Yihowwaa Ulfeesiisaake Garinni Weli Uuxxecca Dandeennaaki Hittate?

1-2. Weli Uuxxecca uuddaaxxa mitti mitti manni maa hiyyee?

WELI UUXXECCATIXXI yanna haranga gammachchiissaaxxe kada dandeettaan. Taꞌixxe yannaꞌn weli uuxxeccateꞌn hexxinoole, tinni yanna gammachchiissaaxxe kaddaashsha hassinaaxxi egeꞌnendeexxen. Ittan heddo weli uuxxeccateꞌni hedheeke manjiꞌa tinni yanna gammachchiissaaxxen. Tophphi giddo hexxaꞌneexxi Tsiyoona hiyyendaꞌneexxi mitte dayyo iitta hiteen: “hedho anxeꞌn haranga gammadeennexxe yanna giddiiꞌn mitte miniinke anni ankenni weli uuxxeccateꞌni heꞌnennaxxe yannan. Laꞌo affeexxe yaaneꞌni mariꞌantaannan, ittan geenbaannan. Eeyyaannekannaa isinna aneꞌe eeyyaꞌneeka manjo alfennexxa egeꞌna haranga gammadannoshsha assiteen.”

² Kaddomaleꞌe, Neezerlaande hedhaꞌneeki, Aleesiꞌo hiyyemaꞌneeki dayyi, iitta hiyyeen: “Ediꞌa anxe miniinxe ama kaddaaxxe manjonni, weli uuxxecca haranga gammachchiissaaxxe kaddoolenna, eettene yannaꞌn haꞌurtaaxxi yaanuwwa hexxemman.” Tenne qoꞌneꞌni mitte mitte haꞌuraaka jeejuwwa ittan, Yihowwaaꞌa gammachchiisaake garinni, weli uuxxeccateꞌe gargaaraaka mitte mitte Maxxafi Qullichchiinka hundaayyetika seeruwwa uundannon. Ittan gubaꞌeteꞌni hedheeki weli manninna, weli uuxxeccateꞌni hedheeka manna gargaara dandeꞌaaki hittate kaddeexxa uundannon.

WELI UUXXECCATIKI YAADI MAACHCHO?

3. Weli Uuxxeccatiki yaadi maachcho? (Fakkeenna 20:25)

³ Weli Uuxxeccatixxi yanna gammachchiissaaxxe yanna calla kaddebaangi bultetibaꞌa akeeka dandeettaaxxe jabaxxe tarkaaffen. Jilatixxa barra kunni lami manni, hedhoti heꞌnee qicoꞌn weli eeyyateenna ulfeessateꞌe, Yihowwa edo kako aagaan. Heene kakonna aagat edi darre, kako aangaannexxa yaane xexxeꞌachchoti hediyyo hasissaan. (Fakkeenna 20:25 yaansis.) Aadhatee kako aagaki manjinna iittanden assiyyo hasissaaki. Weli Uuxxeccatixxi yanna, bulte hasaꞌneeki lami manni weli egeꞌnaashshanna eloxxa murte assedhaashsha gargaartaan. Mitte mitte yanna tinni murte bulteteꞌn eꞌyinaashsha assitaan, yookiin weli uuxxecca uurrisateꞌe murteesseꞌnaashsha assitaan. Kunni lami manni weli uuxxecca uurriseexxe kaddoole, dedha hunjeen hiyyotebaan. Kunni lami manni eloxxa murte asseedhaashsha gargaartemmaxxeꞌe, weli uuxxecca ensaꞌnexxi toliinxemmani hiyya dandeessissabaan.

