Addeti Mammaremme

1. Phawuloosi hedho isixxa udumaa wirriyye hedaa wodda gammadaammaki mayeete kada dandeetta?

PHAWULOOSI mitte wodda shiqixxe yannaꞌni reyaꞌneexxa egeꞌneemman. Kaddomaleꞌe hedho isixxeꞌni gammadaashsha assitaaxxi jabaxxi buuto hexxemman. Hedho isixxa udumaa wirriyye hedati: “Gongichcho bireennen, addenna heqqedheennen” hiyyeen. (2 Xi. 4:6-8) Phawuloosi ergatenshatixxe hujeꞌni eloxxa murte assedheemmaxxeꞌe, Yihowwa isoꞌni gammadaaxxa egeꞌneemman. Noꞌonna isishshanni eloxxa murte murteessedhateꞌe, ittan Mageninna noꞌoꞌni gammadoꞌaa hansaannen. Iitta assa dandeennannoki hittate?

2. Addeti mammaremate hiyyo maa hiyyote?

² Phawuloosi ifinna ittan wele addatemeeka Kirsitaanaa: “Mammaremmaanneki addetite malee uudatitebaan” hiyyeen. (2 Qo. 5:7) Phawuloosi iitta hiyya wodda maa hiyyote? Maxaafi Qullichchi giddo, “mammarema” hitaaxxi hiyya mitte mitte wodda, mitti manji hedhatee melledheeka ora ifissaaxxen. Mitti manji uushsho callinni mammaremaa wodda, murte isixxi irriinke bisi isikinni uuddaaxxenna laqaaxxe yaaneꞌni ittan isoꞌni fakkaatteexxe yaaneꞌni calla hundeessendeexxe kaddaan. Wele darrenaaꞌni kinni, mitti manji addeti mammaremaake kada wodda, murte isixxi Mageno Yihowwaꞌni afeexxe addeꞌni hundeessendeexxe kaddaan. Adde afeeke manjixxi murte Mageni isoo badhaasaaxxanna Qaale giddo Yihowwa uwweeki gorsi isiꞌaa laꞌo afeexxa addataꞌneexxa leellishshaaxxen.—Far. 119:66; Ibr. 11:6.

3. Addeti mammarema maa laꞌo affee? (2 Qorontoosi 4:18)

³ Dhugaateni noꞌo duuchchiniingi uundannexxenna lanqaannexxe ittan noꞌoꞌni fakkaattaaxxe yaaneꞌni irkante murte murteesseꞌnannoxxi yanna hexxeen. Uundannexxanna lanqaannexxa yaane calla hendaꞌni jabaxxa murte murteesseꞌnaannole, rakkoteꞌni inbannoxxi hexxaan. Mayee? Buutotinna uundannexxinna lanqaannexxi yaane duuchchinii wodda dhugaa calla kaddaan hiyyotebaan. Tenne yaane callaꞌni irkante murte asseꞌnaannexxe kaddoole, laanginni Mageni gibaaxxa yaane huja sanfannoxxi hexxaan. (Mek. 11:9; Mat. 24:37-39) Addeti mammaremmanno wodda kinni, murte noꞌooxxi irran caala “Gootta gammachchiissaaxxe” kaddaan. (Eff. 5:10) Mageniinka gorsa hordonfanno wodda kinni, qalbe giddika nageꞌanna dhugaatixxa gammashsho alfinannon. (Far. 16:8, 9; Isa. 48:17, 18) Ittin lebendaaxxa, addeti mammarema ittin ediꞌaa sunfaannole, bari bariinxa hedho alfinannon.—2 Qorontoosi 4:18 yaansis.

