Atiꞌa Kaddaaxxa Bultetixxa Jaalo Alfa Dandeetattoki Hittate?

1-2. (a) Aadhebaaki Kirsitaani weli uuxxecca safati edi darre hediyyo hasissaaxxi yaanuwwa maachcho? (b) “Weli Uuxxecca” hiyyo maa hiyyote? (“Ifisemeeka Yaada” hitaꞌneexxa kollo uudi.)

AADHA hassaate? Aadha yookiin heerumi gammashshotee umo yaane kadanna gophphoole, heddi aadhebaaki Kirsitaani, dargaggeeyye yookiin cimeekinna aadhatee hasaan. Aadhatee hassaateke manjinni weli uuxxecca safati edi darre, maallaqiinxa, manfasiinxanna irriinxa qophphe assedhiyyo hasissaan.a (1 Qoro. 7:36) Iitta assitaattexxe kaddoole eloxxa bulte alfa dandeettatton.

² Kaddomaleꞌe, bultete kadaaka manjo alfa duuchchii wodda shollaxxebaan. (Fakke. 31:10) Ittan, adda egeꞌnatee hassaateka manjonna affottole okkone manjinni weli uuxxeccab safa shollaxxe kada dandeꞌa gophphaan. Tenne qoꞌneꞌni, isiꞌa kadaaka manjo halsaꞌneeki manji alfaashshanna weli uuxxecca safaashsha gargaartaaxxi yaane maachcho kaddeexxa uundannon. Ittan, gubaꞌeti giddo hedheeki weli manni, aadhaaka manjo halsedhaꞌneeka Kirsitaana gargaara dandeꞌaaki hittate kaddeexxanna uundannon.

BULTETE KADAAKA MANJO HALSA

3. Mitti aadhebaaki Kirsitaani aadhaaka manjo halsaa wodda hediyyo hasissaaxxi yaanuwwa maachcho?

³ Aadhatee hassaatole weli uuxxecca safati edi darre atiꞌaa bultetike jaalo kadoꞌaa hassaateki manji afoꞌaa hassaateka adabuwwa egeꞌniyyo hasissaan.c Iitta kada gophphoole, atiꞌaa kadaaki manji hedheeꞌnaanni, kadabaake manjinni weli uuxxecca saffattoxxi hexxaan. Bultete kadaaki huuni manjinna cuuphemeeke Kirsitaana kadiyyo hasissaan. (1 Qoro. 7:39) Kaddomaleꞌe, cuuphemeeki manji duuchchi eloke bultetike jaalo kadaan hiyyotebaan. Tenneꞌa, ifi iitta hite qori: ‘Hedho anxiki herregi maachcho? Mitti bultete hasaanneki manji ani hasaanneka hoone adabuwwa afee? Kaddoꞌaa hasaannexxi yaane miketixxee?’

4. Mitti mitti manni kadhaataa wodda heene yaanuwwa qoree?

⁴ Ati hassaateshsha kadaaka bultetika jaalo alfatee kadhatteettexxi mama affeexxebaan. (Filph. 4:6) Yihowwa ayyiꞌaanna bultetee kadaaka jaalo aadhe dage anga uuwwatee kako aageebaan. Kaddomaleꞌe, Yihowwa halcha atixxanna ateꞌni laqendaꞌneexxa yaane egeꞌneemmaxxeꞌe, bultetika jaalo alfatee halsittato wodda gargaaraan. Tenneꞌaa halcha atixxanna ateꞌni laqendaꞌneexxa yaane isoꞌn kuꞌli. (Faaro 62:8) Ossuntenna beekuma atiꞌa uwwaashsha kadhat. (Yaꞌiqo. 1:5) Yunaytid Isiteetise hedhaꞌneeki Joonid hiyyemaaki mitti aadhebaaki dayyi maa hiyye kadhataammaxxa haasoꞌeen: “Aadhatee hasaanneki manji afoꞌaa hasaanneka adaba Yihowwaꞌni kulaannan. Aniꞌaa kadaake manjinni futtii hiyyannoshsha kadhataannan. Ittan, eloke miniinke anna kadatee hasisaaka adabuwwa nossedhannoshsha Yihowwa aneꞌe gargaaraashsha kadhataannan.” Sirlaanka hexxaꞌneexxi Taanya hiyyendaꞌneexxi dayyo iitta hiteen: “Aniꞌa kadaaka bultetika jaalo halsedhaannaxxa yanna, Yihowwa aneꞌe addatemeennexxe, qajeelto uushsho affeennexxenna gammashshoti hedhannoshsha gargaaroꞌa kadhataannan.” Ati hassettexxe yannaꞌn, kadaaka bultetika jaalo alfanna gophphottole, Yihowwa maaliinxanna irriinxa halcha atixxa wonshatee kako aageꞌeen.—Faaro 55:22.

