Yihowwa “Qalbe Enqendeeka Xaasaan”

1. Yihowwa ergantooleeyye isixxa uudaa wodda isoꞌn laqendaꞌneexxi yaane maachcho?

YIHOWWA buttateꞌni hexxeexxe ergantooleeyye isixxibaa uudaa wodda miꞌlachcho assaꞌneexxi yaane maachcho? Isi gammashsho noꞌoxxanna yaaddo noꞌooxxa egeꞌneꞌeen. (Faaro 37:18) Qalbe noꞌoxxeꞌn jabaxxi yaaddo hexxeꞌnaanni isiꞌaa ergatematee dandeennennexxa duuchcha assinaaꞌnaa uudaa wodda hittatta gammadaaxxa hedde! Tennenaaꞌn saxxeexxa noꞌoo kiphateenna jajjabeessatee lumoxxa halcha afeꞌeen.

2. Yihowwa qalbe enqemeeke manjiꞌaa maa assa? Gargaarsa isikenaaꞌn laꞌo alfa dandeennannok hittate?

² Faaro 147:3 Yihowwa qalbet enqemeeke manjixxa ‘mada fayyisaaxxa’ haasoottaan. Tinni xiqse Yihowwa mitte yaadik miidhemeeka manjo, mararteti karkarsaaxxa ifissaan. Garagaarsa isikenaaꞌn laꞌo alfatee noꞌoo maa assa hasissa? Fakkeenna konnee uundo. Mitti ciꞌlotixxa oge afeeki ciꞌleessichchi, mitte miidhemeeka manjo fayyaashsha gargaaratee dandeꞌeexxa duuchcha assaan. Kunni miidhemeeki manji fayyatee hasaꞌnoole, ciꞌleessichchi ajajeexxa yaane assa hasissaan. Tenne qoꞌneꞌn Yihowwa yaadik miidhemeeke manjiꞌaa Qaale isixxeꞌn hiyyeexxa yaane uundannon, ittan konnee jaalalatika gorsa hujeteꞌn hosinsannoki hittate kaddeexxanna mariꞌantannon.

YIHOWWA LAꞌO ANFEENNEKE MANNA KANDEENNEXXA KOKEESSEꞌEEN

3. Mitti mitti manni laꞌo afebaashsha asse ifi hedaꞌneeki mayeete?

³ Heꞌnanneki jaalala baxxeexxeꞌninna heddi manji ifi laꞌo afebaashsha asse hedaashsha assinnaꞌneexxe buttaꞌniten. Heeleenia hiyyendaaxxi mitte dayyo iitta hiteen: “Nophphennek jaalala hexxebaake mineꞌniten. Anni anki elobakemman, ittan duuchchinii wodda mitte laꞌo anfebeꞌnoshsha haasoꞌaamman.” Dedha ateenna Heeleenishshanni, mitti mitti manni seeri belo abidaaxxi, ceeꞌmaaxxi yookiin ayyinna atee eeyyaꞌnebaashsha assite heddattoshsha assaaxxi hexxaan. Yaane iittate kaddoole, ayyinna ataa qalbe giddixxen hedaꞌneexxa addata haꞌurtaaxxi hexxaan.

4. Faaro 34:18 keꞌni, Yihowwa noꞌaa maa assaaxxa kokeessee?

⁴ Manji atee miicaꞌneexxe kaddoolenna, Yihowwa atee eeyyaꞌneexxanna lummise uudaꞌneexxa addat. Isi “qalbe enqendeekee shiqiken.” (Faaro 34:18 yaansis.) Laꞌo affebexxoshsha ateꞌn fakkaattaꞌnoole, Yihowwa ati giddo hexxeexxa eloxxa yaane uudaꞌnexxanna isibaa shiqqattoshsha asseexxa qalli hiyyi. (Yoha. 6:44) Ati isi edo fiixa kaddeettaxxeꞌe, duuchchinii wodda atee gargaaratee qophphoꞌee heqqedhaꞌneen.

5. Weli manni tuffataammaka manna Yesuusi abideeke oranaaꞌn maachcho barantanno?

⁵ Yesuusika fakkeenna qoꞌnisati, Yihowwaxxa hedino egeꞌna dandeenannon. Yesuusi buttateꞌni ergatemaamma wodda, manji tuffataammake manniꞌaa miꞌlachcho uwwaamman, ittan mararteti abidaamman. (Mat. 9:9-12) Mitte jabaxxe dhibonni geebendaammaxxi manjichcho, fayyatee hasseꞌe Yesuusixxa seemma abiddeemma wodda isinna isee jajjabeesseemman, ittan adde isexxanna jajeemman. (Marqo. 5:25-34) Yesuusi Anni isikixxa ayyunte hexxeeshshan leellisheen. (Yoha. 14:9) Tenneꞌa Yihowwa ateenna lummise uudaꞌneexxa, ati giddo hexxeexxa eloxxa yaane uudaꞌneexxa, ittan adde atixxanna isiꞌaa affeettexxa jaalala egeꞌneexxa addat.

