodda maa assa hasissa? (1 Qorontoosi 9:26)

³ Ergatenshateꞌni kullaannexxa yaane laqatee hasaꞌneeke manjinni afemmanno wodda hedhotike oraꞌni meꞌa safaashsha gargaara hasissaan. Tenneꞌaa, taakkanxe mariꞌe woddanni Maxaafa Qullichcha barata safaashshanna gubaꞌe dagaashsha qoratee hooda hasissabaan.—1 Qorontoosi 9:26 yaansis.

4. Maxaafa Qullichcha baratatee hassaammaxxe dargaggeettexxa hedhotixxa baranno haasoꞌi.

⁴ Maxaafa Qullichcha barantaashsha qori. Mitti mitti haasoossinannoki manni hirbangeꞌni Maxaafa Qullichcha barata hasaaki hedheen. Fakkeennakeꞌe, Kanaadi giddo Gidaadiinxa barra, mitte dubarichcho borreessiletixxe gaare biraa shikki hiteexxi Baro Baro Gammadiki Hedhi! hitaaxxa biroshuure adhdhiteen. Gaareti bira uurriteemmaxxi dayyo belto tinni tenne biroshuurenni maallaqi belo Maxaafa Qullichcha barata dandeettaaxxa ifisseen. Beltotinna barata hassaammaxxeꞌe bilbiliinka laakkossa uuteen. Eettene barra uduma beltotinna harumaaxxa erga borreessiteexxi barachcho haano sanfaaxxa qorteen. Dayyotinna daggaaxxa torba martaaxxa kuldee woddi ise kinni: “Soodo dhaqqabaaxxo? Tolange hedhennen” hiteen. Okkooꞌni Bitaꞌixxa barra barachcho sanfeen. Belto tinni eettene torbaꞌninni Sanbatiinxa barra gubaꞌe marteen. Manfasiinxe hedhoninna turtebaangi nophphichcho assa ittin suffeen.

5. Manji Maxaafa Qullichcha barataashsha qorranno wodda qalbeeffanna anfeennexxa leellinshannoki hittate? (Fakkuwwatanna uudi.)

⁵ Maxaafi Qullichchiinxa erga kullaanneki manni duuchchi tenne beltoshsha laqatixxa halcha afaani hine hiqqinaaꞌnon. Mitti mitti manni kinni kullaannexxa yaane addate adhdhateꞌe qeerraaxxa yanna hasaaxxi hexxaan. Mitte manjinni taakkaa mariꞌe assinanno wodda okkone manjixxa hubanno butataake yaadinni safa hasissaan. Qajeellichcha yaadaꞌni miꞌlachcho assinaannolenna mitte mitteni manjiꞌaa hendaannexxa leellinshaannole, harumaaxxe yanna giddo Maxaafi Qullichchiinxa barachcho sanfaashsha assinannoxxi hexxaan. Maxaafa Qullichcha barantaashsha qorranno wodda maa hiyya dandeennanno? Heddi manni Maxaafa Qullichcha barata safaashsha gargaarteexxi heddo dayyuwwa maa hiteexxa uundo.

6. Kullaannexxa yaane laqatixxa halcha afeeki manji, Maxaafa Qullichcha barata isiꞌaa laꞌo affeexxa egeꞌnaashsha gargaarateꞌe maa hinanno?