4. Weli Uuxxeccatee toggitte uushsho afiyyo hasisseeki mayeete?

⁴ Weli Uuxxeccateꞌe toggitte uushsho afa laꞌo affeeki mayeete? Toggitte uushsho afeeki bulteteꞌn eꞌyebaaki manji, aadhatee hasaꞌneebaake manjinni weli uuxxecca safabaan. Iitta heexxeexxa toggitte uushsho afiyyo hasissaaꞌneeki aadhebaake manjo callabaan. Noꞌo duuchchiing iitta hexxeexxa uushsho nossedhiyyo hasissaan. Fakkeennakeꞌe, mitti mitti manni lami manni weli uuxxecca safoole bulteteꞌn eꞌyaani hiyyee hedaan. Iitta hexxeexxi hedino aadhebaaka Kirsitaana miitaaki hittate? Yunaytid Isiteetise hexxaꞌneexxi Meelisa hiyyendaaxxi mitte dayyo iitta hiteen: “lame weli uuxxeccateꞌni hedheeka manna bulteteꞌni eꞌyinaashsha tirtirsaaki heddi manni hedheen. Tenne tirtirsanaaꞌn kexxeexxa, mitti mitti Kirsitaani weli uuxxecca uurrisa hasissaaꞌneexxe kaddoolenna, bulteteꞌni eꞌyatee gaddachchemeꞌeen. Weli aadhebaaki Kirsitaani kinni weli uuxxecca safande hitaaxxa yaane ijjenda xireeffataꞌneen. Tirtirsa tinninna hunna insaꞌnexxi iimi darre kada dandeettaan.”

WELIꞌAANNI WELI ADDA EGEꞌNA

5-6. Weli Uuxxeccateꞌn hedheeki manni weli adda egeꞌnateꞌe woꞌlaana hasisseeki mayeete? (1 Pheexiroosi 3:4)

⁵ Weli Uuxxeccateꞌn hexxinoole bulteteꞌn eꞌyate yookiin eꞌya gophateꞌe murteessexxinnaashsha haꞌnoꞌo gargaartaaxxi yaane machcho? Weli adda egeꞌne. Weli Uuxxecca saffinebaa edi darre manjo okkonee uuddaaxxa egendinaaxxi mitte mitte yaanuwwa hedha dandeettaan. Kaddomaleꞌe, mitte manjixxa shoondeexxa dhugaatixxa ayyunte egeꞌna dandeetinaaki taꞌaten. (1 Pheexiroosi 3:4 yaansis.) Tinninna ediꞌa atike bultetike jaalo kadaꞌneeke manjixxa manfaasiinxa hedho, ayyuntenna hedino isixxa egeꞌnaten. Yanna saxxaꞌni meꞌitaashshan, konne qortumuwwiꞌaa hiissichcho alfa hasissaan: ‘Kunni manji aniꞌa eloke bultetike jaalo kadaakee?’ (Fakke. 31:26, 27, 30; Effe. 5:33; 1 Ximo. 5:8) ‘Weliꞌaani weli jaalala leellishanna miꞌlachcho uwwa dandeennanno? Mitti weliinxa balleessa dandeenneꞌe hedha dandeennanno?’b (Roome 3:23) Weli aagate hiyyo duuchchiinxe yaaneni, weli fakkaatate hiyyote kaddebaangi, oddo insaꞌnexxeꞌn hexxeexxa gargarunte abinde heꞌnaa qico egeꞌnate hiyyoten.

⁶ Weli Uuxxeccateꞌni hexxinaaxxa yanna, wele manjo uuddaaxxa egeꞌniyyo hasissaaxxi wele yaane heente? Jaalalat jajji hiyyaati edi darre haranga hasissaaxxa yaane uuddaaxxa tinniirinna: mitti manji ediꞌa afeeke herregaꞌn mariꞌatinaaxxi hexxaan. Fayyuntetixxa, maallaqiinxa rakko yookiin edo gelteexxe balanaaꞌn kexxeexxa taꞌixxe yannaꞌn hedinoteꞌn, irrakeꞌn yookiin adabakeꞌn koꞌo geesisseexxa ifixxe kaddeexxa yaanuwwa uuddaaxxa maa hiyya daandeesissa? Weli Uuxxeccatike safoꞌn duuchchiinxa yaane mariꞌata hasissabaan. (Yohaannisi 16:12 ki welt hokkokisiis.) Mitte mitte ifike kadeke qortumuwwiꞌa shiqoxxe yannaꞌn hiissichcho alfa hassaattole, okkone manjoꞌn egeꞌnish. Ediꞌaa atike bultetike jaalo kadaꞌneeki manji eloxxa murte assedhateꞌe, kunni tarji hasisaammaxxeꞌe teneꞌe yaane egeꞌnate hasaan. Tenneꞌa mitte yaanenna shoxxebexxongi haasoꞌi.

7. Weli Uuxxeccateꞌn hedheeki manni weli adda egeꞌna dandeꞌaaki hittate? (“Bayyanteꞌe Heꞌne Weli Uuxxecca” hitaꞌneexxa kollo uudi.) (Fakkuwwa uudi.)

