Cuuphendettechchi Udumanna Yesuusi “Hordofa Ittin Sufi”

1-2. Mitti manji cuuphemeechchi uduma maa badhaadha alfa?

CUUPHEMME Yihowwake mini hadixxe una kada haranga gammachchiissaaxxen. Iitta hexxeexxa tarkaaffe adhdheeki manji Faarsanji Daawit: “Dallaꞌi atiki giddo hedhaashsha mellexxeettekinna shiqilsiteetteki manji gammadeeken” hiyye haasoꞌeeke yaadaꞌn addataan.—Faaro 65:4.

² Yihowwa ayyeenna mini hadi isikixxe una kadaashsha gaddachchabaan. Saxxeexxe qoꞌneꞌni mariꞌantennashshanni, isi shiqaaki isinni welt jabaxxa firunte afatee, halcha afeexxa kokeessaake manjinniten. (Yaꞌiqo. 4:8) Ifi Yihowwaꞌa mudhdhite cuuphendatto wodda, isinni welt gargarti hexxeexxa mittunte affatton. Okkoneechchi uduma “uggitattoba gophphatto qicoꞌn eebba atiꞌa dinbilqi assaaxxa” kokkatton.—Mil. 3:10; Ermi. 17:7, 8.

3. Ifi mudhdhe cuuphemeeki Kirsitaani heene jabaxxa maganne afee? (Mekibebi 5:4, 5)

³ Cuuphensha keꞌitiinxe tarkaaffe callan. Tarkaaffe tennee adhdhitettechchi uduma, rakka yookiin hega uushsho ateꞌn geltoolenna, ifi mudhdhitette wodda aaggeettaxxa kako muuxateꞌe dandeetettexxa duuchcha assiyyo hasissaan. (Mekibebi 5:4, 5 yaansis.) Yesuusike hordofeessa kaddettaxxee fakkeenna isikanna ajaja dandeesissee qicoꞌn jabeenniki hordofi. (Mat. 28:19, 20; 1 Pheex. 2:21) Tinni qoꞌne tenne yaanuwwa assa dandeetattoshsha gargaartaan.

ABARINNAA HEGA UUSHSHO HEXXEEꞌNAAN YESUUSI “HORDOFA ITTIN SUFI”

4. Yesuusixxi hordofooleeyye ‘abariinka haqichcho dulkitaꞌneeki’ hoone garinnite? (Luqa. 9:23)

⁴ Cuuphendettechchi uduma rakko ateꞌni geltabaan hiyyotebaan. Yesuusi hordofooleeyye isixxi ‘rakkotika haqichcho dulkexxaaxxa’ farra assee kuleen. Insaꞌnenna dulkedha hasissaammaki “bara barandeꞌnitemman” (Luqqaasi 9:23 yaansis.) Yesuusi iitta hiyyeeki, hordofooleeyye isixxeꞌn duuchchinii wodda abari geyaan hiyyateetee? Waawwot. Isi iitta hiyyeeki eebba hexxaaꞌnaanni hega uushsho geltaaxxa hubachchiisateeten. Mitte mitte hega uushsho kinni haranga jabaxxe kaddoꞌaa dandeettaan.—2 Ximo. 3:12.

5. Yesuusi ifixxa laꞌo tolcha assaaki manji, maa badhaadha alfaaxxa kako aagee?

⁵ Dedha mini hado atikenaaꞌninni shorrichchi geyaaxxinna hedha dandeettaan, yookiin Mageniinxa Mootumma hedho atixxeꞌn edisateꞌe hitatto wodda maalakeꞌe hasissaaxxa yaane gussa, tolcha assitattoxxinna hexxaan. (Mat. 6:33) Iitta assitaattexxe kaddoole, Yihowwa addetixxa huje atixxa uudaꞌneexxa kokiinke kada dandeetatton. (Ibra. 6:10) Ittan kunni Yesuusiki jechchinna dhugaate kadeexxa hedho atixxeꞌn uuddatton: “Aniꞌaannaa gammachchiissaaxxe odoꞌa hiyyaa wodda mine yookiin dayyuwwa yookiin ama yookiin anna yookiin oose yookiin fichcha waaleeki duuchchi, taꞌa konne baroꞌn, surrichchinginninni minuwwa, dayyuwwa, amuwwa, oosuwwanna fichchuwwa dhibba dachchaꞌa, daggaaxxe aadaꞌni kinni bari bariinxa hedho alfaan.” (Marq. 10:29, 30) Ati alfitaatteki badhaadhi tolcha assitettexxe yaanenaaꞌn haranga caalaaken.—Faaro 37:4.