6. Mitti manji ‘laꞌo afebeꞌnon’ hitaaxxa hedino injifata dandeꞌaaki hittate?

⁶ Duuchchinii wodda ifi laꞌo afebaake manjishsha assitte uuddaattole, maa assa dandeettato? Yihowwa edo laꞌo affeettexxa kokeessitaaxxa xiqse yaansisi, ittan iseꞌni alalchi.b (Faaro 94:19) Mitte herreggeettexxa yaane muuxa dandeꞌa gophphottole ifi welki hokkokiisiissoxxe, ittan hunna atixxi iimi darre hexxeexxe yaaneꞌn miꞌlachcho assitoxxeꞌe. Yihowwa ati assitottaa hasaꞌneexxi yaane hunna atixxi iimi darre hexxeexxebaan. (Faaro 103:13, 14) Edo mitti manji atee miidhoole, balleessa atixxe kada gophpheemmaxxee ifi aallattoxxeꞌe. Yihowwa edo qoremmaꞌneeki, balleessanjoke malee miidhememmake kadebaaxxa qalli hiyyi. (1 Pheexi. 3:12) Oosumma hexxemma wodda weli manji miidheexxi Saandra: “Duuchchinii wodda Yihowwa anee uudaꞌneeke miketike kadeeke garinni, ifi uudannoshsha anee gargaroꞌaa kadhataannan” hiteen.

7. konnechchi edi darre anfeennexxa eloxxa hedhotixxa baranno, Yihowwa ergatematee laꞌoonfata dandeennannoki hittate?

⁷ Yihowwa wele manjo gargaratee atee laꞌoonfata dandeꞌaaxxa ijjenda deetoxxeꞌe. Isi lassatixxa huje isinni welt hujjattoshsha uwwat atee ulfeesseen. (1 Qoro. 3:9) Atixxi hedhotixxi baranno weliinxa rakko ifixxishsha assite uuddattoshshanna yaada insaꞌnekee miꞌlachcho uutattoshsha gargaara dandeettaan. Insaꞌnee gargaaratee heddo yaane assa dandeettaton. Iimiꞌn uundeennaxxi Heeleeni gargaarsa eeti hitee adhdhiteꞌe, taꞌa wele manjonna elo qicin gargaartaꞌneen. Isenna iitta hiteen: “Edo laꞌo afebeꞌnoshsha assee ifi hedaannan. Kaddomaleꞌe, taꞌa eyyemaanneshshanna welekeenna laꞌo afeenneshsha asse ifi hedannoshsha Yihowwa anee gargaareen.” Heeleni taꞌa duuchchi woddixxe qajeellisanjo kaddeꞌe gammashshot ergatemateꞌn hexxeen.

YIHOWWA GATTOWWAAL HIYYEEXXA ADDANTONNAA HASAꞌNEEN

8. Isayaasi 1:18 keꞌni, Yihowwa maa hiyyee kokeessee?

⁸ Mitte mitte Yihowwaxxi ergantoole edo hujjeexxee cubbonaaꞌn kexxeexxa, cuuphendeechchi edi darrenna kaddoꞌo cuuphendeechchi udummanna jaba qicinni yaaddaan. Kaddomaleꞌe, Yihowwa noꞌaa afeexxe jabaxxe jaalalanaaꞌn kexxeexxa, wodo noꞌaa qophpheesseexxa qalli hiyya hasissaan. Tenneꞌaa uwwa isixxa adhdhinonnaa hasaꞌneen. Yihowwa dadendeexxa rakko isinni ‘mariꞌante tinkennechchi’c uduma cubbo noꞌoxxa hexxeeshshanni gattowwaal hiyyaaxxa kokeesseen. (Isayaasi 1:18 yaansis.) Jaalalatik anni noꞌoki Yihowwa, edo hunjennexxa cubbo qalli hiyya gopha hittatta gammachchiissaaxxe yaane! Wele darenaaꞌn kinni, hunjennexxa eloxxa yaane ijjenda dedhabaan.—Faaro 103:9, 12; Ibra. 6:10

