Ifi Yihowwaꞌa Mudhdhateꞌe Qophpheeffatteete?

1-2. Mitti manji cuuphemebaa edi darre maa assa hasissa?

SAXXEEXXE onde wogguwwaꞌn, mitte miiloone iimi gama hedheeki manni cuupheme Yihowwaxxe Naqaashe kadeen. Konne manni giddiiꞌn heddi dhugaa barateeki keꞌitiinke dhibbeessoke baroꞌn hedhemmake Ximootoosishsha ‘oosummandeꞌniten.’ (2 Ximo. 3:14, 15) Weli kinni, Yihowwaa egeꞌneeki lumolla kadeechchi uduman. Shiixxoxxe yanna edi darre, Maxaafa Qullichcha barattaammaxxi 97 woggaxxi geercho cuuphende Yihowwaxxe Naqaashe kaddeen!

² Maxaafi Qullichchiinxe baratto kaddoottolenna yookiin nophphitaatteki dhugaatike mineꞌninna kadoole cuuphema hassaate? Iitta heddaatole kunni eloke herregan! Cuuphemati edi darre ifi Yihowwaꞌa mudhdhiyyo hasissaan. Tinni qoꞌne ifi Yihowwaꞌa mudhdhate hiyyo maa hiyyote kaddeexxa ifissaan. Ittan ifixxa hedho Magenokee mudhdhateenna cuuphemateꞌe qophpheeffatatenaaꞌn udumaa higa gophphaateki mayeete kaddeexxa egendattoshsha gargaartaan.

IFI MUDHDHATE HIYYO MAA HIYYOTE?

3. Yihowwaꞌa ifi mudhdheemmake mannika fakkeenna Maxaafa Qullichchakenaaꞌn kuli.

³ Maxaafi Qullichchiinsha, ifi mudhdhate hiyyo mitte qullichchi yaadiꞌa ifi foꞌatika jeeja ifissaan. Isiraꞌeelooti ifi Yihowwaꞌa mudhdhiteemmaxxe gosan. Kaddoolenna, tenne gosa giddiiꞌninni gargarti hedheeke orinni ifi Yihowwaꞌa mudhdheemmaki mitti mitti manni hedhemman. Fakkeennakeꞌe, Aarooni ifi Magenokeꞌe “mudhdheeke kadeexxa leellishaaka qullichcha beesisa” umokeꞌn usudhdheemmake ruufaꞌn edi gamiiꞌn calacala hitaaxxa bexxitte worqe uggudhdheemman. Tinni bexxitte worqe, isi Israꞌeelootiinke lumoke kayinaatichcho kade, Yihowwaꞌa gargarti hedheeke orinni ergatemateꞌe mudhdheexxa leellishshaaxxemman. (Zele. 8:9) Naaziraꞌeelootinna gargarti hedheeke orinni Yihowwaꞌa ergatemateꞌe ifi mudhdheemman. “Naaziraꞌeelichcho,” hitaaxxi hiyya naazirʹ, hitaaxxe Ibraysixetixxe hiyyanaaꞌn daggeexxe kaddaa wodda “Gargarti higeeke,” yookiin “Ifi mudhdheeke “hitaaxxen. Naaziraꞌeelooti Muuseki seeri insaꞌnaꞌa fulcheexxe gabalaxxe hundaayyeshsha hedhaamman.—Zehu. 6:2-8.

4. (a) Yihowwaꞌa ifi mudhdheeki manji qullichchi yaadiꞌa ifi gargarti assaaki hoone orinnite? (b) Ifi ‘waakkatate’ hiyyo maa hiyyote? (Fakke uudi.)

