Yihowwa Duuchchiingi Aadde Aagoꞌaa Hasaꞌneen

1. Mitti aadde aagaaki manji maa assa hasissa?

CUBBO hunjanno wodda aadde aaga haranga hasissaaxxe yaanen. Maxaafi Qullichchi mitti manji aadde aagaa wodda hujeexxe elobaaxxe yaaneꞌaa yaada, elobaake oraꞌni meꞌa uurrisanna langaxxa ettene yaaneꞌni higa gophatee murteessedhaa hasissaaxxa haasoꞌaan.—“Aadde Aaga” hitaaxxe hiyyaxxa tika uudi.

2. Noꞌo duuchchiingi aadde aaga uuddaaxxa barata hasisseeki mayeete? (Nehmiya 8:9-11)

² Hedhoti hedheeki manji duuchchi aadde aagaa uuddaaxxa barata hasissaan. Mayee? Buutotinna noꞌo duuchchiingi barra barrandeꞌn cubbo hunjaannaxxeeten. Noꞌo Addaamixxenna Heewwanixxe ila kandennaxxee, duuchchiingi cubbonna reyo insaꞌnenaaꞌn dhaalleennen. (Roome 3:23; 5:12) Noꞌo giddiiꞌn ayyinna qullichchi hedhebaan. Matanga jabaxxa adde afeemmake hawaarya Phawuloosiꞌninni elobaaxxa hedino injifata haꞌurataammaxxi yanna hexxemman. (Roome 7:21-24) Iitta hiyyo duuchchinii wodda cubbotenaaꞌn kexxeexxa adde wonxannon hiyyotee? Waawwot, Yihowwa marartetike Mageno kademmaxxee gammandeenneke kandonnaa hasaꞌneen. Nehmiyake baroꞌn hedhemmake Ayhuudootiinka fakkeenna uundo. (Nehmiya 8:9-11 yaansis.) Yihowwa insaꞌne edo hujeemmaxxe cubbonaaꞌn kexxeexxa yaandaꞌni heꞌnoꞌaa hasaammabaan. Tenne irra gammashshoti isoo mageneeffantaꞌn heꞌnoꞌaa hasaamman. Yihowwa aadde aaga gammachchiissaaxxe yaane kaddeexxa egeꞌneen. Noꞌoo aadde aaga uuddaaxxa barsiisaꞌneeki tenneꞌaaten. Cubbo hunjennexxee aadde aangaannexxe kaddoole, marartetiki Anni noꞌoki noꞌaa gattowwaal hiyyaaxxa addata dandeennannon.

3. Tenne qoꞌneꞌni mariꞌantaannexxi yaane maachcho?

³ Tenne qoꞌneꞌni aadde aaga uuddaaxxa sase yaanuwwa uundannon. Edinsennexxi, aadde aaga uuddaaxxa Yihowwa Israꞌeeloota maa barsiiseexxa uundannon. Okkooꞌni, cubbaaleeyye aadde aaggaashsha Yihowwa gargaaraꞌneeki hittate kaddeexxa uundannon. Muuxamakeꞌn, Yesuusi hordofooleeyye isixxa aadde aaga uuddaaxxa maa barsiiseexxa mariꞌantannon.

AADDE AAGA UUDDAAXXA YIHOWWA ISRAꞌEELOOTA BARSIISEEXXA YAANE

4. Aadde aaga uuddaaxxa Yihowwa Israꞌeeloota barsiiseexxi yaane maachcho?

⁴ Yihowwa Israꞌeelixxa gosa orgeesseexxa yanna insaꞌnenni kako aageemman, insaꞌnenna isiꞌaa ajajematee isinni weli aangeemman. Insaꞌne seeruwwa isika heqqeꞌneexxe kaddoole, isi insaꞌnee heqqaan, ittan eebbisaan. Konnee seeruwwa uuddaaxxa insaꞌneꞌaa iitta hiyye kokeesseemman: “Ani techcho atee ajajaanneki kunni ajaji, ateꞌn okkone qico haꞌuraakebaan, atenaaꞌninna bayyateekebaan.” (Zeda. 30:11, 16) Kaddomaleꞌe, isoꞌni jallanteꞌe wele magenuwwa mageneeffatatee melleꞌneexxe kaddoole, eebba isixxi insaꞌnenaaꞌn bayyattaan, ittan insaꞌnenna rakkoteꞌn inbaan. Iitta hiyyo kinni Mageni insaꞌnee ijjenda hune waalaan hiyyotebaan. Insaꞌne ‘Mageno insaꞌneke Yihowwabaa hingeexxi, isi hiyyaꞌneexxa yaane laqa dandeennaan.’ (Zeda. 30:1-3, 17-20) Weli orinni, aadde aaga dandeennaan hiyyoten. Iitta assineexxe kaddoole, Yihowwa insaꞌnebaa shiqaan, ittan eebba isixxi insaꞌneꞌaa bira saxxaan.