9. Edo assinennexxe yaane iirra, taꞌa ittan ediꞌaa assinaannexxe yaaneꞌn miꞌlachcho assa hasisseeki mayeete?

⁹ Edo hujjeettake dedhanaaꞌn kexxeexxa taꞌanna yaaddaattole saxxeexxe yaaneꞌnite kaddeebaangi, taꞌa ittan ediꞌaa assitattoxxe yaaneꞌn miꞌlachcho assi. Hawaarya Phawuloosika fakkeenna uudi. Phawuloosi edi wodda Kirsitaana shorraammake manjo kadeemmaxxee yaadeemman. Kaddomaleꞌe, Yihowwa isiꞌaa gattowwaal hiyyeexxa addateemman. (1 Ximo. 1:12-15) Edo hujeemmaxxa cubbo hedaꞌni yaadaamma? ulfeessemeeke Feriisaawwichcho kadatee asseemmaxxa yaane qalli hiyyaammabaashshanni, edo hujeemmaxxa balleessa qalli hiyyaammabaaxxi egeꞌnendeexxen. (Filph. 3:4-8, 13-15) Tenne irra Phawuloosi hinaaffeti ergatemaamman, ittan ediꞌaa assaaxxe yaaneꞌn miꞌlachcho assaamman. Atinna Phawuloosishshanni saxxeexxa yaane jijjiira dandeettabexxon. Taꞌa assitaattexxe yaanenni, Yihowwaa ulfeessanna isi ediꞌaa atiꞌaa uwwatee kako aageeke gammachchiisaake badhaadhaꞌn miꞌlachcho assa dandeettaton.

10. Edo assineennexxe yaanenni manjo miinoonnole maa assa dandeenanno?

¹⁰ Edo assitettexxi mitte mitte yaane manjo miitoole, tinni yaane dedha atee yaadisa dandeettaan. Atee gargaartaaxxi yaane maachcho? Yaane toggi assatee dandeettettexxa duuchcha assi, ittan qalbe giddixxen gattowwaali qori. (2 Qoro. 7:11) Ati assitettexxe yaanenni miidhemeeka manjo Yihowwa gargaaroꞌaa kadhat. Isi ateenna ati assiteettexxe yaanenni miidhemeeki manji, ossitinaashshanna higgeeni nageꞌa alfitinaashsha gargaaraan.

11. Wabeekichcho Yoonaasike fakkeennanaaꞌn maa barantanno? (Gogakeꞌni hexxeexxa fakke uudi.)

¹¹ Edo hujjineeke dedhanaaꞌn baratte, ittan Yihowwa haꞌnoo isi haaseeke garinni laꞌoonfataashsha fedhiitike kadde. Wabeekichcho Yoonaasika fakkeenna hubanto. Yoonaasi Mageni ergeebaa Nenewaa meꞌati irra, wele bakkabaa meꞌeemman. Yihowwanna isoꞌoo xixeen, isinna hujeeke dedhinaaꞌn barachcho alfeen. (Yona. 1:1-4, 15-17; 2:7-10) Yihowwa Yoonaasiꞌni adde woxebaan. Mageni Yoonaasii higgeeni Nenewe maraashsha ajajeen, eetenne yanna Yoonaasi Magenokee ajajemeexxi hirbangeꞌn meꞌeen. Yoonaasi hujeexxe balleessaa yaadoolenna, tinni yaaddo kinni Yihowwa uwweexxa huje adhdhabaashsha gufo kaddoꞌaa waalebaan.—Yona. 3:1-3

YIHOWWA NOꞌOO MANFASA ISIKENNI JAJJABEESSAAN

12. Yihowwa yaadiki miidhemmanno wodda yookiin yaaddo noꞌoꞌni geltaa wodda nageꞌa uwwaꞌneeki hittate? (Filphisiyuusi 4:6, 7)

¹² Yihowwa yaadiki miidhemmanno wodda yookiin yaaddo noꞌoꞌn geltaa wodda, manfasi qullichchiki noꞌoo jajjabeessaan. Raanixxanna Kaarolixxa hedhotixxa baranno uundo. Yaadissaaxxa, belti insaꞌneki ifi shiꞌween. Insaꞌnenna iitta hineen: “Konnechchi edi darre jabaxxi rakko noꞌoꞌni gelteeꞌnaa uundeennen. Kaddoolenna tinni haranga gargariti hexxeexxen, heddo hashsha diiphi daga gibaammaxxa yanna, Yihowwabaa kadhantaannan. Filphisiyuusi 4:6, 7 keꞌni kulemeeki nageꞌi dhugaate kadeexxa uundeennen.” (Xiqse yaansis.) Qalbe atixxi enqendaashsha assitaaxxi rakko ateꞌn geltaꞌnoole, duuchchin wodda yookiin ati hassette qicoꞌni, qalbe atixxi giddo hexxeexxa yaane kadhat Yihowwaꞌn kuꞌla dandeettatton. (Faaro 86:3; 88:1) Yihowwa manfasa isika atiꞌaa uwwaashsha higge higgeen kadhat. Isi kadha atixxa ijjenda laqaꞌni sammi hiyyabaan.—Luqa. 11:9-13