⁴ Yihowwaꞌa ifi mudhdhitatto wodda, hordofeessa Yesuusi Kirsitoosike kadateenna hedho atixxeꞌn lumoxxa bakka uutaattexxe yaane iimi darre Mageniinxa fedhii assateꞌe mellexxeette hiyyoten. Ifi mudhdhe Kirsitaana kadeeke manjonaaꞌn heqqendaaxxi yaane maachcho? Yesuusinna iitta hiyyeen: “Anee hordofatee hasaꞌneeki ayyinna hedhoole, ifi waakkatowwaal.” (Mat. 16:24) Girketike laagadanaaꞌn tikemeeki “ifi waakkata” hiyyaaki daali “ifiꞌa waawwot hiyya hasissaan” hiyyaake daalinni weli shiqaan. Yihowwaꞌa, ergatemateꞌe ifi mudhdhiteettaxxeꞌe, Yihowwaxxe fedhiinni weli gibbaaxxa heene yaanenna waawwot hiyya hasissaan. (2 Qoro. 5:14, 15) Tenne waawwot hiyya hasissaaxxe yaane giddiiꞌn, “maalinxe huje” kaddeexxe saalinxe baalagunten. (Gela. 5:19-21; 1 Qoro. 6:18) Konne seeriꞌa ajajeensha hedho ateꞌn haꞌurtaashsha assitaa? Waawwoti, Yihowwaꞌa eetatteexxe kaddoole seeri isiki atiꞌa laꞌo afeeke kadeexxa kokkatton. (Faaro 119:97; Isa. 48:17, 18) Nikkoolaasite hiyyemmaki dayyi iitta hiyyeen: “Kunni qullummatiki Yihowwaki seeri hansennexxa yaane assinabeꞌnoshsha, kutammake usuriinke minike dallaꞌishsha fakkaatoolenna neenqi noꞌoꞌn miidhdhama geesisabaashsha ijaarreeke dallaꞌishsha assinne heda dandeennannon.”

5. (a) Yihowwaꞌa ifi mudhdhitattoki hittate? (b) Ifi mudhdhatixxenna cuupheenshatixxe oddoꞌn hexxeexxi gargarunte maachcho? (Fakke uudi.)

⁵ Yihowwaꞌa ifi mudhdhitattoki hittate? Isoꞌo calla mageneeffatateenna hedho atixxeꞌn fedhii isixxa edisateꞌe kadhat kako aagatiten. Okkooꞌn, Yihowwaꞌa “woꞌma qalben, woꞌma lubbon, woꞌma sammonninna woꞌma hunnani” eeyya ittin sufateꞌe kako aaggatton. (Marq. 12:30) Ifi mudhdha, atixxenna Yihowwaxxe oddo callaꞌn kaddaꞌneexxe yaanen. Wele darrenni kinni, cuupheensha ifi mudhdhitetteexxa ardakee leellishshattoke oran. Ifi mudhdha qullichcha silata kademmaxxeꞌe, atinna ifinaaꞌn heqqitattashshan, Yihowwanna konnee silata muuxxotaa hasaꞌneen.—Meki. 5:4, 5.

YIHOWWAꞌA IFI MUDHDHITAATTEKI MAYEETE?

6. Mitti manji ifi Yihowwaꞌa mudhdhaashsha tirtirsitaaxxi yaane maachcho?

⁶ Yihowwaꞌa ifi mudhdhitattoshsha assitaꞌneexxi taakkaxxi buuto, isiꞌa affeettexxe jaalalan. Tinni jaalala sinsinnetixxebaan. Tenneꞌa irra, ‘toggitte egeꞌnanninnaa’ ‘manfasiinxe hubannonni’ hidda oltiteexxen; Yihowwaꞌa uuddaaxxa barattetexxi yaane isiꞌa affeettexxi jaalala nophphitaꞌn meꞌitaashsha assitaan. (Qola. 1:9) Maxaafa Qullichcha qoꞌnisette wodda (1) Yihowwa dhugaandinni hedheexxa, (2) Maxaafi Qullichchi manfasiinxe akeetten borreessendeexxe Qaale kadeexxa, ittan (3) Yihowwa fedhii isixxa muuxateꞌe orga isixxa laꞌoonfataꞌneexxa kokeesiteeten.

7. Magenoke ifi mudhdhinebeꞌno edi darre assiyyo hasissaaxxi yaane heente?

⁷ Yihowwaꞌa ifi mudhdheeki manji, Mageniinxe Qaalexxa hundaayye barachcho egeꞌnaan, ittan barateexxe yaanenni weli aagaake garinni konne qullichchi seerixxe hundaayyeshsha hedha hasissaan. Jeeji isaꞌaa uwwedhee qicoꞌn baranteexxa yaane welekee kulatee dandeꞌeexxa duuchcha assaan. (Mat. 28:19, 20) Yihowwaꞌa afeexxi jaalala nophphiteꞌeen, ittan isoꞌo mageneeffatatixxa qalbe giddixxa halcha afeen. Ateꞌninna iittan fakkaattaꞌnee? Iitta hexxeexxa jaalala afa, ifi mudhdhitaatekinna cuuphendaateki, atika Maxaafi Qullichchiinka barsiisaanjonna hado atika gammachchiisateꞌe yookiin jaaluwwa atixxa fakkaatateꞌe hite assitaabexxoxxe yaane kaddeebaaxxa hubattattoshsha assitaan.