5. Yihowwa jallichcha kadeemmaka arda isika ossunteti abideemmaki hittate? (2 Negisite 17:13, 14)

⁵ Yihowwa melledheemmaki Israꞌeeliki ardi higge-higgeen isoꞌn jallataamman. Insaꞌnenna adibaare mageneeffantaamman, ittan wele fuggoxxa yaanuwwanna assinaamman. Tennenaaꞌn kexxeexxa rakkoteꞌn inbeen. Kaddomaleꞌe, Yihowwa jallaameeyye kadeeke konne arda isikeꞌn adde woxeemmabaan. Ardi isiki aadde aageexxi isibaa higaashsha jajjabeessatee higge-higgeen wabeekkooleeyye ergaamman.—2 Negisite 17:13, 14 yaansis.

6. Yihowwa ardi isiki aadde aagatixxa laꞌo egeꞌnaashsha wabeekkooleeyyeti darreeꞌn barsiisaammaki hittatemma? (Fakke uudi.)

⁶ Yihowwa heddo yanna jallichcha kadeeka arda isika, xexxeꞌachiisaammakinna toggi assaammaki wabeekkooleeyyeti darreeꞌniten. Fakkeennakeꞌe, Mageni Erimiyaasi darreeꞌni iitta hiyyeemman: “Waakkattitte Israꞌeelii, higi . . . Ani addatemeenneke kadennaxxee, haꞌnoo hifotixxe illenni uudabeꞌnon . . . Baro barokee mufataaꞌnon. Ati balleessa hujjettexxa calla addati, Mageno atike Yihowwaꞌn jallatteetten.” (Ermi. 3:12, 13) Iyuꞌeeli darreeꞌninna Yihowwa iitta hiyyeemman: “Qalbe mittenni anibaa higge.” (Iyu. 2:12, 13) Isiyaasi darreeꞌninna, “ifi caꞌa assedhdhe, elobaaxxa huje haꞌnooxxa ille anxi ediiꞌn fugusse, elobaaxxa yaane assa waalle” hiyyeemman. (Isa. 1:16-19) Ittan Hiziqeelinna iitta hiyye haasoꞌaashsha ajajeemman: “Ani fuggichchi manjixxe reyoꞌni gammadanno? . . . Ani gammadannoki ora isikenaaꞌn higeexxi hedhoti hedheeletebaa? Ani ayyixxe reyoꞌninna gammadaaꞌnon, . . . Tenneꞌaa higgineexxi hedhoti hedhdhe.” (Hizi. 18:23, 32) Yihowwa, manji baro baro hedhoti hedhoꞌaa hasaammaxxee, aadde aagaa wodda yoꞌoshsha gammadaan! Kaddomaleꞌe, Yihowwa cubbichchi manji isike gargaarsi belonni jijjiiremoꞌaa sammi hiyye waala?