4. Mitti manji addeti yookiin uudati mammaremaꞌneexxa egeꞌna dandeꞌaaki hittate?

⁴ Addeti yookiin uudati mammaremmaannexxa egeꞌna dandeennannoki hittate? Konne qortummiki hiissichchi: Murte murteesseꞌnaanneki mayekeꞌni irkanteete? Uundanneexxe yaane callaꞌn akeekemmaꞌnite moo gorsa isikeꞌni anfeennexxe addeꞌni akeekemaꞌnite? hiyyaake qortummaꞌni huundeessemeeken. Haranga hasissaake sase tooruwwinni kunnirinna: huje halsinnanno wodda, buliite kadaaka manjo halsinnanno woddanna tiꞌokiraasetixxi akeette uwwenda wodda, addeti mammarema ittin ediꞌaa sufa dandeennannoki hittate kaddeexxa uundo. Eloxxa murte murteessedhatee tenne sasiinxe yaanuwwaꞌni heda hasissaaxxa yaanuwwa uundannon.

HUJE HALSINANNO WODDA

5. Huje halsinanno wodda heda hasissaaxxi yaanuwwa maachcho?

⁵ Noꞌo duuchchiningi ifiꞌaanna mini hado noꞌoke hasissaaxxa yaane wonshatee hansaannen. (Mek. 7:12; 1 Xi. 5:8) Mitte mitte hujuwwa eloka runda kaffallaaxxen. Tenne hujuwwaa kaffallaaki maallaqi, mitti manji ifiꞌaanna mini hado isikee hasissaaxxa yaane wonshe, soodiꞌaanna suuqedheeꞌnaa geyaake kada dandeꞌaan. Wele hujuwwaa kaffallaaki rundi kinni mitti hujalli, mini hado isikee hasissaaxxa yaane wonshatenaaꞌni saꞌaakebaan. Mitte huje safatee yookiin safa gophatee murteesseꞌnanno wodda huje itti hitteeka maallaqa kaffallaꞌneexxe kaddeexxa hendannoxxi egeꞌnendeexxen. Kaddomaleꞌe, mitti manji tennee yaanuwwa calla hedaꞌneexxe kaddoole, mammaremaꞌneeki uuda callinnite kada dandeꞌaan.

6. Huje halsinanno wodda addeti mammarema dandeennannoki hittate? (Ibraawiyaane 13:5)

⁶ Addeti mammaremmaannexxe kaddoole, mitte huje Yihowwanni welti anfeennexxa jaalunte tuqqaaki hittate kaddeexxa hendannon. Ifi iitta hinee qora dandeennannon: ‘Huje tinni Yihowwa gibaaxxe yaane giddo eꞌyannoshsha assitaaxxee?’ (Fak. 6:16-19) ‘Mageneeffachcho anxa tuqqaaxxee? yookiin mini hado ankenni afemebeꞌnongi qeerraaxxa yanna turannoshsha assitaaxxee?’ (Flp. 1:10) Konne qortummuwwiki hiissichchi eeti hiyyaake kadoole, huje sholla qiccinni afema gophphaꞌnoolenna iitta hexxeexxa huje safa gopha eloxxen. Addeti mammaremmaannaxxeꞌe Yihowwa wele orinni noꞌaa hasissaaxxa yaane wonshaaxxa addantannexxa leellishshaaxxa murtemurteesseꞌnannon.—Mat. 6:33; Ibraawiyaane 13:5 yaansis.

7-8. Mitti Bitaꞌike Ameerikaꞌni hedhaꞌneeki dayyi addeti mammaremaꞌneexxa leellisheeki hittate? (Fakketanna uudi.)

⁷ Mitti Bitaꞌike Ameerikaꞌni hedhaꞌneeki Hayiveeria hiyyemaaki dayyi addeti mammarema laꞌo affeexxa uudee qico hubatte. Isinna iitta hiyyeen: “Edo alfaannake rundinaaꞌni lame anga kaffallaaxxanna yoꞌoshsha gammachchiissaaxxa mitte huje safateꞌe barachchotika tarja anka aassennen.” Kaddomaleꞌe, Hayiveeri qajeellisanjo kadatixxa jabaxxa halcha afeemman. Ittin lebeexxi: “Mitti hujetiki akeekisanji hujetika qortuma anee qoraashsha prograami abidemeemman. Qortumi safebaa edi darre, aniꞌaa eldaaxxa yaane egeꞌneeki Yihowwate kadeexxa egeꞌneennaxxeꞌe isibaa kadhatennen. Huje anxixxa oge nossedhonnaa hasaannan. Kaddomaleꞌe, huje tinni manfasiinxe hedhoke herrega ankeꞌni geyonnaa gargaara gophphaꞌnoole, isee safonnaa hasaannabaan.”

