Gubaꞌetenaaꞌni Fulchineeke Manjiꞌaa Kadaaka Gargaarsa

1-2. (a) Yihowwa egennaꞌninni hunjaaxxa cubbo uudaaki hittate? (b) Yihowwa cubbaaleeyye maa assitoꞌaa hasaꞌne?

YIHOWWA cubbo bashshi hiyyeꞌe waalaake Magenobaan, tenne irra cubbo gibaan. (Faaro 5:4-6) Yihowwa Qaale isixxeꞌni noꞌaa fulcheeka qullummatika seera ulfeesinonnaa hasaꞌneen. Dhugaaten, Yihowwa qullichcha kadebaake manjonaaꞌni qullumma heqqabaan. (Faaro 130:3, 4) Wele darrenaaꞌni kinni ‘Mageno sodaatabaaki manni badhaadha Mageniinkeꞌni irkiseꞌe shookibeloxxa’ hunjaaxxa yaane sammi hiyyeꞌe uudabaan. (Yihuda 4) Matanga Maxaafi Qullichchi “Mageno sodaatabaaki manni” Armaagedon hiyyemaake Mageniinke bagedinni baꞌaaxxa haasoꞌaan.—2 Pheexi. 3:7; Leellisha. 16:16.

² Kaddoolenna, Yihowwa ayyinna baꞌoꞌaa hasaꞌnebaan. Edinseꞌe weli duuka shiqqeexxe barachchoꞌni uundennashshanni, Maxaafi Qullichchi Yihowwa ‘duuchchiingi aadde aagoꞌaa hasaꞌneexxa’ ifisaan. (2 Pheexi. 3:9) Gubaꞌetixxi geedhe cubbo hujeeki manji cubbotike oranaaꞌni higaashshanna Yihowwabaa shiqaashsha ossunteti gargaarati, Yihowwaka fakkeenna hordoffaan. Kaddomaleꞌe, cubbo hujeeki manji duuchchi aadde aagatee fedhiitike kadaan hiyyotebaan. (Isa. 6:9) Geedhe aadde aangaashsha higge-higgeen woꞌlaandaꞌneexxenna kaddoole mitti mitti manni cubbotike oraꞌni meꞌa ittin ediꞌaa sufeen. Iitta hexxeexxi yaane kaddaa wodda geedhe maa assa hasissa?

“FUGGICHCHA MANJO ODDO HAꞌNOOXXENAAꞌNI FULCHE”

3. (a) Maxaafi Qullichchi aadde aagabaa manjo maa assa hasissaaxxa haasoꞌa? (b) Mitti manji aadde aaga gibaa wodda ‘gubaꞌetenaaꞌni isoo fulchinaashsha ifiꞌaanni melledheꞌeen’ hiyya dandeennannoki mayeete?

³ Mitti manji aadde aaga gibaa wodda geedhe wele assitaaxxi yaane hedha gophpheemmaxxeꞌe, 1 Qorontoosi 5:13 keꞌni hedheeka: “Fuggichcha manjo oddo haꞌnooxxenaaꞌni fulche” hiyyaꞌneeka seera hordoffaan. Tennenaaꞌni kexxeexxa, cubbo hujeeki manjichchi, ‘isinni rolkeexxe yaanexxa gumma haaꞌmatee melledheꞌeen’ hiyya dandeesissaan. (Gela. 6:7) Iitta hinaanneki mayeete? Buutotinna geedhe isi aadde aagaashsha gargaaratee higge-higgeen assitaꞌneexxa yaane gibeemmaxxeeten. (2 Neg. 17:12-15) Isi assaꞌneexxe yaanenni Yihowwake seeriꞌaa ajajematee hasaꞌnebaaxxa leellisheen.—Zeda. 30:19, 20.

