Mama Injifantannoki Hittate?

1-2. (a) Yihowwaxxi ergantooleeyye ifi maa hiteꞌe qortaaxxi hexxa? (b) Tenne qoꞌneꞌni mariꞌantaannexxi yaane maachcho?

DUUCHCHIINXE woggake koobboꞌn hedheeki manji mitte mitte wodda mamaaxxia yanna hexxeen. Fakkeennakeꞌe, Yihowwa dhugaandinni isiꞌa hedaꞌneexxa mamaꞌneeka Yihowwaxxe Naqaashe kadeeka mitte dargaggeessa hedde. Dedha kunni dargaggeessi cuuphemandi hasissaammanxa mamaaxxi hexxaan. Yookiin mitti dayyi, dargaggummateꞌn hedhemmaxxa yanna butta tenneꞌn jaba maallaqa alfatee irra, hedho ifixxeꞌn Mageniinxa mootumma edisatee murteessedheeka hedde. Kunni dayyi taꞌa afeeki maallaqi mini hadiꞌa hasissaaxxa yaane shiqisatenaaꞌn saꞌabaake kadatenaaꞌn kexxeexxa, edo murteessedheemmaxxi murte seeriinxe kaddeexxanna mamaaxxi hexxaan. Ittan jabeeniinxa yookiin hunnatixxa hanqo affeexxa mitte cindeexxa dayyo hedatee woꞌlaanne. Dedha tinni dayyo edi wodda hujjaammaxxa yaane taꞌa huja dandeꞌa gophatenaaꞌn kexxeexxa adde woxxaaxxi hexxaan. Ifi iitta hiteꞌe qortee egendette: ‘Yihowwa anee qalli hiyyaꞌninni hedhee? Yihowwa isiꞌa hiyye assennexxa yaane lummisee uudaꞌnee? Taꞌanna Yihowwa edo laꞌo afeenne?’

² Iitta hedheeke qortumuwwiꞌaa, hiissichcho anfebeꞌnoki sammi hine waala, Yihowwaꞌn anfeennexxi adde xeꞌyitaashsha, wele waalini isoo mageneeffata waallannoshsha assitaan. Tenne qoꞌneꞌni (1) Yihowwa noꞌaa hedaꞌneexxa, (2) edi wodda asseꞌnennexxi murte seeriinxe kaddeexxa mammanno wodda, ittan (3) Yihowwa edo laꞌo anfeennexxa mammaannexxe kaddoole, Maxaafi Qullichchiinke hundaayyetike seeruwwaꞌni miꞌlachcho assa noꞌoo gargaartaaki hittate kaddeexxa uundannon.

MAMA INJIFANTANNOKI HITTATE?

3. Mama injifantannoki mitti ori hoonte?

³ Mama injifantannoki mitti ori, qortumuwwa noꞌokee hiissichcho alfatee Mageniinxa Qaale qoꞌnisaten. Iitta assinaannexxe kaddoole, jabeenna anfeenneke kandannon, manfasiinxe hedhonni nophphinannon, ittan ‘addet jabaate uurratee’ elo-qicinni kaꞌlineenneke kandannon.—1 Qorontoosi 16:13.

4. ‘Duuchchiinxa yaane firfirsinannoki’ hittate? (1 Teselonqe 5:21)

⁴ 1 Teselonqe 5:21 yaansis. Maxaafi Qullichchi duuchchiinxa yaane firfirsinannoshsha jajjabeessaꞌneexxa qalli hiyye. Iitta assa dandeennannoki hittate? Addantaannexxi yaane dhugaate kaddeexxa kokeessatee, Maxaafi Qullichchi hiyyaaxxe yaanenni hokkokisiisat kokeessa dandeenannon. Fakkeennakeꞌe, Mageni edo laꞌo afeexxa mamaꞌneeka mitte dargaggeessa hendo. Kunni dargaggeessi tennee hedino dhugaatixxen hiyye addate adhdha hasissaa? Waawwot, Yihowwa tenne yaaneꞌaa afeexxa uushsho egeꞌnatee duuchchiinxa yaane firfirse kokeessa hasissaan.