5. Aadhebaaki Kirsitaani Yihowwaaꞌa eeyyaake manjinni afematixxa heene futtii afee? (1 Qorontoosi 15:58) (Fakke uudi.)

⁵ Maxaafi Qullichchi ‘Goottiinxi huje bira saxxeeke manna kandannoshsha’ jajjabeessaan. (1 Qorontoosi 15:58 yaansis.) Yihowwaxxi huje bira saxxeeke manjo kaddatto wodda, gargariti hedheeke dayyuwwinninna dayyuwwat yanna saꞌissitaattaxxeꞌe, alfitattoxxi jajjabeesitaaxxe jaaluwwa calla kaddebaangi, atishshanni Yihowwaaꞌa ergatemateꞌn miꞌlachcho asseeke aadhebaakenna heerumebaake Kirsitaaninni afendatton. Ittan Yihowwaa gammachchiisatee, dandeettettexxa duuchcha assitaattole dhugaatixxa gammashsho alfitatton.

6. Bultete kadaaka manjo halsedhaaki Kirsitaani qalli hiyya hasissaaxxi yaane maachcho?

⁶ Bultete kadaaka manjo alfatee assitinaꞌneexxi yaane, hedho haꞌnooxxeꞌn lumoxxa bakka adhdhitabaashsha xexxeꞌatte. (Filph. 1:10) Gammashshotee hundaayye kaddeexxi yaane, aadha yookiin heerumake kaddebaangi, Yihowwanni welt affineexxe firunten. (Mat. 5:3) Ittan, aaxxinebaangi qofitti hexxinaaxxa yanna ergachchotixxa huje baꞌlisatixxa caaldeexxa futtii alfa dandeettinaan. (1 Qoro. 7:32, 33) Tenne yanna elo garinni laꞌoonfatte. Yunaytid Isiteetise hexxaꞌneexxi 30 woggake muuxamibaaꞌa heerundeexxi Jeesika hiyyendaꞌneexxi dayyo iitta hiteen, “Heerumebeꞌnongi hedhennaxxa yanna ergachchotixxe hujenni abidemeennaxxeꞌe, heerumatee hasaannolenna, itite hedhannoshsha aneꞌe gargaarteen.”

YANNA ADHDHITE ADDA KOKI

7. Mitte bultete kadaan hinaanneka manjo, eenaannexxa kulati edi darre yanna adhdhine kokiyyo beekkumake hinaanaanneki mayeete? (Fakkeenna 13:16)

⁷ Mitte manjo bultete kadaan hite heddottole maa assittato? Okkonne manjo eettaattexxa hirbangeꞌni marte kuliyyo hasissaa? Maxaafi Qullichchi beekichchi manji mitte yaane assat edi darre egeꞌna halsaaxxa haasoꞌaan. (Fakkeenna 13:16 yaansis.) Tenneꞌa okkone manjo eettaattexxa kulat edi darre maliki kokati beekkichcha manjo kadi. Neezerlaande hedhaꞌneeki Ashiwiini, “jaalalatixxi yorte wiinamiki nophphite, wiinamiki baꞌa dandeettaan” hiyyeen. “Tenneꞌa mitte manjo yanna uute koki maleꞌe, yannati uduma baxxaaxxe yorteꞌni hundeessende weli uuxxecca saffoxxe.” Wele darrenaaꞌn kinni, bultete kadaan hite heddattoka manjo kokkattoxxa yanna ikki manji atiꞌa kadabaake kadeexxa hubattattoxxinna hexxaan.