6. Cuuphendetechchi uduma “maaliinxa yorte” faachcheffata ittin ediꞌa sufa hasisseeki mayeete?

⁶ Cuuphendettechchi udumanna “maaliinxa yorte” faachcheeffata hasissaan. (1 Yoha. 2:16) Buutotinna Addaaminaaꞌn dhaaldeetexxa cubbo affeettaxxeeten. Mitte mitte yanna Hawaariya Phawuloosi hiyye borreessemmashsha ateꞌninna laqendaaxxi yanna hedha dandeettaan, isinna iitta hiyye borreesseen: “Giddo anxi Mageniinke seeraꞌn yoꞌoshsha gammaddaan, bisi anki giddo kinni, sammo anxike seerinni welt lolendaꞌneexxanna bisi anki giddo hedheeke cubbotike seeriꞌa aneꞌe boojiꞌe uwwaꞌneeka wele seera uudaannen.” (Roome 7:22, 23) Cubbotixxe yortenaaꞌn kexxeexxa adde woxxattoxxinna hedha dandeettaan. Kaddomaleꞌe, Yihowwaꞌa ifi mudhdhitettexxa yanna aaggeettaxxa kako qalli hitaattexxe kaddoole, tenne ateꞌn geltaꞌneexxa hega uushsho faachcheeffatattoxxa hunna alfitatton. Ifi mudhdhitete wodda aaggeettaxxi kako hega uushsho faachcheeffata shollaxxe kaddaashsha gargaartaan. Hitta?

7. Yihowwaꞌa ifi mudhdhiteeteke kada, isiꞌa addatendeeteke kaddattoshsha gargaartaaki hittate?

⁷ Yihowwaꞌa ifi mudhitette wodda ifi waakkatteeten. Tinninna ifixxa halcha yookiin Yihowwaꞌa yaadisa dandeettaaxxa maaliinxa yorte muuxa gophateeꞌe waawwot hiyyoten. (Mat. 16:24) Tenneꞌa hega uushsho ateꞌn geltaa wodda ‘maa assennexxa woyya?’ hitaꞌn hedati yanna adhdhiyyo hasissabaan. Yihowwaꞌa addatemati gadhi darre hedheeka yaada gibateꞌe edisseen murteessexxeetten. Yihowwaꞌa gammachchiisatee qalbetixxa murte assexxeeten. Iitta assitatto wodda Iyyoobi fakkaattatton. Isoꞌni haranga jabaki abari geyeexxenna kaddoole isinna shenuntet: “Addatensha anxa xureessedhabeꞌnon!” hiyyeen.—Iyyo. 27:5.

8. Ifi mudhdhitette wodda kadhatteettaxxa kadha qalli hiyya, rakko ateꞌn galtaa wodda faachchefata dandeetattoshsha gargaartaaki hittate?

⁸ Yihowwaꞌa ifi mudhdhitette wodda kadhatteettaxxa kadha qalli hiyyat, heene hega uushshonna injifata dandeettattoka jabeenna alfitatton. Fakkeennakeꞌe, wele manjike bultetike jaaliꞌa jaalalatika beesisa leellishshaatte? Iitta assa ijjenda hasissabaan! Iitta assa gophatee edisseen kako aaggeetten. Konne orinni seeri beloxxe kaddeexxi yorte hidda oltiteechchi uduma idaggaaxxe rakkonaaꞌn gargaarendatton. Ittan ‘fuggaaleeyyetike oranaaꞌn’ “bayyattatton.”—Fakke. 4:14, 15.