5. Yihowwa qortuma noꞌokee hiissichcho uwwaa wodda “lanqannoki” hittate?

⁵ Yihowwa noꞌoo haasoossaa wodda “laqa” dandeennannoki Maxaafa Qullichcha yaansisatiten. Yihowwa qortuma noꞌokee hiissaꞌneeka hiissichcho egeꞌnatee hansaannole, Maxaafa Qullichcha yaansinsanno wodda noꞌoo yadissaꞌneexxe yaanenni weli fakkaataake yaadaꞌni miꞌlachcho assa hasissaan. Yihowwaxxi orga qophpheessiteeka qoꞌne kiphaaka miyuwwa laꞌoonfantennexxi noꞌoo yaadisaꞌneeke yaadaꞌni qoꞌne assa dandeenannon. (Fakke. 2:3-6) Yihowwa qoꞌne assinnanno wodda akeekoꞌaanna qortuma noꞌokee isi maa uushsho afeexxa egennannoshsha gargaaroꞌaa kadhata dandeenannon. Okkooꞌn Maxaafi Qulliichchiinka hundaayyetika seeruwwanna hujeteꞌn hosinsannoka tarjuwwa hansannon. Maxaafi Qullichchi giddo birexxe yannaꞌni, noꞌoꞌni gelteexxe rakkonni weli fakkaattaaxxi rakko gelteeke manjike raagaꞌni, miꞌlachcho assatinna laꞌo alfa dandeenannon.

6. Mama injifantannoshsha noꞌoo gargaartaaxxi heene bukkiitixxe kuta?

⁶ Bukkiiteꞌninna Yihowwa noꞌoo haasoossaa wodda “laqa” dandeenannon. Duuchchinii wodda bukkiiteꞌn afemmaannole, mama injifantannoshsha gargaaraaka yaada, shiqaꞌneeke haasoꞌanaaꞌn, yookiin gubaꞌe giddo mitti manji yaada uwwaa wodda laqa dandeenannon. (Fakke. 27:17) Mitte mitte mama injifantannoki hittate kaddeexxa uundo.

YIHOWWA ATIꞌAA HEDAꞌNEEXXA MANDATTO WODDA

7. Mitti mitti manji maa hiyye qoraaxxi hexxa?

⁷ ‘Dhugaandinni Yihowwa anee hubataꞌninni hedhee?’ hite ifi qortee egendette? Ifi laꞌo afebaake manjishsha assite heddaattole, iimanna butta dadeeke Mageninni jaalo kada dandeesissabaaxxe yaane ateꞌn fakkaattaaxxinna hexxaan. Mootichcha Daawitiꞌninna iitta hexxeexxi yaane futti hiteemmaxxi yanna hedha gophpheebaan. Isinna womi fulabaaka manjo Yihowwa hubataꞌneexxa manbeꞌa hiyyat iitta hiyyeemman: “Yihowwaa, manjo hubattaateki ayyete kadeeꞌnaate? Bakka isiꞌa uutaatteki reyaaki manjii belti maachcho?” (Faaro 144:3) Konne qortumiꞌaa hiissichcho alfa dandeettattoki habaaꞌnite?

8. 1 Samuꞌeli 16:6, 7, 10-12, qicoꞌn hedheeke yaadixxe hundaayyeshsha, Yihowwa manjo uudaa wodda hubataꞌneexxi yaane maachcho?

⁸ Maxaafi Qullichchi manji edo tuffatemeeka manjo Yihowwa hubataaxxa haasoꞌaan. Fakkeennakeꞌe, Yihowwa, Samuꞌeeliiꞌi Isseyixxe oose giddiiꞌni mitte, ediꞌa Israꞌeelike mootichcha kadaaaka hariiroꞌaa ergeemman. Isseyinna shiixxooka belto Daawitii waaleexxi, torbaane labbaxxa oose calla Saamuꞌeeli edo shiqiseemman.b Kaddomaleꞌe, Yihowwa melleemmaki Daawitiitemman. (1 Samuꞌeli 16:6, 7, 10-12 yaansis.) Yihowwa Daawiti hitta hedheeke manjo kadeexxa giddo isixxa uudeemman. Ittan isoo yoꞌoshsha eeyaꞌneeke dargaggeessa kadeemmaxxanna egeꞌneemman.