⁶ Maxaafa Qullichcha barsiisa safa uuddaaxxa qorendeexxi baꞌlisanoolenna qajeellisanoole mitte mitte bogaꞌni “qoꞌne” “Maxaafi Qullichchiinxa barachcho” yookiin “ateꞌe barsiinsannon” hitaaxxa hiyyuwwa laꞌoonfata gopha eloxxe kaddeexxa haassootteen. Tinni dayyuwwa “Maxaafi Qullichchiinka yaada weli jijjiidhdha” “mariꞌata” ittan “Maxaafa Qullichcha adda egeꞌna” hitaaxxa hiyyuwwa laꞌoonfata eloxxe kaddeexxa hubatteꞌeen. Mitte manjo haasoossitatto wodda “Maxaafi Qullichchi qorrannoke haranga hasisaake qortumuwwiꞌaa hiissichcho hiissaaxxa egeꞌna manbeꞌa assitaaxxe yaanen yookiin Maxaafi Qullichchi addetike maxaafa callabaan, hedho noꞌoxxeenna eloxxa laꞌo afeen” hiyyati haasoossitaatteki manji higgee woddanna atinni mariꞌataashsha assaake yaadinni safa dandeettatton. Lebbettexxi “Mariꞌeteꞌni qeerraaxxa yanna turraaꞌnoni, isonaaꞌni laꞌo affeexxa barachcho alfateꞌe 10 yookiin 15 daqiiqi geyeꞌeen” hiyyanna dandeettatton. Yaane haꞌursineꞌe uundaashsha assitaaxxa “barra welti abixxino” yookiin “torba torbandeꞌn” hitaaxxa hiyyuwwa laꞌoonfattoxxeꞌe.

7. Mitti mitti manni Maxaafi Qullichchiinxa dhugaa hubataaki haanote? (1 Qorontoosi 14:23-25)

⁷ Gubaꞌe dangaashsha yeꞌi. Hawaarya Phawuloosike baroꞌni hedhemmaki mitti mitti manni Maxaafi Qullichchiinxa dhugaa taakkaa hubateeki Kirsitaaniinxa bukkii maree woddate fakkaattaꞌneen. (1 Qorontoosi 14:23-25 yaansis.) Taꞌixxe yannaꞌninna heddo yanna tinni yaane iittanden. Heddi haarooki manni rakeexxi manfasiinxe hedhonni nophphaaki gubaꞌe daga safeechchi uduman. Gubaꞌe dangaashsha yeꞌa hasissaakita haanote? Bara Baro Gammadiki Hedhi! hiyyaaki maxaafi hafuura adhdha 10 gubaꞌe mara maa laꞌo affeexxa haasoꞌaan. Gubaꞌe dangaashsha kulateꞌe barsiissaꞌni okkoo geltatto qicoꞌni heqqa hasissabaan. Haasoossitaatteka manjo taakkaxxe mariꞌe baronni shiqaꞌneeka ardiinke haasoꞌikanna Qoꞌnetixxe Maxxansoxxe Heqqecatixxe Xellephoka umo yaada kuldettexxi torbatike muuxamixxa bukkii dagaaasha yeꞌa dandeettatton.

8. Mitti manji gubaꞌe dagaashsha yeꞌnanno wodda bukkii noꞌoxxa uuddaaxxa heenee yaanuwwa isoꞌni kullanno? (Isayaasi 54:13)

⁸ Kullaannexxa yaane laqatixxa halcha afeeka manjo, gubaꞌe dagaashsha yexxatto wodda bukkii noꞌoxxi isi egeꞌneexxe wele addexxenaaꞌni gargariti hexxeexxe kaddeexxa ifis. Mitte Maxaafa Qullichcha barattaꞌneexxi manjo taakkaa gubaꞌe martee baro Heqqecatixxa Xellepho qoꞌninsaaꞌnaa “Akeekaꞌneeki manjichchi duuchchiinge manjika summa egeꞌnee?” hiteꞌe isee barsiissammaxxa dayyo qorteen. Dayyotinna mini hidi noꞌoki giddo hedheeke manjika summa egennannashshanni, gubaꞌe giddo hedheeke manji duuchchika summa egeꞌnateꞌe woꞌlaannannon hite hiissiteen. Tinni manjonna wele addeba egendeexxe yaanenaaꞌni tinni haranga gargariti hexxeexxe yaane kaddeexxa hubatteen. Heddi manni mayee bukki hinaannexxa egeꞌnebaan. (Isayaasi 54:13 yaansis.) Mitteba bukki hinaanneki Yihowwaa mageneeffatateꞌe, isonaaꞌni baratateenna weliꞌaan weli jajjabeessateeten. (Ibr. 2:12; 10:24, 25) Tenneꞌaa bukkii noꞌoxxi seeriki orgeessendeexxenna laꞌo alfinaannexxe maleꞌe, addetika seera wonshateꞌe bukki hinaannexxebaan. (1 Qo. 14:40) Bukki hinaanneki barachchoteete kaddemmaxxeꞌe, noꞌoki Bukkiiti Galmuwwinna barachchotee elaa garinni ijaaremeeken. Noꞌo poletikiinxe yaaneꞌni eꞌya gonphaannaxxeꞌe, poletikiinxa yaane ijjenda mariꞌantabeꞌnon, ittan hoginsabeꞌnon yookiin weliꞌaan weli morommabeꞌnon. Barsiissaatteki manji gubaꞌe dagebaa edi darre Bukkii Noꞌoxxike Galmaꞌni Assendaꞌneexxi Yaane Maachcho? hitaꞌneexxaa viidiyo leellisha eloxxen. Kunni manjinna assinaꞌneexxi yaane maachcho kaddeexxa ediseen egeꞌnaan.