⁸ Hayiveeri itti lebeexxi iitta hiyyeen: “Hujetiki akeekisanji qortumma qoraammaxxa yanna hujetixxe saate udumanna duuchchinii wodda huja hasissaaxxa kuleen. Tinni huje ergatenshatee gufo kaddaammaxxeꞌe, tennee huje huja dandeꞌaabeꞌnoxxa ulfinniki kulennen. Hayiiveeri huje tennee adhdha gibeen. Lame torba uduma, qajeellisanjo kadee ergatema safeen. Eettenne woggaꞌninni udumiiꞌni gamisa baraxxa huje alfeen. Isinna iitta hiyyeen: “Yihowwa kadha anxa laqeexxi qajeellisanjo kadeꞌe ergatemaanneke prograama ankenni welti metaaxxa huje aniꞌaa uwween. Qeerraaxxa yanna Yihowwanna dayyuwwa ankee ergatemannoxxa yanna alfennexxeꞌe yoꞌoshsha gammadeennen.”

9. Tireezeerixxe hedhotixxe barannonaaꞌni maa baratteette?

⁹ Taꞌa hujateꞌni heꞌnennexxi huje addeti mammaremmabeꞌnoshsha assitaaxxe kaddoolennaꞌa? Kongo hedhaꞌneeke Tireezeeri hiyyeemmaꞌneeke dayyixxa hedhotixxa baranno uundo. Isinna iitta hiyyeen: “alfeennexxi haarooxxi huje sholla qicinni afendaaxxebaan, edo alfaannakee rundinaaꞌni sase anganni caalaka runda alfaannan. Ittan aninna manjiinxe oddoꞌni ulfeessemeennake manjomman.” Kaddomaleꞌe, Tireezeeri hujetixxe yanna udumanna hujaammaxxeꞌe, heddo yanna gubaꞌe hosaamman. Jaaluwwi isikinna maallaqa alfateꞌe isi dhara haasoꞌaashsha tirtirsaamman. Tireezeeri tennee huje waalatee haseemman. Kaddomaleꞌe, wele huje alfa gophaaxxeenna sodaateemman. Isoo gargaarteexxi yaaneta maachcho? Iitta hiyyeen: “Inbaaqoomi 3:17-19 hedheeki yaadi huje tennee waalonnolenna Yihowwa anee wele orinni karkarsaaxxa egeꞌnannoshsha gargaareen. Tenneꞌaa huje tennee waalennen.” Ittin lebeexxi iitta hiyyeen: “Heddo hujalluwwaꞌni mitti manji eloka runda kaffallaaxxe hujeꞌaa hiyyeꞌe, heene yaanenna waalaan yookiin maateti saꞌissaaxxa yannanna manfasiinxe hedho isixxee assaaxxa yaane waala hasissaachcho fakkaattaan. Yihowwanninna maate anxenni afeennexxi firunte qiiddabaashsha xexxeꞌatennexxeꞌe yoꞌoshsha gammadeennen. Yihowwa woggati uduma miketixxa hedho hedhannoshshanna isiꞌaa ergatemaꞌni qeerraaxxa yanna saꞌissannoshsha assitaaxxa eloxxa huje alfannoshsha anee gargaareen. Hedho noꞌoxxeꞌni Yihowwaa gammachchiissaaxxa yaane edinsanno wodda mitte mitte yanna maallaqiinxi rakko noꞌoni geltaaxxi hexxaan, kaddomaleꞌe Yihowwa kinni noꞌoo karkarsaan.” Eeti, Yihowwake gorsaꞌninna isi kako aageexxe yaaneꞌni addantaannexxe kaddoole, addeti mammarema ittin ediꞌaa sunfannon, ittan isi noꞌoo eebbisaan.