8. Yihowwa atiꞌa asseexxe yaaneꞌa galateeffata, ifi isiꞌa murteesseexxattoshsha gargaartaaki hittate? (Faaro 116:12-14)

⁸ Yihowwaꞌa ifi mudhdhateꞌe murteeseꞌnaanneki isi noꞌaa asseexxa eloxxa yaane duuchcha hendanno woddan. (Faaro 116:12-14 yaansis.) Maxaafi Qullichchi, Yihowwaꞌa “duuchchiinxe eloxxe yaanekenna qullitte yaaneke uwwallo” hiyyaan. (Yaꞌiqo. 1:17) Isixxe uwwa duuchchinaaꞌn haranga caaldeexxi, belto isika Yesuusi tolcha asse uwweexxen. Tinni hittatta manbeꞌa assitaaxxe uwwa kaddeexxa hedi! Tinni wodonna Yihowwan welti jabaxxa firunte affattoshsha ora atiꞌaa bandeen. Ittan, baro baro hexxattoka tasfanna uwween. (1 Yoha. 4:9, 10, 19) Yihowwaꞌa ifi mudhdha, Yihowwa konne qicoꞌn jaalala atiꞌa leellisheexxeenna wele atiꞌa badhaaseeke badhaadhuwwiꞌa saadino affeettexxa leellisha dandeettattoke oran. (Zedag. 16:17; 2 Qoro. 5:15) Tennee saadino leellisha dandeettattoki qici, Baro Baro Gammadiki Hedhi! Hiyyaake maxaafaꞌn hafuura adhdha 46, beddo 4 xxeꞌn Uwwa Haꞌnooxxa Magenokeꞌe Shiqisse hitaꞌneexxe sase daqiiqqixxe viidiyoꞌn ifisendeen.

IFI MUDHDHATEENNA CUUPHENSHATEꞌE QOPHPHEEFFATTEETE?

9. Mitti manji Yihowwaꞌa ifi mudhdhaashsha dhiiba hasissabaaki mayeete?

⁹ Dedha ateꞌn ifi mudhdhateenna cuupheenshateꞌe qophpheeffatteebexxochcho fakkaata dandeettaan. Ittan Yihowwake seerinni weli aage hedhatee, hittato wodda hedho atixxeꞌn jijjiirra assexxottaꞌanna yookiin adde atixxa jabeessedhateꞌe yanna hassattoxxinna hexxaan. (Qola. 2:6, 7) Duuchchiniinxe Maxaafi Qullichchiinxe barattooleki nophphichchi weli qixxetebaan, ittan duuchchiinxi dargaggeeyye weli fakkaataake woggatike koobboꞌn ifi mudhdhateenna cuuphemateꞌe qophphootteexxe kaddabaan. Assitottaaꞌa hassaatteexxe yaanexxe hundaayyeꞌn, manfasiinka nophphichcho atika welki hokkokkissebexxong memmekisateꞌe woꞌlaancho assi.—Gela. 6:4, 5.

10. Ifi mudhdhateenna cuuphemateꞌe qophpheeffatteebexxoxxa addattaatole maa assa dandeettato? (“Dhugaatike Mineꞌn Nophphaꞌneeke Manniꞌaa” hitaꞌneexxa kollo uudi.)

¹⁰ Konne qicoꞌn, Yihowwaꞌa ifi mudhdhateꞌe qophpheeffata gophpheetteexxa addattaatole, konne herregaꞌn geyateꞌe tarkaaffe adha ittin ediꞌa suf. Hasissaaxxa jijjiirra assateꞌe assitaattexxa woꞌlaancho duuchcha eebbisaashsha Yihowwaꞌa kadhat. (Filph. 2:13; 3:16) Isi kadha atixxa laqaꞌneexxanna laqe hiissaꞌneexxa kokinke kadi.—1 Yoha. 5:14.