9-10. Gubaꞌe dagaashsha kullannoki manji una noꞌoxxe kadaashsha yookiin yaada uwwaashsha gaddachchinaabeꞌnoxxa egeꞌnaashsha assateꞌe maa assinanno? (Fakketanna uudi.)

⁹ Mitti mitti manni adde isixxa waaleexxi Yihowwaxxe Naqaashe kadaashsha qorraan hiyye daga sodaataaki hedhaan. Gubaꞌe dagaashsha yexxattoki manji, una noꞌoxxe kadaashsha yookiin mariꞌetixxa yanna yaada uwwaashsha gaddachchinabeꞌnoxxa egeꞌnaashsha assi. Mini hadi oose insaꞌnexxinni mitteba daga dandeꞌaan. Bukkii noꞌoxxeꞌni oose hadokenaaꞌni gargari higgeꞌe qofitti barattaashsha assinabaan. Tenne irra oose ofoldaakinna barattaaki hadiki mittebaten. Konne orinni, hadi oose insaꞌnexxi haba hexxeexxanna maa barattaꞌneexxa egeꞌna dandeꞌaan. (Zed. 31:12) Bukkii noꞌoxxeꞌni manjokenaaꞌni maallaqa qoncabeꞌnon. Tenne irra Yesuusi “tolanga adhdhitinemmashshanni tolanga uwwe” hiyyeeke ajajiꞌaa hiremmaannen. (Mat. 10:8) Gubaꞌe dagaashsha yexxattoki manji fiixa kaddeexxa seemma oddoꞌwa hasissabaaxxa eerra eloxxen. Mageni uudaꞌneeki qalbe giddixxe maleꞌe iimixxe ayyuntebaan.—1 Sa. 16:7.

¹⁰ Yexxetteki manji gubaꞌe dagaa wodda qofitti gateechcho isoꞌni fakkaattabaashsha dandeettettexxa yaane duuchcha assi. Geedhetinna wele dayyuwwanni egeꞌnishi. Taakka baro qofi gateeshsha fakkaata gophphoole, wele woddanna higeꞌe dagateꞌe sodaatabaan. Maxaafa Qullichcha afa gophoole, maxaafa atikenaaꞌni isiꞌaa leellishi, shiqaꞌneeka haasoꞌanna qoꞌnetixxa barachcho hordonfaaki hittate kaddeexxa leelliishi.

MAXAAFA QULLICHCHA BARATA SAFAA WODDA

11. Barsiissaatteke manjixxa yannanna prograama ulfeessitaattexxa leellishattoki hittate?

¹¹ Mitte manjo Maxaafa Qullichcha barsiissatto wodda qalli hiyya hasissaaxxi yaane maachcho? Barsiissaatteke manjixxa yannanna prograama ulfeessi. Fakkeennakeꞌe, loola haꞌnookeꞌni manji hiyyeexxa saate heqqedha gophaꞌnoolenna ati kinni hitettexxe saateꞌni mari. Ittani, taakkaa barachcho safaa baro barachcho qeerrisa gopha eloxxen. Qeerraaxxe yannaaꞌa heddo manjo Maxaafa Qullichcha barsiisseexxi dayyuwwa, barsiinsaanneki manji laqa hasaaꞌnaanni harumaa qicoꞌni bira eloxxe kaddeexxa haassootteen. Ittan, atin calli sammi hite haasoottoxxeꞌe. Barsiissaatteki manji hedaꞌneexxa yaane haasoꞌaaxxa yanna uwwi.—Fak. 10:19.