BULIITEE KADAAKA MANJO HALSITINAA WODDA

10. Buliitee kadaaka manjo halsinnanno wodda uuda callinni mammaremmannoshsha assitaaxxi yaane maachcho kada dandeetta?

¹⁰ Bulii Yihowwaxxe uwwa kaddeemmaxxeꞌe, buliitee kadaaka manjo halsa dadumangeꞌni hexxeexxe yaanen. Mitte dayyo ediꞌaa iseke miniinke anna kada dandeꞌaaka manjo heddaa wodda mitti dayyixxa ayyunte, bifa, afeeka summa, afeeka maallaqa, maate giddo afeexxa bakka, ittan isee hitta abidaaxxa hubattaaxxi hexxaan.b Tinni duuchchiinxi hasissaaxxe yaanuwwan. Kaddomaleꞌe, tennee yaanuwwa calla uuddaꞌneexxe kaddoole mammarendaꞌneeki uushsho callinnite kada dandeettaan.

11. Buliitee kadaaka manjo halsinanno wodda addeti mammarema dandeennannoki hittate? (1 Qorontoosi 7:39)

¹¹ Yihowwa, dayyuwwa noꞌoxxi buliitee kadaaka manjo halsitaaxxa yanna gorsa isika hordonfaaꞌnaa uuda wodda insaꞌneꞌni hittatta gammadaaxxa hedde! Fakkeennakee insaꞌnenna “kalaala gennebaangi” buliitee weli uuxxecca sanfabaashsha uwwemaꞌneeka gorsa lanqaꞌneen. (1 Qo. 7:36) Insaꞌne buliitee hansaꞌneeki manji, Yihowwa eloke miniinke anna yookiin eloxxe miniinxe ama kadatee hasisaani hiyyeeka adabuwwa afeexxa konkaan. (Fak. 31:10-13, 26-28; Eff. 5:33; 1 Xi. 5:8) Yihowwaxxe Naqaashe kadebaaki mitti manji jaalala afeexxa insaꞌnaa leellishaa wodda 1 Qorontoosi 7:39 keꞌni bulii “Gootti callinni” kada hasissaaxxa uwwemeeke gorsiꞌaa ajajemmaan. (Xiqse yaansis) Yihowwa insaꞌne yorraꞌneexxa yaane ayyi iimi darre wonshaaxxa addatati addeti mammarema ittin sunfaan.—Far. 55:22.