9. Ifi mudhdhiteetta wodda kadhatettaxxa kadha qalli hiyya, Yihowwaxxa mageneeffachcho hedho atixxeꞌn edissattoshsha gargaartaaki hittate?

⁹ Mitti manji Kirsitaaniinxe buukkiixxa barra huje uwweexxe kaddoole maa assitatto? Maa assitattoxxa egendeetten. Huje uwwendeebaa edin Darren iitta hexxeexxi huje uwwendoole waawwot hiyyateꞌe murteessexxeetten. Tenneꞌa, huje tenneꞌe adhdhat, assexxattoxxi murte eloxxe yookiin elobaaxxe kaddeexxa egeꞌnateꞌe woꞌlaana hasissabaan. Yesuusi Anna isika gammachchiisatee afeemmaxxa shenunte qalli hiyyat, atinna mitte yaane Mageno atika yaadissaaxxe kaddeexxa egendotole heene yaanenna hirbangeꞌn jabeenniki giba dandeetatton.—Mat. 4:10; Yoha. 8:29.

10. Cuuphendettechchi uduma Yesuusiꞌi ‘hordofa ittin suffattoshsha’ Yihowwa gargaaraaki hittate?

¹⁰ Rakkonna hega uushsho, Yesuusi ‘hordofa ittin sufatee’ affeetexxa shenunte leellishshattoshsha ora bandaan. Iitta assitaattexxe kaddoole, Yihowwa ateꞌe gargaaraꞌneexxa kokiinke kaddatton. Maxaafi Qullichchi iitta hiyyaan, “Mageni addatemeeken, baꞌedha dandeetinabaaxxi iimi darre hexxeexxi hega uushsho haꞌnooꞌn geltoꞌaa waalabaan, tenneꞌa iimi darre, hega uushshoteꞌn jaabeenniki ossa dandeetinaashsha, hega uushsho geltaa wodda fuldinaaka ora qophpheessaan.”—1 Qoro. 10:13.

YESUUSI HORDOFA ITTIN SUFFATTOKI HITTATE?

11. Yesuusi hordofa dandeennannoki mitti eloki ori hoonte? (Fakke uudi.)

¹¹ Yesuusi, Yihowwaꞌa woꞌma qalbenni ergatemaamman, ittan kadhatinna isibaꞌa shiqaamman. (Luqa. 6:12) Cuuphendetechchi uduma Yesuusi hordofa itti suffattoki mitti ori, Yihowwabaaꞌa shiqqattoshsha gargaartaaxxa yaane duuchchiin wodda assatiten. Maxaafi Qullichchi: “Hittee qiconna nophphineenneke kandoonolenna, konne oraꞌninni seeriki meꞌa ittin sunfo” hiyyaan. (Filph. 3:16) Heddo yanna Yihowwaꞌa baꞌla qicoꞌn ergatematike herregaꞌn gelteexxe dayyuwwaxxa hedhotixxa baranno laqqatton. Dedha tinni dayyuwwa Mootummatike Wengeelaawetike Barachchoti Mineꞌn baratteexxe yookiin gargaasi adda hasisaaxxe bakkabaꞌa meꞌite ergatemateꞌn hexxeexxe kada dandeettaan. Atinna konne herregaꞌn geyatee hassaattole, tinninna eloxxe yaanen. Yihowwaki ardi ergachchotixxa huje baꞌlisatee hasaꞌneen. (Huje 16:9) Taꞌixxe yannaꞌn tennee yaane assa dandeꞌa gophphaattolena? Tenne yaanuwwa assa dandeꞌeeke manni butti darre hexxetteshsha assite ifi heddoxxe. Kirsitaanakenaaꞌn heqqendaaxxi mitte yaane ossunteten. (Mat. 10:22) Affeettexxe dandeettenninna hexxetteke jeejinni, Yihowwaꞌa ergatematixxa laꞌo shollisse uuddoxxe. Kunninna cuuphendettechchi uduma Yesuusi hordofa ittin sufa dandeetattoke laꞌo afeeke oran.—Faaro 26:1.