4. Cubbo hujeeka manjo gubaꞌetenaaꞌni fulchinaa wodda egeꞌnishanji kulemaꞌneeki mayeete?

⁴ Cubbo hujeꞌe aadde aaga gibeeka manjo gubaꞌetenaaꞌni fulchinaa wodda ikki manji konneechchinni udumiꞌaa, Yihowwaxxe Naqaashe kadebaaxxa gubaꞌe egendaashsha egeꞌnishanji kulemaan.a Egeꞌnishanji kulemaꞌneeki cubbo hujeeka manjo salphisateetebaan. Tenne irra egeꞌnishanji kulemaꞌneeki, gubaꞌe Maxaafi Qullichchi ‘isinni welti jaaloondinoqe,’ ittan isinni ‘welti sagalenda midde ittinoqqe’ hiyyeeka seera heqqexxaashshaten. (1 Qoro. 5:9-11) Tinni akeette uuwwendeexxi eloxxi buuto hexxeen. Hawaarya Phawuloosi: “Shiixxooxxi irsho lixe duuchcha bukeesitaan” hiyyeꞌe borreesseen. (1 Qoro. 5:6) Cubbo hujeꞌe aadde aagaabaa manji, Yihowwake qullichchi seerixxe hundaayyeshsha hedhatee woꞌlaancho assaꞌneeke manjixxi shenunte, qiiddaꞌni meetaashsha assaa dandeꞌaan.—Fakke. 13:20; 1 Qoro. 15:33.

5. Gubaꞌetenaaꞌni fulchineeka mitte manjo uuda hasissaaki hittate? Mayee?

⁵ Gubaꞌetenaaꞌni fulchineeka mitte addetika jaalo uuda hasissaaki hittate? Konne manjinni jaalooma gonphonnolenna isoo uuda hasissaaki baꞌeeke gedhechchishshate malee baxxe gatteexxe yaaneshshatebaan. Hori giddiiꞌni milqeeki mitti gedhechchi higa dandeꞌaan. Kunni baꞌeeki gedhechchi, ifi Yihowwaa mudhdheeke kadeexxa qalli hiyye. Yaadissaaxxa kunni manji Yihowwaa addatemeꞌe hedhatee aageemmaxxa kako taꞌixxe yannaꞌni heqqedheebaan, tinninna rakkoteꞌni ibaashsha assitaan. (Hizi. 18:31) Kaddoolenna Yihowwaxxi mararte hexxee qicoꞌni kunni manji hegatika tasfa afeen. Geedhe cubbo hujeꞌe gubaꞌetenaaꞌni fulchineeki manji tasfa afeexxa leellishaaki hittate?

GUBAꞌETENAAꞌNI FULCHINEEKA MANJO GEEDHE GARGAARTAAKI HITTATE?

6. Geedhe gubaꞌetenaaꞌni fulchineeka manjo gargaaratee maa assita?

⁶ Mitte manjo gubaꞌetenaaꞌni fulchinaa wodda, ikki manji ifiꞌaanni Yihowwabaa higaashsha geedhe sammi hitee waaldaa? Waawwot! Cubbo hujeeka manjo gubaꞌetenaaꞌni fulchineexxa kullaa wodda geedhetixxi komite ikki manji gubaꞌetibaa higatee maa assa hasissaaxxa kuldaan. Kaddomaleꞌe, geedhe wele assitaaxxi yaanenna hexxeen. Heddo yanna geedhe kunni cubbo hujeeki manji qalbeti jijjiremeexxa uudatee heenooke agenjuwwi uduma higgeen isinni afendaaxxa kuldaan. Kunni manji higgeeni insaꞌnenni bukki hiyyatee fedhiitike kadoole, aadde aagaashshanna higaashsha jajjabeessitaan. Ettene yannaꞌni kunni manji, qalbetixxa jijjiirra afa gophoole ediꞌaa isinni afema ittin suffaan.

7. Geedhe gubaꞌetenaaꞌni fulchiteeka manjo haasoositaa wodda Yihowwaxxixxa mararte leellishshaaki hittate? (Erimiyaasi 3:12)

⁷ Geedhe gubaꞌetenaaꞌni fulchiteeka mitte manjo haasoositaa wodda Yihowwaxxixxa mararte leellishatee woꞌlaandaan. Fakkeennakeꞌe, Yihowwa jallichcha kadeeki qariki Israꞌelooti isike gargaarsi belonni aadde aagatee tarkaaffe adhaa qicoꞌni heqqaammabaan. Tenne irra, aadde aanga hansaꞌneexxa leellishaaka hoone beesisa uudebaangi ediseen insaꞌnee gargaaraamman. Tenne maxxansoꞌni langaxxe qoꞌneꞌni uundeennashshanni, Yihowwa mararte isixxa bararsiisatee wabeekkichchi hooseꞌi, cubbo hujandeꞌni hexxeexxe manjichcho isixxinni higgeen araaremaashsha ajajeemman. (Hose. 3:1; Milki. 3:7) Yihowwaa fakkaatati gubaꞌetixxi geedhenna gubaꞌetenaaꞌni fulchineeki manji higaashsha qalbe mitten hassaan, ittan Yihowwabaa higa okkone manjoꞌni haꞌurtaashsha assitabaan.—Erimiyaasi 3:12 yaansis.