8. Mitti aadhebaaki manji bultete kadaaka manjo koka dandeꞌaaki hittate? (Fakke uudi.)

⁸ Bultetee hassinaaka manjo maliki koka dandeettinaaki hittate?Gubaꞌeti giddo yookiin manji heddi bukki hiyyeexxe bakkaꞌn okkone manjixxa manfasiinxa hedho, ayyunte isixxanna adaba hubattinaaxxi hexxaan. Konne manjiki jaali ayyete? Haasoꞌatee eeyyaꞌneexxi yaane maachcho? (Luqa. 6:45) Herregi isiki atikenni weli fakkaataakee? Isixxe gubaꞌexxa geedhe yookiin isoꞌo adda egeꞌneeka galfateeka Kirsitaana qora dandeettatton. (Fakke. 20:18) Hitta hedheeka summanna adaba afeeke manjo kadeexxa qora dandeettatton. (Ruuti 2:11) Konnee manjo kokkattoxxa yanna shookissabexxoshsha xexxeꞌati. Yaada isika, maqonna bakka isixxa ulfeesi.

9. Bultetee kadaan hitineꞌe heddinaake manjibaa shiqat edi darre kokiyyo hasissaaxxi yaanuwwa maachcho?

⁹ Hassinaꞌneeke manjoꞌn eettinaꞌneexxa kuldinebaangi hittee qico turyo hasissa? Hasinaꞌneeke manjibaaꞌa rakkine shiqqinaꞌneexxe kaddoole hiddinebaangi wiinamiinxa tarkaaffe adhdhitinaaxxi hexxaan. (Fakke. 29:20) Kaddomaleꞌe, ikki manji ati isoꞌo hassaattexxa egeꞌneeꞌnaanni ati qeerraaxxa yanna turtaattexxe kaddoole, murte murteessedhatee hooddaatteke manjo kaddeettexxa hubataaxxi hedha dandeettaan. (Meki. 11:4) Mitte hassaattexxe beltoni shiqat edi darre, iseꞌe aadhannon hite kokiinke kadiyyo hasissabaaxxa qalli hiyyi. Kaddomaleꞌe, atinni aadhatee qophpheeffatteettexxanna ise atiꞌa kaddaaxxenna kaddabaaxxa kaddeexxa kokiyyo hasissaan.

10. Mitti manji ateꞌe yoraꞌneexxa egendottole atixxi yorte kinni isixxishsha kada gophphoole maa assitatto?

¹⁰ Mitti manji ateꞌe yoraꞌneexxa egendottole maa assitatto? Atiki yaadi okkone manjikishsha kada gophoole, yaada atika assitaattexxe yaanenni leellishatee woꞌlaan. Ati okkone manjo eettaabexxongi, ikki manji ateeꞌe hedaashsha assitaaxxa mitte mitte yaanuwwa assa, okkene manjiꞌa mararte affebexxoxxa leellishshaan.—1 Qoro. 10:24; Effe. 4:25.

11. Weli Uuxxeccatee yookiin aadhatee weli manji mellaake bogaꞌn qalli hiyya hasissaaxxi yaane maachcho?

¹¹ Mitte mitte bogaꞌn aadhebaake manjiꞌa kadaaka manjo, hadi yookiin weli galfateeki manji mellaaxxi bakka hexxeen. Wele bogaꞌni kinni mini hadi yookiin jaaluwwi, mitte aadhebaake manjiꞌa bultetika jaalo hasati, okkoneechchi uduma laminiinga manna afensiisat bultete kandaaxxa yookiin kandabaaxxa weli uuxxeꞌnaashsha asinaan. Mitti manji aadhaaka manjo isiꞌaa hassattoshsha qorreexxe kaddoole konne lami mannixxi halchanna filanno maachcho kaddeexxa qalli hiyyi. Okkone manjiꞌa buliitee kadaaka manjo affettechchi uduma, dandeesissee qicoꞌn ayyunte isixxa, adabuwwanna duuchchiinxi iimi darre manfasiinxa hedho isixxa egeꞌnatee woꞌlaan. Mitti manji Yihowwanni welt afeexxi firunte, maallaqakenaaꞌn, barachchotenaaꞌn yookiin ardi giddo afeexxe bakkanaaꞌn caaldaan. Bulteteꞌn eꞌyatee yookiin eꞌya gophatee muuxamiinxa murte assedhaaki konnee lame manna kadeexxa qalli hiyyi.—Gela. 6:5.