⁷ Mitte manjixxa giddixxa dhugaatixxa ayyunte egeꞌna dandeesissaaki hittate? Iitta assa dandeesissaaki mitti ori, shoꞌibelo dhugaa haasoꞌati, qortuma qoratinnaa adda caqasatiten. (Fakke. 20:5; Yaꞌiqo. 1:19) Iitta assateꞌe haꞌnoꞌa haasoꞌakeꞌe eldaaxxa hujuwwa mitteba huja, tinniirinnaa: sagale mitteba ita, manji afeemaaxxe bakkaꞌn welti mammaremanna ergachcho mitteba fuula eloxxe kaddaan. Jaaluwwikinna hadiki saꞌissitinaaxxa yannanna laꞌoonfatineꞌe, weli adda egeꞌna dandeetinaan. Ittin lebendaaxxa, mitti manji gargariti hedheeke jeji giddonna gargariti hedheeke manji hedheeba, hitta hedheeka adaba leellishaꞌneexxa egeꞌnatee edissineꞌe qixxeeffate. Neezerlaande hedhaꞌneeki Ashiwiini, maa assatee woꞌlaaneexxa hubatte. Aliisha hiyyeendaaxxe dayyoni weli uuxxeccateꞌn heꞌnemmaxxa yanna uuddaaxxa iitta hiyyeen: “Weliꞌaan weli egennannoshsha gargaartaaxxa yaane assa hansaannan. Tinni yaanuwwanna shollaxxemmani, fakkeennakeꞌe sagale mitteba raꞌissa, mitteba mini giddixxa hujuwwa hujateeriimman. Tenne hujuwwa hunjano wodda mitti weliinxa gonphenna kado jabeenna uundannon.”

8. Weli egeꞌneteꞌn hedheeke manniꞌa Maxaafa Qullichcha mitteba qoꞌnisa laꞌo affeeki hittate?

⁸ Maxaafa Qullichcha welti qoꞌnisati weli egeꞌna dandeettinaan. Bulteteꞌn eꞌyitinoole, Mageni bulte haꞌnooxxa eebbisoꞌaa mini hadixxe mageneffachchoꞌaa yanna dhaabiyyo hasissaan. (Meki. 4:12) Taꞌanni tenne weli uuxxeccatixxe yannaꞌinni mittebaa qoꞌnisa saffineelenaꞌa? Weli Uuxxeccateꞌn hedheeki lami manni mitte maate kada gopheemmaxxeeꞌe labbaki umo iseke kada dandeꞌabaan. Kaddoolenna, duuchchin wodda qoꞌne assati weliꞌaan welixxa manfasiinxa hedho egeꞌna dandeetinaan. Yunaytid Isiteetise hedhaꞌneeki Makisinna Layisa wele laꞌo alfineen. Isinna iitta hiyyeen: “Weli Uuxxecca sanfeennaxxa yanna bultenna mini hadixxa hedho uuddaaxxa borreesiluwwa qoꞌninsaannan. Tinni borreesiluwwanna mariꞌatatee noꞌoꞌni haꞌurtaaxxa yaane mariꞌaantannoshsha ora bandeꞌeen.”

WELE QALLI HIYYA HASISSAAXXA YAANUWWA

9. Weli Uuxxeccateꞌni hedheeki manni, weli uuxxecca safeexxa manjokeꞌn kula hasaa wodda qalli hiyya hasissaaxxi yaanuwwa maachcho? Ayyeꞌn kula hasissa?

⁹ Ayyeꞌni kula hasissa? Tinni weli aadheteenna heerumatee hasaꞌneke mannixxe murten. Weli Uuxxecca saffinneshshanni heenoke manjo callaꞌn kulatee mudhdhitinaaxxi hexxaan. (Fakke. 17:27) Iitta assa, hasisabaaki tirtirsinna qortumi haꞌnoobaa dagabaashsha assitaan. Kaddomaleꞌe, ayyeꞌinna kula gophphinoole weli manji haꞌnoo afabaashsha hitine shoꞌondinaaxxi hexxaan. Tinni kinni haꞌnoo fuggoxxe yaaneꞌn ibissaaxxen. Tenneꞌa eloka gorsa uwwa dandeꞌaaka manjoꞌninna weli orinni gargaaraake manjoꞌn kula beekkumaken. (Fakke. 15:22) Fakkeennakeꞌe, mini hadi giddo hedheeke heenooke manjoꞌn, galfatteexxe jaaluwwaꞌn yookiin gubaꞌetixxe geedheꞌn kula dandeetinaan.