8. Yesuusi haasoꞌeemmaki baꞌeemmake beltiki fakkeenni, Yihowwaxxa marartenna gattowaalii adda caꞌa asse leellishaaki hittate? (Luqqaasi 15:7)

⁸ Tenne maxxansoꞌni langaxxe qoꞌneꞌni baranteennaka, Yesuusi haasoꞌeemmaka baꞌeemmake beltika fakkeenna qalli hiyyi. Anni kunni belti isiki miniꞌaa higaaꞌnaa bayyiiꞌninni uudeexxi, “gongaꞌni mareexxi goobakeꞌn marxemeꞌe sunqedheen.” (Luqa. 15:20) Anni kunni, belti isiki isoo gattowaalii qoraa qicoꞌni heqqebaaxxa hubatte. Tenne irra, beltokee afeexxe jaalalanaaꞌni kexxeexxa beltiinbaa gongeeki annaken. Geedhetinna gubaꞌe giddiiꞌni baꞌeeke manjiꞌaa, iitta hexxeexxa hedino affeexxa leellishatee woꞌlaandaan. Insaꞌne baꞌeeki gedhebi ‘minaa higaashsha hansaꞌneen.’ (Luqa. 15:22-24, 32) Mitti cubbichchi higaa wodda iimateꞌni gammashsho kaddammashshanni buttateꞌninna kaddaan!—Luqqaasi 15:7 yaansis.

9. Yihowwa cubbaaleeyye maa assitaashsha jajjabeessaꞌne?

⁹ Konne qicoꞌni Yihowwa cubbo hujeꞌe aadde aagatee hasabaaki manji, gubaꞌe giddo hedhaashsha bashshi hiyye waalaꞌnebaaxxa baranteennen. Kaddomaleꞌe, isi cubbo hujeeke mannaꞌni dudduro wirri assabaan. Isi hasaꞌneeki insaꞌne isibaa hingoꞌaaten. Yihowwa aadde aaggeexxe cubbaaleeyyeꞌaa afeexxi hedino Hooseꞌi 14:4 keꞌni ifisendeen: “Addatema gopha insaꞌnexxa fayyisannon. Feedhi ifixxinni insaꞌnee eeyyannon, buutotinna mufe anxi isonaaꞌni higgeꞌeen.” Kunni mitti manji aadde aagatee hasaꞌneexxa leellishaake hoone beesisiꞌaanna geedhe miꞌlachcho uutaashsha tirtirsaake jabake yaadan. Ittan Yihowwaa waaleeki manni turebaangi isibaa higaashsha tirtirsaaken.

10-11. Geedhe gubaꞌetenaaꞌni fulchineeꞌnaa tureeka manjo gargaaratee woꞌlaancho assitaaki hittate?

¹⁰ Edo gubaꞌetenaaꞌni fulchineeka yookiin fulchineexxinni qeerraaxxi wogga saxxeeka manna uuddaaxxa maa hiyya dandeesissa? Kunni manni gubaꞌetenaaꞌni insaꞌnee fulchinaashsha assiteemmaxxa cubbo taꞌi qicoꞌni hujateꞌni hedhabaaxxinna hexxaan. Mitte mitte buutonaaꞌni kexxeexxa insaꞌnee mayee fulchineemmanxa deenaaxxinna hexxaan. Kunne manna gubaꞌetenaaꞌni fulchineexxinni heddo wogganna tureeke kadoole, geedhe hasateenna mare qoratee woꞌlaancho assitaan. Geedhe marte qortaaxxa yanna isinni welti kadhantaan, ittan gubaꞌetibaa higaashsha jajjabeessitaan. Gubaꞌtenaaꞌni fulchineeꞌnaa qeerraaxxa wogga tureeki mitti manji manfasiinxe hedhonni haranga gophaaxxi egeꞌnedeexxen. Tenneꞌaa kunni manji gubaꞌetibaa higatee hasaꞌneexxa leellisheexxe kaddoole, higeꞌe Yihowwaxxe Naqaashe kadebaa edi darre, geedhe mitti manji isoo Maxaafa Qullichcha barsiisaashsha qophpheessitaan. Maxaafa Qullichcha barsiisaaka manjo qophpheesitaaxxi geedheten.