9. Yihowwa atiꞌaa hedaꞌneexxa kokiinke kada dandeettattoki mayeete? (Fakke uudi.)

⁹ Yihowwa atee hubataꞌneexxa leellisheeki hittate kaddeexxa hedi. Isi atiꞌaa hasisaaka eloka gorsa uwwaan. (Faaro 32:8) Atee adda egeꞌna gopheele atiꞌaa tennee yaane assammaꞌa? (Faaro 139:1) Gorsa Yihowwaka hujeteꞌn hosisseeꞌnaa, atee gargaaraa wodda isi dhugaandinni atiꞌaa hedaꞌneeke Mageno kadeexxa kokkatton. (1 Zeena 28:9; Huje 17:26, 27) Yihowwa isiꞌaa ergatemateennaa isiꞌa ajajematee assitaattexxa duuchchiinxa yaane uudaan. Ati giddo hexxeexxa eloxxa yaane uudaan, ittan atibaanna shiqatee hasaꞌneen. (Ermi. 17:10) Isike jaalo kaddottaanna hasaꞌneen.—1 Yohaannisi 4:19.

EDI WODDA ASSEXXETTEXXI MURTE BEEKKUMIINXE KADDEEXXA MANDATTO WODDA

10. Edi wodda asseꞌnennexxa murte uuddaaxxa maa hine qorrannoxxi hexxa?

¹⁰ Mitti mitti manni hedho ifixxeꞌn assedheexxa murte udumiꞌa wirri hiyye hedat, eloxxa murte assedheemmaxxa mamaaxxi hexxaan. Yihowwaa woꞌma hedhonni ergatematee hinaa wodda eloka runda kaffallaaxxa huje yookiin jaba maallaqa alfinaammaxxa daddaliinxa huje waalatee murteesseꞌneexxinna hexxaan. Tennee murte asseꞌneexxinni qeerraaxxi wogga saxxeꞌeen. Insaꞌnexxenaaꞌn gargarit hexxeexxa murte assedhemmaki, insaꞌne egenneeki manji jabaka maallaqa afeeꞌnaanna eloxxa jiro hedhaaꞌnaa uundaaxxi hexxaan. Tennenaaꞌn kexxeexxa iitta hine ifi qorraaxxi hexxaan: ‘Yihowwaa eloꞌenneki tolangee? Yookiin ‘tennee murte assedha gopheennele taꞌa eloxxa jiro hedhannabaa?’

11. Faaro 73 ki borreessanji adde woxeemmaki mayeete?

¹¹ Iitta hedheeki qortumuwwi sammo atixxibaa dagaꞌn atee rakkisaꞌnoole, Faaro 73 ka borreesanjoꞌni maachchi laqemaammaxxa qalli hiyyi. Isinna weli manji fayyuntet, dananetixxanna rakko beloxxa hedho hedhaaꞌnaa uudeemman. (Faaro 73:3-5, 12) Faarsanji kunni insaꞌneenna yannatixxa eloxxa hedho insaꞌnexxa uudeechchi uduma, Yihowwaa ergatematee assaꞌneexxi yaane laꞌo affebaachcho isoꞌn fakkaatteemman. Isinna konne adde woxisaake yaadinaaꞌni kexxeexxa “barra duuchcha” yaadeen. (Faaro 73:13, 14) Konnee yaada injifata dandeꞌeekita hittate?

12. Faaro 73:16-18 qicoꞌn kulendeeshshanni, borreessanji kunni isoo adde woxissaammaxxa yaane injifata dandeꞌeeki hittate?