12. Roozake fakkeennanaaꞌni maa baratteette?

¹² Kolombiyiinke bogaꞌni qajeellisanjo kadde ergatendaꞌneexxa Roozaxxa hedhotixxa baranno uundo. Hujetixxe buutonaaꞌni kexxeexxa isee yoraꞌneeke Yihowwaxxe Naqaashe kadebaake mitti manjinni higge higgeeni afendaamman. Kunni manjichchinna Rooza yoꞌoshsha eeyyeen. Rooza iitta hiteen: “isinna haranga eloke manjo fakkaattaamman. Loolakeꞌni hedheeka manna gargaarammakenna eloxxa hedho hedhaammake manjon. Anee mararteti karkarsaamma qiconna yoꞌoshsha eeyyeennan. Yihowwaxxe Naqaashe kada gopho malee, anke miniinke ana kadoꞌaa hasaannaki manji afoꞌaa hasaannaka adabuwwa duuchcha afeemman.” Ittin lebbeexxi, “heerumi yaadiki yoꞌoshsha hasaannaxxe yaane kadeemmaxxeꞌe, isoo giba haranga haꞌurteemman. Eettenne yanna qofitti gateenneshsha aneꞌni fakkaatteemman, ittan heerummanna hasaannan kaddomaleꞌe, dhugaati giddo heerummannoka manjo afa dandeꞌeennabaan.” Kaddomaleꞌe, Rooza uuddaꞌneexxe yaaneꞌni calla miꞌlachcho assitaammabaan. Isenna tinni murte Yihowwanni welti affeexxa firunte tuqqaaki hittate kaddeexxa adda heddeemman. Tenneꞌaa okkone manjichchinni afema waaldeen, ittan Yihowwaxxi hujenna iseꞌni bira saxxaashsha assiteen. Okkooꞌni shiixxoxxe yanna uduma Wengeelawootiinke Barachchotike Mineꞌni barattaashsha yeꞌendeen. Taꞌa kinni gargariti hexxeexxe qajeellisanjo kadde ergatemateꞌni hexxeen. Rooza: “Yihowwa qalbe anxi lumoxxe gammashshonni woꞌmitaashsha asseen.” Alfatee qalbeti yorrannexxi yaane hexxeꞌnaanni addeti mammarema haꞌurtaaxxe yaane kaddoolenna iitta assa kinni unsha hinannoshsha assitaaxxe yaanebaan.

AKEETTE UWWENDAA WODDA

13. Tiꞌokiraasetixxi akeette uwwendaa wodda uushsho callinni mammaremmmannoshsha assitaaxxi yaane maachcho kada dandeetta?

¹³ Yihowwaa toggichchi garrinni mageneeffantannoshsha gargaartaaxxi tiꞌokiraasetixxi akeette uwwendaaki, gubaꞌetixxe geedhe darreeꞌni, roginke iimike toꞌatalli darreeꞌni, dame beeronaaꞌn, yookiin Iimike Bisonaaꞌni kada dandeettaan. Kaddomaleꞌe, akeette mitte uwwendeexxa buuto egeꞌna gonphonnolenna? Akeette tinni noꞌoꞌni geesissa dandeettaaxxi qajeelto kaddebaaxxi, yaane calla noꞌoꞌni leellitaaxxi hexxaan. Dedha akeette uutaꞌneexxe dayyuwwaxxe gonpheꞌni miꞌlachcho assa sanfannoxxi hexxaan.

14. Tiꞌokiraasetixxi akeette uwwendaa wodda addeti mammaremmannoshsha assitaaxxi yaane maachcho? (Ibraawiyaane 13:17)

¹⁴ Addeti mammaremmaannole orga akeekaꞌneeki Yihowwate kaddeexxanna heꞌnenneka jeeja egeꞌneexxa addantannon. Iittatte kaddoole ajajematee wiinammennekenna assinaannexxe yaaneꞌa toggitte uushsho anfannon. (Ibraawiyaane 13:17 yaansis.) Ajajensha noꞌoxxi gubaꞌe giddo mittunte hexxaashsha assitaaxxa egenneennen. (Eff. 4:2, 3) Akeette uutaꞌneexxi dayyuwwa qulliyyetenna kada gophphoole, uwwendaꞌneexxe akeetteꞌaa ajajemmanno wodda Yihowwa noꞌoo eebbisaaxxa addantannon. (1 Sa. 15:22) Yihowwa toggi hiyya hasissaaxxa heene yaanenna hasissaaxxe yannaꞌni toggi assaan.—Mik. 7:7.

15-16. Mitti dayyi uwwendeexxe akeetteꞌni mama afoolenna addeti mammaremaashsha gargaarteexxi yaane maachcho (Fakketanna uudi.)