12-13. Hinaaffe atixxi qiiddoole maa assa dandeetatto? (1 Qorontoosi 9:16, 17) (“Gongichcho Uurrissoxxe” hitaꞌneexxa kollo uudi)

¹² Kadha atixxi qalbetixxe kaddeechcho fakkaata gophphaꞌnoole, yookiin ergatenshateꞌn gammashsho alfa gophphaatole maa assitatto? Maxaafa Qullichcha yaansissatto wodda edishsha gammashsho alfa gophphaattole maa assitatto? Cuuphendetechchi uduma iitta hexxeexxi rakko ateꞌn geltoole Yihowwaki manfasi atinni hedhebaashsha assite heddoxxe. Qullichcha manjo kada gophpheettaxxee irri atiki jijjiirema dandeꞌaan. Hinaaffe atixxi qiiddaꞌn meꞌitaꞌnoole hawaariya Phawuloosika fakkeenna qalli hiyyi. Isinna Yesuusi fakkaatateꞌe woꞌlaancho assaꞌneexxe kaddoolenna yanna yanna kinni hasaꞌneexxa yaane assatee hinaaffe heenoꞌmitaammaxxa egeꞌneemman. (1 Qorontoosi 9:16, 17 yaansis.) Iittanna hiyyeen: “Eeyyabeꞌnongi assaannexxenna kaddoole, itisatixxi maganne aniꞌa uwwendeen.” Kaddoolenna, Phawuloosi iitta hexxeexxi hedino hexxeeꞌnaanni ergachchotixxa huje muuxatee murteessedheemman.

¹³ Tenneꞌa, atinna qullichcha kadebaake yaadi atikeꞌn irkatte murte assexxoxxe. Toggitte kaddeexxa yaane assatixxi halcha hedhanna gophphoole toggitte kaddeexxa yaane assatee murteessedhi. Iitta assitaattexxe kaddoole yaadi atiki jijjiiremaan. Eloxxa manfasiinxa yaane assatixxa aada jabeessedha, cuuphendettechchi uduma Yesuusi hordofa ittin suffattoshsha gargaartaan. Addetiki jaaluwwi jabeenniki Yihowwaꞌa ergatendaattexxa uuda wodda jajjabaataan.—1 Tese. 5:11.

“IFI QOꞌNISSE. . . IFI FIRFIRSE”

14. Cuphendettechchi uduma, duuchchinii wodda ifi hega uudiyyo hasissaaki heene yaanuwwannite? Hitta? (2 Qorontoosi 13:5)

¹⁴ Cuuphendettechchi uduma hexxette qico duuchchini wodda ifi uuda eloxxen. (2 Qorontoosi 13:5 yaansis.) Duuchchinii wodda kadhattaattexxa, yaansissaattexxa, Maxaafi Qullichchiinxa qoꞌne assitaattexxa, bukkiiteꞌn afendaattexxanna ergachchoteꞌn qoodendaattexxa hedho atixxanna assitaattexxa yaane saxxaꞌn saxxaꞌni toꞌat. Tenne yaanuwwanaaꞌn gammashshonaa laꞌo alfitattoshsha gargaaraaka toora halsi. Fakkeennakeꞌe, ifi konnee qortumuwwa qori: ‘Hundayyetixxa Maxaafi Qullichchiinxa barachcho wele manjiꞌa ifisa dandeꞌaane? Ergachcho anxi haranga gammachchiissaaxxe kaddaashsha assa dandeꞌannoki weli oruwwi hedhee? Kadhataanne qici woꞌma qalbenni Yihowwaꞌn addataannexxa leellishaakee? Duuchchinii wodda Kirsitaaniinxe bukkiiꞌn afemaanne? Bikkiiteꞌn miꞌlachchot caqasaanna yaada uwwaanneka elcha dandeꞌannoki hittate?’

15-16. Hega uushsho injifateeke mitte dayyixxe hedhotixxe barannonaaꞌn maa barachcho alfiteete?