12. Mitte manjo Maxaafa Qullichcha barsiisa sanfanno woddanni herregi noꞌoki maachcho kada hasissa?

¹² Maxaafa Qullichcha barsiinsanno wodda herregi noꞌoki, safongenaaꞌninni barsiinsaanneki manji Yihowwaanna Yesuusii egeꞌnaashsha ittan insaꞌnaa anfeexxi jaalala nophphitaashsha gargaarate kada hasissaan. Iitta assitattoki, isi ateꞌninna ati affeettexxe Maxaafi Qullichchiinxe egeꞌnaꞌni kaddebaaki, Qaale Mageniinxeꞌni miꞌlachcho assaashsha gargaaratiten. (Huj. 10:25, 26) Hawaarya Phawuloosi barsiisaa wodda miꞌlachcho assaammaki, Yihowwa isoo egennonnaanna isoo eenonnaa noꞌoo gargaaroꞌaa ergeeke Yesuusi Kirsitoosiꞌnitemman. (1 Qo. 2:1, 2) Phawuloosi haaroxxi hordofoole worqet, birretinna fiixa kaddeexxe kinonni qixxoꞌaaka adabuwwa affaashsha gargaara hasisseeki mayeete kaddeexxa caꞌa asse kuleen. (1 Qo. 3:11-15) Konne haranga hasissaake adabuwwi giddiiꞌni mitti mitti adde, beekkuma, qalbeeffachchonna Yihowwaa sodaataten. (Far. 19:9, 10; Fak. 3:13-15; 1 Ph. 1:7) Atinnna barsiissaatteke orinni Phawuloosii fakkaatati, barsiissaatteki manji iimatike jaalalatike Anna isikeꞌni jabaxxa adde afaashshanna isinni jaaloomaashsha gargaari.—2 Qo. 1:24.

13. Kullaannexxa erga laqatixxa halcha afeeka manjo gargaarateꞌe ossunte anfeennexxanna isiꞌaa hendaannexxa leellinshannoki hittate? (2 Qorontoosi 10:4, 5) (Fakketanna uudi.)

¹³ Ossunte affeettexxanna barsiissaatteke manjiꞌaa heddaattexxa leellishati, Yesuusi barsiisaammaka ora hordofi. Barsiissaatteka manjo shookisaaka yookiin isi eeyyabaaka qortuma qortoxxe. Hasissaꞌnoole, barsiissaattexxi yaane isoꞌni aaga gophphaa wodda mitte yaadaꞌni turati irra wele wodda higge barsiissottaaꞌa waalde saꞌi. Barsiissaattexxa yaane adhdhateꞌe isi ifi qophpheessebaangi hunnati tirtirsateꞌe woꞌlaanati irra, dhugaa isi giddo hidda oltitaa qicoꞌni heqqi. (Yoh. 16:12; Qol. 2:6, 7) Maxaafi Qullichchi dhariinxa barachcho noꞌo diigaateꞌe woꞌlaannaannoke gollinni fakkeessaan. (2 Qorontoosi 10:4, 5 yaansis.) Ati barsiissaatteki manji qeerraaxxe yanna addataꞌni tureexxa yaane harumaaxxe yanna giddo addata waala haꞌurtaan. Tenneꞌaa haarooka golla ijaadhdhaashsha yookiin Yihowwaꞌni addataashsha gargaari. Iittate kaddoole edo lummise uudammaxxa yaane waala isoꞌni shollexxaan.—Far. 91:9.

HAAROOKI MANNI GUBAꞌE DAGAA WODDA

14. Haarooki manji gubaꞌe dagaa wodda hitta keesunsa hasissa?

¹⁴ Yihowwa haarooka gubaꞌe dagaaka manjo gaminsebeꞌnongi abindonnaa hasaꞌneen. Aada, nophphineexxi bakkanna galdumi insaꞌneki gargariti hedheekenna kadoole mitte illenni uuda hasissaan. (Yaq. 2:1-4, 9) Tenneꞌaa bukkii noꞌoxxa dagaake haaroke manniꞌaa jaalala anfeennexxa leellinshannoki hittate?