10. Lami bulteteꞌn eꞌyatee hasaꞌneeki manni, Yihowwaꞌa ulfeesisatee assaaxxi yaane maachcho? (Fakkeenna 22:3)

¹⁰ Weli Uuxxeccatixxi yanna, Yihowwaaꞌa ulfeesissaaxxe kaddaashasha assa dandeetinaaki hittate? Weliꞌaan weli affinneexxi eeyyunte nophphitaꞌn meꞌita wodda jaalala hanoꞌoxxi haranga jabataꞌn meꞌiteechcho haꞌnoꞌni fakkaattoꞌa dandeettaan. Yihowwa haꞌnoꞌni gammadabaashsha assitaaxxa heene yaanenna assitinabaashsha haꞌnoꞌo gargaartaxxi yaane maachcho? (1 Qoro. 6:18) Battichcha haasoꞌa haasottinoqqe, haꞌno lami calli qoffitti hexxinoqqe, ittan miket iimi darre haꞌwitinoqqe. (Effe. 5:3) Tinni yaanuwwa saaliinxa yorte lebbaꞌn meꞌitaashsha assitammaxxee, toggitte kaddeexxa yaane assa haꞌurtaashsha assitaan. Haꞌnooxxi weli uuxxeccatixxi yanna Yihowwa ulfaataaxxe kaddaashsha assatee maa assitinaaxxa duuchchinii wodda mariꞌattineelenaꞌa? (Fakkeenna 22:3 yaansis.) Tophphiinke bogaꞌn hedhaꞌneeka lame manna Daawitinna Alimaaze maachchi gargaareexxa uundo. Insaꞌnenna iitta hineen: “Noꞌo yanna saꞌisinaannaki heddi manji hedheeba yookiin jaaluwwa noꞌokenniten. Ijjenda kaamole giddo yookiin mini giddo qofitti heꞌnaannabaan. Tinni yaanuwwanna haꞌuraake jeeji giddo inbabeꞌnoshsha gargaarteꞌeen.”

11. Weli Uuxxeccateꞌn hedheeki manni weliꞌaan weli jaalala leellishaa wodda hediyyo hasissaaxxi yaane maachcho?

¹¹ Weli Uuxxeccaten hedheeki manni weliꞌaan weli jaalala leellisha hasissaa? Mittunte haꞌnooxxi jabattaꞌn meꞌitaashsha seeriinke kadeeke orinni weliꞌaan weli jaalala leellishatee murteesexxinaaxxi hedha dandeettaan. Kaddomaleꞌe, saaliinxi yorte haꞌnooxxi eebbittaꞌn meꞌitoole bekkumiinxa murte assedha haꞌura dandeettaan. (Mehal. 1:2; 2:6) Weliꞌaan weli jaalala leellishshinaa wodda ifi hira haꞌurtaammaxxee, Yihowwaa yaadissaaxxa yaane muuxxinaashsha assa dandeettaan. (Fakke. 6:27) Tenneꞌa weli uuxxecca saffinaaxxa yanna, Maxaafi Qullichchiinke hundaayyetike seerinni weli aaga garinni saxxinabaaxxa gabala uggudhdhatee mariꞌatte.c (1 Tese. 4:3-7) Ifi iitta hitine qorre: ‘Noꞌo heꞌnaanneke loolaꞌn hedheeki manni weliꞌaan weli leellinshaannexxe jaalalaꞌa afeexxi uushsho maachcho? Kunni jaalala leellishatiki ori noꞌoxxi laminiingixxi saaliinxi yorte eebbitaashsha assaake?’

12. Weli Uuxxeccateꞌn hedheeki manni oddo insaꞌnexxen rakkonna weli aaggo gonphe hexxeexxa hubantoole hediyyo hasissaaxxi yaane maachcho?’