MITTI MITTI HOODAꞌNEEKI MAYEETE

11. Yihowwa isiꞌa addatemmeenneke kandannoshsha gargaaraꞌneeki hittate?

¹¹ Mitti mitti manni ifi mudhdhateenna cuuphemateꞌe qophphoꞌeenni hedhe hoodaan. Dedha kunni manni, ‘Jabaxxa cubbo huje gubaꞌetenaaꞌn fugussemunnu?’ hiyye hedaaxxi hedha dandeettaan. Atinna iittan sodaattaatexxe kaddoole, Yihowwa ‘hasaꞌneeke oraꞌn meꞌitattoshshanna’ woꞌma garinni isoꞌo gammachchiissattoshsha hassaatexxa yaane duuchcha uwwaaxxa addat. (Qola. 1:10) Ittan toggitte kaddeexxa yaane hujjattoshsha hunna uwwaan. Isi heddi manni toggitte kaddeexxa yaane assaashsha gargaarati, tenne assa dandeꞌaaxxa kokeesseen. (1 Qoro. 10:13) Kirsitaaniinxe gubaꞌe giddiiꞌn fugussemaꞌneeke manniki laakkoossi shiixxedheeki, tenne buutonaaꞌn kexxeexxinniten. Yihowwa ardi isiki addatemeeke kadaashsha gargaaraꞌneen.

12. Haꞌuritaaxxa cubbo hujatenaaꞌn bayyata dandeennannoki hittate?

¹² Qullichcha kadebaaki huuni manji toggitte kaddebaaxxa yaane hujateꞌe hega uudemaan. (Yaꞌiqo. 1:14) Kaddomaleꞌe, hega uushsho ateꞌn geltaa wodda maa assitattoxxa melledha dandeettattoki ati ifiꞌaanden. Dhugaatishsha hexxoole hedho atixxa hitta akeekkattoxxa murteessexxattokinna atenden. Kaddomaleꞌe, mitti mitti manni, noꞌoꞌni laqendaaxxinna assa dandeennannoxxi yaane hunna noꞌoxxi iimi darre hexxeexxe hiyyaan. Tinni kinni dharaken. Elobaaxxa yaane assatixxa halcha injifata dandeettatton. Kaddoolenna mitti mitti manni elobaaxxa yaane assitattoshsha dhiibaꞌnoolenna tenne yaane assa gophateꞌe faachcheeffata dandeettatton. Tenneꞌa duuchchini wodda kadhat, ifixxa Maxaafi Qullichcha qoꞌnisatixxa aada nossedhi. Kirsitaaniinxe bukkiiꞌn afemi. Addattaattexxa yaanenna welekeꞌe kuli. Yihowwaꞌa ifi mudhdhateꞌe aaggeeteka silata, muuxxattoshsha ateꞌe jabeessitaaxxa tenne yaanuwwa duuchchinii wodda assi. Ittan tenne yaane assitattoshsha Yihowwa ateꞌe gargaaraaxxa deetoxxeꞌe.—Gela. 5:16.

13. Yooseefi hitta hedheeke fakkeenna noꞌaa leellishee?

¹³ Hega uushsho geltaa wodda maa assitattoxxa edisseen murteessexxoottole, Magenokeꞌe ifi mudhdhatee aaggeettexxa kako heqqedha shollaxxe kaddeexxa egendatton. Maxaafi Qullichchi heddi manni cubbichchange kade iitta hexxeexxa yaane asseexxa haasoꞌaan. Fakkeennakeꞌe, Phooxifaaraxxi miniinxi ama, Yooseefiꞌi higge higgeen maxxissaamman. Kaddomaleꞌe, isinna assedha hasissaaxxa murte ediseen egeꞌneemman. Maxaafi Qullichchi isinna: “Haranga elobaaxxa yaane assati Magenokeꞌn hitta asse cubbo hujanno?” hiyyati ‘fedhiitike kada gopheexxa’ haasoꞌaan. (Dada. 39:8-10) Yooseefi, ise tennee woꞌlaancho assitebaa edin darren maa assa hasissaaxxa ediseen egeꞌneemman. Iitta assa isixxi isoꞌn gelteexxi tinni hega uushsho, shollexxaashsha assiteen .

14. Elobaaxxa yaane huja gophatee waawwot hiyya barata dandeennannoki hittate?

¹⁴ Atinna Yooseefi fakkaata dandeettattoki hittate? Hega uushsho geltaa wodda maa assitattoxxa taꞌani murteessedha dandeettatton. Yihowwa gibaaxxa yaane hirbangeꞌn waawwot hiyyannaa ettenee yaane heda gopha barat. (Faaro 97:10; 119:165) Tinninna erqe kayya daaqqabexxoshsha assitaan. Iitta hexxeexxi yaane geltaa wodda maa assitattoxxa edisseen egendeettaxxeꞌe raakkattabexxon.