¹¹ Geedhe mararteti Yihowwaa fakkaatati, dandeesissee qicoꞌni heddi manni higaashsha hula banendeꞌe hexxeexxa egeꞌnaashsha gargaaratee hansaꞌneen. Mitti cubbo hujeeki manji aadde aageexxanna elobaaxxa yaane huja waaleexxa leellishaa wodda turbaangi gubaꞌetibaa higa dandeꞌaan.—2 Qoro. 2:6-8.

12. (a) Geedhe giddiiꞌninni xexxeꞌata hasissaaki hoone jeejuwwa? (b) Mitti mitti cubbo hujeeki manni Yihowwaxxa mararte alfabaan hiyyeꞌe heda hasissaꞌnebaaki mayeete? (Lekkatibaꞌika qallassanjo uudi.)

¹² Geedhe mitti manji gubaꞌetibaa higaashsha assitebaa edi darre, haranga xexxeꞌata hasissaaki mitti mitti jeejuwwi hedheen. Fakkeennakeꞌe, mitti manji ooseteꞌni miidhdhama geesisoole, waakkatichcha kadoole yookiin bulii diigatee diina ganeemmake kadoole, geedhe kunni manji dhugaandinni aadde aageexxa koka hasissaan. (Milki. 2:14; 2 Ximo. 3:6) Insaꞌne Mageniinka gedhebo fuggoxxe yaanenaaꞌni heqqa hasissaan. Wele darrenaaꞌni kinni, dhugaati aadde aageexxa leellisheekanna elobaaxxa yaane assa waaleeka, heene cubbonna hujeeka manjo Yihowwa higgeen adhdhaaxxa noꞌo addata hasissaan. Geedhe sobiki manjo miidheeka manjo xexxeꞌata hasissaaxxe kaddoolenna iitta hexxeexxa cubbo hujeeke manjiꞌaa, Yihowwaxxxi gattowaalii ijjenda hasissabaan hitaa qicoꞌni geya hasissabaan.b—1 Pheexi. 2:10.

GUBAꞌE MAA ASSA DANDEETTA?

13. Xixichchi uwwemeeka manjonna gubaꞌetenaaꞌni fulchineeka manjo abidaanneke garaꞌni hexxeexxi gargarunte maachcho?

¹³ Saxxeexxe qoꞌneꞌni uundeennashshan, mitte mitte wodda mitte manjiꞌaa xixichchi uwwemeexxa egeꞌnishanji kulemaa wodda ikki manji aadde aageexxanna elobaaxxa yaane huja waaleexxa egenneennaxxee, isinni welti jaalooma ittin sunfannon. (1 Ximo. 5:20) Isi taꞌanna gubaꞌetixxe una kademmaxxee eloxxa yaane assa ittin ediꞌaa sufaashsha addetike jaaluwwiki kiphi hasisaan. (Ibra. 10:24, 25) Kaddomaleꞌe, gubaꞌetenaaꞌni fulchineeka manjo abindanno gari, konnenaaꞌni gargariti hedheeken. Konne manjinni ‘Jaaloomanda waalannon,’ ittan ‘sagalenda midde isinni welti indabeꞌnon.’—1 Qoro. 5:11.

14. Gubaꞌetenaaꞌni fulchineeka manjo abindaa qico uuddaaxxa, Kirsitaani Maxaafi Qullichchiki leenjisemeeka wodana ifika laꞌoonfata dandeꞌaaki hittate? (Fakke uudi.)