¹² Rakkonna weli aaggo gonphe oddo haꞌnooxxen hexxoole maa assitina? Yanna yanna weli aaggo gophphinaꞌnoolenna? Tinni yaane haꞌno bultetee kaddinabaake manna kaddeexxa leellishshaaxxe yaane? Iitta hiyyotebaan; Buutotinna duuchchiinge bultetike jaaluwwixxe oddoꞌn gargarunte hexxeen. Jabaxxi bulte hundeesendeeki oddoteꞌn hexxeexxa gargarunte dandeꞌatee, jabaxxa woꞌlaancho assaꞌneeke lame mannaꞌniteen. Tenneꞌa taꞌa rakko tikatee assitinaꞌneexxi woꞌlaancho ediꞌaa bulte haꞌnooxxi qabbaaxxe kaddeexxa leellishaaxxe yaane kada dandeettaan. Ifi iitta hitine qorre: ‘Yaane mitte ititikinna ulfinniki mariꞌata dandeennaane? Balleessa ifixxa addante jijjiirra assatee woꞌlaannane? Ishshi hinaanneki, gattowaali qorraanneki ittan gattowaal hinanneki muddamikitee?’ (Effe. 4:31, 32) Kaddoolenna, weli uuxxeccatixxa yanna duuchchinii wodda weli aaggo gophphinaꞌnoole, yookiin weliꞌaan weli morondinaꞌnoole, kunni jeeji bulte giddo eꞌyitinoolenna jijjiiremabaaxxa egeꞌnendeexxen. Kunni manji bultetee atiꞌaa kadabaake kadeexxa addattotole weli uuxxecca uurrisa laminiinge haꞌnoꞌaa laꞌo affeexxe murten.d

13. Lami bulteteꞌn eꞌyatee hasaꞌneeki manni haani qicoꞌn weli uuxxecca hasissaaxxa murteesedhatee insaꞌnee gargaartaaxxi yaane maachcho?

¹³ Weli uuxxeccateꞌni turiyyo hasissaaki haani qicoꞌnite? Heddo yanna wiinamiki assinaaxxi murte rakkoteꞌn ibissaan. (Fakke. 21:5) Tenneꞌa, weli uuxxeccatixxi yanna okkonee manjo adda egeꞌna dandeettinaashsha qeerraaxxe yannaꞌa turtaaxxe kadiyyo hasissaan. Kaddomaleꞌe, haranganna qeerraaxxe yanna kadiyyo hasissabaan. Maxaafi Qullichchi : “Muuxemebaangi turaaki tasfi qalbe madoossaan” hiyyaan. (Fakke. 13:12) Ittin lebendaaxxa, weli uuxxeccatixxi yanna qeerrexxeexxe qixxeꞌn saaliinxa yorte faachcheeffata haꞌurtaꞌn meꞌitaan. (1 Qoro. 7:9) Weli uuxxeccateꞌni turtiinaaxxe yannaꞌni calla miꞌlachcho assati iimi darre, eloxxa murte assedhatee ‘konne manjo uuddaaxxa egeꞌnonna hasaaꞌnexxi yaane maachcho?’ hitine ifi qorre.

WELI UUXXECCATEꞌN HEDHEEKA MANNA KIPHA DANDEENNANNOKI HITTATE?

14. Weli Uuxxeccateꞌn hedheeka manna hoone oruwwinni kipha dandeennanno? (Fakke uudi.)

¹⁴ Weli Uuxxeccateꞌn hedheeka manna egennoonnole insaꞌne kipha dandeennannoki hittate? Noꞌonni welt sagale indaashsha, mini hadixxe mageneeffachchoꞌn yookiin dayyeffachchotixxe bakaꞌni noꞌonni welt heꞌnaashsha yeꞌa dandeennannon. (Roome 12:13) Tenne assinaannexxe yaanenaaꞌn kexxeexxa insaꞌnenna weli adda egeꞌna dandeennaan. Kaamolet meꞌinaa wodda yookiin qofitti heꞌne haasoonnaaxxe bakaꞌni insaꞌnenni welt hedhaaka manjo hansaꞌnee? Insaꞌnenni welt hedhonnaa qorroole insaꞌnee gargaaratee ishshi hiyyaane? (Gela. 6:10) Iimiiꞌn uundeennaxxi Aliisha, isennaa Ashiwiin saandaammaxxa yaane uuddaaxxa qalli hiteꞌe iitta hiteen: “Mitte mitte dayyuwwa kofitti hexxineꞌe haasoꞌa hassinaaxxa yanna noꞌoba daga dandeetinaan, hitaammaxxi yaane gammachchiissaamaxxe yaanemman.” Insaꞌnenni welt hexxattoshsha ateꞌe qorroole, tenneꞌe yaane mabtetishsha assitꞌe uuddeetelenaꞌa? Insaꞌnee qofitti hune waala hasissabaaxxa qalbeeffat, kaddomaleꞌe, qofitti hedhe haasoꞌateꞌe, insaꞌnaꞌa bakkannaa yanna hasissaaki haanote kaddeexxa qalli hiyyi.—Filph. 2:4.