13. Yihowwaa addattemmeꞌe isoꞌoo mageneeffata ittin ediꞌaa sunfannoshsha, manfasi qullichchi isiki noꞌoo gargaaraak hittate? (Effesooni 3:16)

¹³ Ateꞌni gelteexxi yaaddo gophphattoshsha assitee? Manfasi qullichchi, Yihowwaa addatendeꞌe mageneeffata ittin ediꞌaa suffattoshsha hunna atiꞌaa uwwaan. (Effesooni 3:16 yaansis.) Filoora hiyyeendaaxxe dayyoxxa hedhotixxa baranno uudi. Isenna iseki miniink anni, miisoonoota kandeꞌe ergatemateꞌn heꞌnemmaxxa yanna, miniink anni iseki iseꞌaa addatemebaangi gateen, tenneꞌa insaꞌnenna wel tinkeen. Isenna iitta hiteen: “Isi anee waakkatatenaaꞌn kexxeexxa yoꞌoshsha yaadennen. Jabaate ossa dandeꞌaannoshsha Yihowwa manfasa isika aniꞌaa uwwaa kadhatennen. Yihowwa yaadik fayyannoshshanna keꞌitokeꞌni dandeꞌaabeꞌnochcho fakkaatteemmaxxa rakko dandeꞌe saꞌannoka jabeenna aniꞌaa uwween.” Filoora Mageni qalbe mitten isoꞌn addattaashsha gargaareexxanna rakko gelta wodda duuchcha isee gargaaraaxxa kokiinxemman. Isenna lebbeexxi: “Faaro 119:32 keꞌni ‘qalbe anxi giddo bakka isiꞌaa uuteettaxxeꞌe, ajaja atikika ora halchat hordofannon’ hiyyaꞌneeki yaadi anee gargaareen” hiteen.

14. Mageniinki manfasi noꞌoꞌn hujaashsha assa dandeennannoki hittate?

¹⁴ Yihowwa manfasa qullichcha uwwaashsha kadhattettechchi uduma maa assa hasissa? Manfasi qullichchi isik ateꞌn hujaashsha assitaaxxa yaanuwwa huji. Tinnirinna bukkiiteꞌn afematenna welekee lassateeran. Duuchchinii wodda Qaale yaansisat sammo atixxi Yihowwaxxe hedinonni woꞌmitaashsha assi. (Filph. 4:8, 9) Yaansissatto wodda, Maxaafi Qullichchi giddo rakko gelteeke mannike fakkeennaꞌn miꞌlachcho assi, okkooꞌn kunni manni jabaate ossaashsha Yihowwa gargaareeki hittate kaddeexxa alalchi. Iimiꞌn uundeennaxxe Sandiraꞌni gargariti hexxeexxi haꞌurtaaxxi yaane gelteemman. Isenna: “Yoosefiki raagi anee haranga jajjabeesseen. Isoꞌni geyeeki abarinna ille uushsho, Yihowwani welt afeemmaxxa firunte qiiddaashsha assitoꞌaa waaleemmabaan” hiteen.—Dada. 39:21-23.

YIHOWWA ADDETIKE JAALUWWI GAMIIꞌN JAJJABEESSAAN

15. Jajjabeenna alfinannoki ayyeemanninaaꞌnite? Insaꞌne noꞌoo gargaara dandeennaaki hittate? (Fakke uudi.)

¹⁵ Rakko noꞌoꞌni gelta wodda addetiki jaaluwwi noꞌoki “jajjabeenniinxe muumme” noꞌaa kada dandeꞌaan. (Qola. 4:11) Dayyuwwi noꞌokinna dayyuwwa noꞌoxxi, Yihowwa noꞌaa jaalala afeexxa leellishaꞌneeke mitte oran. Addetixxi jaaluwwa noꞌoxxi miꞌlachcho uwwe caqasat, ittan yanna noꞌonni welt saꞌissat noꞌoo jajjabeessa dandeettaan. Jajjabeesitaaxxa Maxaafi Qullichchiinxa xiqse yaansissaan, yookiin noꞌonni welt kadhattaan.d (Roome 15:4) Mitte mitte wodda mitti dayyi yookiiꞌn mitte dayyo, Yihowwaxxa hedino qalli hinannoshsha assinaaxxi hexxaan, tinninna jabaante ediꞌaa sunfannoshsha gargaartaan. Yaaddoteꞌn heꞌnanno wodda addetixxi dayyuwwa noꞌoxxi weli orinninna noꞌoo gargaara dandeettaan. Fakkeennakeꞌe, sagale qophpheessati eloki yaadi noꞌoni laqemaashsha assa dandeettaan.