15. Mitti manji qalbe mitten, Yihowwaꞌa halsaꞌneexxa leellisha dandeꞌaaki hittate? (Ibraawiyaane 11:6)

¹⁵ Dhugaa alfiteettexxa egendoottolenna ittan Yihowwaꞌa woꞌma qalbenni ergatemateꞌe hassaattexxenna kaddoole, ifi mudhdhitabexxoshshanna cuuphendabexxoshsha, dedha ateꞌe udumaa harkissaaxxi mitte mitte yaane hedha dandeettaan. Mootichcha Daawitika fakkeenna qali hiyya dandeettatton. Yihowwaꞌa: “Mageno anke, aneꞌe adda firfirsi, qalbe anxanna egeꞌn. Memmekis, aneꞌe yaadissaꞌneexxa yaanuwwa egeꞌn. Giddo anxeꞌn elobaaxxi yaane hexxoole uudi, bari bariinke oraꞌninna aneꞌe akeeki” hitte kadhata dandeettatton. (Faaro 139:23, 24) Yihowwa “qalbe mitten isoꞌo [halsaaka]” duuchcha eebbisaan. Ifi mudhdhatikenna cuuphematike hirregaꞌn geyatee assitaattexxi yaane, atinna iitta assitaattexxa leellishshaaxxen.—Ibraawiyaane 11:6 yaansis.

YIHOWWABAA SHIQA ITTIN EDIꞌAA SUFI

16-17. Dhugaatike mineꞌn nophpheeka manjo Yihowwa harkisa dandeꞌaaki hittate? (Yohaannisi 6:44)

¹⁶ Yesuusi hordofooleeyye isixxa Yihowwa isibaꞌa harkiseexxa haasoꞌeen. (Yohaannisi 6:44 yaansis.) Kunni hitta manbeꞌa assaake yaada kadeexxanna maa hiyyote kaddeexxa hedi. Yihowwa mitte mittenga manjo isibaa harkisaꞌneeki giddo isixxeꞌn eloxxa yaane uudeeten. Isi mitte mittenga “gargarti hexxeexxe karrashsha” yookiin “fiixa karrashsha” asseeten uudaꞌneeki. (Zedag. 7:6; lqj.) Ateenna uudaꞌneeki iittanden.

¹⁷ Dedha ati dhugaatike mineꞌn nophiteetteke dargaggeessa kada dandeettatton. Yihowwaa ergattaateki, hadi atik Yihowwaxxe Naqaashe kadeexxete maleꞌe, Yihowwa ateꞌe harkiiseebaashsha assiteꞌe heddattoxxinna hexxaan. Kaddomaleꞌe, Maxaafi Qullichchi: “Mageniinbaꞌa shiqqe, isinna haꞌnoobaa shiqaan” hiyyaan. (Yaꞌiqo. 4:8; 1 Zena. 28:9) Ati edisseꞌe Yihowwabaa shiqqatto wodda, isinna atibaa shiqaan. Yihowwa ateꞌe uudaꞌneeki mitte gammoxxe unashsha calla asseetebaan. Dhugaatike mineꞌn nophpheeke manjonna kadoole isi mitte mittenga ifibaa harkilsaan. Yaꞌiqoobi 4:8 keꞌn, uundenneshshanni, mitti manji ediseen hedhe Yihowwabaa shiqeexxe kaddoole, isinna isibaa shiqaan.—2 Teselonqe 2:13 hokkokisiisi.

18. Itti aandaaxxe qoꞌneꞌn maachcho mariꞌantano? (Faaro 40:8)

¹⁸ Yihowwaꞌa ifi mudhdhiteꞌe cuuphendatto wodda, Yesuusikika adaba leellishshatton. Isinna Anni isiki hasaꞌneexxa yaane assatee fedhii ifixxinni isiꞌaa ifi shiqiseemman. (Faaro 40:8 yaansis; Ibra. 10:7) Itti aandaaxxe qoꞌneꞌn, Yihowwaꞌa addatemmeenneke kande ergatematee noꞌoꞌo maachchi gargaaraaxxa mariꞌantannon.