15. Weli Uuxxeccateꞌn hedheeka manna gargaaratee, jaaluwwa assa dandeettaaxxi wele yaane maachcho? (Fakkeenna 12:18)

¹⁵ Insaꞌneꞌe, haasoonnaannexxe yaanenninnaa haasoꞌa hasissabaaxxa yaane haasoꞌa gophati kipha dandeennannon. Mitte mitte yanna ifi hira hasissaaxxi yanna hexxaan. (Fakkeenna 12:18 yaansis.) Fakkeennakeꞌe, lami manni weli uuxxecca safeexxa wele mannaꞌn kula hansannoxxi hexxaan, kaddomaleꞌe, kunni bulteteꞌn eꞌatee hasaꞌneeki manni, insaꞌne ifiꞌaan tenne yaane manjokeꞌn kulloꞌaa hansaaxxinna hexxaan. Insaꞌnee hamata yookiin gonphe insaꞌnexxa welekeꞌn haasoꞌa hasissabaan. (Fakke. 20:19; Roome 14:10; 1 Tese. 4:11) Ittan kunni lami manni bulteteꞌn eꞌyaashsha yaada uwwa yookiin qorroꞌaa eenabaaxxinna hedha dandeettaan. Eliisi hiyyendaꞌneexxi dayyonnaa isek miniinki anni iittan hineen, “Noꞌo mariꞌantebenongi weli manji, jilatixxa qophphe noꞌoꞌo qoraa wodda shoonkaannan.”

16. Lami manni weli uuxxecca uurriseexxe kaddoole, tenne yaane hitta uundanno?

¹⁶ Lami manni weli uuxxecca uurrisatee murteessedhoolena? Yaane insaꞌnexxi giddo eꞌya yookiin insaꞌne giddiiꞌn mitte balleessanjiishsha assine uudiyyo hasissaabaan. (1 Pheexi. 4:15) Liyate hiyyendaaxxi dayyo iitta hiteen: “Aninna mitti dayyi weli uuxxecca uurrissennexxeꞌe, weli manni insaꞌnenni fakkaatteexxa yaane haasoꞌaaꞌna laqenneni. Haranga giddo anxinna miidhendeen.” Iimiꞌn uundenneshshan, bulteteꞌn eꞌyatee hasaaꞌneeki lami manni weli uuxxecca uurrisoole, tenne murte insaꞌnexxa elobaaxxishsha assineꞌe hediyyo hasissabaan. Heddo yanna bulteteꞌn eꞌyatee hasaꞌneeki manni eloxxa murte assedheexxe kaddoole, weli uuxxecca herrega insaꞌnekeꞌn gennaashsha gargaariten hiyyoten. Kaddomaleꞌe, tinni murte yaandaashsha assitoꞌaa ittan qofi ganteechcho insaꞌneꞌn fakkaattoꞌaa dandeettaan. Tenneꞌa insaꞌnee hitta gargaarrannoxxa heda hasissaan.—Fakke. 17:17.

17. Weli Uuxxeccateꞌn hedheeki manni heene yaane assa itti ediꞌaa sufiyyo hasissa?

¹⁷ Iimiꞌn uundenneshshan weli uuxxeccatixxi yanna, haꞌurtaaxxe kaddoolenna gammachchiissaaxxen. Jeesiika iitta hiteen: “Dhugaande hiyyaannen, weli uuxxecca jabaxxe hujen. Kaddomaleꞌe, weli uuxxecca hunnanna yanna laqqaaxxe kaddoolenna gammadeennen.” Weli Uuxxeccateꞌn hexxineeke manna kaddinoole wel adda egeꞌna ittin suffe. Iitta assiteneexxe kaddoole, weli uuxxecca haꞌnooxxi qabbeexxe kaddaan, ittan haꞌno lamiing eloxxa murte assexxinaashsha gargaartaan.