7. Yihowwa wabeekkichcho Hooseꞌikanna isixxe miniinxe amaka raaga laꞌoonfateexxi arda barsiiseexxi yaane maachcho?

⁷ Yihowwa wabeekkichcho Hooseꞌixxe miniinxe amake Goomerike fakkeenninni arda isika barsiiseexxi yaane maachcho kaddeexxa hubatte. Ise yabaabuldeechchi uduma, Hooseꞌi waaldeexxi wele labballibaa meteemman. Gargaarsi iseꞌaa hasisabaan hiyyote? Qalbe manjiinxa egeꞌneeki Yihowwa Hooseꞌii, “Israꞌeeliki ardi wele magenuwwa hordofaaꞌnaanni Yihowwa eeyyemmashshanni, atinna martettexxi wele manjoꞌni eeyyendeexxanna yabaabuldaꞌneexxa manjichcho higgeen eeyyi” hiyyeen. (Hose. 3:1; Fakke. 16:2) Hooseꞌixxi miniinxi ama taꞌi qicoꞌn jabaxxa cubbo hujandeꞌn hexxeexxa qalli hiyye. Kaddoolenna, Yihowwa Hooseꞌi iseba mareexxi iseꞌaa gattowwaal hiyyaashshanna isenni araaremaashsha ajajeen.a Weli fakkaattaanxa, Yihowwa isoo laqaammabaake arda isikeꞌni adde woxeemmabaan. Insaꞌne fuggoxxa cubbo hunjaꞌneexxenna kaddoole, isi insaꞌnee eeyyaamman, ittan aadde aangaashshanna fuggoke oranaaꞌn hingaasha gargaaratee woꞌlaancho assa ittin ediꞌaa sufeemman. Kunni fakkeenni, qalbe manjiinxa firfirsaaki Yihowwa, jabaxxa cubbo hujateꞌn hedheeki manji aadde aagaashsha gargaarate woꞌlaancho assaaxxa leellishaake? (Fakke. 17:3) Meen uundo.

YIHOWWA CUBBAALEEYYE AADDE AAGGAASHSHA GARGAARAꞌNEE QICO

8. Yihowwa, Qayeeni aadde aagaashsha gargaareemmaki hittate? (Dadatika Maxaafa 4:3-7) (Fakke uudi.)

⁸ Qayeeni, Addaamikenna Heewwanike angafa beltomman. Isi cubbo hujatixxa yorte hado isikenaaꞌn dhaaleen. Itti lebendaaxxa, Maxaafi Qullichchi, “huje isixxi fuggoxxe” kaddeemmaxxa haasoꞌaan. (1 Yoha. 3:12) Qayeeni tolcha shiqiseemmaxxa yanna, Yihowwa ‘isoonna isixxa uwwa eloxxe illenni uuda gopheeki’ tenneꞌaate kada gophpheebaan. Qayeeni fuggoke oranaaꞌni higati irra, “yoꞌoshsha aareen, ittan jaba qicinni yaadeen.” Itti aana Yihowwa maa asse? Qayeenii haasoosseen. (Dadatika Maxaafa 4:3-7 yaansis.) Yihowwa Qayeenii shaqqunteti haasoosseexxa, eloxxa yaane assoole eebbisaaxxanna elobaake cubbotike oranaaꞌni higaashsha xexxeꞌachchiiseexxa hubatte. Yaadissaaxxa Qayeeni Yihowwa hiyyeexxa yaane laqa gibeen. Yihowwa isi aadde aagaashsha gargaaroꞌaa hiyyaa wodda isi fedhiitikemmabaan. Qayeeni isi hiyyaꞌneexxa yaane laqa gibeechchi uduma, Yihowwa wele cubbaaleeyye aadde aaggaashsha gargaaratee aassaꞌeexxa woꞌlaancho uurrisee? Waawwot!

9. Yihowwa Daawiti aadde aagaashsha gargaareeki hittate?

⁹ Daawiti, Yihowwa yoꞌoshsha eeyyaammake mootichchamman. Matanga isoo “qalbe anxishsha hedheeke manjon” hiyyeꞌe yeꞌeemman. (Huje 13:22) Kaddomaleꞌe, Daawiti yabaabulatinna manjo shiyati, jabaxxa cubbo hujeen. Muuseke seerishsha, Daawiti reya hasissamman. (Zele. 20:10; Zehu. 35:31) Kaddomaleꞌe, Yihowwa baꞌlunteti tenne yaanexxe oddoꞌni eꞌyeen.b Daawiti aadde aagatika beesisa leellisha gopheexxenna kaddoole, Yihowwa konne mootichchibaa wabeekkichcho Naataanii ergeen. Naataani qalbe Daawitixxa tuqaaka fakkeenna laꞌoonfateꞌe haasoosseen. Daawiti, Yihowwaa yaadiseexxa hubateexxi aadde aageen. (2 Samu. 12:1-14) Isinna aadde aageexxa leellishshaaxxa faaro borreesseen. (Faaro 51, faarotike umoꞌni afemaaka ifisanjo) Tinni faaro heddo cubbichcha manjo jajjabeesiteen, ittan aadde aagaashsha tirtirsiteen. Yihowwa eeyyaꞌneeka ergatanjo isika Daawitii aadde aagaashsha gargaara gammandannoshsha assitaaxxe yaanebaa?

10. Yihowwa cubbichcha kadeeka manjiinka belto ossunteti abidaꞌneexxanna gattowwaal hiyyaꞌneexxa egeꞌna maachchi ateꞌni laqemaashsha assitee?