¹⁵ Gonphe ifixxa egeꞌnatee sobi belo ifi qoꞌnisa eloxxen. Dayyi Roobertixxi hedhotixxi baranno konnee yaada adda ifissaan: “20 woggaꞌn hedhennaxxa yanna gamisa bara calla hujaannaxxi huje hexxemman. Mitte barra welt hunjaannaxxi belto iseba mine aneꞌe yexxeen. Isenna ‘mine qofitti eloxxa yanna saꞌisinannon hiteen.’ Safokeꞌn heenonxa kaddabaaxxa buutto haasoꞌennechchi uduma, muuxamakeꞌn waawwoti hiyyennexxi, buutotinna mayeete kaddeexxa ifisennen.” Rooberti hega uushsho tennee injifata galateeffachchiissaaxxen. Tinni yaane kadde saxxeechchi uduma, silaat tenne yaane, konnenaaꞌn caale garinni abida dandeꞌaammaxxa hubateen. Isinna iitta hiyyeen: “Yooseefi, Phooxifaaraxxi miniinxi ama haasootteenge hirbaꞌn waawwot hiyyemmashsha ani hiyyebeꞌnon.” (Dada. 39:7-9) Waawwot hiyya hittee qico haꞌurtaꞌneexxe yaane kaddeexxa egeꞌna manbeꞌa assiteen. Tinni hega uushsho, Yihowwanni welt afeennexxa firunte jabeessedha hasissaaxxa egeꞌnannoshsha gargaarteen.”

¹⁶ Atinna Roobertishshanni ifi hega uudat laꞌo alfa dandeettatton. Hega uushsho injifatte saxxoottole ifi iitta hitte qori, ‘Waawwot hiyyatee hittee qico turene?’ Jijjiirra assiyyo hasissaaxxa hubattotole ifi tuffattoxxe. Tenne irra gonphe ifixxa egendettexxee gammadi. Tennee yaane uuddaaxxa kadhat, ittan Yihowwake qullichchi seerixxe hundaayyeꞌn hedhatee assexxeettexxa murte jabeessedhatee terkaaffe adhdhi.—Faaro 139:23, 24.

17. Rooberitixxi hedhotixxi baranno summi Yihowwaki ulfaateexxa leellishshaaki hittate?

¹⁷ Taꞌaanna Roobertinaaꞌn alfinannoxxi wele barachcho hexxeen. Ittin sufeexxi: “Iseka yeꞌinjo gibennechchi uduma, ‘Hega uushsho saxxeetten!’ hiteen, Maa hiyyatee hasseete? Hiyyennen. Isenna konneechchi edi darre Yihowwaxxe Naqaashe kadeemmaki jaali iseki, duuchchiinxi Yihowwaxxe Naqaashe kaddeexxi dargaggeeyye, lame hedho hexxaꞌneexxanna iitta hexxeexxa futtiiꞌi alfitoole udumiꞌaa uuddabaaxxa iseꞌn haasoꞌeemmaxxa kuldeen. Tenneꞌa kunni iseke jaali aneꞌe hega uuddaashsha iseꞌn haasoꞌeemman. Aninna Yihowwaka summa ulfeesisa hittee qico gammachchiissaꞌneexxe yaane kaddeexxa uudennen.”

18. Cuuphendettechchi uduma maa assatee mudhdhiteete? (“Gammashsho Alfitattoshsha Gargaaraaka Yaaduwwa.” hitaꞌneexxa kollo uudi)

¹⁸ Ifi Yihowwaꞌa mudhdhite cuuphendatto wodda, hiini hega uushshonna ateꞌn geltoole summa isika qulloonsatee hassaattexxa leellishshatton. Ittan ateꞌn geltaꞌneexxa rakkonna fachcheeffatateꞌn hexxetexxa hega uushsho duuchcha Yihowwa egeꞌneexxa kokkatton. Isiꞌa addatendeetteke kaddottaaꞌa assitaattexxa woꞌlaancho duuchcha eebbisaan. Manfasi isikinni ateꞌe jabeessaaxxa addat. (Luqa. 11:11-13) Cuuphendetechchi uduma Yihowwake gargaarsinni Yesuusi hordofa ittin sufa dandeetatton.