¹⁴ 1 Qorontoosi 5:11 keꞌni hedheeki yaadi, gubaꞌetenaaꞌni fulchineeka manjo lagantannoshsha ifisaake? Waawwot. Isinni jaaloommabeꞌnoxxi egeꞌnedeexxen. Kaddomaleꞌe, Kirsitaani hado ifika yookiin shiqike jaalo kadeemmaka gubaꞌetenaaꞌni fulchineeka manjo, bukkii dagaashsha jajjabeessatee yookiin jajjabeessa gophateꞌe, Maxaafi Qullichchiki leenjisemeeka wodana ifika laꞌoonfata dandeꞌaan. Iitta hedheeki manji bukkii dagaa wodda maa assinanno? Edo iitta hedheeka manjo nageꞌa aaꞌnaannabaan. Kaddomaleꞌe, duuchchiingi Kirsitaani Maxaafi Qullichchiki leenjisemeeka wodana ifika laꞌoonfata hasissaan. Mitti mitti manji iitta hedheeka manjo nageꞌa aadhatee yookiin ‘baga nageꞌiki daggetten’ hiyyatee hasaaxxi hexxaan. Kaddomaleꞌe, konne manjinni qeerraaka haasoꞌa haasoonnaaꞌnon yookiin jaaloommaaꞌnon.

15. 2 Yohaannisi 9-11 kulemeeki, hitta hexxeexxa cubbo hujeeke manjo? (“Yohaannisinna Phawuloosi Ifinseexxi Cubbo Weli Fakkaattaaxxee?” hitaꞌneexxa kollo uudi)

¹⁵ Mitti mitti manji ‘Maxaafi Qullichchi iitta hedheeka manjo nageꞌa aadhaaki Kirsitaani fuggoxxa huje isixxa kiphaan hiyyaꞌnebaa?’ hiyye qoraaxxi hexxaan. (2 Yohaannisi 9-11 yaansis.) Tenne xiqseke qarqaraꞌni hedheeki yaadi waakkatooleeyyenna welinna elobaaxxa yaane hujaashsha jajjabeessaꞌneeka manna ifisaaken. (Leellisha. 2:20) Tenneꞌaa mitti manji waakkatooleeyyetixxa barachcho barsiisaꞌni meꞌaꞌnoole yookiin wele fuggoxxa yaane baꞌlisaꞌni meꞌaꞌnoole geedhe iitta hedheeka manjo mare qoratee progiraama fulchitabaan. Dhugaaten, kunni manji qalbeeffateꞌe aadde aagaaki tasfi hedheen. Okkone qicoꞌni iitta hedheeka manjo nageꞌa aaꞌnaaꞌnon yookiin gubaꞌe dagaashsha yeꞌnaaꞌnon.

MARARTETINNA GATTOWWAALIITI YIHOWWAA FAKKAATA

16-17. (a) Yihowwa cubbaaleeyye assitoꞌaa hasaꞌneexxi yaane maachcho? (Hiziqeli 18:32) (b) Geedhe cubbo hujeeka manjo gargaaratee woꞌlaandaa wodda Yihowwan welti hujjaꞌneexxa leellisha dandeettaaki hittate?

¹⁶ Tenne weli duuka shiqqeexxe onde barachchuwwanaaꞌni baranteennexxi yaane maachcho? Yihowwa ayyinna baꞌoꞌaa hasaꞌnebaan! (Hiziqeli 18:32 yaansis.) Isi cubbaaleeyye isinni welti araarendoꞌaa hasaꞌneen. (2 Qoro. 5:20) Yihowwa isoo waaldeemmaxxi ergantooleeyye isixxi aadde aaggaashshanna isibaa higgaashsha higge-higgeen jajjabeessaammaki tenneꞌaaten. Gubaꞌetixxi geedhe cubbo hujeeki manji aadde aagaashsha gargaarati, Yihowwanni welti hujatixxa lumoxxa baalle affeen.—Roome 2:4; 1 Qoro. 3:9.

¹⁷ Cubbaaleeyye aadde aaggaa wodda iimateꞌni kaddaaxxa gammashsho hedi! Iimatiki Anni noꞌoki Yihowwa mitti baꞌeeki gedhechchi gubaꞌetibaa higaaxxa yanna duuchcha gammadaꞌneen. Yihowwaxxe mararteꞌn, gattowaaliꞌninna noꞌaa hasissaan hinbeꞌnoxxe baꞌlunte isixxeꞌni alalchinennexxe qixxeꞌni, isiꞌaa anfeennexxi jaalala jabaattaꞌni metaan.—Luqa. 1:78.