¹⁰ Yihowwa heene cubbonna eeyyabaan. (Faaro 5:4, 5) Kaddomaleꞌe, noꞌo cubbaaleeyye kandeennexxa egeꞌneꞌeen, noꞌaa afeexxe jaalalanaaꞌni kexxeexxa cubbo injifantannoshsha gargaaraan. Isi duuchchinii wodda fuggoxxa cubbo hujaꞌneeki manji, aadde aagaashshanna isibaa shiqaashsha gargaaratee woꞌlaancho assaꞌneen. Tenne egeꞌna noꞌoo hittatta jajjabeesitaaxxe yaane! Yihowwaxxe ossunteꞌninna gattowwaaliꞌni alalchinennexxe qixxeꞌni, isiꞌaa addatemmeꞌe hedhateenna cubbo hunjennexxe kaddoole, rankennexxi aadde aagatee murteesseꞌnannon. Aadde aaga uuddaaxxa Kirsitaaniinxi gubaꞌe hitta barachcho alfiteexxa uundo.

YESUUSI AADDE AAGA UUDDAAXXA HORDOFOOLEEYYE ISIXXA BARSIISEEXXA BARACHCHO

11-12. Yesuusi Anni isikixxa gattowwaalii isoo caqasaammake manniꞌaa barsiiseeki hittate? (Gogakeꞌn fakke.)

¹¹ Keꞌitiinke dhibeesso baroꞌni Mesihchi dagaaxxi yanna gelteen. Saxxeexxe qoꞌneꞌni kulendemmashshanni, Yihowwa cuuphallo Yohaannisiinna Yesuusii laꞌoonfateꞌe arda isikee aadde aaga affeexxa laꞌo barsiiseemman.—Mat. 3:1, 2; 4:17.

¹² Yesuusi ergatenshateꞌni saꞌisseexxe yanna duuchchaꞌni, Anni isikixxa gattowwaali, isoo caqasaammake manniꞌaa barsiisaamman. Yesuusi tenne yaane barsiisatee, baꞌeemmake beltika fakkeenna manbeꞌa assaa garinni laꞌoonfateemman. Kunni dargaggeessi heenooxxe yannaꞌaa cubbotike oraꞌni meꞌatee murteessedheemman. Kaddoolenna, isinna “wodaniinbaa higeexxi” miniꞌaa higeen. Anni isiki isoo adhdheemmaki hittate? Yesuusi iitta hiyyeen: “Bayyanni hedheeꞌnaa anni isiki uudeen, eettenee yanna haꞌnura isoo culphisseen, gongaꞌni mareexxinna goobakeꞌn marxemeꞌe sunqedheen.” Belti kinna anni isikike mini giddo ergatanjo kada dandeꞌaaxxa qoreen, kaddomaleꞌe, anni ‘kunni belto anken’ hiyyati miniꞌaa adhdheen. Ittanni: “Baꞌeemman afemeꞌeen” hiyyeen. (Luqa. 15:11-32) Yesuusi butta dagebaa edi darre, iimateꞌni hedhemmaxxa yanna, Anni isiki aadde aaggaaxxe heddo cubbaaleeyyeꞌaa mararaaꞌnaa uudeexxi mama affeexxebaan. Yesuusi marartetika Anna noꞌoka Yihowwaa ifisatee laꞌoonfateeki fakkeenni, hittatta gammachchiisaakenna jajjabeessaake!

13-14. Hawaarya Pheexiroosi aadde aaga uuddaaxxa barateexxi yaane maachcho? Tenne yaane uuddaaxxa isi wele barsiiseexxi yaane maachcho? (Fakke uudi.)

¹³ Hawaarya Pheexiroosi aadde aaganna gattowwaali uuddaaxxa Yesuusinaaꞌn heddo yaane barateen. Pheexiroosi heddo balleessa hujeemmaxxa yanna, Yesuusi isiꞌaa gattowwaali hiyyeemman. Fakkeennakeꞌe, Pheexiroosi, Gootta isika sasele waakkatatenaaꞌn kexxeexxa yoꞌoshsha yaadeemman. (Mat. 26:34, 35, 69-75) Kaddomaleꞌe, Yesuusi reyotenaaꞌn keꞌeechchi uduma Pheexiroosi qofitti hedheeꞌnaa isoꞌni leelleen. (Luqa. 24:33, 34; 1 Qoro. 15:3-5) Eettene futtiiꞌni, Yesuusi aadde aageeke hawaaryaatichchiꞌaa jaalalati gattowwaali hiyyeexxanna jajjabeesseexxa mammannoxxebaan.—Marqo. 16:7