WELI UUXXECCA SAFA

12. Etaatteke manjinni weli uuxxecca safetee hassaattole, okkone manjoꞌn kuldattoki hittate?

¹² Mitte manjinni weli uuxxecca safatee hassaattole okkone manjoꞌn kuldattoki hittate?e Konne manjo; manji hedhaaxxe bakkaꞌn afemat, yookiin bilbilikinna kaddoole haasoossitattoka ora hasa dandeettatton. Eetaattexxa toggichcha kadeeke orini kuli. (1 Qoro. 14:9) Hasissaꞌneexxe kaddoole ikki manjinna hede hiissaaxxa yanna uwwi. (Fakke. 15:28) Ittan kunni manji ateꞌe hasa gophaꞌneexxe kaddoole yaada isika ulfeesi

13. Mitti manji ateeꞌe eeyyaꞌneexxa kuloole maa assittato? (Qolaasiyaasi 4:6)

¹³ Mitti manji ateeꞌe eeyyaꞌneexxa kuloole maa assittato? Kunni manji yaada isika ateꞌni haasoꞌatee atibaaꞌa shiqeeki, shollaxxinnite kada gophpheemmaxxeeꞌe, isiꞌa shaqquntetinna ulfinniki hiissichcho uwwi. (Qolaasiyaasi 4:6 yaansis.) Weli Uuxxecca safetee yookiin safa gophatee heddattoxxi yanna hasissaꞌnoole, ikki manji yanna uwwaashsha qora dandeettatton. Kaddoolenna, dandeessissee qicoꞌn hiissichcho harumaaxxe yannaꞌn uwwatee woꞌlaan. (Fakke. 13:12) Konne manjo hasa gophphaateke kadoole, yaada atika shaqquntetinna toggichcha kadeeke orinni ifisi. Awustiraaliya hedhaꞌneeki Hansi hiyyemaaki dayyi, mitte dayyo isooꞌo qorteemmaxxa yanna maa hiyye hiisseexxa hubatte: “Murte anxi maachchoke kaddeexxa iseꞌaa egeꞌnishenneki malikitenna kaddoole toggichcha kadeeke orinniten. Iittanna assenneki kaddabaaxxe yaaneni aneꞌe heqqexxaashsha hasa gophaannaxxeeꞌe yannandeꞌnitemman. Tennenaaꞌn kexxeexxa, yaada jijjiireenneshsha assite heddaashsha assitaaxxa yaanuwwa haasoꞌateenna assa gophatee xexxeꞌataannan.” Wele darrenaaꞌn kinnni, okkonne manjinni weli uuxxecca safetee hassaatole weli uuxxecca uuddaaxxa affeetteka yaada hassaattexxa yaane mariꞌatte. Ati hassaattexxi yaane nophphitettexxe aadanaaꞌn yookiin wele buutonaaꞌn kexxeexxa okkone manjixxenaaꞌn gargarit hexxeexxe kaddoꞌa dandeettaan.

AADHEBAAKA KIRSITAANA KIPHA DANDEENNANNOKI HITTATE?