16. Weliinka gargaarsa adhdhatee maa assa hasissa?

¹⁶ Weliinka gargaarsa hansaannole qora hasissaaxxinna hexxeen. Dayyuwwa noꞌoxxi noꞌoo eetaꞌneen, ittan gargaarateenna hassaꞌneen. (Fakke. 17:17) Kaddoolenna maachchi noꞌoni laqemaꞌneexxa yookiin maachcho hansaannexxa egeꞌna gonphaaxxinna hexxaan. (Fakke. 14:10) Yaadik miidhendoottole, ateꞌn laqendaꞌneexxa yaane galfatteexxe jaaluwwa atixxeꞌni haasoꞌatee fedhiitike kadi. Gargarroꞌaa hassaattexxa yaane insaꞌneꞌni kuli. Ateꞌn laqendaꞌneexxa yaane mitte yookiin lame geedheꞌn haasoꞌa dandeettatton. Mitte mitte dubarte dayyuwwa insaꞌneꞌni gelteexxa yaane mitte galfatteexxe dayyoꞌni kula jajjabeessitaaxxe yaane kaddeexxa hubatteꞌeen.

17. Jajjabeenna alfinabeꞌnoshsha noꞌoo kuttaaxxi mitte mitte haꞌura yaanuwwa heente? Tennee yaanuwwa injifatta dandeennannok hittate?

¹⁷ Manjokenaaꞌn bayyattatoshsha assaake yaadinaaꞌn ifi heqqedhi. Yaadi atik madoꞌaashsha assitteexxe yaanenaaꞌn kexxeexxa, manjiki shiqa gibisaaxxinna hedha dandeettaan. Mitte mitte wodda dayyuwwikinna dayyuwwa, yaada atika gargaadhdha gonphaaxxi yookiin dedha atee miidhaake orinni haasoonnaaxxinna hexxaan. (Yaꞌiqo. 3:2) Iitta hexxeexxi yaanuwwa hasisaaka jajjabeenna alfitabexxoshsha gufo kaddoꞌaa waaldoxxeꞌe. Yaaddoti sammo dhibemeeki mitti gubaꞌetik geerchi iitta hiyyeen: “Heddo yanna jaaluwwa anxenni haasoꞌa yookiin yanna saꞌissa hasaannabaan.” Kaddoolenna, Gavini iitta hexxeexxe hedinoꞌaa anga uwwa gopheemmaxxee weliki jaalomat laꞌo alfeen. Eemi hiyyendaꞌneexxi dayyo iitta hiteen: “Edo aneꞌn gelteexxe yaanenaaꞌn kexxeexxa manjo addata haꞌurataamman. Kaddomaleꞌe, dayyuwwa Yihowwashsha eeyya hasissaaxxa baratennen. Tinni yaane Yihowwaa gammachchiissaaxxa, ittan aneenna irran caala gammachchiissaaxxa hubatennen.”

YIHOWWA FAYYISATEE AAGEEXXI KAKO JABAANTANNOSHSHA ASSITAAN

18. Ediꞌaa kaddaaxxi heqqedha dandeennannoxxi yaane maachcho? Taꞌa maa assa dandeenanno?

¹⁸ Yihowwa shiqixxe yannaꞌn maaliinxanna yaadiinxa dhibo hexxeeshshanni fayyisaaxxa egenneennaxxee, ediꞌaa hexxeexxa yanna woꞌma qalbenni heqqedha dandeenannon. (Leellisha. 21:3, 4) Okkone wodda taꞌixxe yannaꞌn noꞌoo rakkissaꞌneexxi yaanuwwa, “qalbetibaa daggabaan.” (Isa. 65:17) Iimiiꞌn uundeennashshanni, Yihowwa taꞌanna kaddoole mada noꞌoxxa fayyisaan. Jabaattinaashshanna hafuura adhdhitinaashsha assitaaxxe, Yihowwaxxe jaalalatixxe qophpheenaaꞌn laꞌoonfatte. Isi haꞌnoꞌaa hedaꞌneexxa ijjenda mandinoqqe.”—1 Pheexi. 5:7.