15-16. Bukkii noꞌoxxa dagaaki haarooki manni qofitti gateeshsha isoꞌni fakkaattabaashsha gargaarannoki hittate?

¹⁵ Mitti mitti haarooki manni bukkii noꞌoxxa dagaꞌneeki assendaꞌneexxa yaane uudatee yookiin wele loolaꞌni hedheeki manji dagaashsha tirtirseexxeete kada dandeettaan. Tenneꞌaa bukkii noꞌoxxa dageeke manjibaa shiqe haasoossateꞌe hooda hasissabaan. Isoo shookisabaa garinni haasoosse. Atinni welti ofoꞌlaashsha assi. Atike Maxaafa Qullichchanaaꞌninna atixxe qoꞌnetixxe borreessilenaaꞌni isinna atinni welti hordofaashsha assi, yookiin Maxaafa Qullichchanna qoꞌnetixxa borreessile gubaꞌetenaaꞌni aaxxe uwwi. Mitti Bukkiitika Galma uudoꞌaa dageeki manjichchi, gubaꞌe giddo hexxeexxe dayyuwwashsha oddoꞌwa gopheexxeꞌe, sodaateexxa isoo nageꞌa aadheeke dayyoꞌni haasoꞌeen. Dayyikinna isi sodaatabaashshanna Yihowwaxxi Naqaashe wele mannanaaꞌni gargariti hedheeke manna kaddeebaaxxa ifiseen. Kunni manjinna udumiiꞌni jabaateexxi cuuphemeen, dayyikkinna isoo jajjabeessee qico ijjenda dedheebaan. Haasoottattoxxa yaane xexxeꞌati: Gubaꞌe dageeke haaroke manjinni bukkiiti edonna uduma haasottatto wodda isi haasoꞌa hasabaaxxa yaane qora gophati isiꞌaa heddaatexxa leellishi.—1 Ph. 4:15.

¹⁶ Bukkiitixxa yanna Yihowwaxxe Naqaashe kadebaake mannixxe addeꞌaa ulfinna anfeennexxa leellishaa garinni haasoꞌatinna yaada uwwati, gubaꞌe dagaaki haarooki manni qofitti gatabaashsha assa dandeennannon. Insaꞌnee miitaaxxa yookiin hinge dangabaashsha assitaaxxa hiyya laꞌoonfata hasissabaan. (Tit. 2:8; 3:2) Fakkeennakeꞌe, Yihowwaxxe Naqaashe kadebaaki manni addataꞌneexxa yaane ijjenda busheeshinaaꞌnon. (2 Qo. 6:3) Iitta hexxeexxa yaane haasottabaashsha, ardiinka haasoꞌa shiqissaaxxi dayyuwwa giddiiꞌninni xexxeꞌata hasissaan. Insaꞌne gargaadhatee haꞌurtaaxxa hiyyuwwanna yaada aagaa garinni diideessati, bukkii giddo hedheeka Yihowwaxxe Naqaashe kadebaaka manna deenaꞌnebaaxxanna leellinshaan

17. Ergatenshateꞌni “seeriinxa qalbetixxa halcha” afeeke manninni afemmanno wodda herregi noꞌoki maachcho kada hasisa?

¹⁷ Manna hordofoole assatixxi huje edi irra wiinamiinxe kaddemmaxxeꞌe bari bariinxi hedho hasissaaka “seeriinxa qalbetixxa halcha” afeeka manna hasa ittin sunfannon. (Huj. 13:48) Tennee huje hunjanno wodda Maxaafa Qullichcha barantaashshanna gubaꞌe dangaashsha qoratenaaꞌni udumaa higa hasissabaan. Iitta assati ‘hedhotibaa akeekaake oraꞌni’ meꞌatee takkaarro adhdha sanfaashsha gargaarro.—Mat. 7:14.