¹⁵ Addeti mammarema maa laꞌo affeexxa leellishshaaxxa hedhotixxa baranno uundo. Peeru bogaꞌni, baꞌla qicoꞌni manni haasoꞌaꞌneeki Isipanshuffate kadoolenna, heddi manni haasoꞌaammaki boga okkoneke laagaduwwan. Konne laagaduwwi giddiiꞌni mitti Keechiwa hiyyemaakemman. Heddo wogguwwaaꞌa Keechiwuffa haasoottaaxxi dayyuwwa konnee laagada haasoꞌaꞌneeka manna boga okkoneꞌni hassaꞌni turteen. Boga okkoneka mootummatika seera ulfeessateꞌe, insaꞌne konnee laagada haasoꞌaꞌneeka manna hansaꞌneeke oraꞌni orga jijjiirra assiteen. (Rom. 13:1) Tennenaaꞌni kexxeexxa mitte mitte dayyuwwa konne loolaꞌni hujendaꞌneexxe hujeꞌaa tinni akeette gufote kaddaan hite heddeemman. Kaddoolenna dayyuwwa tinne uwwendeexxe akeetteꞌaa ajajendeemmaxxeꞌe, Yihowwa Keechiwuffa haasoꞌaaka heddo manna afa dandeennaashsha assati woꞌlaancho insaꞌnexxa eebbiseen.

¹⁶ Keechiwuffatixxe gubaꞌe giddo geercho kade ergatemaammaka Keeviniinna tinni yaane yaaddisseemman. Isinna iitta hiyyeen: “Keechiwuffa haasoꞌaꞌneeka manna taꞌa anfaanneki hittate?” hiyye hedennen. Keevinni maa asseta? Iitta hiyyeen: “Fakkeenna 3:5 keꞌni hedheeka yaada qalli hiyyennen. Ittan Muusenna heddennen. Yihowwa Muuseꞌe udumiiꞌni shorraꞌneeke Gibtseke sannachchanaaꞌni, milinqaabi hedhebaashsha fakkaattaaxxe bakkabaaa Diimmoxxe Abbayyabaa akeekaashsha ajajeemman. Kaddoolenna Muuse akeette tennee ajajeemeemmaxxee Yihowwa arda isika manbeꞌa assa garinni gargaareemman.” (Zts. 14:1, 2, 9-11, 21, 22) Keeviini haarooxxe akeetteshsha lassatee fedhiitikemman. Tinni maa laꞌo affeemma? Keeviin iitta hiyyeen: “Yihowwa noꞌoo hittee qico eebbiseexxa manbeꞌa hiyyennen. Edi wodda Keechiwuffa haasoꞌaaka manna afatee qeerraaka ora menne mitte mitte wodda anfaannaki mitte yookiin lame manjo callamman. Taꞌa miꞌlachcho assinaanneki Keechiwuffa haasoꞌaaki heddi manni hedheexxe bakkaꞌniten. Tennenaaꞌni kexxeexxa heddo manna haasoossa, higge qorranna Maxaafa Qullichcha barsiisa dandeenneennen. Gubaꞌe dagaake manniki laakkoossinna lebeen.” Eeti, addeti mammaremmanno wodda Yihowwa noꞌoo duuchchinii wodda badhaasaan.

17. Tenne qoꞌnenaaꞌni maa barachcho alfiteette?

¹⁷ Sase haranga hasisaake tooruwwinni addeti mammaremma ittin ediꞌaa sunfannoki hittate kaddeexxa uundeennen. Kaddomaleꞌe, hedho noꞌoxxenni duuchchinii darren, fakkeennakeꞌe dayyeeffantannoxxa yookiini hafuura adhdhinnannoxxa yaane melleꞌnanno wodda barachchotee yookiin oose nossatee murteesseꞌnanno wodda addeti mammarema ittin sufa hasissaan. Heene murtenna murteesseꞌnanno wodda akeekema hasissaaki, uuda dandeennannoxxe yaanenni calla kaddeebaangi, Yihowwanni welti anfeennexxe firuntenni, gorsi isikenninna isi noꞌoo karkarsatee aageexxe kakkoꞌni anfeennexxe addenniten. Iitta assinnonnole, “Mageno noꞌokike Yihowwake summinni baro baro mennannon.”—Mik. 4:5.