¹⁴ Pheexiroosi hedho ifixxeꞌni uudeemmaxxeꞌe, gattowwaaliinna aadde aaga uuddaaxxa welekee barsiisa dandeꞌaan. Phenxeqoosixxeki ayyaani ulfeessemeexxe shiixxooxxe barra uduma, addataꞌnebaake Ayhuudootiꞌaa haasoꞌaa shiqiseemmaxxa yanna Mesihcho shinneexxa ifiseemman. Kaddoolenna, jaalalati insaꞌnee, “tenneꞌaa cubbo haꞌnooxxi baxxaashsha aadde aagge, higge, Yihowwanaaꞌn haarooꞌmatiki bari haꞌnoꞌaa dagaan” hiyye jajjabeesseen. (Huje 3:14, 15, 17, 19) Tenne bakkaꞌni Pheexiroosi mitti aadde aagaaki cubbaaleessi manji, elobaaxxa hedino waala, elobaake oranaaꞌn higanna Yihowwaa gammachchiissaaxxa yaane assa hasissaaxxa kokeesseen. Ittan lebeexxi, Pheexiroosi, Yihowwa cubbo insaꞌnexxa mittenna gattebaangi gattowwaali hiyyaaxxa, ittan hexxeeshshanni fiye balleessaaxxa ifiseen. Heddo wogguwwa uduma, Pheexiroosi Kirsitaanakee, “Yihowwa . . . haꞌnoo osseeki, duuchchiingi aadde aagaashshate malee ayyinna baꞌoꞌaa hasa gophaammaxxeeten” hiyye kokeesseen. (2 Pheexi. 3:9) Cubbo hujeeki Kirsitaani, matanga cubbotinna jabaxxe kaddoole tasfa afeen!

15-16. (a) Hawaarya Phawuloosi gattowwaali uuddaaxxa barateeki hittate? (1 Ximootwosi 1:12-15) (b) Itti aandaaxxe qoꞌneꞌni barantaannexxi yaane maachcho?

¹⁵ Xeerseesi bogiki Saꞌooli, heddo cubbo hujeeke manjo kademmaxxee aadde aaganna gattowwaali hasissaamman. Isi Kirsitoosixxa eeyyendeexxa hordofooleeyye jaba qicinni shorraammake manjomman. Heddi Kirsitaani isoo ijjenda jijjiiremabaake manjishsha asseꞌe heda gopheebaan. Reyotenaaꞌni keꞌeeki Yesuusi, Saꞌooli jijjiiremaaxxanna aadde aagaaxxa egeꞌneemman. Isinna Anni isiki, Saꞌooli giddo eloxxi yaane hexxeexxa uundeemman. Yesuus, “isoo aniꞌaa mellemeeke miyan” hiyyeemman. (Huje 9:15) Matanga Yesuusi, Saꞌooli aadde aagaashsha gargaareeki masotiten. (Huje 7:58–8:3; 9:1-9, 17-20) Saꞌooli Kirsitaana kadeechchi uduma hawaarya Phawuloosite hiyyemeꞌe yeꞌemeen. Isi Yesuusi isiꞌaa leellisheexxa baꞌluntenna mararte saadaꞌneexxa heddo yanna haasoꞌaamman. (1 Ximootwosi 1:12-15 yaansis.) Kunni assendeexxe yaaneꞌaa galateeffataꞌneeki hawaaryaatichchi: ‘Mageni aadde aangaashsha gargaaratee woꞌlaanateꞌni hedheexxa’ barsiiseen.—Roome 2:4.

¹⁶ Phawuloosi, Qorotoosike bogaꞌn hexxemmaxxe Kirsitaaniinxe gubaꞌe giddo, shookissaaxxi saaliinxi baalagunte muxendeexxa laqeexxa yanna, tennee yaane abideeki hittatemmaꞌa? Isi tennee yaane abideemmaki, Yihowwaka jaalalatika xixichchonna mararte leellisha affeexxa laꞌo barantannoshsha assake eloke garinnitemman. Konnee yaada uuddaaxxa itti aandaaxxe qoꞌneꞌni baꞌla qicoꞌn barantannon.