14. Haasoonnaannexxe yaaneni aadhebaaka irsitaana kipha dandeennannoki hittate?

¹⁴ Noꞌo duuchchiing aadhatee hasaꞌneeka Kirsitaana kipha dandeenannoki hittate? Iitta assinannoki taakkaki ori haasoonaannexxa yaane xexxeꞌatatiten. (Effe. 4:29) Iitta hine ifi qora dandeennannon: ‘Aadhatee hasaꞌneeka manjo cooraane? Mitti aadhebaakinna heerundebaaxxi dayyo welt haasoonaaꞌnaa uudanno wodda jaalala sanfeeshsha assee hedaane?’ (1 Ximo. 5:13) Mitte aadhebaagi yookiin heerumebaangi hedheeka Kirsitaana, taꞌi qicoꞌni qofitti hedheeki isooꞌo hasaaki manji gophemeeshsha asse hedaashsha assaaka yaada ijjenda haasoꞌiyyo hasissabaan. Woldo iimiiꞌn uundeennaki Hansi iitta hiyyeen: “Mitti mitti dayyuwwi mayeete aadha gophpheeteki? Haani qicoꞌnite qofitti hexxaateki? hiyyaan.’ Iitta hedheeki haasoꞌi aadhebaaki manji ulfeessemaꞌnebaaxxa leellishati yookiin aadhatixxi halcha lebbaashsha assati gadhi darre wele laꞌo afebaan.” Aadhebaangi hedheeka Kirsitaana galateeffantannoxxa futti halsa hittatta eloxxe!—1 Tese. 5:11.

15. (a) Roome 15:2 keꞌn, hedheeke hundaayyeti seerishsha, Mitti manji aadhaaka manjo alfaashsha gargaarat edi darre hediyyo hasissaaxxi yaane maachcho? (Fakke uudi.) (b) Viidiyotenaaꞌn maa barachcho alfitinee?

¹⁵ Mitti dayyinna mitte dayyo eloke arenna aroꞌo kandaan hine hendonnole maa assinano? Maxaafi Qullichchi weli manjixxi halcha maachcho kaddeexxa hediyyo hasissaaxxa haasoꞌaan. (Roome 15:2 yaansis.) Heddi aadhebaaki yookiin herumebaaki manji insaꞌnaa bultetee kadaake manjinni weli manji afensiisoꞌa hasabaan, tenneꞌa halcha insaꞌnexxa ulfeessa hasissaan. (2 Tese. 3:11) Hiirqi kinni weliinka gargaarsa hasaꞌneexxenna kaddoole, noꞌoka gargaarsa qorebaa qicoꞌn tenne yaaneꞌn oddo eꞌyiyyo hasissabaan.f (Fakke. 3:27) Mitti mitti toggichcha kadeeke orinni hasaꞌneeke manjinni egeꞌnematee hasabaakinna hedha dandeꞌaan. Liidiya hiyyendaaxxi Jermeene hexxaꞌneexxi mitte herundebaaxxi dayyo iitta hiteen: “ Gargaaratee hassinaꞌneeka lame aadhe heerumebaaka Kirsitaana heddi manji bukki hiyyeexxe bakkaꞌn afemaashsha assa dandeetinaan. Konne lame aadhebaakanna heerumebaaka Kirsitaana afensiisineꞌe gatteexxa yaane insaꞌnaa waalle”

16. Aadhebaaki Kirsitaani qalli hiyya hasissaaxxi yaane maachcho?

¹⁶ Noꞌo duuchchiing aaꞌnennekinna aaꞌnebenoki gammachchiissaaxxa hedho hedha dandeenannon! (Faaro 128:1) Aadhatee hassaꞌni, hassaateka manjo afa gophphottole, Yihowwaꞌa ergatema ittin ediꞌaa sufi. Makkaꞌo hinaake bogaꞌni hexxaꞌneexxi Seni Ye hiyyendaaxxi dayyo iitta hiteen: “Taꞌa qofitti hexxinaaxxi yanna Genneteteꞌn miniinke anninni hexxinaaxxe yannanni welt hokkokkinsaa wodda haranga shiixxooxxen. Tenne yanna elo qicini laꞌoonfatte,” Atiꞌa bultetee kadaaka manjo alfite isinni welt weli uuxxecca saffoottole maa assittato? Itti aandaaxxe qoꞌneꞌn elo garinni weli uuxxecca dandeessissaaki hittate kaddeexxa uundannonni.