¹² Faaro 73:16-18 yaansis. Faarsanji nageꞌa afeeke Yihowwake minibaa meꞌeemman. Okkonna mareexxi eloxxa yaane heda dandeꞌeen. Konne mannixxi hedho eloxxe fakkaattoolenna, ediꞌa kunni manni tasfa afebaaxxa hubateen. Tenne yaane hubatatenaaꞌn kexxeexxa qalbe isixxi nageꞌa alfiteen. Ittan manfasiinxa yaane hedho ifixxeꞌn edisa eloxxe murte kaddeexxanna egeꞌna dandeꞌeen. Tennenaaꞌn kexxeexxa, Yihowwaa ergatema ittin ediꞌaa sufatee murteessedheen.—Faaro 73:23-28.

13. Edo assexxettexxi murte eloxxe kaddeexxa kokiinke kada gophphottole sammotika nageꞌa alfa dandeettattoki hittate? (Fakke uudi.)

¹³ Mageniinxe Qaaleke gargaarsinni atinna isishshanni, sammotika nageꞌa alfa dandeettatton. Hitta? Iimateꞌn affeettexxa fiixa karranna wele affeettexxi yaane hittee qico laꞌo affeexxe kaddeexxa qalli hiyyi, ittan taꞌixxe yannaꞌni Yihowwaa mageneeffataꞌnebaaki manni konnee badhaadha afeebaaxxa hedi. Insaꞌne ediꞌa tasfiki heqqeꞌnaꞌneexxi yaane hedha gophpheemmaxxeꞌe, taꞌa anfeeke qabeennaꞌn mitte qalbenni addantaaxxi hexxaan. Atiꞌaa kinni Yihowwa laakkootte birtabexxoxxa yaane uwwatee kako aageen. (Faaro 145:16) Tenne yaane hedi: Taꞌixxenaaꞌn gargariti hexxeexxa murte asseꞌneennele hedho noꞌoxxi hitta hexxammaxxa egeꞌna dandeennano? Mitte afoꞌo woꞌmine haasoonnannoxxi yaane tenneten: Magenokeenna wele manjiꞌa anfeennexxe jaalalanni murte assedhaaki manji, hedho isixxee kaddaaxxa eloxxa yaane ijjenda gophabaan.

YIHOWAA LAꞌO AFFEETTEXXA MANDATTO WODDA

14. Mitti mitti manji ifi addata gophaꞌneeki mayeete? Insaꞌnee huuni qortumi rakkisaaxxi hexxa?

¹⁴ Mitte mitte Yihowwaxxa ergantooleeyye cimo, fayyuntetixxi rakko yookiin bisiinxi kooko heddaꞌneexxa yaane assitabaashsha kuttaꞌneen. Tinni yaane kinni Yihowwaa laꞌo anfeexxa addantabaashsha assitoꞌaa dandeettaan. Dedha ‘taꞌanna Yihowwaa laꞌo afeenne?’ hine qorraaxxi hexxaan.

15. Faaro 71 ki borreessanj heene yaane uuddaaxxa kokiinkemmaꞌa?

¹⁵ Faaro 71 ki borreessanji tennenni weli fakkaattaaxxa yaaddo afeemmaxxa ifiseen. “Hunna anxi muddaaxxa yanna anee waaldoxxeꞌe” hiyye kadhateen. (Faaro 71:9, 18) Kaddoolenna, kunni faarsanji Mageno isikee addatenshati ergatemeexxe kaddoole, Yihowwa isoo akeekaaxxanna gargaaraaxxa kokiinkemman. Faarsanji kunni hunnatixxi hanqo hexxeeꞌnaanni, Yihowwaa ergatematee dandeꞌeexxa duuchcha assaꞌneeke manjoꞌn, Yihowwwa gammadaaxxa egeꞌneemman.—Faaro 37:23-25.

16. Mitti cimeeki manji Yihowwaa laꞌo afeeke kadaaki hoone oruwwinnite? (Faaro 92:12-15)

¹⁶ Haꞌnoo woggati lummexxineeki manni, jeeja hexxineeka Yihowwa uudaꞌneeke garinni uudde. Maali haꞌnooki gophoolenna isiꞌaa addatenshat ergatendinaashsha Yihowwa haꞌnoo gargaaraan. (Faaro 92:12-15 yaansis.) Hunna haꞌnooxxi iimi darre hexxeexxe yaaneꞌni kaddebaangi, assa dandeetinaaxxe yaaneꞌni miꞌlachcho asse. Fakkeennakeꞌe, addetike fakkeenni haꞌnookinninna manjokee heddinaꞌneexxa leellishati wele jajjabeessa dandeetinaan. Qeerraake bariꞌaa Yihowwa haꞌnoo gargaaraꞌn tureeki hittate kaddeexxanna isi kako aageexxi yaane muuxendaaxxa affineexxa jabaxxa adde haasoꞌe. Ittan welekee kadhatinaꞌneexxi qalbetixxi kadha jabaxxa hunna affeexxa ijjenda deetinoqqe. (1 Pheexi. 3:12) Hoone jeeji giddonna heꞌnennexxe kaddoole, noꞌo duuchchiing Yihowwaanna welekee assinannoxxi yaane hexxeen.

17. Ifi welki hokkokisiisa hasissaꞌnebaaki mayeete?

¹⁷ Yihowwaa ergatematee assitaattexxi yaane womi fuldabaaxxe ateꞌni fakkaattoole, assitaattexxa yaane duuchcha isi lummise uudaaxxa addat. Assitaattexxa yaane weli assaꞌneexxe yaanenni welti hokkokisiisatee yortattoxxinna hexxaan. Iitta hexxeexxe hedinonaaꞌni bayyat! Mayekee? Buutotinna Yihowwa ati assitaattexxa yaane weli assaꞌneexxe yaanenni hokkokisiisa gophammaxxeeten. (Gela. 6:4) Fakkeennakeꞌe, Maariyaami fiixa kaddeexxa shitto Yesuusiꞌaa uuteemman. (Yoha. 12:3-5) Wele darrenaaꞌn kinni, gargaarsi hasisaammaxxi hiyyeette manjichcho, heenooka hira affeexxa lame saante Mageniinke miniꞌa uuteemman. (Luqa. 21:1-4) Kadoolenna, Yesuusi tennee lame dubarte hokkokisiisat irra, uwwa insaꞌnexxa insaꞌne adde anfeexxa leellinsheeke orishsha assee uudeemman. Anni isiki Yihowwanna, assitaattexxi yaane ateꞌn heenooxxe fakkaattoolenna, qalbe mittenninna isiꞌaa affeettexxe jaalalanni assitaattexxa heene yaanenna lummisee uudaan.

18. Mama injifantannoshsha noꞌoo gargaartaaxxi yaane maachcho? (“Yihowwaxxi Qaale Mama Injifattattoshsha Gargaartaan” hitaꞌneexxa kollo uudi.)

¹⁸ Noꞌo duuchchiingi mitte mitte wodda mammannoxxi yanna hexxaan. Iimiꞌn uundenneshshanni, dhugaatixxe Qaale kadeeki Maxaafi Qullichchi, iitta hexxeexxa hedino faachcheeffantannoshsha gargaaraan. Tenneꞌa mandinaꞌneexxe yaaneꞌa dhugaatika hiissichcho alfatee woꞌlaacho asse, mamiinxa bakka adde haꞌnooxxa jabeessedhe. Yihowwa dhugaandinni haꞌnoo anni-annittin egeꞌneꞌeen. Isi hedho haꞌnooxxeꞌn isoo edisatee hitineꞌe assitineexxa yaane duuchcha lummisee uudaꞌneen. Haꞌnoo badhaasateenna kako aageꞌeen. Yihowwa duuchchiinxa addatendeexxa ergantooleeyye isixxa eeyaꞌneexxanna karkarsa hasaꞌneexxa addatte.